Transport Minister Car-ah Party Flag Tar : Model Code of Conduct A Bawhchhia
Aizawl, Oct 25 : MPYCC & MPCY Coordination Committee chuan Transport Minister motor chu Tlungvel bial Thingsul Tlangnuamah a campaign lai hmuh a ni tih Chief Electoral Officer, Mizoram State hnenah an report a, a hma thei anga action tul la turin an ngen. Nimina CEO hnena an lehkha thehluhah chuan ni 23.10.2006 dar 1:30 p.m. velah Transport,etc. Minister Pu Lalrinchhana campaign convoy lirthei MZ-01A-9900 leh MZ-01B-0507 chu an campaign lai hmuh a ni an ti a, Minister car, Maruti Zen MZ-01A-9900-ah chuan Minister hming chuanna (name plate) leh MNF leh MCP flag tar a ni a, Mizoram State Transport ta Maruti Gypsy MZ-01B-0507 chuan a tawiawm a ni an ti. MPYCC & MPCY Coordination Committee hian heng maruti leh gypsy thlalak pawh an lehkhaah chuan an thil tel a, Election Commission Order No.437/6/96/PCN-11 Dated 15th.January 1996 point 7-na chuan sawrkar motor hman hi a khap chiang a ni an ti.
MPYCC & MPCY Coordination Committee chuan MNF Minister Pu Lalrinchhana chu minister nihna plate leh MNF & MCP flag tar chunga a campaign avangin Model Code of Conduct a bawhchhia a ni tiin sawrkar leh MPF tyen action la ngei tura an phut thu press release hmangin an sawi.
Hetih lai hian Deputy Commissioner & District Election Officer, Aizawl District Pu Vanengmawia chuan nimin piaha lehkha an lo thehluh, SHDC Chairman Malsawma Darngawn leh SHDC Chairman hlui Hmingchungnung ten Hmar helte hmanga mipui an vau nia an puhna chu chhui chiang turin SP, Aizawl hnenah a ti a, a report pawh a hma thei ang bera thehlut turin a ti.
Vairengte Bulah Khualzin Suamleh : SDPO Leh Police Thuam Thar Phut
MZP Sub Hqrs. Vairengte chu an ngenna hrang hrang ngai pawimawha sawrkarin SDPO Kolasib temporary-a a pe an lawm a, amaherawhchu Oct.ni 3-a thuneitute hnena November thla ral hma ngeia SDPO post dah tura an phutna leh police thuam thar an ngenna tihhhlawhtlinsak ngei turin sawrkar an phut a, he an phutna hian awmzia a nei lova harsatna a awm a nih chuan engtiang pawhin Vairengte khuain hma an la a nih pawha hre thiam turin Zoram mipui an ngen.
Nimin khan press release chhuahin MZP Sub Hqrs. Vairenmgte chuan October ni 20 zan dar 9:30-10:30 vel khan Vairengte dai Vakultui pengah misual rualin zin veivakte ngampa taka an suam leh an dem takzet thu an sawi a. Vairengte leh a chhehvelah hian tun hnaiah vawi duai lo insuamna a thleng tawhin vawiin thlenga a titu misualte man chhuah lohva an la awm zahthlak an tih leh tlawmthlak an tih thu an sawi. Heng thil avang hian Vairengte khawtlang chuan vawi tamtak thuneitute hnenah police indaih lohzia leh thuam that an ngaihzia an lo thlen tawh thin a ni an ti.
Thupek Kalhin Electric Ban Lawntir
National Trade Union of Mizoram (NTUM)P&E Branch chuan tun Pathianni kal taa an thawhpui Muster Roll Worker Tv.Lalhmingliana s/o Liansua, Electric Veng a duty lai Aizawl Tuikhuahtlangah vanduaina tawka current man vanga a boral pawi an tih leh an tuar thu an sawi a, a kalsan a chhungte Pathianin awmpui se an duh takzet thu an sawi. Press release chhuahin L.T.line nung lai khawih palha vanduai ta a nih thu sawiin CE P&E department order chhuah, MR te Live Line banah an lawn tur a ni lo tih chu a kalh a ni an ti a.P&E department -ah hian hetianga accident tawka boral leh ram tui lei lo eng emawzat tunah hian an awm mek tih sawiin hemi kawngah an memberte thlavang hauhin khauh takin an ding a ni tih sawrkar leh P&E department chuan hrenawn leh se an duh thu an sawi. Danin a sawi ang leh an phu tawk zangnadawmna sawrkarin a pek ngei an beiseiin an phut. NTUM P&E Branch chuan Chief Minister hnenah an harsatna hrang hrang workmen compensation harsatna awm lova inpek leh MR senior tamtak kaisanna, regulara an awm theih dan kawng dap leh hamthatna an neih theih dan turte an thlan tawh thin tih an sawi a, hetiang renga kal tur chuan he department privatisation/corporatisation hi thil bihchian ngai tak nia an hriat thu an sawi bawk.
Chhiatna Laka Inven Nan Khawpui Din Leh Insak Chungchanga Dan Siam Danglam Tulte Zirho
Disaster Management & Rehabilitation department leh Central sorkar hnuaia Building Materials & Technology Promotion Council (BMTPC) buatsaihin nimin khan Engineer leh Architect rual ten chhiatna laka invenna tura khawpui din leh a than dan tura ruahmanna te, khaw thensawm dan leh insak chungchanga khuahkhirhna dante, Mizoram mamawh mila siam danglam tulte zirhona, “Technical Workshop on Model Amendments in Town & Country Planning Act, Zoning Regulations, Development Control Regulations and Building Regulations for Natural Hazard” chu I&PR Aauditorium-ah neih a ni a. DM & R Minister Pu Lalrinchhana chu Khuallian a ni.
Khuallian Pu Lalrinchhana chuan thu sawiin Mizoram-a a vawi khatna atan hetiang technical workshop buatsaih a ni chu lawmawm a tih thu a sawi a. Englai pawha lirnghing tawk mai thei Mizoram ah chhiatna rapthlak a thlen loh na tura insakna hmun leh a sak dan tur chungchangah te khuahkhirhna dan mumal tak neih a tul zia sawiin heta tana Mizoram sokarin kawng hrang hranga hma a lo lak tawh te a tarlang a. Khawpui enkawl turin LAD hnuaiah Town & Country Planning Wing din a nih thu te; Mizoram Urban and Regional Development Act bawhzui nana Dan siam a nih thu te; Aizawl leh district khawpui tana Master plan duan a nih thu leh Chief Minister chairman na hnuaia Aizawl Development Authority pawh din a nih thu a sawi a. Heng Dan zam leh hmalakna hrang hrang te chu a taka kenkawh leh tih hlawhtlin a harsat thu sawiin a mawhphurtu te bakah mipui lamah pawh zau zawka inzirtirna neih tul a tih thu a sawi bawk.
He workshop ah hian BMTPC Chief (BM) Pu J.K Prasad chuan workshop neih a nih chhan leh a thil tum te tarlangin thu hma a sawi a. Chawhnu lama zirhona neihah Mizoram sorkar in hemi kawnga hma a lo lak tawhna te thlir hovin khawpui himna tura ruahmanna mumal neih dan tur leh khuahkhirhna dan zam that tulna lai te zirho a ni.
World Bank Kawng Black Top Nov. Ni 1 Atanga Tan CMZP-in Phut
Chhimphei Joint Mizo Zirlai Pawl tih chu Joint tih paihin Chhimphei Mizo Zirlai Pawl CMZP) tiin an thlak a, Chhimphei Aizawl South III huam chhunga MZP leh Students Union branch zawng zawng in-affiliate theih a ni. CMZP hian tun hnaiah Muallungthu-ah conference vawikhatna an nei a, chutah chuan World Bank Project hnuaia Chhimphei kawng siam mektu contractor-te chuan November ni 1 atangin black top hna an tan ngei tur a ni tiin an rel. Melthum chhungah kawng laih belh tir tura hma lak ni se, tlangdung mite tana hnathawktute 50% hauh tura hma lak ni se, Muallungthu khaw luh tantirh kawng chho lutuk te, Hmuifangtlang chho leh Sumsuih (Midum kham) kawng chho lutukte siam tha tura hma lak ni se an ti bawk. State Referral Hospital, Falkawn a puitlin ngei nan a tul ang zela hma lak ni se, NGO leh nu leh pate nen hemi chungchang zir chianga seminar neih ni se an ti. He an inkhawmpuiah hian branch 15 atangin member 800 vel an kal a ni.
A vawikhat nan ‘Zirlaite Ni’ hman a ni dawn
October ni 27, 2006 khi ‘Zirlaite Ni’ a hman turin sawrkar chuan a ti a. He ni atan hian School Education Minister Dr. R.Lalthangliana chuan Zirlaite hnenah duhsakna a hlan.
Dr R.Lalthangliana chuan ‘Zirlaite Ni’ chu Sorkar-in kum tina hman turin a lo ruahman ta a, he Ni serh hran hi Mizorama Zirlai Pawl hrang hrangte pawhin an nghahfak a lo ni thin a, Sorkar pawhin hei hi a tul zia hriain he ruahmanna hi a lo duang chhuak ta ani a ti a. He Ni-ah hian Zirlaite chu khua leh tui tha, ram leh hnam tana mi chhenfakawm, eizawnna kawng peng chi hrang hranga mahni leh chhungkua leh ram tana chhuanawm tham ni tura tan lakna ni ah leh hma lam hun zela an kawng zawh tur tha thlang thiam thei tura inpuahchah nana hmang turin a fuih a.He Ni-ah hian thupui zir bing atan subject 4 – Ruihhlo leh HIV/AIDS chungchang, eizawnna peng hrang hrang kawng zauzia inhrilh hriat, Sorkar hna ngawr ngawr piah lama mahnia eizawn dan inzirtir te leh ramngaw leh nungcha humhalh te chu thlan an ni.
Tuikuk Hel An Lokir Kim Dawn
Bru Liberation Front of Mizoram (BLFM) hel mi 800 vel chu naktuk hian Tuipuibari Camp-ah sawrkar kutah an ralthuamte nen inpe dawn a, Home Minister Pu Tanluia’n nunphung pangngaia khawsa turin a lo lawmlut ang. Heng Tuikuk helte hi October ni 24 khan Tripura-a 36th Assam Rifles Commandant kuta inpe tawh an ni a, an inpek laiin mi 736 an ni a, hemi hnu-ah mi dang an inpek belh zel a, tichuan mi 800 vel an tling ta a ni. he BLFM inpeknaah hian Chief Secretary Pu Haukhum Hauzel, DGP Pu Lalngheta Sailo, Home Secretary Pu C.Ropianga leh mi pawimawh dangte an tel ang. Heng Tuikuk helte hi Tripura atangin Mizoramah lak an ni tawh a, an zinga 400 vel chu Damparengpui Camp-ah dah an ni a, a dang 400 vel chu Tuipuibari Camp-ah dah an ni. BLFM ten an ralthuam sawrkara an pekluh turte chu AK 47 rifle 1 leha mu 20, 9mm carbine 1, 9mm pistol 2, grenade 2, motar 1, .22 revolver 2, .22 rifle 2 leh tualchher silai 37 a ni.
Sesawng Bial An Chhuahsan
MPYCC & MPCY Coordination Committee chuan MPC intia Sesawng leh Khanpui khuaah teMNF party candidate vote vek tur tia an vote loh chuan hel pawl pahnih an kawl anga mipuite tihthaihtu nia an sawi Pu Malsawma Darngawn leh Pu Hmingchungnung chuan Sesawng bial an chhuahsan nia sawiin lawmawm an tih thu an sawi a, Hmar mipuite pawh dan phal ang ngeia zalen taka mahni duh zawng ngei vote turin an sawm. Nimin khan press release chhuahin MPYCC & MPCY Coordination Committee chuan Tlungvel bye election-ah HPC chuan candidate an nei lovin, MNF party nen thawhhona an siam pawh hriat a nih loh laia Pu Malsawma Darngawn hova HPC intiten MNF party candidate vote tura Hmar mipui an vau an dem leh hetiang hi thleng tawh lo tura an duh thu an sawi a, hetiang a thleng leh a nih chuan a tul anga an ngaihtuah tur thu an puang.
CM Relief Fund Pe
Mizoram Soil & Water Conservation Service Association chuan Chief Minister Relief Fund-ah Rs.10,000 an pe a, he Association hian tun hnaiah General Conference neiin kum 2006-2008 chhung atana hruaitu turte an thlang a, Office Bearers paruk zingah President Pu H.L.Vhungnunga, General Secretary Pu C.Barminghama an ni.
State Core Committee thukhawm
State Core Committee on Adolescence Education Programme chu nimin khan Pi L. Tochhawng Commissioner, Education and Higher Education Department Office Chamber ah neih a ni a. District tinah District Core Committee on AEP din nise an ti a. Committee hian school level a AIDS education kalpui dan tur leh hmalak tawh sa endik hi a tum ber a ni a, Mizoram state AIDS Control Society leh School Education Department tangkawp a hmalak thin a ni.
Aizawl West-I Pakhatna
Art & Culture Department leh MUP Gen.Hqrs tangkawp buatsaih MUP Area Lengkhawm Zai Intihsiak chu nimin khan Vanapa Hall ah neih a ni a. Aizawl West-1 MUP chu pakhatna an ni.He inelna ah hian Area 11 atangin MUP member 1,254 an tel a. kum 90 chung lam mi 4 an tel bawk. Area tel zawng zawng te hi Participation Prize cheng 1000 theuh hlan an ni bawk.Lawmman la te:-1. Aizawl West I Certificate leh cheng 4000,2. Aizawl North II Certificate leh cheng 3000,3. Ramhlun Area Certificate leh cheng 2000.
YMA Gen.Conference Tan Ta
YMA General Conference vawi 61-na chu nizan khan Saitual-a he inkhawm thlenna atana pandal buatsaih “Zofate Run’-ah palai lawmna inkhawmin tan a ni a, he conference hian naktuk thleng a awh ang. Nimin tlai thleng khan palai 1,800 vel an thleng tawh a, an thlen belh zel.
Museum & Records Exhibition
Mizoram State Museum leh Archive, Art & Culture Department chuan October ni 25-27, 2006 chhungin Serchhip Town Hall-ah ‘Museum & Records Exhibition’ an buatsaih.
Manager Hna Ruak
Small Industries Development Bank of India (SIDBI) hnuaiah Manager Group B (General Stream) hna , Bachelor’s degree in Engineering/Economic/Commerce/Science tan dil theih a ni a, dilna form District Employment Exchange, Aizawlah lam theih a ni a, hrechiang duh tan pawh zawh theih a ni bawk.
Hmeichhe Inkhawmpui Lian
Naktip atang hian Mizoram Presbyterian Kohhran Hmeichhe Inkhawmpui Lian vawi 11-na chu Ramhlun Venglai Kohhranin an thleng dawn a, he khawmpui hian October ni 29 thleng a awh ang. He khawmpui thupui chu “I Pathian tawk turin inpeih rawh” Amos 4:12) a ni. Oct.ni 27 dar 6:30 p.m.-ah he khawmpui hawnna inkhawm neih a ni ang a, Rev.Lalramliana Pachuau, Administrative Secretary i/c PWF chuan a hawng ang a, thupui a sawi ang.
“Puanhnuai Thil” Tlangzarh
Vawiin dar 1:30 p.m.-ah hian Chicken Land Restaurant, Treasury Square-ah People’s Right to Information & Development Implementing Society of Mizoram (PRISM)-in Right to Information Act hmanga sawrkar thil tih dan chi hrang hrang an zawhchhuah ziahna bu “Puanhnuai Thil” chu Pu M.Lalmanzuala, IAS (retd) chuan a tlangzarh dawn. PRISM kalphung puanzar a ni bawk ang. He pawl hian an thupui chu “Thil nihna dik tak hriat ni rawh se” a ni a, sawrkar leh sawrkar tanpuinaa hna thawkhote hnathawhnaa mipui chanai chhuhsakna leh dikna chanvo rahbehnate hailang a, puangzar thin tura PRISM hi din a ni a. Sawrkar leh sawrkar tanpuinaa hnathawkte hnathawhnaa thil dik lo awm hre zung zung thei turin hmun tinah member an nei dawn a ni.
Similar Posts:
- Health dept sum bo House-ah an khel
- Health Minister bang rawh se
- Rorelna langtlang awm tur a ni
- CM hlawh thar tur – Rs.1,20,000
- Cheraw Kan world record siam dawn?
