mi(sual).com

1^st. Monday: Mizoram Sorkar Cabiet Meeting chuan Hnahthial District thar siam chu a tifel ta, hemi rual hian Khawzawl  District leh Saitual District pawh tihfel ve nghal a ni bawk.

2^nd. Tuesday:  Vawiin tlai dar 3 leh dar 4 inkar khan Saiphai leh Saipum inkarah IR Battallion mite veivak, hel pawl nia rinten an kap a, Police hnen atanga thu dawn danin, hel nia hriatte hian Sub Inspector Rindika, Constable 2 leh an chuanna motor handyman, an vaiin mi 4 an kap hlum a ni.

3^rd. Wednesday: Mizoram Synod hnuaia Family Guidance & Counselling Centre (FG&CC)-in Lay Leader-te puala Pastoral Care & Counselling Residential Training  vawi 8-na, Synod Multipurpose Training Centre (SMTC) Mission Vengthlanga a buatsaih chu zanin khan Synod Moderator Rev. Dr. H. Vanlalauvan a hawng.

4^th. Thursday: Mizoram Police Organization hnuaia Forensic Science Laboratory, Mualpui-ah vawiin khan Police Officer 48-te Training neihpui an ni.

5^th. Friday: Zanin dar 8 vel khan Raj Bhawan leh City Park inkarah Karizma Bike, Lalbiakfela Pachuau khalh, MZ-01/D 7279, leh City Bus, MZ-01/C 6613, Lalnithanga khalhte chu na takin an insu a, thi an awm lo na a, bike khalhtu hi a hliam na deuh nia thu dawn a ni. 

6^th. Saturday: Chief Minister, Pu Zoramthanga’n tukin khan Dawrpui Multipurpose Centre Demand Committee-ten Aizawl Civil Hospital Quarters hmuna Green Park siamna tura sawrkara hmun an dil chu a tlawh.

7^th. Sunday: Lunglei khawpui chhunga media hrang hrang te chuan vawiin tlai khan Lunglei ADC kalchhuak tur, Pu James Lalrinchhana thlahna hun an hmang.

8^th. Monday: Tukin dar 6 vel khan Lalrinsanga (K-8) s/o Buatsaiha, Tlabung Vengchhak chu a pu te In varanda light tarna pipe-a Electric Current leak-in a man a. Damdawi In pan pui nghal a ni nain a ka pawh chhawn lohvin a boral zui ta mai a ni.

9^th. Tuesday: Vawiin Assembly Session-ah kumin July ni 1-a thi ta, Urban Development & Poverty Alleviation, Trade & Commerce leh Soil & Water Conservation Minister, Pu Aichhinga sunna hun hman a ni.

10^th. Wednesday: Vawiin chawhnu dar 2:00 vel khan Lunglei Rahsi Veng leh Sazaikawn inkar Rahsiveng Thlanmual thlang lawkah Taxi MZ-02/6638 chu chesualin he Motor a chuang Pi F.Lalthankimi (42) Lunglei Farm veng chu a boral.

11^th. Thursday: Assam Rifles Lammuala Rajiv Gandhi Sports Stadium sak tur lungphûm chu vawiin khan Mizoram Larsap, Pu MM Lakhera-a’n a phûm.

12^th. Friday: MHIP Gen. Hqrs-a Pawngsual Do Sub-Committee buatsaih-in vawiin khan MHIP Gen. Hqrs Committee Room-ah tlawmngai pawl, Kohhran hruaitute’n kum tling lo pawngsual tam ta lutuk tihreh dan kawng an sawiho.

13^th. Saturday: Dam chhunga Pathian rawngbawl tura inpe, Deacon Dennis Lalfela chu vawiin khan Kulikawna Christ The King Cathedral-ah Aizawl Bishop, Most Rev. Stephen Rotluanga’n puithiam puitling ni turin a ngemnghet.

14^th. Sunday: Vawiin khan Mizoram Synod hnuaia Sande Sikul department hrang hrangte chuan anmahni Pastor bial tinah an thla thum dan zirlai puanchhuahna inkhawmpui an hmang.

15^th. Monday: Vawiin chawhnu dar 1:00 khan Rev.Dr HS Luaia Kum 100 tlinna pualin Saikuti Hall-ah hun hman a ni a. BCM leh an chhunglehkhatte chuan he prog. hi an buatsaih a ni.

16^th Tuesday: School Education Minister Dr. R.Lalthangliana chuan rambuai laia thi ta te hriatrengna lung, Thuampui venga phun chu vawiin khan a hawng.

17^th. Wednesday: Vawiin khan Synod Literature & Publication Board-in a chhuah thar lehkhabu pali Rev. Vanlalchhunga ziak Mission Mak Tak, Pi L. Thanmawii lehlin Hmelhem, Upa Lalhriata ziak Chun Chawi Loh leh Pu H.T. Khuma lehlin Huan Thurukte chu Synod Conference Centre, Pi Zaii Hall-ah Synod Moderetor Rev. Dr. H. Vanlalauvan a rualin a tlangzarh.

18^th. Thursday: Govt. Eastern High School Biate chuan vawiin khan an kum 50 tlin, Golden Jubilee hlim takin an lawm. A lawmna inkhawm, Biate High School Field-a Pandal-a neihah hian, School Education Deptt. Joint Director, Pu T.Sangnghilhlova chu khuallian a ni.

19^th. Friday: Lalthangfala (61), a pawl ten Pathian tiha an koh thin chu tukin zing dar 2 khan a chenna Chawnpuiah Pumna vangin a thi.

20^th. Saturday: Cheng nuai 108 chuang senga sak, Electric Veng YMA Hall chu vawiin khan Chief Minister Pu Zoramthanga’n a hawng.

21^st. Sunday: Synod Moderator Rev. Dr. H. Vanlalauva chuan vawiin khan Aizawl Kohhran leh Chaltlang South Kohhrante a tlawh.

22^nd. Monday: Zaithiam lar K.Vanlalruata (K.Ruata) kum 30, Lunglei Bazarveng chu zanin dar 9:10 vel khan pumna avangin Civil Hospital Aizawl-ah a boral.

23^rd. Tuesday: Vawiin khan Lunglei S.P Pu Thanmawia Chongthu chu a chenna in ah Lungleia Police Deptt chuan thlahna hun an hmang.

24^th. Wednesday: Civil Sub-Division diltu-te zinga pakhat, Bairabi chuan Thawhtan zing atanga darkar 72 chhung awh tur bandh an huaihawt chu darkar 48 a titawiin  vawiin atang khan an chawlhsan ta a, hetianga an pawh tawina chhan hi an bialtu MLA, Pu K. Lalrinliana’n an thil phut hi Mizoram sorkara thlen a tiam vang ani.

25^th. Thursday: MPC, ZNP leh ZKP thawhhona, United Democratic Alliance (UDA) chuan kumin kum tawpa MLA Inthlanpui-ah sorkarna an siam a nih chuan Chief Minister atan Brig T Sailo, Dy. Chief Minister atan Pu Lalduhoma dah an tum tih an puang.  

26^th. Friday: Champhai Kanaan Venga Pu Lalngurliana V/C Secretery in(Assam Type) chu amah a borala lumen tura lo kal an tam vanglai takin zan dar 9:30 vel khan a chima, mi 48 an hliam a, thi erawh an awm lo.

27^th. Saturday: Rangvamual-a motor lian, truck dah khawmna tur, Ch.Saprawnga Truck Terminus tia vuah chu vawiin khan Chief Minister Pu Zoramthanga’n a hawng.

28^th. Sunday: Bungkawn Branch YMA chuan kumpuan ‘ruihhlo do’ bawh zuiin ngawrh takin tan a la chho zel a, kumin kumtir atanga, hemi chhunga an zu man thenkhat Rakzu leh Sap zu, Excise kuta hlan remchang lo leh an hlan bang te chu vawiin tlai khan an leihbua

29^th.Monday: Mizoram Kohhran Hruaitute Committee huaihawtin Orissa leh India ram state thenkhata Kristiante tihduhdah an nih duh loh lantirna Remna Kawngzawh chu Zoram pumah hman ani. Hei vang hi emawni khua pawh a duai hle.

30^th.Tuesday: MPSC chuan Law & Judicial Department hnuaia Civil Judge (Mizoram Judicial Service) post 12 luah khat tur lakna a kalpui chu September 30 khan interview neia zawh fel a ni. Civil Judge atana tling mi 12 zingah Julie Lalrinzami d/o Dr K. Rokhawla, Durtlang North chu pakhatna a ni.

Similar Posts:

• August 2008 Mizoram Diary
• October 2008 Mizoram Diary
• December 2009, Mizoram Diary
• June 2008 Mizoram Diary
• July 2008 Mizoram Diary

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Saturday, October 4th, 2008 at 7:17 am and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.