PI ZIRI A CHING EM NI?

August 15th, 2017 3:07 pm by Lersia

Mikhual hmeichhe hmeltha tak mai pakhat hi khaw pakhat ah a zin a; chumi khua ah chuan mirethei tak chhungkaw in ah a thleng a. “Chhungkaw rual tak, zah kâi, thlah ropui tak, mi chhungkaw awh rawn, mifate entawn, mi pate enthlak in nih theih nan min nei ula, min pâwl u la ka rai ang a, fa ka hrin sak ang che u… Tun chin ah rual awt reng reng a in awm a ngai tawh lovang, a hming pawh ka neisa thlapa District-a tih hi Lalpa min pek a ni” a ti a…. An va lawm teh lul em, kut bên hnan in Pathian hnen ah hial lawmthu an sawi a!!!

Chu hmeichhia chu a hmel en in zûnzam in a bawh khat tlat a, a pian lah chithlah nana itawm hliah hliah a ni, a mizia lah kutdawh tluka in ngaitlawm, lalfanu anga zahawm a ni. Mitilreh leh Pastor zahmawh thlenga kaitho thei khawpa ît awm, zei bawksi, thilphal, tawngkam thlum khat tlat a ni.

Chawngvung-i man lêt lawih a man a nih laiin, chhungkaw hmakhaw ngaih avangin an engkim thapin, neih thing lung khawng dawt dawt sengin an nei ta a. A mah ah chuan an hmakhaw hun an dahkham tak meuh meuh a ni. Nula sang tamtak hmeltha tak tak neih tur an tam laiin, Fapa ropui pek a intiam tlat avangi neih an tumruh tlat a, amah ah “zawng zawngin” an innghat ta meuh meuh a ni. Kum tamtak chhung atan an rinawm tlat a, an nei ta rêng a!!!

Mahse, an han nei ta cheng a, beisei a lo ang lo hle mai!!! Mo fel hmeltha anga a luh achin ah Rorelnate, thuneihnate, thiltihtheihna te a rawn chhawm a, hun a lo kal deuh a, chhungpuinû chan chang tura beisei khan, nu hrawn zia a rawn pu ta a!!! Ancheh, biak har, induh, vîn si, sual si ah a lo chhuak ta a. Chhungkaw fai rel bêl awmna hai khawpin chhungkua a hre chiang lova. Êk in kawng thlawh fai chu sawi loh, kawng tla bal, tuiin a hawrh leh biboh zawng zawng pawh a hai der lui tlat tawh!!!

Chhungkaw tan thahnem ngaih a hnekin an thenawm Pu Hawla zûn ah a uâi ru tlat a. A pasal fanau te aiin Pu Hâwla a hlau a, a palsal fanaute dikna humhalh turin Pu Hawla pawh a hau ngam talo. A chuungkaw din tan chuan thahnem pakhat mahin a ngai ta lo. A thlauhthla der a ni!!!

A intiamna te chu dawt mai dawt mai, a ching chu a ni chiah lo. A râi thei lo a ni!!! Khum laizawl ah a dawrh a, Pa ber hoin, tilmu nei zawng zawngin an bawh rawn luai luai a, râi a hnehin a ruak reng a, position chi hrang hrang a an beih rawn pawhin râi ni rêng a nei lo. Rai tum awm ang takin a lang a; a nuamti leh a râk ring ring ah a tang fova, a rai loh nachhan ah a chhungte zawk chu a puh lêt hleuh tawh!!! In zei lo, in neite a niang, a tih dan in hre lo, a tihna lai tak tur ah tak in ti lo a niang, rai ka tum teh lul nen a ti zuah zuah bâng lo!!!

Nimahsela, thudik thup theih a ni tawh lo. Thenawmpa Pu Hawla nen inthurualin indanna damdawi chhum lo chat lovin, zing leh tlai ah an lo in pe ngat ngat chu a lo ni zawk!!! A chhungte aia a thlan lakah chuan a lo rinawm fe tawh zawk a lo ni!!!

Hun lo kal leh zel turah Pi Ziri hi rai maw rai lo maw? I lo thlir ang, a intiam District hi a hrin sak angem?…😀😀😀