mi(sual).com

ZOFISHFED-in Sum Hman Dik Ngei An Duh
Mizoram Cooperative Fish Farming Marketing and Processing Federation Ltd. (ZOFISHFED) chuan Mizorama sangha khawitu thenkhatte hmasawn nana Zohills Fish Farm kal tlanga cheng nuai 113.61 North Eastern Council-in a sanction lawmawm an ti a, he pawisa hi a hman dan tur leh hmanna tur dik taka hman ngei ni se, a hlawkna changtu dik takten an hlawkpuia an eizawnnaah an din chhuahpui ngei an duhsak thu an sawi. Nimin khan press release chhuahin ZOFISHFED chuan he pawisa hi a hman dan tur leh hmanna tur dik taka hman a nih loh chuan Mizorama sangha khawitute tan tun hunah hmasaawnna tibuaitu lian tak a ni thei dawn a ni an ti a. Chuvangin, he hna enkawltu Nodal Department (Fisheries department) leh Zohills Fish Farm te chu he scheme pawisa zawng zawng dik taka hmang tura an duh leh phut thu an sawi.
Zohills Fish Farm-in project a siam anga Mizorama sangha khawitute tana NEC-in pawisa a pek atanga first installement cheng nuai 45 June ni 13, 2006-a rawn pek tawh chu Fisheries department-ah hian a tang rei deuhah ngaiin a mawh chu Director-in a phurah ngaiin Zohills Fish Farm Chairman Pu P.C.Saithanmawia chuan nimin piah khan Fisheries Department Director, Dr.O.P.Singh chu a pisa kal tur a lo nam deuh a, mahse, police an inrawlh hman a, kut inthlakna erawh a awm lo. Fishries Director Dr.O.P.Singh-a hi eiruk chungchanga hming lang a nih avangin Pu Saithanmawia hian sangha khawitute pawisa tur hi a lo eizawhsak mai pawh a hlau nia sawi a ni.
Hetianga an Director pisa kal tur dan a nih chungchangah hian Fisheries Officers and Staff Welfare Association Mizoram leh Mizoram Fisheries Technical Staff Assocationchuan thu an chhuah nghal a, an department tihmualpho tumna leh office zahlohna lantirnaah an ngaih thu an sawi.

MZP-in Baffacos An Thlir Reng Dawn
MZP chuan Mizoram sawrkarin Baffacos pawisa a sem chhuah dan ang chuan sum tam zawk chuan mi retheite hnen a thleng phak lo a ni an ti a, pawi an tih thu an sawi. Baffacos sum, inkaihruaina ang lova hman a ni leh Officer thil tithei leh party induhsakna anga ngaih theih tura sumpek chhuah chhunzawm lo turin Mizoram sawrkar an phut a, tanpui ngai dik takte leh a dawng tur dik tak, mi rethei, lo neimite hnen a thlen theih nan MZP chuan theihtawp an chhuah dawn tih an puang.
Nimin piaha MZP Gen.Hqrs. Executive Meeting an President Pu P.C.Laltlansanga hova an neih chuan mautam lo thleng tur laka loneitute an him theihna tur leh mautam avanga mipuiten harsatna an tawh tur laka an him theih nana Baffacos ngaihtuah chhuah a nih lawmawm an ti a, sawrkar laipuiin cheng nuai sangnga lai a rawn pek chu Baffacos Chairman Pu Haukhum Hauzel, Chief Secretary ni bawkin huaisen taka Baffacos sum development atan hman a nih loh tur a sawi ang ngeia hman ni se an ti a, he scheme leh guidelines piah lama sum tihchingpen a nih loh nan an thlir reng dawn tih an sawi.

Kawnga Chawhmeh Zawrh Duh Lo
New Market Chawhmeh Zuar Association (NMCZA) chuan, zirtawp zana Dawrpui veng kawngpui dunga chawhmeh zawrh thin chu tha an ti lo a, he zan bazar hi enfiah sak thuai turin thuneitute an ngen.
Zirtawp zana kawng dunga tlaivara chawhmeh zawrh tha an tih lohnate chu:
1. Hetia tlaivara thu thinte zingah hian mahni thlai thar tak tak zuar chu sawm a pakhat emaw vel chauh an ni a; a dang zawng chu ram dang mi leh khar chhawnga inzuar thinte an ni.
2. Zan bazar atang hian ruihhlo zuar leh anmahni lo dawrtute tan leh mipat hmeichhiatna hmang sualtute tan remchanna a siam a, insual buaite pawh a awm phah fo a ni
3. Zan bazar a awm atang hian New Market-ah ruk ruk a hluar a, chawhmeh chi hrang hrang lo thleng tharte leh bungrua awm sate a bo nasa thin.
4. Zirtawp zana tlaivara thute hi veng chhung mite tan an bengchhen bakah, inhauh leh insual buai a awm fo avangin a ralmuang lo. Ram hmel lanna pakhat a nih avangin ram titawptu leh tihmelhemtu an ni.

IR Constable Tlanbo Ruang Chhar
Nimin piah tlai lam khan Bilkhawthlir leh Kolasib inkar Bilkhawthlir hnaih kawngthlang metre 40 chuangah ruang chhar a ni a, 1st. India Reserve Battalion constable R.C.Zoramthanga ruang nia hriat a ni. Zoramthanga hi Zamuang khua a ni a, Chhatisgarh state-a kal tur IR Battalion constable te, Vairengtea CIJW School-a training lai tlanbo nia sawi a ni. A ruang hi nimin zing khan post mortem a nih hnuah 1st.Bn. IR hmunpui, Mualvum-ah lak a ni a, an khuaah thawn a ni. A ruang hi a ruh a filh vek tawh a, August ni 14-a an training-na hmun atanga tlanbo a ni. Amah hi ruihhlo ti thinnia rinhlelh a nih avangin mi thah emaw a nih a rinawm loh thu police hotuten an sawi.

Headmaster siksawi
Edn. Deptt. chuan High School Headmaster te hetiang hian a siksawi. Pu Lalzuithanga Khiangte Pukpui atangin Tawipui-ah, Pu CT Huma Tawipui atangin Rahsiveng-ah, Pu R.Thangkhuma Rahsiveng atangin New Activities-ah, Pu PC Lawmzuala New Activities atangin Pukpui-ah te an insawn kual dawn

Geletine Tlawn 1,000 Man
Nizan hmasa khan Kolasib-ah Poilice-ten Capital Travel Aizawl atanga Guwahati pan tur atangin geletine tlawn 1,000, bawm pangaa thun an man a, a neitu a tlanbo hman a, zawn mek a ni. He bus-achuangten hotela zanriah an ei laiin police-ten bus hi an dap a, geletine hi an man. Geletine neitu hian bus ticket a laknaah chuan a hming ‘Lala’ tiin a ziahtir.

Tiau-ah Tui Tla
Lunglei district Myanmar ramri bul Bualpui khaw mi Lalthantluanga, 25 chu nimin piah tlai khan Tiau luiah chesualin a tla a, a ruang zawn mek a ni. Mizo danin ruang hi ni 7 zawn a ni ang a, tui tla zawngtute hi bialtu MLA Pu F.Lalthanzuala chuan Rs.1,000 a pe.

MPCC-in An President Chhuang
Nimina MPCC Executive Committee inkhawm chuan tun lai politics chungchanga thil pawimawh tak takte an thlirho a, tun laia mipuiin corruption an vei a, an buaipui em em laia an President Pu Lal Thanhawla MLA-te zinga LTC hmang dik ber leh hmang tlem ber a ni tih mipui hriata puanzar a ni chu chhuawnawm leh lawmawm an ti a, hei hian hruaitu rintlak a nihzia a tarlang a ni an ti. MPCC Executive hian an party hm lak zui zel dan turte an sawiho bawk.

College Chess & Chinese Checker Tournament
Nimin piaha MZP Gen. Hqrs. Executive Meeting chuan Aizawl City College Chess & Chinese Checker Tournament naktuk atanga September ni 1 hian buatsaih ni se, lawmman pakhatna Rs.1,000, pahnihna Rs.700, pathumna Rs.500 a ni ang. Tournament-a tel College SU hnenah participation prize pek a ni ang a, team champion trophy siam a ni bawk ang. Tel tur chuan vawinah MZP pisa puiah inhriattir tur a ni.

MPCY-in Laldenga Duh Dan An Ti
MPC Thalai (MPCY) chuanMNF hruaituten India sawrkar leh MNF inremna MNF President Pu Laldenga duh dan pawh a ni lo an tih thin chu thu dik lo a ni an ti a. Nimin khan press release chhuahin Isaac Zoliana ziak “Laldenga” phek 174-ah chuan Pu Laldenga thusawi “Tunah chuan kan lungawina ang ngeiin kan inbiakna chu kan lo titawpdawn ta” “Prime Minister Rajiv Gandhi hruaina hnuaiah rilru chhungril taka lungawina nen inhriatthgiam tawnnain kan lo titawp thei dawn ta” tih a chuang a ni an ti.

Hindi Zirtirtu Aikal Phal Dawn Lo
Joint Hindi Students UnionGen.Hqrs. chuan Govt. Primary School tana Hindi Teachers 500 lakfeltak lawmawm an tia, mahni post theuhah thataka awm leh aikal la lo turin an ngen a, aikal la an awm chuan a tul angin hma an la dawn tih an sawi. High School Hindi Teacher interview result la chhuak lo a rang lama tichhuak tur leh a thiam leh tlingte ngei chauh la turin sawrkar an ngen bawk.

Sesawng-ah MNF leh MCP An Hnatlang
Political Party atanga inlet tihah tun laiin Sesawng a lar hle a, nimin piah khan Sesawng khuaah hian MNF leh MCP chuan nilengin khaw chhung thenfai hna an thawk a, MNF press release chuan mi 400 chuang an thawk chhuak niin a sawi. Tun hnaia Congress-a lawmluhte pawh phur takin hnatlangah hian an thawk chhuak a ni a ti. Tlaiah ruai an kilho nghal.

Intuaitharna Training Nei Mek
SSA Lunglei chuan Primary Teacher leh Upper Primary Teacher-te pualin Upgraded orientation Training an buatsaih a. Hetah hian DIET lecturer leh DPO Co-ordinator ten lecture an pe. Training-ah hian an kal tha hle a, mi 70 vel an tel thei. August 31 thleng training hi neih a ni ang.

Lunglei MZP Hruaitu Ruatbelh
MZP Southern Hqrs. Lunglei Office Bearers inkhawm chuan Secretary, Adviser leh Executive hetiang an ruat thar a. Heng bakah hian Executive member 35 ruat in, College tin a SU V/Pre leh GS te chu ex-officio member an ni bawk. Nimin khan an pisa pui Venglai-ah Executive Comtt. Meeting an nei a. Hetah hian Chawngte College Principal chungchang an ngaihtuah.

Similar Posts:

• Mizo Aw News : 27 Sept.
• LADC office rawk a ni
• Sorkar website
• 5th IR Havildar bo PB Lalsangliana ruang Delhi dai-ah hmuh a ni
• Mizo Aw News :: Aug 31

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, August 30th, 2006 at 12:06 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.