mi(sual).com

Mizo leh Chin chung chang hi kan sawi zing ta malh malh hle mai. Tin, kan vei tlang bawk a niang, Mizo Site zawng zawng deuh thaw ah hian hemi lampang hawizawng Topic pawh hi hmuh tur a awm ta reng mai. Inpumkhatna a tana kan hman duh a vanga, Lungrual taka ke kan pen tlang dawn a nih chuan Mizo Hnam hi khawvel hian a hre telh telh anga, kan Hnam pawh hian changkana lam a pan chhovin, Rahbi pawimawh tak a rap chho zel ang tih chu a lang chiang hle mai.

Mahse tuna ka rawn sawi tum tak hi chu a chhut peih tan chuan chhut tham fe a tlin a vangin ka thlirdan leh ka hmuhdan hi mawlmang takin ka rawn tarlang ve duh a ni e.

Mizo te leh Chin ho inkungkaihdan hi ka hriatdan mawlmang tak hi tawi te in han tarlang hmasa ila a tha awm e. Mizo kan tih te hi Mizo chanchin ziahna lehkha bu tam tak chuan a chhut danah Khawchhak lam Mongolia thlah kahn nih thu te, leh Burma a tanga rawn chhuk thlain India hmarlam tlangdungah bu in khuarin an awm darh ta zel a. A then Burma lamah kir leh in sumdawna, zirna te an han chhunzawm leh hnuhnawh a, chuta tang chuan Mizoramah rawn chhukthla leh in mahni eizawna kawng hrang hrang ah awmhmun an khuar hlen ta a ni. Tin, Mizoramah rawn kir leh lem lo, Burma tlangdung leh a chheh vel a khawsa pahin Mizoram leh Vairam ah sumdawngin leh zirna lam chhunzawm turin Zaohnathlak Hnam hrang hrang te chu, an rawn chhuk thla ve mek bawk a, Chutiang kawng hrang hrang chuan Mizo te leh Chin te hian inkungkaihna thui tak leh nghet tak an nei chho zel a, Tin, Khaawvel hmun hrang hranga awm darh Zofate ngei pawh hi, enge maw thil tih nikhua a piangin an inko khawmin intih hlimna emaw Khawmpui te an lo nei chho ta hian thin ani.

Kawng hrang hranga inkungkaihna neilova awm thei lo, khawvel hmun hrang hrang (abik takin Mizoram State leh Chin State) te hi engvangin nge kan in pawh tak tak theih loh tih hi vawiin a ka sawi duh ber chu a ni. Ka hmuh dan point hrang hrang lo tar lang tai la:-

1. Common Language kan neih loh vang

Zofa te hian Mizo tawng hi common language a tan kan hmang thei. Hei hi engvanga sawi thei nge ka nih tih chuan, Chin State a tanga Mizoram State a rawn lut zinga 99.9% hian Mizo tawng a thiam vek (Mizotawng an hmang thei vek ti ila a dik zawk awm e). Tin, Khawvel ram hrang hranga awm darh Zofate pawh hian Mizotawng a, biak chuan a zavaiin hre kim lo mahse a tlangpuiin an hre thiam. Mahse Zofate zinga Hnam chhengchhe lutuk, Zirna lamah pawh a Hnaiam lutuk te hian Thiam an tum loh mai piah lamah, Common language neih pawimawh zia pawh hi an man pha lova, chuvanga thiam loh mai choh an niin a lang. Chumi piah lamah Rilru zim lutuk a vanga, mahni tawng choh hmang duh te pawh an lo la awm mek zel bawk a, chungmi te chuan mipangai, (mihnuaihnung zawk ti ila a sual awm love) zawk te rilru ah thu diklo tuh a, mahni tawng chiah hman tur ti zawnga an lo fuihpawrh a vang ten Common Language neih chungchang ah harsatna tam tak a thlen ta a ni. Tuna ka awmna ramah ngei pawh hian Mizo tawng hmang ho hi chu Hnamdang unau te (kan tlangmipui tho) te lakah chuan tlem te choh kan ni. Mahse kan sawi hi an hrethiam vek a, mahse a chunga ka rawn tarlan tawh ang deuhvin leh thil chi hrang hrang a vangin an hmang lo choh a ni. Tunhma zawng zawnga Mizotawng thiam tak a tawng thin pawh tute maw, fuihpawrhna a vanga tawng duh ta miah lo te pawh an awm bawk. Heng avang te hian leh Common Language pawimawhzia man pha lo tam tak an awm a vang hian kan inpumkhatna tur Kawng duh angin a kaw mawh ta ani.

2. Zofate hi kan chaopo mah mah

Hei hi tuman kan pawm thei lo mai thei. Mahse a ni tlat. A chhan chu, tlem kan tarlang a nga, Mizoram State a cheng ten a engamah a hmain Vai kan hmusit lutuk te, chutiang bawkin Chin State a cheng ten a engamah a hmain Kawl kan hmusit lutuk te hi kan sim hmasak a ngai. Keini aia Hnamfing leh Hnam lian leh tam zawk an ni. Hmusit mai lovin, an nun a tangin thil tam tak hi kan entawnin kan zir tur zawk a ni. Pa pakhat sawi dan takah “Mizo Nula in Vai Tlangval fel tak Pasal a neihin Vai pasal a nei kan tia, kan hmusit em em a, Mizo Nula dangin Sap Putar, Barakhaih pawh a, phuzawk a thi nghal mai tur khawpa upa tawh pasal a neih lemin Hnamdang an neia, sawichhiat chu sawi loh, an leh ngaihsan daih zawk a” a tia, Hnam danga kan chhiar hi eng Hnam nge tih pawh hi kan chhut chian a ngai leh zual. Kan sawi thui deuh anga, Zohnahthlak te hi kan awmna hmun a piangah kan in ngaihlo tlangpui. Kan in er a, kan in thik a, lungrual a hnek in kan in hek a, a tawp ah tunge mualpho??? Keimah ni bawk a ni mualpho leh tho ni. Tuna ka chena Ram ah ngei pawh hian kan inngaih lo lutuk ringawt, a hnam hnam a kal hran kha duh tawk mai lovin, a khua khuain kan in ti hrang a, kan in hek a, kan in duh khum a, a hnuailama awm engmah hremumal lo, lehkhathiam lem lo leh mawl te te hoin an tuara, chumi te rilru ah chuan ngaihdan thalo tak tak kan tuh chho mek zel bawk. Heng zawng zawng hi a bul ber ah chuan kan chapo vang a nia, Mahni tawng lo, tawng dang han hman kan hreh a, A bik takin (tu huat thu suh ah ka thlirdan leh ka hmuh dan ka ti bawk a) Mizo tawng han hman ber mai hi, Zohnahthlak dang te hian thlawmngaihah an la a, hman an hreh a, chumai nilovin Mizo hi an er tlat a hriatna te ka nei thin).Mizoram chhung a mi te pawh an bang chuang lo. Burma mi kan tia, Mizo Film, etc ah te A chhe zawng hlira tarlan ziah hi a ni ber chuang lo, Burma lam mi tlemte thil tih sual avanga an zavai vai a, sual vek anga, kan puh mai thin hi a dik ber chuang lo. Tuna Aizawl khawpui mi hlun tam tak pawh saw, an thlah tute leh an chhungkhat laina hnai vai te chu Burma lam mi tam tak an awm. Burma lam Zofate hian Mizoram an ngaihsan zia leh an dah san zia te hi I hre thar ang u. Mizoram mi tam tak in Burma lam mi an hmuhsit lutuk avang hian Mizotawng hman an hreh phah nalai tam tak a awm bawk. Heng zawng zawng hi Mizoram chhunga khawsa tan chuan engmah a ni lo mai thei. Mahse India ram pawn han awm chiah hian Burma lam mi han hmuhsit that loh zia tam tak a hmuh theih a ni. Mizoram Ar hmai tiat lek a induh tawk mai lovin kan ngaihtuah na pawh hi International standard deuhva kan hman tan pawh a tul tawh tak meuh meuh a ni. Chuvang chuan tawngpawng in hmuhsit pawh hi a dik ber chuang lo. Khawnge kan chhuan em em tlawmngaihna te kha a awm zawh tak??? Hengah te hian han practice ta ila, kan hnam pumkhatna a tan a tha viau lawng maw ka ti thin.

Similar Posts:

• Mizo tawng hi!
• Chhungkaw khat a tawng chi hnih hmang!!
• Luseiho chauh hi em ni Mizo?
• Hnam Vs Ram
• Mahni hnam tawng thiamloh a zahthlak

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Monday, August 28th, 2006 at 11:28 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.