Archive for the ‘Advice’ Category

Ka Mit Laa, Ka Rilru Khawihtute

Monday, October 22nd, 2012

(Chiartute tan a ho lutuk ang em aw? ti rilru chungin… Post a lut tlem deuh bawk nen. Ka rawn post ve leh tawp. :-) )

Citibank ATM
Tuk dang ang bawkin tlangval lai atang tar tih takah, morning walk ka nei zo chu, inrin ni zing a ni bawka tiin Citibank ATM rauhsan tawh dawhsanah chuan ka thu chawl a. He hmun hi kawngpui bula awm a niin, kawng atang feet nga vel zeta sang a nih avangin a thengthaw nuam hle. Hunawl ka neih changin ka thu chawl fo thin.

Naupang pathum
Ka piah lawka dawr bathlarah chuan naupang an ri nak nak a. Ka’n en phei chuan naupang pathum, inchhangbung vek an ni ngei tur hi an ni a. A upa ber hmeichhe naupang chu kum 4 vel chuan khawi atang a chhar nge ni, parva thi (ruang) hmul a lo pawtfai chawt chawt a.

Reiloteah chuan a nau hmeichhe naupang chu Rs. 10 kengin kawngpuiah a rawn chhuak nawlh a. Minute thum vel a bo vang vang hnu chuan balhla pathum leh Rs. Khat-thir kengin a rawn kir ve leh mai bawk. A upa berin a nau thil lei ngaihvena kawngpui a lo chhuk chuan an naupang ber mipa, la kal thei lo chu a lo tap tuar tuar a. Kawnga kal te’n an en hrek hrek. Zingkar khawvawt kara a nu leh pa te hmel hmuh tur awm lo kha an lainatawm.
(more…)

Posted in Advice, Lifestyle, More than words | 19 Comments »

Kal dem dem.

Sunday, October 21st, 2012

“Ka nunna thawpikna avang khan ka dam chhung kum zawng zawngah chuan zawi tein ka kal dem dem tawh ang.” –Isaia 38:15.

John-a chu a naupan tet atanga nungchang mawi leh tha, mi pawi sawi ngai lo, Lehkha pawh thiam thei em em mai a hi a ni a. Tleirawl sual pawh nei lem lovin tha takin lehkha a zir chhuak ta a. A zir chhuah hma hma atangin a thiamtheih chungchuan zia hriain, Company lian takin an hauh lawk a, hlawh tha tak pein an ruai ta a ni. A hna a tuiin a thiam bawk a, hotute duhsakna a dawng a, a hlawh pawh a tha chho hle mai. Chutah sum a khawl tam tawk taa hriain, a rawlthar chhuah atanga a Car it em em thin Jaguar Car ngei mai chu a lei ta a ni. Chu car mawi leh chak tha tak mai a han nei chu nuam hi a ti em em mai a. engdang ngaihtuah vak lo hian a leu puat puat reng ta mai a ni.

Amaherawhchu, thawkleh khatah a nun dan a lo danglam ta a, A thiante phei chuan mak tih zual deuh mai thil pakhat hi an nei a, chu chu, a Car kawngkhar dinglamah chuan Lunga vawmna nge, mi sutna ni dawn ni, khuar deh dak hi a awm a, chu chu han siam that pawh a har vak dawn loh nen, John-a chuan siamthat reng a tum lo mai a. A Car chu fai-hnum tle hlarha nawtfai thin si hian, chu khuar tereuhte chu a ngai ngai chuan a dah reng mai a ni. A chhan an han zawh chuan, tihian a sawi ta a ni.
(more…)

Posted in Advice, Religion | 22 Comments »

Duhna Sal

Thursday, October 18th, 2012

 Ka MISUAL tanna chu rei ve tawh viau mahse hun rei tak chhung ka biru vung vung a. Piangthar da leh, Thar leh ta iangin ka lo in tel bawl thar ve leh chu nia. Ka dawt sawi leh kamtam liam vel in lo ngaihtheih leh deuh chu a ngai dawn ni! :-P Tunlai chu keima nungchang ka chhui kir neuh neuh a, ka thil duhzawngte avanga ka nundan inlumleh vel dan hian ka rilru a luah ve riau mai a. ‘Mahni nungchang’ tarmita hmangin Duhna Sal-a kan lo tan theih zia kan sep the ang.

SAL CHU TUNGNGE?

“Sal(Slave) chu ‘Pu’ nei, mahni thuhnuaia awmlo, mahni tan leh hlawknana engmah ti theilo, hralh chhawn theih, mahni ta pawh ni lo, MIDANG TA”, tiin han sawifiah ta mai i la. Ama’rawhchu hmanlai leh Pu Lincoln-a te hunlaia Sal kha chu kan sawi tum ber a ni law. Keimahni theuh, kan duhthlanna hmanga kan in Sal beh dan lam zawk hi a ni.

Tichuan, han ti thla ngawt ila, in ngaihtuah ve ngai emaw, kan thil duhzawngte avang hian tih loh loh tur kan tih changte, kan tih theihloh tawp tura lang kan tih theih changte leh kan tih-a mawilo leh thalo kan tih changte hi a lo tam thei viau dawn reng nia mawle. A thupui fun taka han khel chiam ka tum law, mahse kan Pu Vaiva te ho nula duhna sala an tan dan vel leh kan Pu Sandman-a Hnar mam chakzia vel mai mai atang hian I han thlir ang u hmiang.

MEIZIAL SAL-AH

Naupanlai(ti ve khangkha lang ila) leh ‘Teenage’ chhung zawnga meizial zu hauhlo, zuk ruk pawh neilo ka nia. Shillong-a lehkha kan zir laia kan in luah-ah pawh ‘NO SMOKING’ tih tar deuh vu thin ngat mawle. Mahse kum zat sawi apianga hnap tawlh tur ven ngai ziah kum ka nih kumin( ‘hnih hnih’ tih na) nghei leh awm lek lo-in REL lu ka lo ni ve ta reng mai! Thla tir lama ‘Wallet’ a muk lai leh ATM card in awmzia a la neih viau lai hi chuan a zia zia a awm a, mahse thla chawhnu lam a lo niha, Wallet hralha kan vau kan vau tawh chin leh ATM card leh Driving License in pawisa a lakchhuah theihzat a inan reng meuh chuan buaina ral a lian hi a ni ngawt tawh thin.

(more…)

Posted in Advice | 21 Comments »

Pheikhawk Tawt

Thursday, October 18th, 2012

Pheikhawk thar
High sikul leh Higher secondary sikul ka kal thlengin thiante pheikhawk (smart shoes) hi ka it ve thin a, mahse keini tan erawh lei phak rual a ni lo. Nitina ka bun thin Sikul shoes bawk Pathian ni tuka ka bun a nih loh chuan chhungte min duhsaktu’n sneaker bun hlui min pek ka bun mai thin.

Tin heti hi a ni a, college ka kal ve dawn chuan, Rs. 5000 zet mai ka patea’n loan min laksak avangin pheikhawk thar lei ve ngei chu ka duh ta a. Ka vanneih a siamin ka mutbu inlei chawp ngai lovin Aizawla ka chhung te’n min tumsak hlauh bawk si. Hostel-a ka luh dawn ni chuan pheikhawk tha ve si, man tlawm deuh zawngin Aziawl bazaar ka’n suartluan a nih kha, pawisa nei tam si lovin, ka duhtui ve phian si a… ;-)

Ka duh ka hmu, ka tawt deuh si
Darkar hnih zet pheikhawk ka zawn hnu chuan a pian leh rawng ka duh tak mai ka hmu fuh ta hlauh mai a. Ka’n thawlh chhin vel a, ka ke ka thawlh thei mai, mahse ka ke tawt deuh (tribal kephah hlai tih takah). Ka duhthusam ngei a ni si, a aia lian an nei bawk si lo. A zuartu lahin rawlthar mahnia bazaar chu min hmin thiam hlawr hlawr bawk a. Ka lei ve ta ngawt a nih chu. Ka chhungte, thahnemngai taka mutbu min tumsaktu te zah ru tak chungin, ka pheikhawk thar duh tak chu thukru deuh chungin ka hawn ve ta a, ka mawipui ngei inringin. ;-)

(more…)

Posted in Advice, Lifestyle | 13 Comments »

Zuapa

Monday, October 15th, 2012

(Mual sang tam tak kar atanga, ka PA pianchamphaphak lawmpuina pakhat atan…)

Himna kulhpui
Khawvel eng hmua, a chhia leh a tha hre hrang tura Khuanu’n min duan avangin a kum telin chinchang kan hre tam ve tial tial a. Sikul luh hmaa thiante nena inkawm chang emaw, ramhnuaia han chhuah chang te, hmun raltia awm changin zuapa mitthlaa’n a lang nghal thin. Rual-u te’n min velh chang pawha min chhantu tur emaw kan lungngaih min hnem turin ka pa ka pan fo va. Pachang taka awm tur leh mahni inringtawk tura min fuih a, min zilhhau fo tu chu ka pa a ni.

Ka pa chempui a hriam zawk
Thiante nen dai hnai fangin chemtum humin kan inzui chhuak thin a. Kan inhnialna thupui lar tak pakhat chu: ka pa chempui a hriam zawk tih a ni.

Kan inhnial chhan pawh eng dang vang a ni law. Thingtuai emaw mau emaw chhawk tumin, tu chem nge hriam ber, tu kutthlak nge na ber tiin kan inel te te a. Chutah, a chem bil ber emaw kutthlak zawi ber chuan tlawma la duh bik lovin, ka pa chem a hriam tho tiin a’n tan a.

(more…)

Posted in Advice, More than words | 16 Comments »

Zawhna ?

Sunday, October 7th, 2012

Tùnlai chu in post ṭha duh lo hlawm êm mai, hei te hi dah ve leh mai mai ang e…

John Simone chuan “The key to wisdom is knowing all the right questions” a ti. Finna bul chu zawhna dik tak hriat fiah hi a ni ti ila a dik ber awm e. Zawhna hriat fiah loh avangin zirlai naupang leh competitive exam ṭhin mi tam takin chhânna an pe sual fo rêng a ni. Chu chuan an nun kal zêl tùrah hlet a chhuah ve châwk ṭhin.

Zawhna nangmah i inzawh ang zêl kha i nun kal chho dân tùr chu a ni. Nangmah kha zawhna i inzawh tlêm chuan chhânna pawh i hmu tlêm ngei ang. Zawhna ṭha leh tam zâwk i inzawh chuan chhânna ṭha leh ṭangkai i hmuh belh zêl ang.

Mi ṭhenkhat chuan anmahni chungchangah ‘tiang hian zawhna an siam ṭhin “Eng vangin nge ka vanduai bîk êm êm?” “Enga ti nge hetiang dinhmunah hian ka din bîk?” Heti ang zawhna ṭha lo, mahni leh mahni kan inzawh rêng rêngin chhânna pawh a lungchhiat thlâk lam kan hmu a; mahni inkhawngaihna leh indahhniamna kan neih phah a, kan nun a chawhnuin nguina leh hnualna thlarauin min buan hneh fo ṭhin. Zawhna ṭha zâwk “He thil aṭang hian eng nge ka zir chhuah theih ang?” “Heta ṭang hian hmasâwnna tùr eng thil nge awm?” “He harsatna leh buaina hi hnehin eng tin nge ka tâl chhuah theih ang?” tihte hi kan inzâwt fo tùr a ni. A chhan chu hmasâwnna leh hmalam pan zêlna tùr atâna rahbi pawimawh tak a ni si a.

Zawhna ‘ṭha lo’ ni lovin zawhna ‘ṭha’ chauh inzawh nachang hria ang che. Ka lâwm e.

Posted in Advice, Lifestyle | 17 Comments »

Nupui Zawn Dan Thurawn 10

Thursday, October 4th, 2012

Mi(sual) tlangval Dr. Mahminga leh a thiante ho, nupui mamawh inti ve tawh si thlan sual hlau bawk si, anmahni duhtute duh lo va an duhten an duh bawk si loh ho tan heng thurawn 10 hi ka han chhawp chhuak e! Lo apply nghal rawh u le:

Thurawn 1: Nupui atan chuan hmeichhia an tha ber tih hi a la dik reng a, tunlai chhanah a dik leh zual.

Thurawn 2: Nupuia i neih tur chu i neih hunah eng ang mizia nge a neih dawn tih hre turin a hringtu nu mizia en chiang rawh!

Thurawn 3: Mipa tha famkim kan awm lo ang bawkin hmeichhia tha famkim an awm lo. Mahni lam inhre rengin duhtui chin tawk nei rawh. Hemi hi nupui atan a tha ang em? tia i ngaihtuah rual khan nangmah pawh kha pasal atan i tha ang em tih inzawt nghal bawk rawh.

Thurawn 4: A hmel that vanga nupuia neitu aiin a fel vanga nupuia neitu chu a nihlawh zawk fo.

(more…)

Posted in Advice, Mizo Society & Culture | 74 Comments »

Hre reng thin ang u!

Sunday, September 30th, 2012

Zan hi a ral ang a, mahse khami zan a thil thleng kha chu a ral tawhlo ang. Mahse Condom i hman chuan khami zana thil thleng pawh kha a ral ang.(100% chuan a ni chuanglo)

Zep theih leh phat sen pawh a nita lo, sex hi Mizo hnam tlemte zingah enjoyment a tan chauha hmang duh tam tak kan awm ta! Hriatloh der leh engmah tih theih neilo ang mai a Uipui Tui lian thlir a kan thlir reng zawngin reilo te ah kan hnam tlemte hian kan la chhiat phah ngei ang le, tunah pawh nasa takin kan tuar mek zel. Inneih hma a sex hmanglo tura kan in zirtirna te chuan mi tlemte tan bak a sawt ta lo, mahse kan hnam damnan chuan kan zavai kan pawimawh si, ‘an sual em a, tikhan awm mai mai teh se’ tiin kan in ensan thei ringawt tawhlo, kan za vaia kan tantlan a ngai tak zet tawh a ni. (more…)

Posted in Advice | 34 Comments »

Chhiartu duh tak

Tuesday, September 18th, 2012

Chhiartu duh tak, nang nên a thlum a al kan eiza lêm lo maithei. Ama’rawhchu, hei erawh ka hria, ka ‘ṭhian’ i ni. Khawvêl hi ‘tu emaw’ tà bîk a ni lo va, ropuina pawh hi ‘tu emaw’ khum tùr bîk a ni hek lo. Thu leh hla te pawh hi tute emaw ziaha phuah tùr bîk emaw te kha ilo ti ngawt ang e. Duhsak takin ‘a ni lo’ tih ka hrilh duh che a ni.

Chhiartu duh tak, nang leh kei hian inzawmna ril tak kan nei. Sakhmêl intawng lovin ànka nêm inhlàn lo mah ila, changkânna hrui duhawm tak hmangin kan inthlun zawm tlat si a.

Chhiartu duh tak, tute nge thu ziak ṭhin a, tute nge hla phuah ṭhin? Keimahni anga tung chhoa kal ve tho an ni asin. An theih bîk vang leh an thiam bîk vang em ni? Ni lo. An tum a, an bei a, an pâr chhuak a, rah duhawm an chhuah mai ṭhin.

Chhiartu duh tak, Pu Kaphleia ‘Thlîrtu’ te kha ilo bih ve tawh ngei ang a. Thil ṭha tih tùr tam tak a hmu a, a hria a, nimahsela, tih tum lovin a thlîr liam mai mai a nih kha. Chuti chung pawhin thu leh hla lama kan mi ngaihsàn nih a ṭhulh chuang lo va, a thu leh hlate chuan Zoram pum a dêng nghîng lawih lawih tho mai. A tih tùr hmuh leh hriat te kha tiin, theih tâwpin han thawk teh sela aw! A aiin a va ropui nasa dâwn êm! Chuti ang chuan, nang leh kei hian tih tùr leh ziah tùr hi kan hre ṭhin ngei ang. Nimahsela, ti lova kan pàmṭùl leh ṭhin hian dinhmun ṭha zâwka kan dinna tùr kan hmaih leh si ṭhin.

Chhiartu duh tak, sum leh pai hi hman sên loh kan nei bîk lo asin. Mi thu leh hla kawmen pêk te hi hekna a nih ngai chuan kei hi rethei ber ka chang tawh ang. Ngai teh, kei aia rethei tùr fê fê hi an la tam mai zuk nia! Mahse maw chhiartu duh tak, kawmen i pêk hian eng nge hekna riau i neih le?

Chhiartu duh tak, midangte hlimna siamsak hi mihring ten kan tih theih ropui tak a ni. Mite paws-a kawmen i pêk hian a paws-tute thinlungah lâwmna mak tak i thlen tih nangmah pawh i inhre reng tih ka hria. Chu chuan anmahniah phûrna a siamsak a, chona thar a pe a, mi ropui takah i chhuah dêr thei.

(more…)

Posted in Advice, Lifestyle, Luangliam | 17 Comments »

World Suicide Prevention Day Pual thian beidawng hnena lehkhathawn By: Chris M.S.Dawngkima, Ramhlun N

Saturday, September 15th, 2012

A nih dan ang ang in ka rawn copy ve tawp mai nih hi Vanglaini atangin… Tha ka tih em avangin. Tunlai kan thalai/nu leh pa tam tak nun beidawng taktak a awm mek te tan…….

Thian duh tak, i nunin harsatna nasa tak a tâwk a ni tih ka hriatin, thinlung takin ka tuarpui che a ni. I tawngkam ka hriat hnuhnun ber khan ka rilru a luah reng thin a. I tân tihtheih dang ka neih loh avangin ka lo tawngtaipui ngawt mai che a ni. “Ka tân chuan nun hian awmzia a nei hlawl lo; mi, a thih hun nghaka thichhâwnga let rengte hi ka rilru hian a awt ngawih ngawih thin!” tia i thu min hrilh khân ka thinlung hi a chhun na êm êm a, tlêm tala chhawk theih che hi ka va han duh êm!

I hma lam hun darkar khat lek pawh hi thlân thim ang maia thim chhah niin i hria a. I harsatnaah chuan puitu, rin ngam leh beiseina thar siam thei che i hmu lo tih pawh chiang takin ka hria e. I thinlung paukhauh takin hriat chhuah a duh loh ber mai ‘Pathian hming’ chu, i tuarna chuan a hriatchhuahtir nawn chhen che a. Mahse vawiina i awm dân zawng zawng hi i duhthlanna lo hman sual tawh avanga ba thinna lehkhâ chu a ni tih i hai bik si lo.

“Tumahin min ngaidam thei tawh lo vang; keimah leh keimah pawh ka inngaidam thei bawk hek lo. Duhthlangtu leh sual kawng hawnsaktu chu keimah ngei hi ka ni,” tiin tunge i nih i inhre chhuak ta si a. Nimahsela ka thian, harsatna tawp kan tawh hian a ni, kan mamawh ber chu kan hriatchhuah thin!

(more…)

Posted in Advice, Copy Paste, Lifestyle | 9 Comments »

« Older Entries
Newer Entries »