MzSports :: Aug.31

August 31st, 2006 11:39 am by narzhoc

Wai Wai Cup quarter final khelh zawh a ni ta : Naktukah Semi Final khel dawn
Tunah chuan kan sawi mek Wai Wai Cup pawh match 3 chiah en tur kan nei ta. Niminah quarter final khelh zawh a ni a, lung a leng lawk mai dawn a lawm le.
Nimin inkhel hmuhnawm tak kha en lote ka va hlep em. Lammualah hmuhnawm a awm kan ti a, a hmuhnawm tak tak. Aizawl khawpawn atanga lokalten fans an nei tha fu mai. An khawchhuak; lekhazira Aizawla awm leh thil dang dang vanga Aizawla khawsaten tha takin an tawimawm tih a lang reng a, an tih tur dik tak an ti a ni. A hma niah Lammual duh ai mahin a diak a, niminah erawh a zia viau. Duhthusam erawh a ni lo chungin khabak kha kan beisei chuang lo. Tichuan match hmasa berah Aizawl West II chuan Saitual 4-1 a sawpin East II te Wai Wai Cup a\ang hnawtchhuaktu Saitual game a fuh tlat lo. Match hnihnaah ka sawi mek leh beiseiawm Hnahthial chuan Mamit 2-0 a hnehin Aizawl West I leh Lunglei North palzuttu Hnahthial hi an la chetha tluang zel. Match thumnaah North II hnehtu East I chuan Lungpho 2-1 a hnehin inbuatsaihna hun neih loh vanga beisei pawh nei sang em em lo East I-te hi an chetha tawlh tawlh a ni ber a. Player pawh a neitha thawkhat. Mahse inbuatsaihna hun an neih loh bakah practice-na hun an neih loh em a vangin hun thlawl zawk nena he hun hmuah an chak thu an sawi mek a ni. Mahse player nei tha an ni bawk a, an game a inman tawlh tawlh zelin a lang. Inkhel hnuhnung berah Lunglei South leh Kolasib an innuai tawk hle a. Lunglei hi vanneiin 1-0 in an chak ta. Chakna goal leh goal awmchhun thuntu hi striker Liantluanga a ni a, a ni hi Mizo Aw Sports chuan top scorer turah ka ngai deuh a..
Naktuk semi final :
Match hmasa zawkah Hnahthial leh Aizawl East I an innuai dawn a, dar 12:00-ah. A hmuhnawm dawn tih sawilawk har lo leh sual lo tur a ni. Match hnuhnung zawk dar 2:00-a khel tur Aizawl West II leh Lunglei South pawh hi a nep dawn lo.A nep dawn lo mai a ni lova a hmuhnawm dawn. En lote kan hlep leh dawn a ni mai. Chuvangin Footballl hmuhnawm ti zawng zawng chu Zirtawpniah AR Ground-ah kim vek mai tur.

Tennis luhchilh rawh : Academy-ah luh i duh em ? Kawng a awm a nia..
Tennis thiam tuma zir duh tan zirna hun All India Tennis Association chuan a buatsaih dawn a. Mahni duh dan dana khel ve mawp ni lo tunlai tawng taka Academy chhuak ngat kan tih ang deuh hian a bulthum(Grass root level) atangin mipa naupang leh hmeichhe naupang kum 10-12 inkar tan ATA chuan training pek tur a zawng mek a ni.Tennis khel tawh thin leh la vaw ngai miah lo tan pawh hmun a awm vek. A zira zir tur a nih dawn a vangin thiam sa kher a ngai chuang lo. Zir tur thlanna hi Aizawl Tennis Club-ah September hi 11 leh 12 khian neih a ni dawn a, zir tlaka ngaihte chu National Tennis Academy, Gurgaon-ah enkawl zui an ni dawn.
Eizawnna a vang a, lehkhathiam hna hmu lo kan tam kan tih mek lai hian helam kawngah hian a tui leh thiam, tih tak taka ti tan chuan kawng a awm. Infiamna dangah chuan India ramah hriat kan hlawh ta viau a, Tennis-ah erawh chhuan tham engmah hnuhma kan la nei lo. Chuvang he lama kawngsattu kan ni thei tih hi hriat a pawimawh a.Hyderabad naupang Sania Mirza pawh khawvel hriatah a invawrh thei a nih chuan India ram hriatah hian engah nge Mizo hmeichhia leh mipa te kan invawrh ve theih loh ang. India mai ni lo khawvel hriata kan invawrh ve hun tur hi helama tui leh thahnemngaite chuan tlumtea thlir takin an thlir reng a ni I faten a grass root level atangin tennis an zir ang a, anmahnin an zir phawt chuan kawng a awm tih hi chu a lang reng a ni. Enge, zir lem lo, puitlin hnua tui thar mai mai paw’n sang tak tak an thleng thei a lawm. Chuvangin academy chhuak tur an nih dawn a vangin i beisei pawh tisang nghal rawh. I tisual lovang. A pawimawh ber chu selection an neih hun turah hian i fate kal tir la, tennis khawvel luhchilh tak tak turin tun atang khan i fate rilru buatsaih tum rawh. (Hrechiang duh chuan Ph-2340915 & 2343820-ah zawhfiah theih reng a ni)

Chelsea striker Didier Drogba an rim : AC Milan-ah a lut dawn em ni?
Chelsea striker Didier Drogba chu kan tarlan zuai tawh angin Serie A Club AC Milan chuan an lo beisei deuh tak tak roh a.AC Milan vice-president Adriano Galliano nen thawntanni khan Milan-a restaurant pakhatah an inbia tih thu Gazzetta dello Sport chuan tarlangin hemite pahnih hi minute 15 chhung vel an inkawm a, Real Madrid atanga Ronaldo an dawr hlawhchham takah chuan 30 million euros (38.4 million dollars) vela lak chhuah dan kawng an zawng dawn a ni.
Mak tak maiin kar kalta kartawpa Chelsea ten Blackburn Rovers 2-0 a an hneh tum khan Drogba hi Mourinho 1st eleven-ah a tel lova, second half-ah erawh rawn lutin goal a thun nghe nghe. Kum 28-a upa striker chak zet mai hi kum 2004 July thla khan Mourinho chuan French Club Marseille atangin 24 million pounds (45.6 million dollars) zetin a lei a nih kha. 2004-05 season khan game 40 Chelsea tan a khelhah goal 16 a thun a, kum 50 chhunga a vawikhat nan Chelsea chu Premiership title a lakpui a ni. Ivory Coast international hi Milan hian an rim tak tak a nih chuan transfer deadline pelh hmaa an lak fel hman a ngai dawn a, chuti a nih chuan vawiin chiah hun a awm tawh tihna a nih chu. Milan hian an striker Andriy Shevchenko chu Chelsea-ah 30 million pounds zetin thlahmasa deuh lawk khan an lei tawh a, Drogba hi Milan lamah a kal ve thung mai ang em?