mi(sual).com

HIV leh AIDS – Bible thlirna atangin:
– Melody Lalmuanpuii

Khawvel hun kal tawh leh lo thleng mekah hian HIV leh AIDS anga mihringte tana natna nghawngna leh darh zau, mimal, chhungkua, khawtlang leh khawvel pumpuia harsatna nasa thlentu hi a la awm tam awm love.

December 2005 a lo thlen meuh chuan khawvel pumpuia HIV hrik pai chu mi maktaduai 40.3 an lo tling ta reng mai.1 India ramah pawh HIV hrik pai mi maktaduai 5.13 lai awm a chhut a ni.2 A pawi lehzual chu, heng number te hi nitin, darkar tin a pung zel mai hi a ni. HIV hrik pai ni si mahni in hrelo mi tam tak an awm lehzel nen!

HIV hian khawvel hmun khawi lai pawh thlen lohna a nei tawh awm love. Vun rawng, hnam bing, hausa leh rethei, hmeichhia leh mipa thliar bik pawh a nei hek lo. Mizoram hmun kilhawr tak pawh nasa takin min run mek a, thalai tam tak a hun lovah boral tirin, nu leh pa, khawtlang leh kohhrante pawhin an mangang pui tan ta hle mai. October 1990 atanga January 2006 thlenga Mizorama thisen test tawh mi 25324 zingah mi 1421 te chu HIV hrik pai an ni tih finfiah an ni tawh a, heng zinga mi 602 te hi Drug inchiunna thianghlim lo inhman tawm atanga kai an ni a, 684 te hian inpawlna atanga kai ni a hriat an ni.3

Hetianga harsatna nasa tak a lo thlen lai mek hian kan Pathian hian engtinnge a lo thlir ve anga, kan Bible in engnge min kawh hmuh a tum tih te kan hriat thiam tak ang le?

He paper in tih lan a tum ber chu engtinnge keini Kristiante hian he natna chungchangah hian kan mawhpurhna te kan hriat theih anga, keimahni leh kan lainate he natna lakah hian kan inven him ang tih leh engtinnge kan zinga HIV leh AIDS avanga harsatna tuarte hi kan hriathiama, kan hmangaiha, kan tanpui theih ang tih a ni.

HIV leh AIDS chungchangah hian zawhna chhan harsa tak tak leh Pathian thu atang pawha chhanna chiangkuang tak kan hmuh mai loh tam tak te pawh a awm ngei ang.

Pathian duhthusam lei leh van:

Bible a kan hmuh danin Pathianin mihring leh a thilsiam dangte chu Amah tihlim tur leh a ropuina tilang turin a siam a. A duh ang taka a siam lei leh vanah chuan harsatna, buaina leh natna te hian hmun an nei lo. Amah anga a siam a duhtak mihringte chu hlim leh lawm taka awma, harsatna, lungngaihna leh natna, thihna te tuar lova awm turin a duh ngei ang.

Kan chenna khawvel:

Amaherawhchu, kan bawhchhiatna avangin mi zawng zawngin Pathian khawngaihna kan chang zo ta lova. Rom 3:10 ah chuan ‘ Tumah mi fel tak reng an awm lo, Pakhat mah an awm hauh lo’ tih kan hmu a. Kan zavaia kan bawhchhiatna chuan he khawvel famkim lo leh hrehawm tam tak awmna ah hian min chen tir ta zawk a. Pathian nena kan inkar lo chat ta avang hian kan thlarau nun mai ni lovin, kan taksa leh nunphungte pawh a khawih tel ta hial a ni. Kan chhehvel han thlir pawh hian retheihna, hlemhletna, tamna, natna leh hrehawm tam takin min hual vel a ni tih a hriat theih mai awm e.

Pathianina khawvel siamthar leh chhanchhuah a duh dan:

Mihringin Pathian duh loh zawng a tih a, a bawhchhiat ni atang khan kan Pathian zahngai thei tak chuan chhanchhuahna kawng min lo buatsaih sak thung hi chu a ropui ngawt mai. A fapa Lal Isua Krista hmangin a ring apiangte chhandamna kawng min hawn sak a ni. Rilru a thara awma lo danglam tawh turin min ti a, thilsiam thar lo niin, kan Pathian nena inlaichhinna thar nei leh thei kan lo ni ta a ni.(Rom 6: 4-11; Rom 12: 2) He khawvel famkim lo, hrehawmna leh natna te zingah la cheng ni mah ila, Ani chuan lawmna leh beiseina thar min siam sak thin.

Pathianin a duh ang taka a buatsaih khawvelah chuan HIV leh AIDS hi a awmin a rinawm loh- chutiang bawkin tualthahna, natna, lungngaihna leh hrehawmna te pawh. HIV leh AIDS pawh hi Pathian laka inla hrang khawvela thil lo thleng ve pakhat ni ah ngai mai ila a sual lovang.

Heng kan han sawi tak te ngaihtuah chung hian HIV leh AIDS chungchanga zawhna awm thei te chhan tum ta ila.

HIV leh AIDS hi Pathian hremna a ni thei ang em?

HIV hi a inkai darh dan kan en chuan Pathian duh loh zawnga awmna- mipat hmeichhiatna hman khawlohna avang te, drug a inchiu thin ten inchiuna hmanrua thianghlim lo an intawm avang te a kai an tam hle a ni tih kan hmu thei ang. Pathianin mipat hmeichhiatna nupa inkara thianghlim taka hmang tura min tih laiin, inneihna pawnah leh inneih hmaa hman a ni fo mai. Hei hian nghawng tam tak a nei a- nupa inthenna te, chhungkaw keh chhiate, Inpawlna atanga natna inkai chhawn STI (Sexually transmitted Infections) leh HIV te a thlen fo thin.

Chutih lai mekin, HIV avanga harsatna tuar (anmahni vei an ni emaw, an chhungkua, laina hnaivai HIV positive awmte) tam tak te hi mipat hmeichhiatna kawngah a ni emaw, drug hman chungchangah emaw Pathian dan bawhchhia an ni vek kher lo tih erawh chu kan hriat a pawimawh ang. Natna leh vanduai avanga damdawi in atang emaw a thisen thianghlimlo dawng palh, HIV positive ni ta te an awm bawk. Kum 2004 a India rama study pakhat atanga hmuhchhuah ah chuan India rama HIV hrik pai zawng zawng te zingah 22% te hi hmeichhia, pasal pakhat laka rinawm an ni4

Tin, naupang HIV avanga fahrahte leh anmahni ngei pawh HIV hrik pai te an pung ta tual tual bawk. UNICEF chuan India ramah ringawt pawh HIV hrik pai naupang 70000 chuang an awmin a chut a, tin, HIV leh AIDS avanga fahrah lo ni ta naupang 560,000 vel awmin an ngai bawk a ni5

Kan han sawilan tak atang ringawt pawh hian HIV positive te hian an sual man an hmu a, Pathian hremna an tawk a, chutih laiin, a vei ve lo te erawh hi chu mi fel leh bawhchhe ve ngai lo te an ni e a tih mai theih lo ni tih chiang takin a lang awm e. Pian tirh atanga mitdel chungchangah a zirtirten Lal Isua hnenah, “ Rabbi, mitdel saa a pian hi tuin nge thil tisual, he mi hian nge a nu leh a pain?” an ti a , an zawt a. Isuan, “ He mi hian a tisual hek lo, a nu leh a pain an tisual hek lo……” (Johana 9:1-3)

Kan sualna te ang hian min thungrul zel dawn ta sela, keini ho hi dam tlak kan la awm ang em le?

He natna chungchangah hian Pathianin a mi te lak atangin engnge a beisei ang le?

Bible chuan mahni inhmangaih ang bawka vengte hmangaih turin min zirtir a (Marka 12: 31) Tin, retheite, hmeithaite, fahrah te chungah khawngaih chhuah lehzual turin min duh tih kan hmu.(Jakoba 1:27) Heng te kan tih chuan a chunga ti kan ni tih min hrilh bawk. (Mathaia 25:40)

Lal Isua he khawvela a lokal lai pawh khan Amah ngeiin a takin hengte hi a lantir thin tih kan hmu. Mi ten leh hmuhsit pharte pawh a kut ngeia khawihin a tidam a, misual an tih leh an endawng chhiahkhawntute thian nih a duh a ni tih kan hmu bawk.

HIV chungchangah hian Kristian tam tak chuan demna, hmusitna leh endawngna rilu kan puin, thu kan chhakchhuak fo thin. A chhan ni bera lang fo chu a sual leh sual loh tehna kan siam a, chu mi atang chuan ngaihdan leh thutlukna kan siam thin vang a ni awm e. Kan hriattur atana pawimawh chu a tehtu tur dik tak chu Pathian chauh a ni tih hi.

HIV leh AIDS chungchanga kan hriat tur pawimawhte:

Human – mi tu pawh, mipa leh hmeichhia, naupang leh kum bi thliah bik emaw, hnam

bing emaw pawh awm lovin.

Immunodeficiency – mihring taksa a natna dotu tih chak loh leh tihchhiat.

Virus- natna hrik te tak te, mihring taksa chhunga chak taka inthlah pung thei.

Acquired- Kan pianpui ni lo/Kan dawn chawp

Immuno Deficiency-Taksa a natna dotu lo chaklo emaw, natna do let thei lo.

Syndrome- Natna in belhkhawm te.

HIV hi engtianga inkaichhawn theih nge?

HIV hrik hi heng taksa tuihnang/tuirilah te hian an awm tam ber a, heng atang hian a kai chhawn pawh a awlsam ber a ni.

* Thisen
* Mipa chi
* Hmeichhe serh tui
* Hnute tui

HIV inkaidarhna te:

Inpawlna atangin:

Khawvel pumpuiah inpawlna atangin HIV hi a darh nasa ber a. Inpawlna reng reng ah(oral, anal, vaginal) HIV hrik awm tamna tuihnang kha a kawppui taksaa a luhin HIV kha a kai thei a ni. Hei hi vuna hliam, pan leh kak mita hmuh tham mang loh atangin pawhin a ni thei.

Sexually Transmitted Infections:

Inpawlna atanga kai chi natna (STI) vei te hian HIV an kai awlsam bik a, HIV positive STI nei bawk ten midang an kai awlsam bik bawk. STI hian HIV kai theihna hi vawi thum atanga vawi nga velin a tisang sawt a ni.

Hei hi a chhan pahnih a awm a:

* Miin STI a neih chuan a vunah lawng, kak leh hliamte a awm thin a, hei hian HIV taksa a awlsam taka luhna a siam avangin.
* HIV positive STI neite hian an serh atanga chhuak tuihnang ah HIV hrik an pai tam bik thin avangin.

Thisen thianghlim lo dawn atangin:

Thisen thianghlim lo (HIV hrik awmna) dawnin HIV hi a kai theih bawk. Tunlaiah chuan ram tam zawkah thisente damlo hnena pek turte uluk taka test ani tlang pui tawh a, hei hian nasa takin thisen thianghlim lo dawn atanga HIV inkai a tih tlem phah a ni.

Inchiuna hmanrua thianghlim lo intawm atangin:

Inchiuna hriau leh hmanrua hriam dang vun tipawp theite (drug inchiuna atan a hman, damdawi ina inchiuna, tattoo atan hmanrua, bengverhna, hmulmehna a ni emaw)HIV positive hman hnuah tih thianghlim lohva hman leh a nihin HIV a kai theih bawk.

Nu atangin naute ah:

HIV positive nuin a nauteah a kai chhawng thei bawk. Naute hian a nuin a pai laiin emaw, a lo piang tur an chhar laiin emaw, a nu hnute tui a hnek atangin emaw a kai thei bawk. Damdawi hman anih loh chuan naute 15-30% te hian an nute atangin HIV hrik an kai thei a ni.

HIV in kaidarh dan chungchanga kan hriat sual fo te:

Heng atang te hian HIV a kai theih loh:

* HIV positive te nena inkhat a chen ho in.
* Infawhna atangin ( ka chhungah hliam, kak, thisen chhuah theihna a awm loh chuan)
* In chibai, inkuah, infiamna (sports) atangin
* HIV positive siam eitur atangin
* Thosi leh rannung seh atangin
* Chaw eina fian, no, thleng intawm atangin
* Zun leh ek atangin
* Chil, mittui, thlan atangin

First Aid Precautions:

Accident leh rikrum thilah hliam tuar leh tanpui ngai an awmin a theih hram chuan hengte hi hriat reng a tha:

Thisen emaw, taksa atanga chhuak tuihnang khawih a ngai dawn anih chuan:

* Kutkawr( gloves) hmana, hman zawha fel taka paihbo thin tur a ni
* Hliam leh kak i taksa a awm chuan midang bawihsawm hmain tuam/khuh hmasak a tha.
* Taksa khawi laiah emaw thisen, tuihnangte a lo kai palh chuan silfai thuai a tha.
* Inchhung leh hmun dangah thisen emaw kai palh a lo awm chuan bleach hmanga silfai mai tur.
* Hliam bawihsawmna atana hmanrua hmante tuisoah minute 20 vel chiahin HIV hrik te an thi thei.

Hriat atana tha dang te:

* Hmulmehna (Razor blade) chi te inhman tawm mai mai loh tur.
* Toothbrush, personal hygiene items leh medication (inhaler etc) te intawm loh tur.

Engvangin nge HIV test a pawimawh?

HIV test hi thil namai a ni lova, tihdamna awm lo natna vei tih inhriat chu tumahin an chakin a rinawm awm lo ve. Hei bakah hian midangin an lo hriat ve palh hlauh phei chuan endawng leh hmuhsit mai hmabak ni a inngaihna pawh a awm thei ang.

Amaherawhchu, inrinhlehna nei reng chung si a HIV test tih si loh chuan rilru nuam lo leh ngaihthalo takin a awm reng theih bawk.

HIV positive nih inhriat hma hian tangkaina tam tak a nei ve thei. HIV positive nih inhre hmate hi a inhre tlaite aiin an dam rei duh tlangpui. A chhan ber ni a lang chu, miin HIV positive a ni tih a lo inhriat chuan a nun fimkhur zawkin a hmang thei a, ei leh in tur chungchangah te, natna laka invenhim leh inenkawl chungchangah te, rilru lam leh thlarau lama harsatna awm theiah te pawh midang tanpuina te zawngin a lo inbuatsaih thei bawk. Hengte avang hian hrisel takin hun rei tak chhung a dam phah thei a ni.

Tin, HIV positive nih a inhriat chuan midang kai lo turin fimkhur nachang a hria ang a, midangte hnenah HIV a darh zel loh nan hei hi a pawimawh hle a ni.

HIV damdawi leh enkawlna:

Tun thleng hian HIV laka invenna emaw tihdamna tur damdawi hmuh chhuah a la ni lo.

ARV (Antiretroviral drug) hi HIV positive te enkawlna atana damdawi tha ber leh hman tlak ber a la ni rih a ni. ARV hian HIV hrik te a thatin a ti rem vek thei lova, a intlah pung chak lutuk tur erawh a veng thei a ni. ARV hi a tangkaiin HIV positive pawh mi hrisel pangngai dangte angin, natna lian tham nei lovin kum rei tak tak a dam tir thei a ni.

ARV leh damdawi piah lama HIV positive te tana pawimawh ber pakhat chu rilru a hahdamna leh beiseina nung hi a ni. HIV positive te hian tisa, rilru leh thlarau lamah harsatna an nei nasain, hriatthiamna leh hmangaihngna an mamawh em em a ni. Lal Isua hnungzuitute hian kan unaute, kan thenawm khawvengte tanpuina kawngah hian mawhphurhna kan neih theuh a ni tih i inhre thar leh ang u. Rorelna ni ah, kan Pathianin, “Tih tak meuhvin ka hrilh a che u. Heng mi te berte zinga mi pakhat chunga in ti lo chu ka chunga ti lo in ni,” min ti palh hlauh ang e!6

Sawiho turte:

1. Kan paper ngaihthlak atanga zawhna kan neih apiang te. (Kan groupa kan chhan theih loh zawhna a awm chuan paper present tuin a khaikhawm dawnah zawh leh ni se)
2. Kan thalai tam tak ten HIV an kai lohna turin inzirtirna tha kan mamawh tih chu kan pawm tlan a rinawm. HIV leh AIDS chungchanga inzirtirnaah hian, Sex Education, Condom hman chungchangte kan kohhranah pawh hian kan sawi tlan a tulin kan hre tawh em? A chhan engnge?

This paper was presented by the author (working for World Vision) in Chennai Mizo Service. She is now in Ireland for further studies.

Similar Posts:

• Thosi leh AIDS
• Mizoram leh HIV/AIDS
• World AIDS Day pual
• HIV Hrik Pai te Thinhrikna Hi
• Mizoram AIDS dinhmun

Recent Posts:

• June 2016, Mizo(ram) Diary
• The reason we have bad roads in the North East
• INNGHAHNA TLING THURIL CHU
• Essay on Amen
• A MAKIN AVA ROPUI EM…!!

This entry was posted on Saturday, October 7th, 2006 at 1:22 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.