mi(sual).com

Chênna ngai loh ram fan thu – Lalnghinglova Hmar (Tete-a)

South East Asia Editor’s Retreat hmangin Kathmandu lam

Katmandu tih lêmah, kan inhmukhawmna hmun tak hi chu Nagarkot a ni. Katmandu atangin darkar khat leh a chanve kal a ni a, a sang zawng chu Phawngpui tlang nen a inchen deuhthaw a, tlang chhip thengthaw nuam em em, Mount Everest pawh a lan theihna hmunah min dah a, hriat loh thil kan khel a, kan hriat ve chhun chhunte kan sawi bawk a.

Kan chhuak e…
Lengpui Airport panin kan chhuak a, thil ka va hmu hnem tehlul em! Driver motor kian tha duh lo ka hmu phawt a, kawngsira zu lo in ru kerh kerh ka hmu bawk a, taxi phênah an thu bial ang laih a! RV-a an sachek bêl ka hmu a, a tak that hmel ngek ngâwk khawp mai a… kan sorkar thil khap bur a zalenna hmun a ni bawk a. Lengpui Airport luh dawn hmuh hrehawm khawpa hnim tawh lutukte pawh ka hmu.

Thlawhtheihnaa kan chuan tawh hnuah kan thlawk thei lawk lo. Mizo officer lian ber zinga mi hi a lo tlai pek a, thlawhtheihna panin airport terminal building atangin a rawn tlan phei tak tak mai a – Jamaican tlan chak Usain Bolt ka hre chhuak a, Bolt ni ta zawk se… tih mai mai ka ngaihtuah! Kolkata kan thleng a, Mizo footballer-te nena kan ‘beihrual’ chanchin chu vanglaini phek hnung berah ka ziak tawh – Nepal kan pan ta.

Kan thleng e…
Kolkata atanga ka thurualpui neih chhun chu Jayanta Bhattacharya a ni a, Tripura-a Press Trust of India Chief of Bureau a ni – HC Vanlalruata thian tha taka ni nghe nghe. Ani hi a hmanhmawh thei angreng si a, kan thlawhchhuah hma darkar hnihah airport kan thleng der tawh a, thingpui vawi hnih kan in hman.

Kolkata atangin Katmandu Airport kan pan a, kan thlawhna chhuak tur an tihkhawtlai avangin airport-a min lo hmuaktu kan thian dangte (Delhi leh Dhaka atanga lo kal) chuan min lo nghak rei tawh hle – kan thleng a, kan inchibai.

Ka zinna tura min dawrtu ber Kazu Ahmed nen kan inhmu a, kan inhmuh vawi khatna a ni. Kekawrbul nen, T-Shirt lian pui a ha bawk a, a ti hnuang mai a, a palian a, a sam a kir zui bawk si a, “Hawaii lam chhuak i ni lo maw?” ka ti nghe nghe a – a ni lo.

Barakhaih tha chi
Katmandu Airport kan hmu a, a hluiin a chhe tawh hle mai. Airport atangin Nagarkot kan pan a, Katmandu khawpui kan kalnate chu India ram khawpui naran ang ve mai niin ka hmu a, a ‘pui’ hran lo. Chutah Nagarkot chu ‘village’ a nih thu min hrilh a, ka rilru te te in, “Kolkata-ah hotel nuam tak min pe a, thingtlangah min hruai leh daih si…,” ka ti – kan pan zel.

Mizoram kawng naran ve ang mai hi kan zawh a, tlangah kan lawn. Kan lawn zel a, darkar khat vel kan kal tawh a, Nagarkot chu kan thleng ta. In hi a ding chho pheuh pheuh a, kan la tlan zel a, an kâwn lûnlai tak kan pêl ta. Kan peng thut a, kan hmun tur kan thleng.

Kan zavai maiin mak kan ti tlang – nepal thingtlang khaw pakhatah hmun nuam em em mai, ‘Club Himalaya” tih a lo awm. A gate kan luh chiah atangin a ropui nghal a, hotel changkang tak thingkung karah an lo nei reng a. A hmunhma a nuam a, engkim mai a ‘first class’ a ni ber – a mak lo, 2002-a Atal Behari Vajpayee leh Genral Parves Musharaff-te inbiakna tur hmuna an lo thlan kha a lo ni reng a!

Eng nge ka tih ber?
Min sawmtu chu Panos South Asia an ni. Panos pawl hi khawvel hmun hrang hrangah an awm a, anni pawl hian khawvel mipuite harsatna hrang hrang, mi tam zawkin an ngaihthah thinte mipui hriata pholan a, harsatna sutkian an tum. Media lam leh thu leh hla thehdarh theitu mi hrang hrangte an kawm a, an titi a, an hrilh duhte an inhrilh chhawng a, workshop-te an buatsaih a, research hnate beiin ‘khawvel nuam zawk’ siam an tum.

September 14-16 khan Katmandu khawpui kianga Nagarkit hmunah South Asia rama journalist hrang hrangte min ko khawm. South Asia-ah pawh ‘Himalayan Region’ an ti deuh bik a, India phai lama journalist-te an ko tel lo.

Tute nge kan nih?
India ram atanga telte chu Panos-a thawk nghat tih loh chu hmarchhak state lam kan ni ber. Meghalaya, Tripura leh Mizoram atangin pakhat theuh kan ni a, Assam leh Manipur atangin journalist pahnih an tel. Bangladesh khawpui Dhaka atangin English chanchinbu editor pahnih an lo kal a, Nepal-a journalist tha zet mai pathum an tel a, Darjeeling tlang ram atangin pakhat a tel bawk – Burma rama journalist, hmun danga inhumhimna zawnga tlanchhiate pawh an sawm a, an remchang ta lo.

Panos-a thawktu mi pasarih an tel bawk a, kan tam lo – kan tui thung!

Hawi zau rawh
Keini lamin veng-veng, khua-khua tih vel kan buaipui lai hian, kan thian thenkhatte hi chuan ‘khawvel nuam zawk’ a awm theihna turin kan vei phak loh thil an vei. A bul tanna turin ‘crises of water sharing’ kan han chai a, keini tan chuan thil thar a ni. Lui tui intawm vanga harsatna thleng hrang hrang te, lui tui an khuah avanga lui luan zelna rama chêngte’n harsatna an tawhte, mihring mai ni lo nungcha hrang hrangin buaina nasa trak an tawh dante ‘sawiho’ a ni.

Thil kan ‘zir lo a, kan sawiho a, zirtirtu bik an awm lo a, a kaihruaitu a awm a, kan thlir dan kan sawi a, chu chu kan kalkhawm chhan a ni. Mike-a kan sawi zawng zawng an record vek thung – phuahchawp leh sawi sual hlauhawm tak a ni.

‘Displacement and livelihood’ leh ‘borderlands and national identities’ kan han sawi chiah mai chu, an insual dawn ta emaw tih turin Bangladesh lama lo kalte leh Meghalaya, Assam leh Tripura journalist-te ngaihdan a inang lo. India rama awm hoin an state-a Bangladesh mi an luh ruk nasatzia te, harsatna an thlen dante an sawi a, an hre bawk. Bangladesh lamin an thlirna tlang atangin an rawn thlir ve ta a, chutah chiah chuan thil ka zir – Bangladesh lam thusawi hi ‘dawt’ a ni vek lo a, Indian journalist thiante pawhin ‘thudik’ an sawi tho – thil hi a thleir dan azir leh, a thlirna hmun atangin a lo danglam thei hle a ni.

Mizo hun a thleng ta
Tui chungchanga buainaah rem leh rem loin Tuirial Hydel Projest siamna tura kan ram ngei, NEEPCO hnena kan ‘hralh’ dan te, tunah hydel project an la siam si lo, Mizoram chhugna kan ram hi ‘sum’ hmanga kan hralh tâk tho si dante pawh ka sawi ve nual.

‘Borderlands and national identities’ kan sawiho a, sawi tur kan nei ve ta nual mai. Hmasang atanga khawchhak atanga kan lo chhuk dan te, keini aia thû zawkin an duh dan dana ramri min siamsak vanga kan dil lian ber ‘foreign’ rama an rin luh daih dan te, Mizo ni vek si, state hrang hrang leh ram (country) pathum – India, Myanmar, Bangladesh-a kan darh tak dan te. Thenkhatin tun thlenga ‘Greater Mizoram’ neih duha insuihkhawm zai rela an la buaipui dan te; Mizo theuh theuh, ram leh state hranga kan awm darh vanga kan awm dan, mizia leh culture thlenga a danglam chakziate ka thiam ang tawkin ka sawi.

Eng angin nge an ngaih ka hre lo a, Mizoram chhunga mi nuai kua vel lek ni si, Myanmar, Bangladesh, Manipur, Assam leh manipur-a Mizo kan awm darhzia hi chu an ngaihven hle a ni – eng ang rilru pua ngaihven nge an nih erawh ka hre lo.

Nagarkot chu le
Thianho titi nikhuaah, “Tourism hi kan sawi kan sawi a, ram dang mite tlawh duh turin kan ram hi kan phochhuak thiam lo” tihte kan sawi thin – Nepal-ah chuan an thiam, Meghalaya-ah an thiam mek bawk. Nagarkot thingtlang khua chu a thingtlang ang angin an dah mai a, chei teh vak an tum lo. Khualzinte chênna tur an siam nasa thung a, kan thlenna angte hi chu hmun bik deuh a ni a, a dang zawng chu hotel ‘satliah’ tih mai tur ang chi a ni.

Sethlam ang deuhte hian an sa a, ‘cottage’ an ti mai a, chutah chuan Saphote hi an thleng duh em em – a man a tlawm a, a nuam ve tho bawk – hotel lian leh ropui an zawng hran lo. An hmuh duh chu Nagarkot ram mawi em em mai leh, râl hla taka Himalaya tlang inkhawhkham ruak a ni. Kan thlenna hotel-ahte pawh zanriah kan killaia kan kiang zaite chu Nepali mipa pathum an ni a, phenglawng leh ‘vaikhuang’ kan tih ang mai hi an tumin an beng a, Nepali inthuamin an inthuam a,. Nepali hla an sa mai a, chu chu hmun danga kalte hmuh duh chu a ni – show room thawmhnaw an inbel lo a, Sap zaia zai phêt an tum hek lo.

Sap kan tihte hian tourist home tha pui pui emaw, kan kût nikhuaa Sap hla thluk ang deuha Mizo hla sak vak vakte an duh lo – an hmuh duh chu ‘Mizo’ a ni. Mizo thingtlang khuate an hmu châk ang a, kan hmun hluite hi cheibawl lem lohin an tlawh duh ang – Thasiama se no neihna tlangah khan concrete-in step kan siam tawh an tia mi kha?! Reiek tlangte pawh chei bawl lohin an hmu duh zawk ang a, bûng hmingthang kan neihte pawh hi humhal ila an en duh em em ang – Mawmrang kham kan tih angte hi ral atangin enna siam mai ila, a building ropui sa zawnga kal hi an ti tawh vak lo.

Tunlaia khawvel buaipui pakhat chu ecotourism tihte leh jungle tourism tihte a ni daih tawh. kan ram hi a nihna ang ang hian enkawlin humhalh ila, kan nungchate hi tuna an awm ang hian ram dang mite tan hmuhnawm a ni. ‘Tourist’ kan tiha a tam zawk hi khawpui changkang atanga kal chhuak an ni a, thil ‘changkang’ tlanbosan an duh a, a ‘natural’ hi an hmu châk; keini hian changkang tak leh ‘Sap’ taka tourist hip kan tum chuan, khawvel awm chhunga tluk loh tur tourist resort hi leiah hian tam lutuk – ka pêng thui ta lua e.

Mizo harh ang u!
Mi kalnate leh mi tawn ang la tawng ve lo mah ila, ka tawn chin chinah Mizote tana ruahlawh hi a nâ ka ti thin. kan ban phak loh leh theih ve loh hi ka awt buai duh vak lo a, nimahsela kan theih ve reng, kan tih si loh a awm thin hi rualawh tinatu a ni.

Tourism lamah a ni thei a, ka rualawhna chu mahni chênna ram hriatchian kawngah a ni teh daih a. Kei hi ka mawl bik vang pawh a ni thei a, ka thian dangte’n an ram leh state, an hnam thil an hriat chian angin ka hre ve lo – kan thenawmte hian an ram leh hnam chanchin chi hrang hrang hi an lo hre bel hle mai tih ka zir chhuak.

Keini chuan Premier League leh Sap zaithiam te, khawchhak filmstar leh show room-a pheikhawk man zatte kan hre em em a, kan chhehvel hnamte hian an ‘hnam’ tana thil pawimawh te, an ‘history’ leh ‘culture’ hi an hria a, an vei bawk. Keini aiin an tha zawkin an fing zawk vek e, ka ti hauh lo; nimahsela Mizote hi Mizo anga kahwvelin min hriat chu sawi loh, keimahni ngei pawh hi kan inhre chiang lo lulai deuhin ka hria a, thalaite hi a bik takin hemi kawnga kan harh a tha hle mai – Sap nun zir ringawt hian min thlen thui hauh lo ang.

Sorkar lam pawh khêng tel teh ang… tuna district kan thei sem chiam mai te, sorkar hnathawk hlawh kan tawngpawng siam that vakte hi nakina Mizoram tana harsatna thlentu a la ni thei? Chu Mizoramah chuan tu pawh sorkar se, a chhunga cheng Mizote tana tha lo tur hi ‘vote’ zawnna ang maia kan lo ti palh a nih chuan, ‘history’ ah engkim chhinchhiah a ni vek mai si a, thangtharte hin min la kâwk palh ang e.

Kan la tlem si a, Mizoram chhungah phei chuan mi nuai kua vel lek kan awm a, kan ram chhiatna tur zawngin tumahin thil i ti lo ang u. Politician chauh an ni lo a, tunlaia thil chi hrang hrang nawrtute pawh hian mahni khua leh pawl chauh ngaihtuah lo in, ‘Mizoram’ ngaihtuah tel thin ila, heti tehnuaia awm reng mai hi chuan ‘raltiang ram’ kan kai har lutuk ang e.

A taka kalin chênna ngaih loh ram ka fang a, ka la khel ngai loh thupui kan khelin kan sawiho a, thil tam tak vei neiin ka lo haw a; Mizoram lo luh rual a nuar thawm leh ‘pek loh chuan… pawi zawk ang; pek chuan… vote ang’ tih lam boruak ringawt hriat chu thawipikthlak deuh a nia – mahse ka ram a ni miau si a, kan vei lohin Nepali hoin an rawn vei dawn der si lo.

Similar Posts:

• Delhi airport ah Mizo pathum man
• Khawvela Airport tha ber leh chhe ber te 2009
• Teihawi @ Guwahati
• Bengaluru International Airport
• Update : Mizoram Super Model 2007

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Saturday, September 27th, 2008 at 2:02 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.