mi(sual).com

Ni 21.4.08 (Thawhtanni) zing 7:00 khan Mizoram Computer Science & Engineers Association (MICSEA) te chuan Pu Zoramthanga, Hon’ble CM of Mizoram hnenah Information Technology chungchang ah Memorandum an thehlut a. Hemi hunah hian MICSEA member kal pawh an thahnem hle a ni.
A hnuaia mi hi MICSEA tena C.M hnena Memorandum an thehluh chu a ni e.

MEMORANDUM TO CHIEF MINISTER, MIZORAM

21st April 2008
To,

The Hon’ble Chief Minister
Government of Mizoram

Dear Sir,

A hmasain MICSEA (Mizoram Computer Science & Engineers Association) hmingin chibai kan buk a che.

Keini, MICSEA (Mizoram Computer Science & Engineers Association) te hian Mizoramin Information Technology lamah kawng hrang hranga hma a sawn theih nan theih tawpin hma kan la mek a. Hetiang hian ngun taka kan zir chian hnuah, I.T lamah chak taka Mizoramin hma a sawn theihna turin thu pawimawh tak tak nia kan hriatte kan rawn thlen a, a tul anga hma min laksaka min bawhzui sak nghal turin kan rawn ngen a che.

1. Indian Institute of Information Technology (IIIT) din chungchang
Prime Minister Dr. Manmohan Singh an ni 15.08.2007 a a thu sawiah India ram chhunga IIT pariat (8), IIM pasarih (7), IISER panga (5) leh IIIT sawmhnih (20) din belh tur a sawi chu bawhzuiin Mizoram sawrkar pawhin IIT leh IIM a lo dil ve na chu tihhlawhtlin a ni ta lo tih kan lo hria a, pawi kan ti hle a ni. Mizo te tan Information Technology zirna kawngah thlen san ve theihna kawng a awm ve dawn ta lo niin kan hria a, chuvangin, Mizoram leilung chhung ngeiah hian Indian Institute of Information Technology (IIIT) din ve ngei ni rawh se. IIIT hi Ministry of Human Resource Development hnuaiah awlsam taka din theih a nih avangin chak taka hma min laksak nghal turin kan ngen a che. Tin, hemi chungchang bawhzuia hma la nghal tur Committee din ni rawh se.

2. Internet Connectivity chungchang :

Mizoramin Internet connection a hmanna bulpui ber chu BSNL hi a ni a, mahse mipui mamawh ang a phuhruk zawh thin loh vangin Mizoram mipuiin harsatna nasa tak kan tawk mek a ni. Chuvangin, he mipui harsatna sutkian theihna tur leh IT lama chakzawka ke kan pen theihna turin Power Grid Corporation of India Limited (PGCIL) ten Fibre Optic Cable an rawn thlunzawm ve theih ngeina turin Mizoram Sawrkarin hma chak takin la rawh se. Hetiang Cable hi thenawm state ten an hmang vek tawh a, tun dinhmun atang ringawt hi chuan mimal, sorkar hna hmulo ten Internet hmanga sumdawna liantham din turin kawng a ping tlat a ni. Tuna internet hmang nasa heng Banking, Online Air ticket booking te pawhin harsatna an tawk fo thin a, hemi avangin Mizoram Sorkarin Power Grid Corporation of India Limited ten Optical Fibre Cable (OFC) hi a rang thei ang bera an rawn thlunzawm ngei theih nan a rang thei ang bera hma an lak hi kan phut tlat a ni. Hemi chungchang bawhzui tur committee din ni bawk rawh se.

3. Department of Information Technology chungchang :

Mizoramah Department of Information Technology din turin Cabinet Meeting in a passed ta hi lawmawm kan ti hle a. He department thar enkawl tur hian IT lama degree sang nei, Computer Engineer te ngeiin enkawl ni rawh se. He Department thar hian a nihna tur ang taka ke a pen nghal theihna turin I.T Officer post nghet siam thuai rawh se.

4. Department tina I.T Officer dah :

Tunah hian National e-government Plan (NeGP) hnuaiah State Mission Mode Project hmangin Sorkar Department 14 thlan hmasakte chu Computerized vek tum a ni a. Hei hian I.T hi sorkar department tinin an mamawhna a san tawhzia a tilang chiang hlein kan hria. Tin, Department thenkhatin I.T lam kaihhnawih Project an neihte thutchilhtu I.T Officer an la awm loh avangin harsatna lian tak a awm thin niin kan hria. Chuvangin Sorkar Department tinah I.T hmasawnna tur Project full time-a enkawl tur bik I.T Officer, Gazette post dah vek ni rawh se. Tin, Department hrang hranga I.T Post hniam ber atanga a sang ber thlengin I.T Department hnuaia service ni vek rawh se.

5. Recruitment Rules siamthat chungchang :

DP&AR in recruitment rule I.T atan bika a siam hi tunlai dinhmun atan chuan a hman tlak tawh lo hle a, Hei hian nasa takin Sorkar Department hrang hrang hna lak chungchangah harsatna lian tak a thlen mek niin kan hria, chuvangin tunlai thiamna mila recruitment rules hi siam that thuai ni rawh se.

Mizoramin Information Technology lama hma a sawn zel theih nan Mizoram Computer Science & Engineers Association (MICSEA) hi a tul anga Sorkar hmalakna tanpui leh finchhuah a inpeih reng a ni.

Ram tana I thawhpuite,

(Er. VANLALRINGA) (Er. R. LALHNEHTLUANGA)
President General Secretary
MICSEA MICSEA
Gen. Hqrs., Aizawl, Mizoram Gen. Hqrs., Aizawl, Mizoram

Similar Posts:

• MICSEA Press Release
• Engineering branches: Computer Science Vs IT
• Mizoramah Software Technology Park : Sachin Pilot
• Chief Minister-in website thar ‘Mipui Aw’ a tlangzarh
• Mizo Computer Engineers form association

Recent Posts:

• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release
• Ka lawm e, Mi(sual)-nu!

This entry was posted on Monday, April 21st, 2008 at 2:56 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.