nb. in ti tawp ta emaw ka tia, ka lo chawl ve tawp mai asin. ka khua a har em a, ka lut mai maia, a lo la kal reng sia, a lawmawm e.
1st.Thursday: Kawnpui Chhimveng Bial KṬP chuan Kawnpui Dinthar Kohran Hall-ah blood donation camp an huaihawt a, mipa 25 leh hmeichhia pathum-in Synod Hospital tan thisen unit 28 an pe.
2nd. Friday: UDPA department leh National Housing Bank (NHB) ṭangkawp chuan Aijal Club-ah Pradhan Mantri Awas Yojana – Housing for All (Urban) scheme inhrilhfiahna leh zirhona, ‘One Day Workshop on CLSS (EWS/LIG) and CLSS (MIG) under PMAY – HFA (Urban) 2022 Mission’ an buatsaih a, UDPA minister Zodintluanga’n a hmanpui. Zodintluanga chuan, Mizorama census town khaw 23-ah hmalakna ṭhuang hniha kalpui a nih thu sawiin, “In sak ṭanpuina – Beneficiary led Individual House Construction leh in sakna tur loan – Credit Linked Subsidy Scheme (CLSS)-te an ni,” a ti.
3rd. Saturday: Phunchawnga Forest checkgate bulah Ramengmawia (31) s/o Zothanpari, Aizawl Venglai ruang chhar a ni.
4th. Sunday: Presbyterian kohhran ho chuan zan inkhawmah Assembly puala tawngtai rualna hun an hmang. Thawhlawm pawh hemi pual hian an dah hlawm a ni. Assembly hi Presbyterian kohhran inrelbawlnaa a chung ber a awm a ni. Tunah hian member hi 14,05,781 an awm mek a; Synod hrang hrang 10 a awm bawk. Moderator hi Rev Laldawngliana, Manipur Synod a ni a; an hmunpui hi Shillong, Meghalaya-ah a awm a ni.
5th. Monday: Serchhip DC Sangchhin Chinzah chuan UDPA department hnuaia Serchhip Hmarvenga Mini Sport Complex sak hna NBCC-in an thawh mek a tlawh. DC chuan, an hnathawh dan leh an hma thar laknate a hnena hrilh hre zel turin contractor-te a hrilh. Sports complex hi cheng vbc. 12/- senga sak tur a ni.
6th. Tuesday: Ralvawng khuaa Ropuiliani Thlan Committee chuan Mizo lal zinga hmeichhe huaisena sawi Ropuiliani ruhro chu Mizoram State Museum-ah dah a nih dawn avangin Ralvawng khaw khelmualah ruhro thlahna hun an hmang. Ropuiliani hi lal Vandula nupui a ni a, an lal hun lai chu Bengkhuaia ten Mary Winchester an man vanga British sipaiin Mizoram an beih, Vailian tih hun lai vel a ni. Vandula hi Ropuiliani nen an inneih hnuah Belpui, Kawmzawl, Baichi leh Ralvawngah a lal a, Ralvawnga a lal lai chu kum 1856-1861 a ni. A hnuah Aithur, Hnathialah an pêm a, kum 1878-ah Ralvawngah kîr lehin, kum 1885 thleng Ralvawng-ah an awm leh a ni. Ralvawng aṭangin Denlungah an pêm leh a, Denlunga an awm laiin Vandula chu a thi a, Ropuiliani chu lal a ni zui. Mizo lal tam tak British kuta an inpek laiin, Ropuiliani chu a inpe duh lo a; chuvangchuan, a fapa Lalthuama nena inthuruala Sap ho beih tumah ngaiin, August 8, 1893 zingah an nufain Denlungah man an ni. Ropuiliani an man hnu, kum 1894 tir lamah Lunglei bawrhsap Maj. J Shakepears chuan Denlung khaw mite chu tihluihnain Ralvawngah a pêmtir vek niin an sawi. Ropuiliani chu man a nih hnuah Lunglei Guardroom-ah tàntir a ni a, April 8, 1894-ah la chhuakin, April 18, 1894-ah Chittagong Jail-ah dah luh a ni. August 1894-ah santèn a vei a, January 3, 1895 zingah Chittagong Jail-ah a thi a ni. Ropuiliani thih hnuah a ruh chu Maj. J Shakepears (Tarmita) a thupek angin, Ralvawng aṭangin patling 10-in an la a, Febuary 22, 1895-ah Ralvawng an thlenpui a; Ralvawng khaw chhunga bûng lungpher bulah an phûm a ni. Hun eng emaw chen a phûmna hmun zawn a nih hnuah May 19, 1997-ah a ruhro an lai chhuak a ni.
7th. Wednesday: Lunglei District Legal Service Authority chuan Lunglei SP pisa conference hall-ah naupang venhimna dan zirna, ‘Child in conflict with law and children in need of care and protection training’ an buatsaih a; Lunglei District & Session judge R Thanga’n a hmanpui. Training-ah hian police officer, Child Welfare Committee member, Juvenile Board Justice member, District Child Protection officer leh a hnuaia thawk te, tlawmngai pawl leh home hrang hranga superintendent, counsellor leh thawktu dangte an tel a ni.
8th. Thursday: Kolasib District Hospital-a surgeon Dr Zothansanga Zadeng, Serchhip District Hospital-a sawnna tur transfer order sût phût vanga Kolasib Joint Action Committee-in June 6, 2017 zing aṭanga Kolasib-a NH-54 kawngpui an danchah chu an la chhunzawm zel.
9th. Friday: Green Mizoram Day 2017 chu district hrang hrangah hman a ni a, Aizawlah chuan chief minister Lal Thanhawla hoin Chite lui kamah hman a ni. Green Mizoram Day-ah hian thing ṭiak ṭhahnem tak phun a ni a; kum 1999-a hman a nih aṭanga kum 2016 thleng khan thign ṭiak 36,58,174 phun a ni tawh.
10th. Saturday: Zemabawkah Assam type in leiminin a hnâwl a, Laldinpuii (29) a thi. Leiminin in a hnâwl lai hian a chhungah in neitute leh an inléngte nen mi 13 an awm. In hi chhawng hnih a ni a, Laldinpuii leh a fapa thla sarih mi chu in hnuaiah awmin, a bâk zawng chu in chungah an awm a, in chhawng chung zawka awmte chu a chim hmain an tlân chhuak hman. Laldinpuii leh a fapa chu an tlan chhuak ve hman lo a ni.Laldinpuia fapa thla sarih mi chuan hliam a tuar bawk.
11th. Sunday: Tuikual South-a Rimawia in, Assam type, chhawng hnih chu a kâng a; kâng ṭhelhtu zinga mi pali an hliam.
12th. Monday: Zan khat riak turin Union Home minister Rajnath Singh leh minister of state for Home Kiren Rijiju te chuan Mizoram an lo thleng.
13th. Tuesday: Ruah sur nasa avangin Phairuangkaiah hian leimin vangin in pahnih a chim. Nila Moni in chu kopang minin a hnawl a, a tunu ruang leh a menpuitu mi parukte a hnâwl. Leimin-in a hnawl zinga mi pathum an thi.
14th. Wednesday: World Blood Donor Day (WBDD) a ni a, Aizawl leh district hrang hrangah hman niin, thisen pe tamte hnenah chawimawina hlan a ni a; Day thupui chu ‘Eng nge tih theih kan neih? Tunah thisen pe la, pe chhunzawm zel rawh’ tih a ni.
15th. Thursday: YMA Day vawi 83-na chu Mizoram pumah leh state pawna YMA branch awmnaahte hlim taka lawm a ni. YMA Day-ah hian branch tam zawk chu khua leh veng chhung thian faiin an hnatlang a; branch ṭhenkhatin intihhlimna, infiamna leh intihsiakna hunte an hmang a, zan lama intihhlimna hun leh vantlang inkhawm buatsaih branch eng emaw zat an awm bawk.
16th. Friday: Kolasib District Level Green Mizoram Committee bultumin Environment, Forest and Climate Change (EFCC) department complex-ah Kolasib DC Dr Arun T hoin Green Mizoram Day hman a ni. Kolasib-a Green Mizoram Day hmannaah Dr Arun T chuan, khawvel boruak vawn thianghlim a nih theih nan mi tinin mawh an phur tih sawiin, “Mizoramah hian India ram hmun dang aiin boruak thianghlim a tam zawk. Hemi kawnga EFCC department, YMA, V/C-te leh tlawmngai pawl hrang hrangte thawhhona leh hmalaknate a chhuanawm hle,” a ti. Green Mizoram Day hi June 9, 2017-a hman tura duan ni mah se, rokhawlhna a awm avangin tuntumah hian an hmang ta zawk a ni.
17th. Saturday: Kauchhuah khua, Lunglei district-ah in pali a kâng a, thi leh hliam an awm lo. In kangte hi Mayaboron, Niloboron, Dinoboron, Morotso te in a ni a, Mayaboron-te in aṭanga chhuak ṭan a ni.
18th. Sunday: Mizoram Presbyterian Kohhran chuan Rualbanlote Ni an hmang a, thupui chu ‘Lal Isua’n rualbanlote a ngaihsak’ tih a ni. He ni pual hian zan inkhawmah hun hman a ni a, thupui hmang hian kohhran hrang hrangah thuchah ngaihthlak a ni.
19th. Monday: PC Muanthanga lehkhabu ziah, ‘Lungrem hrang hrang’ tih chu Aizawl Press Club-ah Synod senior executive secretary Rev. Lalramliana Pachuau-in a tlangzarh.
20th. Tuesday: GIG Motor’s Pro Volleyball League R.Dengthuama Indoor Stadium, Mualpuiah Hunthar Veng Volleyball Club chu an champion. Hunthar Veng hian final-ah hian Chhinga Veng VC te chu 25-23, 20-25, 29-27, 25-20 in an hneh a ni. Champion team hian Rs 1,00,000/- bakah match money Rs 3,500/- an dawng a ni.
21st. Wednesday: Sipai Lammual ah “Healthy Mizoram Campaign June 21, 2018” chu Assam Riffles kaihhruaina in 3rd. International Yoga Day hmanna denchhena hman tan a ni a. Healthy Mizoram Campaign hawnna leh Yoga Day hmanna ah hian Mizoram Governor Lt. Gen. Nirbhay Sharma (Retd) chu khuallian a ni a. Union Minister Of State For Railways Pu Rajen Gohain pawh he hun hi a rawn chhim a ni.
22nd. Thursday: PC Kapthuama leh Lalthanzami Sailo, Gov’t. Complex, Aizawl te chuan an inneih Diamond Jubilee an lawm. PC Kapthuama te nupa hi 2nd. July, 1957-ah Chalrang Pastor Pasena’n Chalrang biak inah a inneih tir a; tunah hian fa 10 leh tu 29 bakah tuchhuan 13 an nei mek a ni. An fa, tu leh tuchhuan te zawng zawng hi an la dam kim vek nghe nghe. An inneih champha an lawm hi a hun diktak a nih loh chhan chu an fapa kawppui la neilo awmchhun Laltlanliana’n Sihphir nula nupuia a neih ve bawk vang a ni. ‘A hautak loh zawk nan’ tiin hetiang hian a rualin a lawman hun hi an siam ta a ni.
23rd. Friday: Mizoram chhunga khua/veng football hmanga ngaihhlut hlawh ber T| Royte Trophy-Inter Branch YMA Football Tournament final chu Chanmari leh Ramhlun South ten khelin Ramhlun South hi 1-0 in an chak.
24th. Saturday: Zoram Exodus Movement chuan Aizawl Press-Club ah chanchinthar lakhawmtute politics kalphung danglam deuh an sawipui.
25th. Sunday: Salvation Army India Eastern Territory Calendar-ah ‘Salvation Army Youth Sunday’ a ni a; hemi pual hian Corps leh Society tina SAY ten programme uluk takin an duang a. Camping/Crusade te, vantlang rawngbawlna te, damlo leh mi harsate tanpui leh tawngtai sakna hun te an hmang hlawm.
26th. Monday: Union Minister of State for Sports Pu Vijay Goel chu Mizoram tlawhin a lo zin.
27th. Tuesday: AMWAY India chuan 3rd. MAP Complex, Mualpui-ah Mizoram Police te tan healthy living workshop an buatsaih a, he workshop hi DGP Pu Thianghlima Pachuau in a hawng.
28th. Wednesday: Seling leh Tuirini inkar kawngpui dungah kawng chhuat chu mak tak maiin a rawn pawrh chhuak. He thil a tlen lai hian khualzin sumo kal lai a ni a; passenger te pawh hian an hlau hle. Hei hi kawngchhak lam atanga lei a rawn min vang a ni a; he lei min hi kawng thlanga tla tlang loin lei hnuaiah a lut a; hemi insawh muk hian kawngpui hi a rawn tawn puar ta a ni.
29th. Thursday: Lunglei MNF Sub Headquarters Mizo Hnam Run-ah MNF Sr.Vice President Pu Tawnluia’n zirlai hruaitu țhahnem tak MSU leh MZP ațang leh Congress party, ZNP leh BJP ațangtein mithar, an vaiin 146 MNF zawmtharte a lawmlut.
30th. Friday: Serchhip bul, Bungtlang Bazar vengah Maruti 800 leh Truck(709) an in su a; maruti driver Pu Lalzara Sailo (61) s/o Lianhnawla(L) chu a hmunah a thi nghal.Pu Zara hi amah chauhin a chuang a ni.Truck 709 ah hian mi 2 chuangin hliam na an tuar lo thung.
Similar Posts:
- June 2008 Mizoram Diary
- June 2009, Mizoram Diary
- September 2008 Mizoram Diary
- Ram leh hnam tâna lungin tâng hmasate
- December 2016, Mizo(ram) Diary
November 19th, 2017 at 9:08 am
Report this comment
December 17th, 2017 at 2:50 am
Chhana hian rawn ti zel se…
Report this comment