1st. Wednesday: Pasalṭha Zampuimanga chanchin ziahna Lehkhabu, C.Lalaudinga buatsaih chu Finance Minister Lalsawta’n Chanmari YMA Hall-ah a tlangzarh. Zampuimanga hi Zampui, Tripura-ah kum 1801 velah a piang a, kum 1820 velah Hualngohmunah awm ṭanin, kum 1825 velah Lalsavunga khua Aizawlah a awm ṭan a ni.
2nd. Thursday: Isua Krista Kohhran general headquarters executive secretary-te chuan mawhphurhna an inhlan. Mawhphurhna inhlanna inkhawm hi IKK Assembly chairman Upa Lalremliana’n a kaihruai a; Rev. Lalthuamliana chu senior executive secretary atan lak luh a ni a, Rev. V.Lalnghaksanga chu executive eecretary atan lak luh a ni bawk.
3rd. Friday: Mizote kût pui ber, Chapchar Kût chu Mizoram hmun hrang hrangah hlim taka hman a ni a, Aizawlah chuan Lammualah hman niin, Mizoram mipui bakah, Myanmar, Bangladesh, Tripura, Manipur leh Meghalaya aṭangin Zo hnahthlak eng emaw zat an rawn tel. Lammuala Chapchar Kût hmannaah hian Art & Culture minister R.Romawia chu Kût Thlengtu a ni a, Chief Minister chu Kût Pa a ni.
4th. Saturday: C.Zonunmawia (19), Bawngkawn North chu an chenna inah a pa C.Malsawma (56) chuan a kâp hlum.
5th. Sunday: KṬP General Confe¬rence awm loh kuma neih ṭhin, KTP Rorel Inkhawm vawi 7-na, Bawngkawn Kohhran biak ina Zirtawpni zana ṭan chu a ṭiak.Kum 2019-a rorel inkhawm neihna atan Tuikual North Kohhran biak in an thlang a, kum 2017-18 kumpuan thupui atan ‘Khawvel mamawh Isua Krista’ (Phil 3:20) thlan a ni. Kum 2017-18 budget atan Rs. 59,68,000/- an pawm. KṬP-ah hian December 31, 2016 thleng khan pas¬tor bial 199-ah branch 844 a awm a, member mipa 90,505 leh hmeichhia 54,415, an vaiin mi 1,44,920 an awm. Pastor bial 11, branch 44 leh mem¬ber 3,772 chu Mizoram pawna mi an ni.
6th. Monday: Zawngling khuaa ECM khawmpuia kalte chuanna Bolero leh i10 car chu Theiva khaw daiah an chesual a, Bolero-a chuang dri¬ver leh motor neitu Zoramthanga (44) leh C.Rimawia (55), Zero khua, Siaha district ve vete a hmunah an thi nghal. Bolero leh i10 car-te hi an inzui a, Bolero hi tlan liam hmasain, i10 car hi a tlan liam ve zui nghal a ni. i10 car-a chuang leh a neitu Priscila chu helicopter hmanga Aizawl panpui niin, Bolero-a chuang pakhat chu Lunglei lamah thawn a ni a, hliam dang pathum chu Lawngtlaia ECM dam¬dawi-inah dah an ni.
7th. Tuesday: Indian Master (Veteran) National Badminton Championship vawi 41-na Cochin, Kerela-a neih zawh takah Ralliantawna chuan 70+ mens singles inelnaah gold a la.Mizoram tan hian 65+ mens singles-ah Zokima’n chuan silver lain Vanhmingthangi leh Zodinsangi te ṭangdun chuan 45+ womens doubles-ah silver an la ve bawkin Lalthanzuala pawhin 50+ mens singles bronze a la bawk.
8th. Wednesday: Hmeichhiate ni, International Women’s Day a ni a, Aizawl leh khaw dang ṭhenkhatah hman a ni. International Women’s Day hi Aizawlah chuan All Mizoram Women Federation, Mizoram University-a Department of Public Administration hnuaia Women’s Studies Centre leh Control Arms Foundation of India huaihawtin MZU Auditorium-ah hman a ni a, minister of state C.Ngunlianchunga’n a hmanpui.Thupui chu ‘Be bold for change’ tih a ni. He ni hi um 1908 khan New York, USA-ah hmeichhiate’n an hnathawhnaah mipate hlawh ang an lak ve phak loh vanga lungawi lohna lantirin bul an ṭan a ni.
9th. Thursday: Zoram Entu Pawl (ZEP) leh Chhingchhip damdawinin (PHC) ṭangkawp chuan nau paite pualin St. Peter’s Dispensary, Chhingchhipah Prashan Mantri Surakshit Mantritva Abhiyan (PMSMA) orientation camp an buatsaih a, nau paite a thlawnin an endik. He hunah hian nau pai mi 13 leh naupang kum khat hnuai lam mi 30 vel an inentir a ni.
10th. Friday: Miss Mizoram 2017 MZU Multipurpose Hall-ah Grand Finale neih a nia, Rody H. Vanlalhriatpuii (24) d/o H. Thangchianga, Lawngtlai nula chu Miss Mizoram atan thlan a ni. Miss India, Priyadarshini Chatterjee uapna hnuaiah Grand Finale hi neih a ni a, Miss Mizoram 2017 hi Priyadarshini Chatterjee hian lallukhum, Crown a khumtir.Miss Mizoram hian tangka faiin Rs. 110,000/- a dawng a, hei bakah hian a thlawna Bangkok leh Rajasthan zin theih na te a dawng tel. Hei bakah hian CK Cars Vespa Dealer, Bawngkawn aṭangin Vespa S 125cc Scooter a dawng a, Longi Industries Ambassador nihna pek a ni. Vivo C5 phone te, Mitashi Semi Automa¬tic Washing Machine a dawng a, thla ruk chhung atan Magnis Health Club Mem¬ber nihna pek a ni bawk.
11th. Saturday: Mizoram Quarry Oweners Association (MQOA)-te chuan lung man hetiang hian an siam thar: Cubic metre khat zelah – lung balu (stone dust) Rs. 800/-, rawra Rs. 1,600/- (rate hmasa Rs. 1,400/-), cubic lung Rs. 35/- (rate hlui Rs. 24/-), boulder class-I Rs. 700/- leh boulder class-II Rs. 600/- te a ni.
12th. Sunday: Presbyterian Kohhran Hmeichhe Inkhawmpui Lian vawi 47-na, March 10, 2017-a Serchhip a ṭan chu a ṭiak. Inkhawmpui hian Mizoram pum huapa faina leh thianghlimna lama inzirtirna kalpui an rél. Inkhawmpuiah hian Upa C.Ngurthantluanga, Khatla chu speaker a ni. Mizoram Synod hnuaia pastor bial 197-ah Koh¬hran Hmeichhia 818 awmin, member 1,72,655 an awm.
13th. Monday: Mizoram sorkarin zu a lak luhte ṭha lo leh intlak loh a nih thu social media-a thehdarhtute – Khawlhmunsiama (Facebook profile – Gemini Khawlhring), Ramhlun North leh Lalthantluanga (Facebook profile – LT Hmar), Ṭhiak khuate chu police-in an man. Khawlhmunsiama leh Lalthantluanga te hian Facebook-ah sorkar zu lak luh a ṭhat loh thu an thehdarh thu police hmaah an puang a, Court remtihnain jail-ah dah an ni.
14th. Tuesday: Mizoram Legislative Assembly budget session chu ṭan a ni. Thu sawitu, Governor Lt.Gen. Nirbhay Sharma chuan, Mizoram sorkarin kawng hrang hranga mipuite hmasawnna atana hmalak a intiamna a la vawn nun reng thu a sawi. Governor-in thu a sawi zawhah INC member Lalrobiaka’n Governor thusawi vanga lawmthu sawina tur motion a pu lut a, INC member vêk John Siamkunga’n a thlawp.
15th. Wednesday: Mizoram Consumer Union (MCU) leh Govt. Aizawl College (GAC)-a Consumer Club-te chuan GAC hall-ah World Consumer Rights Day an hmang a; Information & Communication Technology department secretary C.Lalhmachhuana khuallian a ni.Inkhawmah hian National Informatic Centre-a system analyst HC Rochungnunga chu resource person niin, World Consumer Rights Day thupui ‘Consumer rights in the digital age’ tih a sawifiah.
16th. Thursday: India rama Postal department-a thawkte intelkhawmna pawl, All India Postal Employers Union (AIPEU) chuan ram pum¬ah, 7th. Pay an hman dana lungawi loh vang te, hna ruak hnawhkhah chungchang te, hun rei tak a nghet loa thawk tawhte dah ngheh te, Post Office mimal kuta dah duh lohna avang te in lungawi lohna an lantir a; AIPEU Mizoram Divisional Branch pawhin zawm vein, Mizorama post office-te khâr a ni.
17th. Friday: Mualpuia 3rd. Battalion MAP parade ground sira tribal girls hostel sak thar, ‘Police Centre’ tia vuah chu parliamentary secretary (Social Welfare) K.Lal¬rinthanga’n a hawng.He building hi Mizoram Football Association leh Tata Trusts nen ṭangkawpin Centre of Excellence hostel atan an hmang dawn ani.
18th. Saturday: Aizawl Tennis Court chei thar, semi indoor stadium chu Sports & Youth Services minister Zodintluanga’n a hawng. Aizawl Tennis Court semi indoor stadium sakna atan Special Plan Assistance aṭangin cheng nuai 100.80/- hmuh a ni a, May 2015-ah siam ṭan niin, October 12, 2016-ah zawh a ni. Stadium hi a dung metre 37 leh a vâng metre 18.70 niin, a zau zawng chu square metre 691.9 a ni a; a chung atan dyna roof hman niin, a chhuat atan rubberised synthetic fibre hman a ni a, zana inkhelh theih turin lighting system ṭha tak vuah a ni bawk.
19th. Sunday: Miss Mizoram Rody H Vanlalhriatpuii chu FBB Femina Miss India-a Mizoram aiawh turin a tling. Gauhati Big Bazaar-a Northeast audition neihah nula 100 chuang an inlan a, hetah hian self-introduction, ramp walk leh question and answer hmanga audition an neih hnuin, Miss Mizoram 2017, Rody H.Vanlalhraitpuii hi Mumbai-a Miss India final-a inlan turin thlan a ni. Miss India hi kum 54 chhung kalpui a ni tawh a, a neitu chu Times of India Group a ni. Kuminah hian sponsor turin FBB lo lutin FBB Femina Miss India tih a ni. India ram hmun hrang hrangah audition round hi neih a ni a, Rody hi Guwahati lamah Northeast audition neiin a tling ta a ni – Mizo zinga Miss India Final-a tling hi an la awm ngai lo. Miss India thlanna hi June-ah Mumbai-ah neih a ni ang.
20th. Monday: Zoram Entu Pawl (ZEP) leh Ferrando Women Development Centre (FIWDC-Peace Home)-te chuan ‘Issues of Persons with Disabilities’ tih thupui sawihona hun an buatsaih.Kum 2011 chhiar¬pui ang chuan Mizoramah rualbanlo mi 15,160 an awm a, Mizoram mihring zat aṭanga chhûtin 1.3% an ni.
21st. Tuesday: World Forestry Day a ni. He ni pual hian chief minister Lal Thanhawla chuan thuchah a tichhuak a; kumina Day thupui chu ‘Forest and Energy’ tih a nih thu sawiin, “He thupui hian mihringte energy min petu pawimawh ber chu ramngaw a ni tih min zirtir a tum a ni,” a ti.Tun dinhmuna khawvelin ramngaw ṭha a neih zawng zawng hmun thuma ṭhena hmun hnih vel chu Canada, Russia, Brazil, USA, Congo, Australia, Indonesia, China, Peru leh India ramah a awm a ni.
22nd. Wednesday: Disaster Management & Rehabilitation department chuan J.Thankima College-ah chhiatna laka invenhim dan tur leh chhiatna a thlena chhanchhuah hna thawh dan tur a taka entirna, Mock Exercise an buatsaih.
23rd. Thursday: MNF policy thar, Socio Economic Development Programme (SEDP) chu Vanapa Hall-ah MNF president Zoramthanga’n a tlangzarh. Zoramthanga chuan, sorkarna an chan chuan SEDP hnuaiah chhung tinte eizawnna ngêlnghet an neih thleng chhawmdawlna leh ṭanpuina pek an nih dawn thu a sawi.Inkhawm hi MNF sr. vice president Tawnluia’n a kaihruai a, SEDP Drafting Committee chairman Dr R.Lalthangliana chuan, SEDP-ah economic chauh ni loin, mihringin a mamawh zawng zawnga hma an sawn theihna tur ruahmanna siam a nih thu a sawi.
24th. Friday: Mizoram sorkar chuan secretary-te hna chanpual a sîksawi a, chief secretary Lalmalsawma chuan Home, DPAR, Vigilance leh Political & Cabinet a chang dawn.
25th. Saturday: Salvation Army ṭhalai, Saitual area-a mite chuan SA centenary pualin Saitualah Aizawl Civil Hospital tan thisen unit 60 an pe a, a petute mipa 48 leh hmeichhia 12 an ni.
26th. Sunday: Synod Moderator Rev. Lalzuithanga chuan chawhma leh chawhnuah N. Khawdungsei Kohhran leh zanah – Sakawrdai Kohhranah te hun a hmang.
27th. Monday: Aizawla Vishal Mega¬mart hawn tur duh loh lantirna atana MIMA-in Aizawla dawr zawng zawng khâr tura an ngen angin Aizawla dawr tam zawk a inkhâr a, dawrkai ten an thlawp tha a hriat a nihg avangin chhun dar 12:30 velah dawr khâr tura an tih chu MIMA chuan an titawp. Hetianga MIMA in an tih nachhan chu sumdawnnaa Mizote chîmralna tura an ngaih vang a ni.
28th. Tuesday: Serchhip District Legal Services Authority chuan Thenzawlah dan leh hrai lama harsatna nei, puih ngaite puihna leh dan inzirtirna hmun, Village Legal Care & Support Centre (VLCSC) an hawng. VLCSC hi Thenzawl West V/C House-ah dah a ni a, Nilainiah chawhma dar 10 aṭanga chawhnu dar 2 thleng hawn ṭhin a ni dawn.
29th. Wednesday: Chief Minister’s Office (CMO) leh bangla luhna gate bula chaw nghei, CSS hnuaia Hindi zirtirtute chuan CM bangla an luhchilh a, bangla páwnah an pungkhawm.
30th. Thursday: March 14, 2017-a ṭan Mizoram Assembly budget session chu a ṭiak. Kum 2017-18 atana Mizoram budget cheng vbc. 8803.10/- pass a ni a; Chief minister Lal Thanhawla chuan, House-a thusawite lo dawnsawn dan thiam ni se a duh thu a sawi. Tun ṭum session chhung hian House-a chhan chi zawhna (starred question) 427 lutin, 400 pawm a ni a, House-ah zawhna 89 chhan hman niin, zawhna 154 chu unstarred question-ah leh a ni. Ziaka chhan chi zawhna (unstarred) 77 a lut a, 71 pawm niin paruk hnâwl a ni.
31st. Friday: Lai Autonomous District Council (LADC) chuan hun eng emaw chen chief executive member (CEM) an neih loh hnuah, CEM atan T.Zakunga chu Lawngtlai DC Dr A Muthamma-a’n LADC Hall-ah rinawmna thu tiamtirin a la lut.T.Zakunga hian executive member atan mi pali a ruat nghal.
Similar Posts:
- I’m a victim of racism in India: Mizoram CM
- Mizo CM meets Patil on expediting BNLF accord implementation
- Orissa ringtute tawrhpuina kawngzawh
- Mizoram leh Council Panga te
- Mizo hnam zingah Gangte telh an ni ve ta
June 17th, 2017 at 12:37 pm
April leh May thla a awm talo tlat mai, a khawharthlak hle mai.
Report this comment
June 22nd, 2017 at 11:42 am
A thla thin e.
Report this comment