mi(sual).com

1st. Saturday: Central YMA hnuaia Drugs dotu pawl lian, Supply Reduction Service (SRS) chu vawiin khan kumpuan an neih tak loh avangin thiah a ni.

2nd. Sunday: Vawiin kha Khawvel Sunday School Ni a ni a, Presbyterian Kohhran chuan puitling leh naupangah thupui hran hmangin he ni hi chawhma leh chawhnu lam khan an hmang a ni.

3rd. Monday: Mizo hla phuahtu lâr, Pu Buonglienkung (38) chu tukin zing dar 1 vel khan Imphal khawpuia RIMS damdawi inah Malaria PF, typhoid leh blood sugar avangin a thi a. Vawiin vek khan an khua, Mualvaiphei, Churachandpur-ah vui liam nghal. Mizo mipuite mittui a ti tla nasa hle.

4th. Tuesday: UDA chuan vawiin khan Vanapa Hall ah MLA Election lo awm tura an candidate turte an puang chiang ta.

5th. Wednesday: Indian Institute of Hardware Technology (IIHT), Aizawl Centre chu vawiin khan MJA President, Pu K.Sapdanga’n a hawng.

6th.Thursday: Rev. Vanlalchhunga, Dawrpui bialtu pastor, nikum lama Synod Moderator, Israel ram fanga zin chuan vawiin khan Mizoram lam panin Tel Aviv Airport a chhuahsan ta.

7th. Friday: Vawiin khan Mizoram Presbyterian Pastor Pension Fellowship chuan Synod Conference Center, Pi Zaii Hall-ah Annual General Meeting vawi 30-na an hmang.

8th.Saturday: Republic Veng Branch YMA chuan an Golden Jubilee lawmna chi khat atan vawiin khan Durtlanga Presbyterian Hospital-a damlote tan thisen unit 51 an pe.

9th. Sunday:Vawiin khan Synod Modorator, Rev. H. Vanlalauva chuan Dawrpui Kohhran (chhun) leh Aizawl Kohhran (zan)-ahte hun a hmang.

10th. Monday: Cheng nuai 185 chuang senga sak, Mission Vengthlang Presbyterian Kohhran Biak In chu vawiin khan Synod Moderator Rev.Dr.H.Vanlalauva’n Pathian hnena a hlan hnu-in a hawng.

11th. Tuesday: Manipur-a missionary-a thawk Pu Vanlaldika Royte leh Meitei ringthar leh ring lo thenkhatte chu tukin zing dar 1:30 vel khan Kabuganj bul Nutoon bazaar-ah mi sual tu tih hriat lohten lo suamin an bungrua zawng zawng an laksak vek bakah, tangkafai Rs. 30,000/- vel leh Mobile handset 4 an laksak a, an chuanna Sumo chabi pawh an laksak bawk.

12th. Wednesday: Kumpuan neihloh tum Central YMA-a committee sang ber Central Coordination Committee vawiina thukhawm chuan kumin chhunga an thupui atan ‘Khawtlang nun siamthat’ tih an thlang.

13th. Thursday: 1st IR Bn. zu ruiten Saipum khaw tlangval pakhat an sawisak rawn avangin Saipum khaw mipuite leh IR te inkarah boruak tha lo tak a thleng meka. Heng IR te chungah hian hremna lek a nih lohchuan Saipum khaw mipuite chuan MLA inthlan lo awm turah vote thlak loh an tum thu vawiin khan thuthar lakhawmtute an hrilh.

14th. Friday: Mizoram Police-ten zanin khan Ramhlun South-ah Chiahpuam sum, cheng nuai 44, sing 9, sang 2 leh 500 an man.

15th. Saturday: December 2-a Mizoram Assembly General Election neih tura chuh tura hming pete inhnuhdawh hun chu vawiin khan a tawp ta a; nomination file mi pahnih chu an inhnûkdâwk a, candidate zawng zawng chu mi 206 an ni dawn ta.

16th. Sunday: All India University Football Tourney Goa-a vawiina final khelh zawh takah Mizoram University Football team te chuan an khingpui Punjabi University chu hneh in an champion ta. Hun pangngai ah 1-1 in an indraw a, tie-break ah Mizoram hian 4-3 in hnehna an chang ta a ni.

17th. Monday: Aizawla nitin chhuak chanchinbu, ROMEI News Editor, Joseph Lalrammawia chu tukin khan lung na-in a thi a, amah hi he chanchinbu Editor, Pu Robert Lalchhuana fapa a ni. Pu Joseph Lalrammawia hian a nupui leh fate pathum a boralsan a, vawiin khan Sihphir Vengthar-a an chenna inah vui liam a ni.

18th. Tuesday: Vawiin atanga nithum chhung neih tur International Assn. of Cancer Registry Annual Meeting, Sydney (Australia)-ah Upa Dr Eric Zomawia, Principal, Investigator Cancer Registry, S/o Upa Sanghlira Colbert, Chanmari Lunglei leh a nupui Dr Lily Chhakchhuak, Pathologist Civil Hospital Aizawl a thawkte chu kal vein Dr. Eric-a hian paper a present ve dawn nghe nghe.

19th. Wednesday: Vawiin chawhnu khan Aizawl Bara Bazarah bomb kam ruk, puak mai tur a awm nia thu thang avangin Bazara thil zuarte an chi-ai hle a, mi tam tak an thutna hmun atangin an tlanchhia a ni. He thuthang awm hi Police-ten an enfiah nghal a, thil hlauhawm engmah an hmu lova, he thuthang lo chhuahna bul pawh an chhui nghal a nia; inbumna thil mai mai a ni tih hmuhchhuah a ni.

20th. Thursday: Tunlaia Mizoram inthlan boruak aia thawm lian zawk emaw tih tur, Chiahpuam chungchanga inhnamhnawih Collector leh Depositor pawl hruaitute chuan, vawiin khan an hnathawh leh hmachhawpte, Aizawl Press Club-ah Chanchinthar lakhawmtute kawmin an sawifiah.

21st. Friday: Mizoram Assembly Inthlanna neih tura Congress tana Campaign-a lo zin, AICC General Secretary, Pu Rahul Gandhi, MP ni bawk chuan Mizorama Congress Party inthlan campaign au hla, NLUP duan that leh hmanga retheite chawikan chu sorkar laipui duh dan a nih thu vawiin khan Vanapa Hall-a inkhawm buatsaihah a sawi.

22nd. Saturday: Synod Revival Speaker heng; Pu Lalsangluia Sailo, Pu R. Lalrinsanga leh Pu C. Lalnunsangate chuan vawiin atanga 7th. December thlenga camping leh crusade nei turin hmun hrang hrangah an fehchhuak.

23rd. Sunday: Aizawl Bishop, Most Rev. Stephen Rotluanga chuan vawiin khan Kulikawna Christ the King Cathedral-ah Biak-In kut a hmanpui.

24th. Monday: Khatla-a Assam Rifles-te chuan vawiin khan Durtlang-a Ferrando Integrayed Women’s Development Centre tan thilpek an hlan a, he hun hi Dimapur-a 3 Corps General Officer Commanding, Lt Gen RK Loomba-a’n a hmanpui a ni.

25th. Tuesday: Mizoram Pradesh Congress Party Campaign pui turin, Prime Minister Dr. Manmohan Singh chuan vawiin khan lehlangin Lunglei leh Aizawl a rawn tlawh.

26th. Wednesday: Synod Moderator Rev. Dr. H. Vanlalauva chuan vawiin khan Lengte Kohhran a tlawh.

27th. Thursday: Mizo zinga sang ber ni-a sawi, Pu Tumpanga (L), feet 6 leh inchi 9-a sang ni-a sawi malpui vei lam ruh chu vawiin khan Mizoram State Museum-ah dah a ni.

28th. Friday: Nilaini zan atanga Mumbai-a mi firfiakte pawi khawihna thleng rapthlak tak, mi firfiakten ralthuam leka pawi an khawihna hmun pakhat, Nariman building luhkhung tura Commando huaisen leh rintlak zual an thlan, hmar chhak biala mi 10 te zingah Mizo 4 an tel niin Mumbai-a hnathawka awm, Lalringliana’n vawiin khan thuthar lakhawmtute a rawn hrilh.

29th. Saturday: Mizorama party lian pathum aiawhte’n vawiin khan Aizawl-ah thuthar lakhawmtute an kawm vek a, heng party MNF, MPCC leh UDA hian Assembly inthlanpui lo awm turah sorkarna chan ngei an inrin thu an sawi theuh a ni.

30th. Sunday: Bilkhawthlir Kualmawi Presbyterian Kohhran chuan vawiin khan Kohhran upa an thlanga; pahnih thlan turah pakhat chauh thlang tlingin Tual upa tanglai Pu Lalzamawia an thlang tling.

Similar Posts:

• August 2008 Mizoram Diary
• July 2008 Mizoram Diary
• October 2008 Mizoram Diary
• June 2009, Mizoram Diary
• December 2009, Mizoram Diary

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Monday, December 1st, 2008 at 9:00 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.