2nd Wai Wai Cup tan a ni

November 20th, 2007 5:09 pm by hmingsanga

2nd Wai Wai Cup for Inter Contiturncy Football tournament chu thawhtan ni khan khelh tan a ni a. He tournament ah hian MLA Bial 40 awm atangin Bial 20 atangin team an tel thei a. Mizoram hmun hrang hrang atangin inkhel thiam te Aizawl ah an fuankhawm mek a ni. Wai Wai Cup ah hian Sports Minister ber Bial an tel lo chu sawi a hlawh hle a. Chutih laiin Aizawl khawpui chhunga football khel thiam tamna veng awmkhawmna Aizawl South I pawh sawi a hlawh ang reng phian bawk. Inkhel hmasa berah defending champion Lunglei North leh Aizawl North II te chu goal khat ve ve thunin an in hneh tawk.

Aizawl pawn lam team te an che tha chho mek zel. Ni 20 Nov a inkhel hmasa berah Aizawl North II leh Serchhip te an inkhel a. Goal khat ve ve thunin an inhneh tawk. Aizawl North II tan tunhnaia India U – 16 tan a che tha tak leh India tana goal thun hnem ber Malsawmfela jersey No 10 chuan inkhelh tan atanga mins 33 naah Aizawl North II tan nalh takin goal a thun a. First half ah Serchhip hian an siphurh an sut hman lo a. Second half tan atanga rei loteah Serchhip chuan R.Lalfakzuala hmangin an si phurh an sut a. Hun tawp thlengin goal an in pe zui ta lo a, goal khat ve ve thunin an inhneh tawk ta a ni.

Match No 2 ah Aizawl khaw pawn Kawnpui Contituency team te chuan Football tha tam tak awmna Aizawl East II chu 2- 1 in an hneh. Inkhelh tan phat atangin Kawnpui lam hian an nawr nghal a. Inkhelh tan atanga minute 20 naah Laltlanmawian Kawnpui tan goal hmahruai a thun a, chumi hnu minute 6 lekah Lalnunsangan Kawnpui tan a goal hnihna a thun leh a. Second half tawp dawn lamah Vanlalchuanga chuan Aizawl East II tan a pek goal ve leh a. Aizawl East II lam hian an sipurh an sut zo thei ta lo a ni. Aizawl East II ah hian player tha an tam tehreng nen, an hmel hmuh tur a awm lo a. A inbuatsaih tha zawk Kawnpui te chu an chak ta zawk a ni.

Tun tournament khelh tawh chin a match khata goal luh tam ber ni turin Lunglei North chuan an khingpui Bilkhawthlir chu 9 – 1 in an hneh. Lunglei North tan R. Lalhuliana ( 3, 10, 11 mins) Malsawmtluanga ( 8mins), Lalthlamuana (21mins), R.Lalnundanga ( 56,74) K.Vanlalnghaka leh R. Lalmuankima ten goal khat an thun ve ve a. Lunglei North player R.Lalhuliana chu tun tournament a hattrick siam hmasa ber a ni. Bilkhawthlir tan Robert C.Lalrosanga chuan goal awmchun a thun.

Mizoram East Derby ah Millennium Cup champion Champhai leh team nei chhe ngai lo Khawzawl te an in hmachhawn a. Inkhel a hmunnawin a tang hle a. Inkhelh tan atanga minute 20 na ah Champhai chuan Lalchhanchhuaha hmangin goal an thun a. Khawzawl lam hian an si phurh chu sut tumin theihtawpin bei mahse Chhanchhuaha goal thun hi Champhai chuan chakna atan an hman phah ta a ni.

Similar Posts:

Recent Posts:

One Response to “2nd Wai Wai Cup tan a ni”

  1. 1
    GirlNextDoor Says:

    Politics endorsement?

    Report this comment

Leave a Reply

You must be logged in to post a comment.