mi(sual).com

Kan nghahhlelh Independence Day Football Tournament chu nimin, Thawhtanni khan AR Lammualah an khel tan ta a, a ni khatna atangin a hmuhnawm ngei mai. Assam Regimental Centre, Shillong an chak zo bik lo a, Luangmual FC nen 1-1 in an inhnehtawk a; FC Kulikawn an chak chiang a, College Veng FC 4-0 in an sawp.

Tournament chungchang

Tun tum Independence Day Football Tournament hi vawi 25-na a ni a, 1986-ah neih a nih loh avangin a kum zawng chuan a kum 26-na a ni thung. MFA chuan kum dang zawng aia chang tlungin a buatsaih a, state pawn team pahnih a sawm a, tournament hlawhtling tak a nih ngei a beiseiawm.

He intihsiakna hi Mizoram State Sports Council Secretary thar, Pu Lianzuala’n a hawng a, Pu Lianzuala chuan MFA hmalakna leh football lama tun hnaia hmasawnna awmte fakawm a tih thu a sawi.

ARC bul tan fuh mahse…

Assam Regiment hi Northeast-a club tha ber pawla sawi an ni a, player tha paruk vel tel lova lo zin an ni a, an chhe chuang lo. Bul an tan fuh a, a tir lamah Luangmual FC an talbuai a, ARC hian chance pawh an nei nual a, an khung lo mai a ni. Minute 18-na a ni a, Luangmual midfielder ball pek dik loh vanga ARC freekick hmuh atangin a goal ta – freekick-a ball lo kal chu penalty box chhung atangin Lalduhzuala chuan chiang zet maiin a pet goal a, ARC-in Mizo player goal hmangin hma an hruai.

Hemi hnu pawh hian ARC hi an hlauhawm thei hle a, goal erawh an thun belh thei lo a, first half-ah an chungnung.

Hei le Luangmual

Second half a ni a, fans nei tha em em Luangmual lamin formation an thlak danglam a, 4-4-2 pangngain an nawr a, Sama Hnamte a khel tha ngei mai. Luangmual hian hun rei tak an nawr bet ve thung a, minute 86-ah substitute Lalruatliana (Tawia) chuan Luangmual goal pawimawh a thun. Team pahnihin goal an thun belh teuh dun khawp mai a, Luangmual hian an goalkeeper Rinmawia hnenah lawmthu sawi rawh se!
Luangmual fans an thawm a ring a, team an tawiawm tha em em a, an fakawm a; amaherawhchu ‘mawl fâl’ pahnih khat avangin an hmingchhe lek lek a, inkhelh leh hunah chuan a ziawm tawh ang – hetiang taka football tuipui Luangmual hi football tinungtu leh tournament tihlawhtlingtu an ni tih erawh sawi hmaih chi a ni lo.

Kulikawn nge nge

FC Kulikawn hi MFA Cup-a an champion hnu lawk khan an player thate’n an chhuahsan duak a, an la tlachhe mawlh lo – College Veng FC 4-0 in an sawp. Inkhel an tan chiah a, Lalrochama’n Kulikawn goal khatna a thun a, hemi hnu hian Lalhlimpuia’n Kulikawn goal hnihna a thun zui a – an khel tan dawn chauha 2-0 in hma an hruai der mai! First half tawp dawnah David Lalrochama chuan a thun belh leh a, Lalsangkima’n an goal li-na a thun leh bawk. Kulikawn leh Luangmual hi naktukah an intum ang a, ARC leh College Veng an inhmachhawn leh bawk ang – en rawh u.

Vawiin inkhel tur

Vawiinah inkhel pakhat chiah awmin dar 2:30-ah Zotlang FC leh 3rd MAP an insu dawn a, a hmuhnawm ang, Zotlang hi tun hnaia kai thar an ni a, hmasawn tuma a khawtlanga tan la mek an ni. 3rd MAP hi team tha tak ni thin kha an ni a, tunlai tak hian an ‘key player’ thenkhat training-in an awm bo mek a, result sawi lawk harsa tak a ni.

Similar Posts:

• 2nd Wai Wai Cup tan a ni
• Independence Cup 2008
• BMA Football Tournament
• Mizoram-ah football a parvul mek e
• Independence Day Celebration Football Tournament

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Tuesday, July 31st, 2007 at 2:33 pm and is filed under Sports & Games. You can follow any responses to this entry through the RSS 2.0 feed. You can leave a response, or trackback from your own site.