SHDC Chairman Leh Chairman Hlui Tlungvel Bial Chhuahsan Rawh Se – MPYCC&MPCY
Aizawl, Oct 24 :MNF party leh candidate tana campaign nei mektu Pu Malsawma Darngawn, Chairman, Sinlung Hill Development Council leh Pu Hmingchungnung, Ex-Chairman, SHDC chuan Pu Zoramthanga, Chief Minister tirh nia insawiin Sesawng leh Khanpui khuaahte “HPC te chuan MNF party candidate vote vek tur, vote lo in awm chuan hel pawl pahnih HPCD leh HNA kan kawl reng a ni” tiin mipui an vauin an tih thaih tih MPYCC & MPCY Coordination Committee chuan Chief Electoral Officer, Mizoram hnenah ziakin an thlen. Hetianga invauna leh inrikrapna nena campaign-tute hi titawp a, Tlungvel bial chhuahsantir turin an ngen. Congress party leh MPC Thalaite chuan Pu Malsawma leh Pu Hmingchungnunga vampaign hi thintim thlak an tih thu ans awi a, kum 2003 General election-ah inthlanna thianghlm lo leh bawlhhlawh tak a thleng tawh vei nen ngaithiam harsa an tih thu an sawi. Helho behchhan a, mipui vautute hian Tlungvel bial chhuahsan nghal turin an ngen a, an la awm lui leh campaign lui zel a nih chuan an chungah eng pawh lo thleng se, anmahni mawhphurhna a ni ang tih CEO chu an hriattir nghal.
SHDC Chairman-in Sum, Zu Leh Nula Chen
Hetih lai hian HPC Gen.Hqrs. Sakawrdai chuan press release chhuahin MPC chu Election Commission of India-in a recognised tawh a ni an ti a, Pu Lalmalsawma Darngawn chu HPC dan kalha thil a tih avanga MPC atanga tiam chin awm lova hnawhchhuah lai mek a ni an ti. HPC primary member a nihna pawh hlihsak a ni tawh a, engmah nihna HPC-ah a nei tawh lo an ti.
HPC chuan Pu Lalmalsawma chu SHDC sum (pawisa) zu leh nula nawmchen nana hmang zo zel nia hriat a nih thu sawiin SHDC Chairman a nih chhungin nupui pali a nei hman a ni an ti a, heng a nupui hmingte hi an sawi a, pathum chu Tinghmun an ni a, pakhat chu Ramhlun South a ni. Heng bakah pawh nula dang la nei zel nia hruai zui a ni an ti a, SHDC pawisa nawmchen nana hmang zotu hi mipuiin an duh tawh lova, chuvang chuan Mizoram sawrkar chuan Chairmana nihna hi ban nghal rawh se an ti.
HPC Party Gen.Hqrs. chuan inthlanna emaw inkohkhawm tura tihna emaw a nei lovin a rel lova, inthlan leh inkohkhawmna nei tur anga lo sawi an awm a nih pawhin dawt hulhual a ni tih hre turin mipui an hriattir.
Central YMA-in SRS Convener Hnathawk Lo Hlawh Pek Ngensak
Central YMA-in ruihhlo an donaa Supply Reduction Service (SRS) Duty Convener Pu R.Lalngheta, Financial Secretary, Central YMA duty-na, a sawrkar hnathawh anga pawmsak tura Mizoram sawrkar an dilna a hlawhchham. Thu bul rinawm tak dawn danin Central YMA hian kumin July ni 31 khan Pu R.Lalngheta, Govt. Hlimen Primary School III teacher-in SRS duty-a a hnathawh chu official duty anga pawmsak tura ngenna Education minister hnenah an thehlut a, Education department chuan Central YMA dilna ngaihtuah hian inkhawm a ko ta a. Pu R.Lalngheta SRS duty, sawrkar hna thawk anga pawmsak tura Central YMA ngena chu Education department chuan zahawm tiin Central YMA hma lakna tha ti hle mah se sawrkar kalphung a nih loh avangin Pu R.Lalngheta SRS duty sawrkar hna thawk (official duty) anga pawm chu School Education Commissioner thutlukna siam turin ni 1.9.2006 khan an hlan a. Hetiang hnuah hian ni 27.9.2006 khan Under Secretary, School Education chuan School Education Director hnenah Central YMA dilna chu sawrkarin a pawm theih loh thu a hrilh ta a, sawrkar hna duty pawn lama ama private inhmannaah chuan sawrkarin sawi theih a neih loh thu pawh Under Secretary chuan a sawi bawk a. He sawrkar thutlukna hi School Education Deputy Director chuan ni 18.10.2006 khan Central YMA chu a hriattir ta a ni.
Thu dawn chuan Pu R.Lalngheta hian hun rei tak chhung a zirtirtu hna thawh ai kal atan Lalrampana lain Central YMA-ah hian a lo inhmang tawh thin a ni a ti a. Chutiang a nih lai chuan ni 19.10.2006 zana LPS Local channel-in Central YMA hruaitute a kawmnaa mipui zawhna huna Pu Lalmuanpuia Punte, Kanan Veng-in “Central YMA Finance Secretary banna thehluh hmun ruak luahkhattu R.Lalngheta chuan zirtirtu ai kal a lak thu sawia engtinnge Central YMA-in a ngaih ?” tih a zawhna chu Central YMA President chuan chhangin a zawttu chuan thil hriat chian loh a nei nia a hriat thu leh R.Lalngheta chuan Central YMA Finance Secretary a nih hma pawha aikal a lo lak tawh thu, hun rei tak Central YMA-a a lo inhman tawh avanga sawrkar hotu lam pawhin hriatthiam bikna an pek thu-in a la chhang a ni.
Kut Hnthawk Pawl Thar Din ZNP President-in Tul Lo A Ti
ZNP President Pu Lalduhoma chuan kut hnathawktu pawl inti lo ding thar zel tul lo a tih thu sawiin ‘Kut Hnathawktu Pawl hruaitu atan chuan an harsatna leh an mamawh hrechiangtu anmahni ngei an tha ber a, pawl hruaitu kut no tak tak leh thlam sak dan pawh thiam lote hi an qualify lo a, officerte eirukna chauh pho lang ngam leh a kaikuang dik tak an pute hliahkhuh tlattute an ni a ti. Nimin khan ZNP Office, Aizawlah bye election-a ZNP tana campaigner-te hnenah thu sawiin kut hnathawk suamhmang tawkten Samari mi tha an mamawh takzet tawh a ni a ti a, Zoram Kut Hnathawk Pawl lo ding chu “An din har mah mah zawk a ni” a ti. MNF party-in Block President-te ko khawma, Zoram Kut Hnathawk Pawl dodal tura an zirtir leh ziak meuha ZNP te nena tangho anga an puh pawi a tih thu sawiin ZNP President chuan “Hetia min puh ta rau rau a nihhi chuan kut hnathawktu zawng zawng chu kalphung thar policy tung ding tura hlauh nei lova pen chhuak turin ka ngen a ni” a ti.
Tlungvel buial bye elexction-ah MPF-te duh dan kalha party dangte chu tlag tar lui chiam leh hotela mi khilai vak vakah puhin Election Commission thu kalha motor-a flag tar luih chiam a dem thu a sawi a. ZNP memberte chu MPF thu zawm tluan chhuak turin a chah.
Pu Lalduhoma chuan kum 35 chhung roreltu PC, Congress leh MNF sawrkarte chu thlai ching tura mipuite zirtir si a, a market ngaihtuah leh si lo, a rate pawh puang lawk thei lo leh a leina tur budget-a cheng khat pawh dah duh ngai lo an ni tiin “Hetiang budget hi chu kum za pawh hmang ila, BPL pun tual tual bak hmabak kan nei chuang lo” a ti. Company mai maite pawhin thlai luman (crop insurance scheme) an siam theih tawh laia thlai luman siam thei lo sawrkar hlir kan la nei a vanduaithlak a ni a ti.
Congress-in Tlungvel Bialah Boaruak Tha An Ti
Mizoram Congress (MPCC) chuan Chawngte leh Tlungvel bial bye election neih turah MPCC leh MPC boruak a tha zel tih an sawi. Nimin khan Tlungvel biala Tlungvel, Thingsulthliah, Seling leh Sesawngah Campaign Office MPCC President Pu Lal Thanhawla leh MPC President Brig. T.Sailo chuan an hawng. President pahnihte hi party pahnih atanga hruaitu tamtakin an tawiawm. MPCC press release chuan Sesawng khua atangin Tlungvel MCP Block Vice President Pu R.T.Zuala, Sesawng, MVP Group Vice President Pu Chhawnthanga, Sesawng Venglai leh MCP Unit President Pu Zakima leh MCP member 69 chuan Congress an zawm thar a ti a, heng MCP atanga bang tate hi MPCC-MCP candidate Pu Lalthanliana tlin theih nan khaw hrang hrangah an zin chhuak nghal a ti.
MPC press release chuan vawiin hian Tlungvel biala campaign tur hian Pu Lalhmingthanga, MLA, Dr.J.V. Hluna, Vice President , Pu Vanlalhlana, General Secretary leh Secretary eng emawzat chuan Tlungvel bial an pan ang a ti.
ADCC-in A.R.Kohli’an Chawimawina A Phu Lo An Ti
Aizawl District Congress Committee (ADCC) chuan Mizoram sawrkarin Governor hlui Pu A.R.Kohli chawimawina sang Padma Bhushan dawng tura a recommend chu rapthlak an tih thu an sawi a. Pu Kohli-an hetiang chawimawina sang phu loa an hriatnate an sawi. Nimin khan press release chhuahin ADCC chuan Pu A.R.Kohli chu Mizoram mipui zawng zawng (MNF sawrkar tiam lovin)-ten an chhangkham, Mizoram leh a mi chengte hmangaih awm taka lang, chhungrila duh kha tak, sum tawkdarha Mizo thalaite Hindu puithiam training tura tamtak hnuk liamtu, Mizo hnam leh sakhua rahbeh tum tlattu, zirtirtute leh kut hnathawktute hmusittu, Hindutva policy hma chhuana Kristianna tihthuanawp tum ruh em em, Mizoramah a tam thei ang ber mandir din tumtu, Hindu missionary chhuan tawlawl a ni an ti a. Pu A.R.Kohli kawng engkima lo phurpui a, hma lakpuitu MNF-BJP sawrkar thil tih hian ‘buichhia laih lohvin a inpuang (House chhungah nen lam) tih zawng zawng a neih zo ta a ni an ti. MNF-BJP sawrkar chu tawng tak tia kovin ADCC chuan hel chakna leh therhlo leh vau thlemna tinrenga din, tlusawp tan ta mek a ni an ti a. Hnama chian thu te, Pathian leh kan ram tan tih te vawikhatmah tiri tawh lo tura an duh thu an sawi.
President Chungah Lawm
Mizoram Horticulture Service Association chuan Dr.APJ Abdul Kalam, President of India-in ni 17.10.2006-a Horticulture department hma lakna, anthurium chinna Durtlang leh Iskut chinna Sihphir a tlawh chu lawmawm an ti a, ram lu berin an hna thawh rah a hmuhpui hian a tilawmin an hnathawh zelna turah phurna leh thawhhona nasatakin a pe a ni an ti.
ACCJSU-in CM An Hmu
Kar kal ta zirtawpni khan Aizawl City College Joint Students Union hruaitute chuan Chief Minister Pu Zoramthanga hmuin an lo hmuh hmsak tuma Post Matric Scholarship thla 12 an lak thin thlam 10 la tura tih an nih chu a ngai anga an lak leh theih nan te, vawi (installment) hniha pek tum chu a hlawma an lak theih nan leh kumin chhunga an lak ngei theih nan hma laksak tura an ngenna chu CM chuan hma a laksak dawn thu leh College-te tana Special Library Fund an dil pawh tihhlawhtlinsak a tum thu te a lo hrilh a. Post Matric Scholarship leh Special Library Fund hi tun November thla tira Delhi a kal hunah bawhzuisak a tum avang leh NEC Meeting, Guwahti-a November hlaa neih a nih hunah Union Tribal Affairs Minister hnenah a thlen sak dawn avangin lawmthu an sawi. Mzoram sawrkarin sawrkara lak a tum mekah Aizawl khaw chhunga deficit College pangate duhsak tura an ngenna pawh CM chuan a tul anga bawhzuisak a lo tiam a ni.
Education hmalakna thlir ho
Nimin khan School Education Minister Dr R.Lalthangliana hovin School Education Department hmalakna thlirho a ni a. Vocationalisation Project; Model School din chungchang; Secondary Education tih hmasawn dan tur (Universalisation of School Education); Mizoram hmun hrang hranga DIET kalphung leh hmalakna tur te leh Pawl VII exam chungchangte chipchiar taka sawiho a ni.
Sangthuama Tlungvel Campaign
Cooperation Minister Pu Sangthuama chu Tlungvel bial bye election campaign turin vawiin hian a chhuak ang a, inrinniah a lokir leh ang. Chawngte lama kal a tum chu a thulh leh ta zawk a ni.
Zirlaibu Free-in Semleh Dawn
SSA Mission, Mizoram chuan nakkum school kum atan Mizoram chhunga Govt. leh Govt.Aided School-a Class I atanga VIII zirlaite hnenah zirlaibu thlanbik Rs.150 man a thlawnin a sem leh dawn a, zirlai leh an nu leh pate chu heng zirlaibu thlan bikte lo lei lo turin a hriattir. Heng zirlaibu thlan bik, man lova pek turte hi SSA Rajiya Mission Office-ah en theih a ni.
Hna Ruak Exam Theih
Inspector of Income Tax, Assistant, Sub Inspector, Divisional Accountant/UDC hna ruak atan Staff Selection Commission hnuaiah exam theih a ni a, Exam Centre Aizawl a ni. Kum 18-27 chin tan exam hun ni 4.2.2007 a ni a, dilna form chu District Employment Exchange, Aizawlah lam theih a ni a, thehluh theih hun hnuhnung ni 1.12.2006 a ni.
TRC Alumni Inthlang Dawn
Naktuk dar 11”00 a.m.-ah T.Romana College Alumni inthlanna College hmunah an nei dawn a, he College-a kal tawh zawng zawng chu tel vek turin an sawm.
Pawl Hming Thlak
Phuldungsei Assembly Constituency chu Dampa Contituency tia thlak a lo nih dawn tak avangin Phuldungsei hming chawia zirlai pawl Phuldungsei Constuituency Students Union chuan an hming “Dampa Bial Mizo Zirlai pawl (DBMZP) tiin an thlak a, kar kal taa West Lungdara General Assembly vawi 10-na an neihah kum 2006-07 hruaitu atan Vice President-ah Lalngurdawla Renthlei, Vice President-ah V.Biaksailova, General Secretary-ah Ramdinpuia, Asstt.Gen.Secretary-ah K.Ramengmawia, Treasurer-ah C.Lalrinzuali, Financial Secretary-ah Lalkhumtira Ralte an thlang.
Assam Rifle la dawn
Aizawl Sipai Lammual-ah November 27 – 4 December, 2006 chhung khian Assam Rifle lak a ni leh dawn a. A tel duh te chu 27, Nov. 2006 zing dar 8:00 ah document kimchang nen A.R. Lammual-ah thlen tur a ni.
Similar Posts:
- MICSEA Press Release
- CYMA in pawl dang inrawlh duh lo
- World Class Education kan nei ang em?
- Mizo Aw News Oct. 31
- National Education Day
