Zu la khap fo bik hi kan at bik vang nge kan fin bik vang ni ang?
L.R.Colney
Zu Khapna dan kan tih mai (Prohibition of alcohol) hi kum 1900 hmalam kha chuan Khawvel ah hian hriat tur tehchiam ala tam lo hle. A lo chhuahdan tak pawh a tirah chuan, a tha zawk angem tih enchhinna ang lek leh Sorkhar sum dik lo taka hman(Sumptuary Law) anih loh nan a siam chhuah ani.
Ram hrang hrangin kum zabi 20th lai khan an lo hmang tawh a.
Prince Edward Island chuan 1900 atanga 1948 thleng an ramah zu an khap.
Russian Empire and Soviet chuan 1914 atanga 1925 thleng.
Ireland ah 1915 atanga 1922 thleng
Norway ah 1916 atanga 1927 thleng
Hungary ah 1919 an hmang zawk bawk.
Finland ramah 1919 atanga 1932 thleng.
Uninted States 1920 atnaga 1933 thlengin ah an nei bawk.
USA A ZUKHAPNA DAN LO CHHUAH DAN
Kum 1657 khan “General Court of Massachusetts” chuan Zu tak lutuk (Strong) siam a khap a.He dan hi zukhap dan awm hmasa ber a sawi theih awmchhun chu ani mai awm e.
Tin, 1784 kum khan Dr.Benjamin Rush chuan Zu hi mihring hriselna leh kan rilru thlenga tichhe thei a nih dan a sawi a. Chuvangin Zu hi tih pun zel aia chuan khap a tha zawk ang tih a sawi te chuan America ram Loneitute rilru ahneh hle ta mai a. Zu khap duh pawl hial alo din phah ta a. An pawl hmingah pawh a “temperance association” an ti tawp mai a. Kum 1800 -1808 ah te chuan Varginia leh New York ah te he pawl hi arh zau zel a. He pawl thu kalpui hian sakhaw hnarkai tute lawm a hlawh hle ta mai a. Kum 1840 ah meuh chuan The Prohibitation emaw Dry Movement in tiin hma an la chiam ta mai a. Methodist, Northern Baptists leh Southern Baptists, Presbytarians, Disciples, Conrigationalists, Quakers leh Lutherans hruaitute an ni deuh ber hlawm a. A bikin Methodist hruaitu ten huaihawtnaah mawh an la nasa hle. Ngaihdan nghet tak an neih chu Zu dawr chu Sawrkhar eirukna bul leh Mimal tin tan zu in hi sual a ni tih ani.
Kum 1850 khan he pawl hi registered pawl lo niin “Maine’s total ban” Zu siamchhuah leh zawrh khapna dan an siam ta a. Mahse he pawl hi a ding rei ta lem lo hle. Chutah American Civil War 1861- 1865 khan a rawn zui chho ta bawk nen.
Kum 1869 khan Prohibition Party leh Women’s Christian Temperance Union te tangkawp chuan Zukhapna dan chu an rawn rawt thar lehin Kum 1881 chuan Kansas bialah chuan Zu In leh hralh khapna dan chu anlo nei tan ta a.
Mahse 1916 Democratic President candidate Woodrow Wilson leh Republican Charles Evan Hughges te chuan Prohibitation tih ang vel chu chu an ngaih pawimawh loh zawng tak alo ni ve ve tlat mai a. Mahse se Movement kal zel avang hian January 16, 1919 khan Zukhap tlatna dan chu Parliament chuan apassed ta ani. US State 48 ah state 36 ah chuan he dan hi hman a ni. Mahse a taka an hman meuh chu chu January 16, 1920 ah chauh khan ani.
Mahse Kum 13 lai an khaphnu ah kum 1932 khan an hlip leh ta a. An hlih hnua hian kum 13 kal ta zu khap hun chhung zawng kha America mipuite chuan “Thirteen years that Damaged America” an ti hial zuk zia.
Dr. John D. Rockefeller, Jr Industrialist ropui tak mai, a hunlaia mi ropuia an gnaih chuan ti hian a ziak:
“He Zukhap burnadan hman anih khan, khawtlang leh ramin a thatpui ngei rinna kalo nei lian em em a. Mahse chutih a hnehin zu-in mi an pung sauh a, Sipai ram leh hnam tan a thawk thinte chu ram dan bawhchhe hmasa ber ber ah an tang ta mai a. Khua leh tuitha tak taka kan ngaihten dan an palzutin, tualthah leh ruk ruk chu a hma zawng aiin a pung sauh zawk ta mai a. Dan lova sumdawng an pung a sorkhar a hlawk dawn emaw kan tih chuan a chan phah ta teuh zawk bawk si a” tiin a sawi hial nia.
US in kum khat chhunga rampuma a hmuh thin Alcohol Tax Dollar million 500 a chanphah a. Dan lo a sum dawng chi hrang hrang an punphah in ramin nasa takin a chhiatphah ani.
Kum 1933 he dan an hlip hnu khan Ameriaca chu an rawn thang thar leh chauh ani an tih chu maw le..
SAKHAW FIRFIAK RAMAH KHAP ALA NI.
An Quranin Zu in hi sual ah angaih avangin Muslim ram tam takah chuan tunthlengin khap ala ni. Mizoram pawh Muslim kan tam ta bawk a, khap ve mah ila kan in hmeh ve ta viau awm e. Muslim Quaran chuan hetiang in sawi.
“Shaitân (Satan) wants only to excite enmity and hatred between you with intoxicants (alcoholic drinks) and gambling, and hinder you from the remembrance of Allâh (God) and from As-Salât (the prayer). So, will you not then abstain?” 
“They ask you (O Muhammad) concerning alcoholic drink and gambling. Say: “In them is a great sin, and (some) benefit for men, but the sin of them is greater than their benefit.” And they ask you what they ought to spend. Say: “That which is beyond your needs.” Thus Allâh makes clear to you His Laws in order that you may give thought.”
India ramah Mizoram leh Gujarat state chauh maia Zu khap ani bik hi a lawmawm rualin a zahthlak lam te pawh a kawk thei zawk in alang? Chief Minister Modi-a Hindu Sakhaw at chilh bur mai rorelna a ni tih kan hai awm love. Chu tih rual chuan kan Politician te pawh hi an lo sakhaw mi lutuk deuh ve ta nge ni anga, a nawrtu te nawr dan dan in sawrkhar hi a thle mai mai tih chu mipuite ngaihdan ah in nghat mai se.
Zu khapna dan a lo chhuahna chu la rei lemlo mahse mahse khawvel ram hrang hrangah an lo practice nual tawh avang leh keini ngeipawn kan hman reng lai anih avangin a mikhual tawh lo hle a ni tih chu kan hre theuh awm e.
Mahse eng vanga ram tam zawk ram changkang zawk ahte khap zui duh ta lo nge an nih a vawiin thlenga ramchang kang zawkah te pawh an la phal rai em em mai ni ang le? Keini hi kan fing fal bik nge kan a fal bik ta zawk tih chu kan zir chhuah a hun ve ta hle.
KOHHRAN TAN ZU A HNAWK EM?
UK te chu hnam upa leh fing hmasa te an ni a Kohhran pawh kum 100=800 vel thleng lai a upa hmuh tur ala tam mai. Biakin Upa tak tak abikin Anglican Biak in kawt velah chuan Zu dawr a awm deuh ngei ngei zuk nia.
Kohhran pakhat ka tlawh chu kum 1970 khan an kohhran kum 750 na an lo lawm tawh a. An biakin Hlui tak chhungah chuan an pastor nen kan inkawm a, Zudawr Biakin kawt maia awm ka hmuh thin thu leh an ngaimawh leh ngaimawh loh ka zawt a. A ni chuan enge a pawi na chhan tur ka hre lo. An sumdawnna ani a in zawmna kan nei hlei nen….. kei a lo sawi ve tur enge awm ang.tiin min chhang mai a. Ka ril ru te te in kan ramah chuan lo kal la…kan kohhran ah chuan Pastor chu sawi loh upa ah pawh kan duh lovang che tih mai ka nap a.
Bishop pakhat The Rt.Revd.Dr.Peter Selby, Bishop of WORCESTER leh FIAG Deputy Chairman ni bawk chuan he ti hian a sawi sam et mai.
“There is no inconsistency between individual church members enjoying alcohol as one of God’s gifts and the church as an institution declining to take dividends from manufacturing or marketing it.”
“Zu sak leh zawrh atanga hlawkna lo tel ve duh lo kohhran leh kohhran member Zu hi Pathian thilpekah ngai a in thin te inkarah in mil lohna a awm lo.”
Chu mai anilo Kum 1987 Methodist Church Conference Report on Alcohol chuan Kohhran ten mipuite zu kan hmelhriat tir dan a dik loh avangin Kohhran in a chhiat phah ani. Sual angin kan hmelhriat tir hi a dik lo tiin thu an passed bawk.
KEINI RAM A KAN KHAP VE CHHAN NI A LANG TE.
Thiltih tha leh mawi ni a kan ngaih vang mai mai.
Mizo te hi a langa mawi lawm ta reng reng kan ni han ti ila, thenkhat chuan kan lo ngai haw palh mah na. Mahse thil kan in tihhmuh chak dan ah leh kan ngaihsan zawng te kan at chilh dante, ngaihsan loh zawng te vek lah hre chiang tur pawh a kan belh peih loh zia a tang te hian kan zu khapna ve ngawtna dan pawh hi a rinhleh awm ta riau in alang.
Ngaih tuahna ngun tak leh kum tam tak thlira thil ti ve hi kan niin alang lo. A tha leh mawi,mi ngaiha hming mawi hming that duh vang mai niin alang tlat ani. Tunah pawh he Zu khapna dan hi han hlip chiah se chu kan thalai leh nu leh pa pawh bang chuang lo hian kan ti leh sup sup anga, mahse hun alo rei vak lovahchuan kan fing tulh tulh anga in mi an tlem leh tulh tulh ang. Sum lova in theih anih loh avangin kar lovah mi tam tak chu an inzir fing thuai anga, Mahse chu tihrual chuan ngawl tak tak chu an awm tho ang.
Thil hi a hmun ngeiah kan zir ve ngam angai ta. Lak bosaka in zirtir ai chuan a that loh zia leh that zia pawh in kawhhmuh hian a chiang zawk thin a, miin an passed hma zawk thin. A hmun ngei a an zir hi kan thalai te hi i phal sak ang u. Kan thalai tam takte duh tawk in tur awmna vairamah hian sang tam an awm ve tawh a, Zu avanga an zirlai chhunzawn thei lo leh an rawn thawn haw hi mi engzat nge kan hriat tawh reng? Kum za 21 na mite hi chu ti em a zu in thiam lo tura inngaih reng bik tawh lovang u.
Bible in zu hi khap nia kan hriat vangin kan khap ve.
“Bible ah zu khapna a awm lo” tia ka sawi chu Kohhran hruaitu lian tak mai pakhat chuan Chanchin Bu ah min rawn chhang letin Bible References tam tawk Zu chanchin ziakna hrang hrang chu a rawn la chhuak ta teuh mai a. Ka rilru te te chuan heng Bible te hi la chhiar ve ngai miah lo ah min ngai em mawn dawn chu aw…ka ti a. Zu chungchang Bible a inziak te hi Zu-khapna ni lovin mihringte khapna leh Zu chungchang min sawifiah sakna te an ni zawk.
Bible in zu in hrim hrim hi khap se chu Thusawm pek ah emaw a inziak ngeianga, Pathian fate reng reng in sawi tur pakaht mah an awm lo tur. Kohhran tiak tirte Tirhkoh Paulan lehkha a thawn tam takah hian a inziak kur ngeinguai ang. Mahse Pathian thu hian material (Nunna neilo) te a do chiam chiam ngai lo.Pathian thuin a ngaih pawimawh chu nunna nei chi reng reng ho hi a ni thin. Pathian chu nunna zawng zawng te hnar ani si a. Chuvangin Zu lam buaipui chiamm lo hian Kohhran hian Zu in thin kan mi leh sa te hi ngaihven ta zawk ila, Pathain thu kan zawm dik zawk hmel.
Bible in zu in hi sual a sawi nia kan hriat vangin kan khap ve.
“Uaiin ruin awm suh u chumi ah chuan insum lohna a awm sia” tih te …”hektu leh uaiin heh mite nilova” .tih te…. “zupui hi nuihza bura minsiam tu” …etc tih angte hian zu sual a ni e tihna lam a kawk lo. Eden huana thei Evil eh Adam an an ei khan an thei ei kha em ni sual? A eitute kha ani lo em ni. Zu ruih chuan a in tu chu a ti maulpho thei thei reng ani. Nova phei chu mualpho khawpin a rui tih kan hria. Paula chuan Timothy chu a pum avanga Uaiin tlem in thin turin a hrilh a. He thurawn hi pafa thil leh mimal thil mah nise, Wine in chu an la thupui hlapui lutuk lo ani tih chu a chiang hle zawk ani. Mimal zalenna leh hriselna ah te a in nnghat a ni. Rang taka kan taksa min tichhe thei Meizial leh Sahdah te hi Kohhran te hian hman a hmanah khan lo khap tawh zawk chu nise, Mizoram hi Cancer vei tamah kan champion bik lo tur. Zu avanga thi aiin Meizial leh Sahdah etc avangte a thi hi kan tam fe a rin awm si a. Bible hian ruih, in tam lutuk pawi zia min hrilh hi zawm ila chu kan hrisel phah ngei ang le.
Mizo ten zu in thiam lo hnam nia kan inhriat vangin kan khap.
Khawvelah Mizo te aia Zu inthiam hnam an lo awm ngai lo thin tihchu tun kan hai ka ring lo.Kan pi leh pute chuan an inkawm hlim nan Lal inah nileng ten Zu an in thin a… an lo ruih deuh palha tual an han kalpai deuh pawn minlo hre thiam teh u…tiin thupha an chawi lawm lawm thin. Chutiang taka zu inthiam hnam khawvel dangah an awm ka ring lo.
Mahse Kristianna alo luh takah chuan Zu chu kohhran chuan sual tuipui angin minlo zirtir ta a. Mi lu la hnam zawk chuan kei ni mizo lu la hnam ni miah lo chu Lu la hnamah min puh a. (Mahni ral te that tu hi lu lahnam an ni lo.) An mahni ramah Biakin kawtah Zu an zawrh pawh a, ngaipawimawh lo hnam khan zu min huat tir a, vawiin thlengin kan rilru lam dan ah nghet takin a chhe zawngin a in tuh phah ta ani.
Khawvel ram changkang zawk UK leh USA ah te pawh zu inthiam lo tak tak hmuh tur chu an tam mai. Kan ramah pawh zu inthiam lo kan tih mai an ruih pawh mi zawng zawngin an hraitpui zel chi ang hi za ah pakhat chu sawi loh sangah pakhat pawh an awm lovang. Mizoram a zu in thin za a 90 percent ang vel hi chu mi tam zawk ten Zu a in thin tih pawh kan hraitpui loh an ni zawk hial ang.
Mihring hi khap beh leh laksak aiin a hmuna zir hian thiam a chiang zawk thin a, kan puitling hma zawk in a tlo zawk bawk thin. In khap behna hi rilru lama puitlinna leh thanna dal tu lian ber ani. I fapa kha zu awm loh vanga a in loh aiin a awm reng chunga a in duh loh khan I thinlung a tilawm zawk ngei ang che. Chu hun chu zu kan khap chhung chuan kan experience ve ngai lovanga..
Ka tu leh fa ten Zu khap hi an thatpui zawk kan rin vangin kan khap.
He rindan hi chu ngaihtuah chiang miah lova rindan ani e. Pu. Keivawma chuan “Zu khap chu at lai thil a ni”a ti e an ti a.a dik thawkhat ang. Kei mahni chauh hi zu khapna chang in ti hria khawvelah hian kan awm lova. Kum tam tak kalta ah khan Mi ramah pawh an lo khap ve sup sup tawh a. Mahse kei ni erawh chuan kum 10 the meuh hnuah pawh zirchuah emaw kan nei chuang lo. A that zawk leh zaqwk loh pawh sawi thei tak tak kan la awmchuang lo. Zu khap hi na chhawkna damdawi ang deuh ani. Temporary relief a ni. A dam na tak tak chu a ni lo.
Chuvangin kan thatpui hlenna tur a awm lo. Chutih ahnehin kan at zia hi nakinah kan la seng zawk a rin awm. Zukhap duh lo tu zawng zawng te zu in mi ah puh ngawt mai te hian kan ngaih dan zim zia te a tilang mai mai zawk in alang.Mizo te hi mahni thawmhnaw inbel lai chauh tha ti leh fak mawi maimai hnam kan ni tawh lo. Mi thawmhnaw tha leh mawi chu a tha… a mawi ti ve ngam hnam kan ni tawh zawk. A langa mawi ngawt hi thil tha ziktluak ani vek lem lo bawk. Zu khap avanga vanram kai kan tum te anih lem loh chuan sim ve ngam zawk a hunt a hle.
ENGE NANG I NGAIH VE DAN?.
.
Similar Posts:
- Zu khap bur na dan hman zawm duh!
- Zu Khapna Bible Ah A Awm Lo
- Zu Hi Engvanga Do Nge Kan Nih ?
- Inkhawmnaa Hmeichhe Thusawi Hi Phal a Ni Lo
- Zu khapna dan teh fo hi
June 30th, 2009 at 1:31 pm
kan ti century teng.
Zu khap ah buai tawh lo ang u , an khap dawn tho . A hre zawk tah teuh a tul kan tih sak mai ang che u hehe.
Report this comment
June 30th, 2009 at 4:33 pm
A in duh chuan an khap chung pon kan hmu Tho !!!
Report this comment