mi(sual).com

Hnathawh peihloh manah hmanni a ka purse tihbo chungchang hi thairang mai mai teh ang.

Hmeichhe tamtak ang a bawkin bag-a thil tinreng ak mi hi ka ni ve a. Niminpiah Inrinni, July 28 2012 pawh khan ka ak tlem lo leh khawp mai a. Purse, nihliap, rawmawl, pen, note bu te, tui bottle, purse dang chahbi leh pendrive vel ka dahna, heti zawng hi ka hriatchhuah theih chin chu a ni.

Tichuan Big Bazar ah ka kal ta a, scarf hi ka lei a ni. A man kha pek nghal a ngaih avang khan ka purse chu ka phawrh a, a man chu ka pe a. A man dawngtunu kha a rilru a buai nge ka hre lo min kir dik lo a, receipt nen kan han entawn leh he haw a, kan inkir dik leh ta. Ka purse chu ka la keng ngei tih ka hria chutih lai chuan. Mahse ka bag ah khan ka thun leh em, ka bag kha ka zip em tih kha ka hre chiang tawh hauhlo.

Bag zip lova teihawi hrat tak mai hi ka ni a, ka vanneih a siamin engmah hi ka la tibo tak tak lo va. Ka phone leh wallet tihbo tawh te chu ka kalsan an ni chawk a. Hemi ni pawh hian ka bag inhawng chu engvakah mah ka ngai lo.

Chuan, Big Bazar hi lian ve tak mai a nia, floor 4 (?) lai an luah a. Ka tei ka tei a, eng engemaw ka en kual a, lei tur te chu ka hmu zel a. Ka inkhai bawr ta fe tihah chuan a man pek tumin cash counter lam ka pan a, ka thlen hmain ka bag chhung ka zuk dap chu ka purse reng a awm lo. Thil dangin an hliah aniang, ka tia, ka han hai chiam, ka phawrh ruak vek, a awm chuang lo. Ehe, a bo ngei a nih hi, ka ti a. Ka rilru a rawn awm hmasa ber chu hah taka ka lo vahna kha a thlawn mai a ni tih hi.
(more…)

Hman zan chu ka thil tawn ve tawh zinga rapthlak ka la tih ber pakhat ka tawng a. June 20 zan kha a ni.

Euro football khel en tur a awm loh zan tak a ni bawk a, MOS (Urban Development) Prof. Saugata Roy-a te nupa leh an official ṭhuihruai te, an vaiin mi 15 vel zanriah ei-ah kan sawm a. Turkish nu valai pakhat a rawn tel bawk.

Zanriah ei khama kan titi mam mam laiin Minister chuan mi dang zawng chu ngawi turin a ti a, amah a lo ding chhuak a, thu ṭha tlem min fah hlawm dawn a niang chu tia kan lo thlir ṭhap lai chuan chutiang lam reng a lo ni lo. Tihtak te-in zai turin min han sawm ta tlat mai a nih chu maw le! A nupui lah chuan ‘zai la, kei ka lo lam ang’ a lo ti mauh mai bawk si. A va’n manganthlak tehlul ngai em!

Chhun lama kan inzuinaah Minister-in Mizo mipa chuan ṭingṭang an perh thiam deuh vek tih a hriat thu a sawi te khan chhuang fein ka lo ‘amen’-pui vel tawh kha a nia. Ṭingṭang ka neih leh neih loh min zawh lah khan ka neih thu te, mahse thiam vak lo chunga electronic piano ka khawih tam tak zawk mah thu te ka lo sawi liam vel mai mai kha a nia. Chutiang lam sawi zui thui lo-in politics lamah te kan pakai a, president thlan lo awm tura an party dinhmun te kan sawi ta zel kha a nia….Mahse mihring hian kan hma lam hun hi kan lo va hre lo-in, ka thil sawi te kha a lo va han ṭul lo tak! Chawhreh leh theih a ni tawh si lo.

(more…)