mi(sual).com

1st. Wednesday: MZP chuan vawiin khan Mizorama Hindi zirtirtu inkhairual lo lutuk chungchanga thuthar lakhawmtute hnenah thuchhuah an siama; chu an thuchhuah chu Education Minister Pu Lalsawta hnenah vawiin vek khan an thehlut.

2nd. Thursday; Mizoram Synod hnuaia Pastor bial hrang hrang inkhawmpui chu zanin khan tan a nia; he inkhawmpui hian 5th. April 2009, Pathian ni thleng a awh ang.

3rd.  Friday: Mizoram State Pharmacy Council cum Drugs Information Center chu zanin khan Tourist Lodge, Chaltlangah Health Minister Pu Lalrinliana Sailo in a hawng.

4th. Saturday: Mizoram Ameteur Taekwondo Assn. buatsaihin vawiin khan Electrict Veng YMA Hall-ah colour belt exam neih a nia; Taekwondo club hrang hrang 11 atangin naupang 105 in exam an nei a ni.

5th. Sunday: Vawiin kha Lal Isua’n Lal anga Jerusalem a luh ni champhaphak ‘Tumkau Ni’ tia vuah a nia. Hemi pual hian Kohhran hrang hrangte’n Lal Isua chawimawiin kawng an zawh.

6th. Monday: 14th. March 2009 a Serkhan ramkang thelh naa nunna chante tlangval pahnih Laltlanmawia leh Zonunzirate chu State Level Comt. For fire Prevention chuan vawiin khan Serkhan Community Hall-ah ralna hun an hmanga; ral nan hian an chhungte hnenah Rs 50,000 ve ve an hlan.

7th. Tuesday: Vawiin tlai khan Lalliankima (41) s/o Vanlalsanga Tachhip khua chu an khaw luh dawnah scooter-in kawngthlangah a tlan liama; a chetsualna hmunah hian a thi nghal.

8th. Wednesday: Vawiin khan Sihphir Venglai Presbyterian Kohhran Biak inah Lalchhanhima Varte s/o H.Lallura Sihphir leh K.Lalawmpuii d/o Lalkhawhluna Bilkhawthlir te chu Rev Johana kutah an innei. He hun hmanpui hian zaithiam R.Lalruatfeli (Mapuii) pawhin zaia rawngbawlna a nei nghe nghe.

9th. Thursday: Congress policy pakhat New Land Use Policy (NLUP) Apex Board Vice Chairman Pu R.Selthuama MLA chuan vawiin khan agriculture directorate building-a a office thar an siamsak chu a luah tan ta.

10th. Friday: Vawiin kha Lal Isua kan sual tlana a thihni champhaphak ‘Good Friday’ a nia; khawvel hmun danga Kristiante tih dan ang thovin Mizoram Kohhran hrang hrangah urhsun taka hman ve a ni.

11th. Saturday: Vawiin chawhnu lam khan Mamit dist.-a Serhmun khuaah rial kuttum tiat tiata lian a tlaa; in 57 lai a deng chhia a ni.

12th. Sunday: Vawiin khan Isua Krista Kross-a khenbeh a nih hnua a thawhlehna ni, ‘Easter Sunday’ a nia; he ni hi khawvel hmun danga an tih dan ang bawkin Mizorama Kristiante chuan hlim takin an hmanga; Kohhran thenkhat chuan he ni hi thingpui ruai nen an lawm a ni.

13th. Monday: Mizoram People Forum (MPF) te chuan vawiin khan Aizawl Central Hall-ah Lok Sabha inthlan lo awm tura candidate-te pualin’joint platform’ a buatsaiha; he hunah hian candidate palite; CL Ruala, Dr.H.Lallungmuana, Rualpawla leh Lalawmpuia Chhangtete an tel kim theia; minute 20 theuh thu an sawi bakah zawhna leh chhanna hun hman a ni bawk.

14th. Tuesday: Vawiin kha India ram danpui duangtute zinga mi, Dr. BR Ambedkar-a pianchaphaphak a nia; hemi avang hian sorkar laipui chuan chawlhah a puanga; hei vang hian Mizorama sorkar pisate pawh khar vek a ni.

15th. Wednesday: Bharat Scouts & Guids Movement-a state level award sang ber Rajya Puraskar Award chu vawiin khan mi 59 hnenah Mizoram Governor leh Bharat Scouts & Guids Patron  MM Lakhera chuan a hlan.

16th. Thursday: Tukin dar 7:00 atang khan Mizoramin Lok Sabha –a seat kan neihchhun hnawhkhat turin MP tur thlan a nia; tlai dar 4:00 thlenga ballot box hawn a ni chungin kum dang zawng aiin vote a tla chhiaa; rampum huapin vote hi 49.68% chiah a tla a ni.Hei hian Tuikuk raltlante vote 57.70% a huam lo. He inthlanpui rual hian East Tuipui Constituency-a MLA By-Election pawh neih nghal a ni.

17th. Friday: Chief Minister Pu Lal Thanhawla hovin Council of Minister, Parliament Secretary leh Chief Secretary-te chuan vawiin khan High Power Meeting an neia; karleha Mizorama lokal tur 13th. Finance Commission member-te hnenah Mizoram mamawh chi hrang hrang sorkarin a thehluh turte an thlirlawk.

18th. Saturday: Vawiin chhun khan Mualkhang khaw bula Tlawng luiah Emanuel Lalramthara (19) s/o Maj. Romawia Tuikual South leh H.Lalrintluanga (16) s/o H.Biakthanga Kulikawnte chu an tlahluma; an ruangte hi zawn nghal ni mahse Emanuel Lalramthara ruang chiah hi an la hmu hrih a ni.

19th. Sunday; Vawiin chawhma 10:40 vel khan nimina tuitlaa boral ta H.Lalrintluanga ruang chu an tlakna bul lawk tui chhungah hmuh a ni.

20th. Monday:Mamit Dist.-a Oil Palm chingtute chuan anmahni bialtu District Agriculture Officer Pu Zahlira Hrahsel hovin an kal zel dan tur leh an harsatnate an sawiho.

21st. Tuesday: Vawiin tlailam khan Tuikhuahtlanga Pu Lalzuala kawmthlang, Mahatma Gandhi Road chhak chu a mina, mihring thi leh hliam an awmlo naa, motor pali lai a delh a ni.

22nd. Wednesday: Mizoram Hmeichhe Insuihkhawm Pawl (MHIP) chuan vawiin khan Vana Pa Hall-ah General Assembly vawi 17-na an hmanga; CM Pu Lal Thanhawla’n a hmanpui.

23rd. Thursday: Vawiin chawhma dar 10:30 khan Mizoram Jornalists Assn. Gen. Cofn. Vawi 36-na chu Aizawl Press Club-ah neih a nia; CM Pu Lal Thanhawla’n a hmanpui.

24th. Friday: India hmarchhak biala Kristian Medical doctor-te leh dental sergion-te inzawmkhawmna Evangilical Medical Fellowship of India chuan zanin atang khan Aizawl Theological College-ah Bienial North east Reational cofn an hmang. He Cofn. hian ni 26 Pathianni zan thleng a awh ang.

25th. Saturday: Mizoram University chuan Tanhrila an campus-ah an din champhaphak vawi kuana an lawm.

26th: Sunday: Sihfa khuaa Pu Dosanga, (68) w/o Lianzami chu vawiin chhun khan rulngan nu, feet kuaa sei leh banrek tiat vela lianin a chuk hluma; rula pawh hi thah nghal a ni.

27th. Monday: Shavei Israel Organisation buatsaiha Munnar (Karela) a seminar neih chu tluang takin a kalzela; he hun hmanpui tur hian Mizoram lama khaipa ber Pu Lyon Fanai chuan Aizawl a chhuahsan.

28th. Tuesday: Mizoram Upa Pawl (MUP) Gen. Hqrs. Chuan nihnih awh tur an General Assembly vawi 37-na chu vawiin atang khan Vanapa Pa Hall-ah an hmanga; he hun hi CM Pu Lal Thanhawla’n hmanpuiin upate dinhmun chu sorkarin zawi zawia siamthat a tum thu leh corruption do kawngah kum lama upate hman tangkai an tum thu a sawi bawk.

29th. Wednesday:Kum 2011 thlenga Mizoram Upa Pawl President atan Pu H.Raltawna thlan nawn a ni. MUP General Assembly vawi 37-na, vawiina Vanapa Hall-a chhunzawmah an hruaitu turte hi an thlang a, inthlan hi MJA President, Pu K. Sapdanga kaihhruaina-a neih a ni a, Official nomination awm lovin kal khawm mipuite’n an duh zawng an chhawp chhuah hnu-ah President bakah hian Vice President-ah Pu K. Malsawma, Chaltlang leh Treasurer-ah Dr.R.Kapthuama, Khatla Veng-te an thlang a ni.
————

30th. Thursday: Agriculture Minister, Pu H. Liansailova’n NLUP hmanga hma lak tan theih beisei hun chu kumin September/ October vel a ni ang a ti. He thu hi Chief Minister nen vawiina Press Conference an neih dunna a sawiin Agriculture Minister chuan, ‘He hun hi kuthnathawktuten nakkuma an lo tur ram an en hun pawh a ni a, NLUP atana sum ruahman hi kum 2008-2009 Budget-ah dah a ni lova, sorkar kum kal mek, 2009-2010 Budget-ah thun a ni a, Parliament inthlanna neih a nih avang leh sorkar laipui thar siam tum mek a nih avangin tunah hian Budget lailawk chauh siam a ni a, kumin September thla-ah chuan Budget pumpui peiha, pass a nih beisei a ni’ a ti.

Similar Posts:

• October 2008 Mizoram Diary
• August 2008 Mizoram Diary
• July 2008 Mizoram Diary
• June 2008 Mizoram Diary
• December 2009, Mizoram Diary

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, May 24th, 2009 at 10:25 pm and is filed under Information. You can follow any responses to this entry through the RSS 2.0 feed. You can leave a response, or trackback from your own site.