mi(sual).com

An hmel enin an tlawm a, an thuam tha ber rawn inbel mahse khawpuiah chuan a mawi zo lo. An hmai a zur a, a dum a, an hmelah ‘beiseina’ ka hmu tawh lo. “Kan mangang..” tia an sawi an sawi hi thudik nilo anga ngaia nui sawng chunga lehlam hawisantu hruaitu kan nei ang tih ava’n hlauhawm em!

Kut hnathawktute hi ka lo vei ve thin, a remna apiangah tarlana sawichhuah hi ka mawhphurhna niin ka hre thin. Nikum khan Saitualah Zoram Kuthnathawktu Pawl chu tereuhtein a ding ve a. Chumi tum chuan LPS X Ray atan leh keimahni Aizawl Post leh Evening Post atanga han kalin activist Ruatfela Nu leh ka thiante pali nen kan han kal a.

Nilenga kawmna han neiin chu thuthar chu theihtawp chhuahin kan thehdarh a, hei tunah chuan Mizoram puamah branch 150 chuang an ding tawh. April ni 19, 2007 khan an dikna leh chanvote an chan ve theih ngeina turin la awm ngai lo Kuthnathawktute chuan Aizawl khawpuiah kawng an rawn zawh ta a ni, a boruak chenchilh tan chuan turu tak a ni.

“Ningani” te, “April ni 19” te a lo inherchhuak ve fo tawh a, mahse kum 2007, April 19 erawh ni danglam a ni. He ni hi Mizo history-ah chuan ni pawimawh a ni reng tawh dawn a, French Revolution intanna aia a nepna a awm chuang lo.

Tuk dang ang bawkin April ni 19 tuk hian khua a thiang a, dar 10 chhoah phei chuan ni a sa vawl vawl hle a. Chanmari kawn ka thlen thlak rual chuan ka hmuh tum chu ka zuk hmu nghal mai a, amaherawhchu ka kal hma deuh ni ngei tur a ni. Kuthnathawktu pawl aukhawmtu pa pakhat leh amah tawiawmtu chiah chu chu kawnah chuan an lo la awm a, Pik Up chunga chuangin long-horn hmangin Kuthnathawktute ni ropui thlen tur thu chu a kianga mite hriat phak ngei tur chuan a lo puang mek bawk a. Dar 10 a pel tawh a, kawng zawh hun kha 11 a ni mai si a, pahnih chauh an la awm si… ‘E heu! A hunah an zuai leh si dawn em ni?’ tia ngaihtuah rauh rauh chung chuan a nghah lam chak a ngai a nih hi tiin ka rilru ka siam ta a.

Kan lo kal alawm hei!

Dar 10:30 a nih meuh chuan City Ride te chu a rawn thleng ta zut zut mai a, tlemin ka thaw huai. Kuthnathawktute an dinchhuah hma chuan Zoram hi a eng dawn si lo a, chu chuan kan economy hi a nghawng tlat avangin Kuthnathawktute an harha Zoram mipui kan harh hun hi ka lo nghakhlel ve thin.

Kawngzawh hi an hmalakna lian hmasa ber tur a ni a, a hlawhtlin chuan ‘step’ khat an kai tihna a ni dawn a, hei hian Zoram kalsiam hi a her danglam bawih dawn si a.

Dar 11 a rik meuh chuan Chanmari kawn khat deuhthaw an rawn thleng hman tawh a, flag dum leh a var inpawlh(A dum hi hmun thuma thena hmun hnih a ni a, hei hian rahbeh an nihna a entir. A sen hi hmun thuma thena hmun khat, hei hian an manganna avanga thisen chhuah an hreh loh zia a entir, a sen vek a nih hun a thleng ang tih a hlauhawm!) chu an rawn vai ta suau suau mai le.

An hmel enin an tlawm a, an thuam tha ber rawn inbel mahse khawpuiah chuan a mawi zo lo. An hmai a zur a, a dum a, an hmelah ‘beiseina’ ka hmu tawh lo. “Kan mangang..” tia an sawi an sawi hi thudik nilo anga ngaia nui sawng chunga lehlam hawisantu hruaitu kan nei ang tih ava’n hlauhawm em!

Dar 11:30 a nih meuh chuan an khat mup mup tawh a, an ‘polite’ em em a, traffic tihbuai mawlh kha an hlau. Chapona nei lo, nunbeidawng ni bawk si. Intepui an ak a, Aizawla khawsa thenkhat khan an thlek he he a, thenkhat chuan an nuih. Mahse ram leh hnam hmangaihtu tan chuan nuih chi an ni hlawl lo. Kawn an khah a, a sang tel tehmeuh an rawn inzui a, motor 50 chuangin an rawn in trip a, branch 85 lai atangin an rawn fehchhuak a, khawchhak hmun hla tak tak Biate leh Mimbung atangte pawhin palai an rawn kal nual a, hei hian Kuthnathawktute harsatnain thingtlang mite a hrutrual zia chu a tarlang chiang khawp mai.

Kawng tum kan rawn sial e

Upa tak tak, khup zawi tawhte khan flag an keng a, “Ka tu leh fate tan tala ka theihna ka chhuah hi a tha si a..” tia kum 80-a upa pakhatin a sawi phei kha chu kan roreltu hausa tak takte hi chuan hria se aw!

Neih chuangliam an nei lo a, nitina ei tur pawh an tan chuan vana rah ang a ni chho tan der tawh. Kum 2008-ah mau a tam dawn a, an nitin eizawnna buh hmun lah an siam ngam tawh si lo. “Sazuin a seh vek ang a, ei tur kan nei dawn lo asin,” tia an sawi hian an dinhmun hi a sawi chiang a, mahse kan hrethiam phak duh si lo.

An chan turte an chan vea an hnena sum a thlen phak ve theihna turin Aizawl khawpuiah kawng an rawn zawh ta a ni a. Han ngaihtuah teh, Aizawl mipuite hi kan mangan avang hian a sang tel tehmeuh New Delhi-ah khuan kawng zu zawh ta i la, chumi a thlen hunah meuh chuan kan chan a chau tawh hle tihna a ni dawn asin.

Tharum tawh an hreh lo a, sawrkarin an duh ang a tihpuitlin loh chuan duhthlan tur erawh an nei hek lo. “Mizoram mipui zaa 80 Kuthnathawktu kan ni a, zaa 20 lek awpbeha kan awm hi a dik lo,” tia an rawn au chhuak hian Political Scientist, Socialogist leh Historian te thin a thawng nasa dawn asin. Khawvel ram hrang hrang, South Africa te pawh kha, political change turu tak thlen dan chiah Kuthnathawktute pawl hian an rawn zawh a. Hei hi an hriat lawk vang a ni lo a, hunin a herchhuah vang a ni. Kan chhe hle a, khawpuia cheng tam zawkte pawh hi kuthnathawktute ang hi kan ni tawh.

‘A hausa leh a lian tlemte an awm a, chhungkaw tlemte an ni a, chhiar tham lek an ni. Chu’ng mite chuan an duh danin mipui chu min sawp taa ni,’ tia thil chhut miin an lo sawi thin fo min ngaihtuahchhuahtir lo thei lo.

Peter Street kan thleng a, “Kan khawpui ve tho a ni a, kan manganna kan rawn thlen a ni,” tia thusawitute’n ruahsur hnuaia mipui an address laite khan khawnge kan thingtlang Minister te chu.

Kawngtum an sial chuan a daltu chu hmanraw hmangin an tikiang thin, Zodin Square an thleng a, French Relovution chhuah dawn a, “Chaw leh chhang kan duh…” tia kuthnathawktu mangang khawpuia an aurual thute kha ka ngaihtuah chhuak a, ka tim ur ur. Kan society-ah hian class lianpui kan lo then der tawh hi a lo ni a. Police lam chuan an order hmuh chu an hlen a ngai a, Treasury lama kal lo turin hrui an lo pawt a. Kuthnathawktu hruaitu lam pawhin kallo turin an ngen nasa nghia’ng.

Mahse… anni chuan DC thuchhuah an ngaihtuah ve lo a, DC ai chuan an chemkawm leh tuhlawh, an eizawnna kha a pawimawh zawk a. An awmnaah chuan kawngtum khawiah pawh an kal thei a, khap a awm ve si lo.

‘Min hmusit hrim hrim, engvangin nge kan kal loh ang, min dang tur a ni lo,’ tiin hmalam amite chuan an nek ta!

Police lam chuan an lo hlap a, thisen pawh a chhuak bawk e, Kuthnathawktute lam pawhin police an vawm ve bawk. He scene-ah ka awm lai hi chuan History-a lal tam tak, mahni nawmsakna chauh ngaituahtute ka mitthla a, kuthnathawktu mangangin chaw leh ei tur dila an au laia an sipaite’n fei leh kawlhnam nena an lo beilette kha ka chan rum rum. Rei ngial an innek hnuah Tennis court lam panin kawng hnuaiah chuan an kal chhunzawm ta a, Agriculture office kawta Farmer’s Cell tih an din, tun hnaia Kuthnathawktute mangang hnu fea engti ti emawa an din chawp chu an chhutdarh ngei ka lo ring ve ngawt a.

Agriculture leh Horticulture department an khar vek a, police te phei chuan AK 47 te pawh an ak hlawmin ka hria, kuthnathawktute vangin.

Thalai lehkhathiam an rawn cho

“Mizo ve tho kan ni a, nangni pawh in ni a, min hlap lo ula,” tia police an auhna ri khan Mizo nun mawi tak kha an rawn puangchhuak ka ti lo thei lo. Mizo leh Mizo te chu Mizo khawpuiah chuan an intualvuak an ring ngai lo, mahse khawvel hi zawng a chhelam hawi zawngin a thang tlat si a ni.

A tar, a zur, a pang leh chhungpui nu thlengin Zawlkhawpui an rawn mawi a. Kawngzawh laia nuih an duh lo a, an lungawi lohna an rawn lantir tlat si a ni.

Tennis court bulah chuan Zoram Kuthnathawktu Pawl president chuan khur dat datin thu a sawi a, “Tunah mai khan mi rethei thisen a chhuak a…..” a hnuk a ulh tlat, a la chhuak lehzel ang. Kan unaute’n thisen chhuah an hreh tawh lo, a ngaihna an hre si lo.

“Kan thihrala hman tur atan emni kan mithiamte khan in thiamna kha hman in tum… thalai mithiamte kha ka rawn cho che u a ni,” tiin thalai lehkhathiamte chu kan unau manganga puk mawnga tawm mek tawhte chuan min rawn au ta a ni. He chona hian Zoram hmangaihtu thalai lehkhathiam tam tak hi a auchhuak zo ang ang em? Tun hi a hun chu a ni tawh si a.

Mithiam tia ka lo hria ve thinte chuan he ni hi an hlut a, an kal thahnem hle. Tin, ram veitu tak tak nia ka hriate hmel ka hmuh tam avangin ka thlamuang lehzual.

Ka hmuh ve dan chuan kan ram hi chhan tlak ala awm a, Kuthnathawktute hian min finchhuah a, thalai muhilte pawh an thangharh ngei dawn niin ka hre tlat. Kan manganna hi a inthlau lo, hnalak, induhsak, contract, supply etc. thlengin eng sawrkarah pawh duhsak uchuak tlemte chauh an awm zel si a, thisen chhuak kher lovin tun hi insiamthat theihna hun chu a ni.

Ram siamtha turin engnge pawimawh ber ang, kan tih chuan mipui a ni mai. Mipui zaa 70 te’n ram kan siam tha duh a nih chuan kan duh thlanna kan VOTE ngei hmangin kan siamtha ang chu. Kum 2008 khi ram siamthatna rahbi pawimawh ber a ni ang a, Mizo history-ah kum pawimawh a ni tawh bawk ang. Zoram Ka Ram ti ngamte tan chuan thut mai mai a hun tawh lo e.

Zoa Tlau,
Picture dang kha link a dik lo. Min lo email mai rawh. Ka lo dah a nge.
-benjamin

Similar Posts:

• Zoram Kuthnathawktu Pawl a phel
• Thalaite’n Kuthnathawktu an tlawh dawn!
• “ZKP kan phel lo”: ZKP
• Bafacos Hla
• Zoram tan

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, April 21st, 2007 at 1:23 am and is filed under More than words, News. You can follow any responses to this entry through the RSS 2.0 feed. You can leave a response, or trackback from your own site.