Hriselna Huang :: Mizo Aw

December 14th, 2006 2:06 pm by narzhoc

Meizial Zu Thinten Zu Tlem Lovin An Nghei Hmak Tur A Ni
(kl_sas hian a rawn ngen si a, thiam lo chung pawha post loh ngam pawh a ni lo ve)
Vaihhlo leh a kaihhnawihte vanga a hun lova thihna tawh hlauh vang emaw natna dang tawrh hlauh vanga meizial zu thin, an meizial zuk titlem te chuan zuk tlem mai ni lovin an zialzuk an nghei ngei ngei tur a ni tiin zialzuk chungchang leh a kaihhnawih zirchiangtute chuan an sawi a. Hei hi engdang vang vak ni lovin meizial zuk tlem ringawt hi, a chanve lai pawha tih tlem ni mahse a tawk lo a ni tih an hmuhchhuah vang a ni.
Oslo khawpuia National Health Screening Service director hlui, Dr Kjell Bjartveit chuan “Meizial zuk chingte chuan a rang thei ang berin an zial zuk an bansan tur a ni. Meizial zuk bansan tluka taksa tana hriselna tha tumahin an taksa an pe thei lo” tiin taksa tana meizial zuk a that loh zia a sawi.
Kum 20 chhung tehmeuh Norway rama mipa leh hmeichhia meizial zuk ching mi 51,000 te an zirchianna atanga he thil hi an hmuhchhuah anih vangin an thil hmuhchhuah hi rintlak tak tura ngaih a ni a. Dr. Bjartveit leh a team te hian meizial zuk tlemin vaihhlo leh a kaihhnawih natna, lung tha lo (heart diseases), leh chuap cancer ah te nghawng a neih dan an zir atanga he thil hi an hmuhchhuah a ni a. Meizial zuk tlem ngawt chuan kawngro a sut lem loh vangin ‘nghei hmiah” mai chu thil tha ber ani ta ber anih chu.
Thihna hial thlentu zinga hlauhawm ber pawl mahse ven theih nisi chu meizial zuk hi a ni a. Meizial zuk hian lung tha lo, thluaka thisen lut tawp thut leh canser chi hrang hrang a thlen theih chu thuhran chuap cancer bakah natna tihdam harsa tak tak thlentu lian ber a ni bawk a. Hriselna chungchang hrechiangtute chuan kum 2020 vel-ah chuan meizial zuk leh a kaihhnawih vanga thi hi kumtin mi maktaduai 10 chuang khawvel pumah an awm dawn niin an sawi lawk.

Mi Valaite Natna Ni A Hriat Zunthlum Natna Naupangin An Vei Tam Tawh
Mi valai leh upa lamte natna bik deuh nia hriat thin zunthlum (diabetes) natna chu khawvel pumah naupangten an vei nasa telh telh niin he natna zirchiangtute chuan an sawi.
University of Southern California medical school a pediatrics professor Francine Kaufman chuan he thu hi World Diabetes Congress, Cape Town khawpuia neih tumin a sawi a. Kaufman-i chuan zunthlum natna chu naupang zinga natna tlanglawn tak anih tawh thu leh he natna veitu naupangte chuan an thihpui deuh zel thu a sawi a ni.
International Diabetes Federation (IDF) in data an tihchhuah thar bera a lan dan in zunthlum natna kan hriat tlanglawn tak pahnih – thalaite vei thin, type-1 kan tih mai leh upa lamte vei thin – type 2 kan tih mai bakah, la hriat chian loh naupang vei thin zunthlum natna-te chu a veitu an pung chho zel a. Kum tin naupang kum 15 hnuai lam mi 70,000 vel chuan zunthlum natna type-1 ang chi hi an vei thar ziah a. Type-2 pawh hi ram thangmek leh thang tawh-ah naupang kum 8 hnuai lamten an vei nasa zual hle niin IDF chuan an tarlang.
Zunthlum natna type-2 hi Japan naupang junior high school kallaite zingah veitu an pung ber a. Kum 1980 – 1995 inkar chhung khan Japan naupang he natna veitu hi za a 14 zetin an pung a. Type-1 aiin Japan ramah he natna type-2 hi vei an pung chak zawk. US state thenkhatah chuan zunthlum natna hmuhchhuah thar za a 45 laite chu type-2 an ni ve thung niin IDF data chuan a tarlang bawk.
Naupang zinga zunthlum natna vei hluar chho ta zel hi hri ang maia hluar chho tur niin mithiamte chuan an sawi a. Kum 2025 ah chuan he natna vei hi khawvel pumah mi maktaduai 400 dawn an awm hman tawh dawn niin an sawi bawk.
Naupangten zunthlum natna an vei awlsam chungchang nu leh pate leh naupang doctorte (pediatricians) hrilh hriat nan IDF chuan nakum 2007 hi ‘The Year of the Child’ atan a puang nghe nghe.
Kaufman-i chuan naupang zinga zunthlum natna pung zel chu doctor-ten hriatchian tuma an la beih mek thu leh ei leh in chhiat vang leh exercise lak tlem vangte a he natna hi naupangten an vei duh bik tih chu an hriat chin anih thu a sawi a. Khawvel puma a darh chak nasat chhan erawh hriatchian fak theih anih loh thu a sawi bawk. “Naupan laia naupang thau lutuk hi naupang zinga zunthlum natna tihluar bertu pakhat a ni” Kaufman-i chuan a ti a ni.
Zunthlum natna chi hnih – type 1 & 2 te hi naupang tana hlauhawm bik a, naupang in an vei tih hriatchhuah thuai anih loh phei chuan thihpui nghal maitheih a ni bawk. Insulin injection hmangin zunthlum type-1 hi tihnep a tihdam theih anih laiin enkawlna pek tlai anih chuan a veitu naupang chu a sahal (dehydrate) thuaiin rangtakin thluak a khawih nghal thei a. Chu chuan thihna hial pawh a thlen nghal thuai thei bawk.
Type-2 vei naupangte pawh enkawl thuai an nih loh chuan thihna hial thlen thei natna dang lungphu chawl leh natna dang an vei nghal maithei bawk a. Heng zunthlum natna chi hnih-te hian kal (kidney) natna, lung lam tha lo, mitdel na leh thazam lam natna te naupang-ah a thlen duh bawk niin IDF chuan an report-ah an tarlang.
Naupangten zunthlum natna an vei chungchanga harsatna lian ber chu an nu leh pate mai bakah doctor-ten an vei tih an hriatchhuah sak mai thin loh anih thu leh naupangin zunthlum natna an vei anih chuan an chauh hluah hluah bakah an tuihal huam huam thin niin IDF chuan an sawi bawk.
Thalai zunthlum natna vei pangngai taka enkawl loh te chuan damchhungin insulin injection emaw damdawi man to tak tak hmanga enkawl an ngai thin a. Hetih lai hian zunthlum natna vei tih hriatchhuah thuai anih chuan he natna zual zel tur ven kawngah nasa takin kawngro a su thei thung.