Kum 30 chuang zet chu kan lo inhmelduh in, kan karah itsikna leh thleibikna reng awm lovin suihlung kan lo rual tlang ve tawh a, a ni tak a, a tlang leh mual pawh dang chuang lo leh laikhum zal tlanna te pawh dang chuang hek suh!! In tel lo chuan nau ang ka tlei zo lo tih pawh inhriat reng kha. In tawnah dawl zawrin ka zawr a, hringnun kalh a kim lo riau zel thin a nih kha!!
Chuvangin khawikipah kal dawn ila, ka hruai ve zel che u a, lunglen hnemah ka fawp leh vawng vawng thin che u a nih kha. In hmel hmu pha lova hun reilote ka awm pawhin ka zawng ruai ruai zel che u a, in tel lova talhrang thei lo val ka nihzia pawh ka hai lo, kan intawn lai hunte ka chhui kir a, naupan tet lai, Primary sikul luh lai daih tawh atanga nu leh pa, zirtirtu leh aia u zawkte hriat hlau reng rengin kan lo inkawp a nih kha. Chuti teh thuta mangtha…. tia thenna biahthu hlana han vailiam mai tur che u chuan thil awlai tak chu a ni bik tawp lo mai le!!
Mahse, naupan lungmawl laia hmangaih ka lo tawn te in nih avangin ka lakah hian inchhuang thei tur in ni bikin ka ring lova, min dem ngawt thei bik hek lovang. Ka thinlung lairil berah hmun lo luah thin mah ula, ngaiin thla-hlel che u in, in tan lo khatliam thin mah ila SD, KN, KV Oh!! nang pawh MZ min dem lul suh ang che u. Ngai chung zelin mangtha tia thenna biahthu hlan lo thei che u ka ni ta love, in duh leh, Hringnun hmangaihna hi zawng doral an chang leh thin tih hla kha in lo sa ve tawh mai dawn nia, in mi hmangaihna dawrawm tak avanga ka tawrhna zozaite, sum leh pai leh hun bakah ka hriselna ten a tlakchhiat phah ziate ka chhut seng ta love.
In mi hmangaihna aia let sang, sing, nuai, chhiarsen rual loh leh chhui zawh sen rual loha hma-ngaihna nasa leh tawp chin nei lova min hmangaihtu tan ka taksa, rilru leh thlarau hi hlan thianghlim ka duh ve tak vang a nia. Ani chuan bawlhhlawh turin min ko lova, thianghlim turin min ko zawk a ni
Tin, ka lo duh thinna che u leh ka thlakhlelh thinna che u kha doral an lo chang zo ta a, huatna leh thinrimnain a lo inthlak ta e. In lo nunrawn zia leh min lo bum rei tawh ziate ka ngaihtuah hian duh tlak loh ka lo duh che u leh hma-ngaih tlak loh ka lo hmangaih che u tih ka hria a, ka lo tisual hle tih ka hria e. Chuvangin ka thin a rim tak zet a, in hming pawh ka phuah uluk ta lo khawp mai. Nang, Sahdah leh Khaini te u, Kuhva leh Meizial te u, Setana Kid tiin ka ko ta che u a, in laka talchhuak thei lo tur anga ka lo indah thinna te kha in pu Setana bumna mai a lo ni e.
He ka taksa, rilru leh thlarau zawng leh nunna te hi nangni anga a der maia min hmangaihtu ni lo, tih duhdah leh hmuhsit endawng leh nuihzat te bakah thih thlenga tuara ka tana nunna hlantu tan ka hlan ta e. Sual langsar zual zu leh hmeichhiat mipat nawmchennate, Lal Isua fak hla sak aia khawvel lam hla sak ka sim tak ang khan nangni pawi Awmtawha leh Awmmeka, Lolaawmzel tur ka Pathian thlarau thianghlim chuan keima theihna ni lovin ama theihnain thenna biahthu ka hlan che u hi a phal mai ni lovin a duh tih ka hria a, ka Pathian chu kuta sak inah cheng lovin ama siam, a anpui ngeia siam ka thinlung sual bawlhhlawh hnuah hian a cheng duh a, a Temple atan min duh a ni.
Hei hi thinlung chhungril atanga lo chhuak Lalpa lawmzawng a ni tih chiang taka ka hriat takah chuan nang Sahdah, mutnaah pawh ka hmuam che a, chawei lai chauhin ka heha awm lo thin i nih kha!! Tunah chuan ka then ta che. Nang pawh Khaini, i rim na tak leh Kuhva, ha tibaltu ka mamawh tawh lo che u a, ka tan thil tenawm leh hnawk mai in lo ni ta e. Nang pawh Meizial, Sikret i ni emaw zozial i ni emaw ka taksa tan tangkaina leh mamawhna che ka nei ta love. Tenawm leh luak tichhuak mai in nih tak avangin min hmangaihtu Lal Isua Krista hmingin in mekna thu leh nangmahni hnehna thu ka puang e. Mangtha vek ule.
