‘Kan naupan lai chuan’ tih tawngkam hi Pitar Putar pui pui tawh te chauh sawi tur a ni bik lova, keini la tar chiah lote pawhin ‘Naupan lai’ kan neih ve avangin ti hian bul han tan ve ila.
Nia, kan naupan lai chuan tunlai ang hian thil hi a la changkang ve lova. Tunlai naupangin awlsam taka engkim an tih zung zung tawh thil tam tak hi a awlsam lo khawp thin. Thil khirhkhan tam tak zingah Suangtuahna kan inhman nasat hleih dan lam chhui ka chak deuh.
Suangtuahna hi tunlai naupang ai hian kan seng nasa deuh em aw.. ka ti deuh thin. Radio or Tape Recorder-ah zai kan ngaithla a, Kan beng hriatna chauh hmangin kan ngaithla a, suangtuahna leh mithlain a zaitu hmel leh a hla thuin a ken tel thawnthu kan chhui zui thin. Drama kan ngaithla a; Hamlet, Romeo & Juliet, Johana, Ka ngaidam tawh che asin!, Thangkura, etc.
Beng hriatna mai chauh chhawrin Suangtuahna khawvelah kan zuanglut a, ngaihtuahna hmang thatchhe ber tan pawh ngaihtuahna tam tak sen a ngai bik a ni. Cartoon film tha tak tak te, Computer Games or Video Games la awm ve hek lo, phuahchawp tak taka infiamna hrang hrang dap chawpin hun kan hmang liam thin. Thil tam tak hi loh theih lohvin ngaihtuah a ngai bik tlat a ni.
Tunlai naupang chuan a tlangpuiin Creative mind hi an tlachham deuh tawh em aw? ka ti thin. An mahni kutkawih liau liaua thil tih tum ve na hi an nei chau em em tawh a, thil hoteah pawh tih sak hi an ngai nasa bik tawh a ni.
An thiam loh a ni hauh lova, Khawvel lo changkan zel leh nunphung lo sang tain a kel tel a ni. Dream ngai ve hauh lovin TV/Video/Games a tak lang nghal vekin an nei a tawh. Zai ngaithla se, a tlangpuiin, a satu hmel leh a hla thu mil video en nghal tur a awm tawh a.
Audio chauh Drama ngaihthlak a ngai tawh hek lo. Thawnthu ngaihthlak dauh dauhva mitthla chawp ai chuan Film tha tak tak, mitthla chawp ngai hauh lo duh hun huna en tur a awm ta bawk nen.
Mihring nunah hian Creativity hi a pawimawh em em a, tunlai kan naupang ho tan hian Creative Mind an neih theih nan tihsak theih kan nei em? Heti lam hi kan ngaihtuah tawh ngai em?
Similar Posts:
- Gamers make bad lovers, researchers say
- Khawnge i fa? Part-2
- Music video response to racial slur
- Krismas Changkang Tak dan zia hi…
- 2011 Bugatti Veyron
July 9th, 2009 at 10:22 am
Van duai kan ti thei tawp chuan ka hre lo. Technology hian an creative phawt chuan nasa tak in a tanpui ang.
Mahse hman mai tur technology tam lutuk hian siam chhuah leh tumna lam kha a ti thuanawp thei a, technology a innghah uchuakna a awm ve thei tho.
Report this comment
July 9th, 2009 at 10:38 am
Tunlai naupangte hi chu kawng tinrengah an vannei thlawt e. Kan naupan lai khan ALOHA te hi lo zir ve ila aw…te ka ti mai mai thin. Engkim hi an kutah a awm vek a, an suangtuah buai ngai lovin engkim hi Technology hian a rawn chhawpchhuahsak vek chu a nih hi! Keini ve kha zawng…kan vanduai em mai!
Report this comment
July 9th, 2009 at 11:14 am
Rini_pa chu i ti dik hle mai, ALOHA hi zir ve leh ta ila awmzia a la awm ang em oooo ka ti thin. Hamlet a pa thlahrang kha hlau leh khur chung2 in kan ngaithla thin a, kan play ring thei si a… den duh tak a ni, zan mut theih loh nan ka hman phah fo mai!!!
Report this comment
July 9th, 2009 at 11:24 am
ALOHA an tih fo hi a tha viau em, a to ang reng sia
Report this comment
July 9th, 2009 at 11:51 am
Kawnga, engdang a nilo,nun hlui liam hnu ngaiin i khua a har a nih kha, chhun mut mai teh:)
Report this comment
July 9th, 2009 at 11:58 am
ALOHA chu than la kin lo tan a tha an tia lawm!!!! Thluak sawizawina a ni e, an ti.
Report this comment
July 9th, 2009 at 12:06 pm
Heti zawng hian kei chuan ka ngaih tuah ve thung, Tunlai naupang leh hun lokal tur naupangte hi an vannei zel dawn zawk a ang tlat in ka lo hre ve zawk a.
Suangtuahna kan tih hi ka sawi fiah thiam dan chuan kan hriatna thazam hrang hrang atang a ngaihruatna piang chhuak, a tak ram kan la thlen loh hi a ni. Chu suangtuahna ram a cheng tur chuan Ri in ngaihtuahna a min hruai lut thei ang bawk in kan hmuh hian ngaihtuahna ram a min hruai lut thei tho. Hei vang tak hian hmanlai naupang ai khan tunlai naupang in ngaihtuahna seng tlem lovin an seng tam zawk a ngem ?
Tunlai naupang hi Kum 2 kum 3 mi lek pawk kha i mobile phone kha han pe teh. Beng a ngaihthlak nachang hre lo an tam lo khawp in ka ring, chu chuan kan vel a thil awm zir zel hian mihringte hian thil kan zir tih a hriat, hmanlai ai khan tunlaiah chuan thil changkang zawk a tam avangin naupangte pawn zirtur an ngah a, an rilru a seng tam zawk in ka ring tlat!
Creativity chungchangah pawh tunlai naupangte chu Creative Mind nei tur a zirtirna Media lam a changkanna hian a kengtel zawk lo maw?
( NOI
)
Report this comment
July 9th, 2009 at 12:16 pm
Diktea_Pa hi a titi bawrh bawrh lai leh a nui hmel hmu tawh in awm em?
Report this comment
July 9th, 2009 at 12:27 pm
Eng generation nge vanduai zawk tih lam chu sawi thiam a har ngawt ang. Ka fate hovin thil min zawh hian, ‘nangni chu in vanduai mang e aw’, ka ti rilru fo thin a. A lehlamah chuan keinin kan mumang lamah pawh kan man phak loh thil changkang tak tak kha an kutah a awm ta si a, vannei ka ti viau lawi bawk. Kan naupan lai chanchin ka hrilh thin hian, khatih hun lai anga awm ve kha an chak thei viau lawi si…
ALOHA =Abacus Learning of Higher Arithmetic hi a zir rual naupang neih chuan zirtir ve ngei chi a ni, an ti.
Report this comment
July 9th, 2009 at 12:28 pm
Arkhay…ALOHA chu tha tih riauna ka nei. Ka fanu kum 8 mi lek hi Level 1 a kal mek a. Class vawi 5 chauh a la kal chungin Number 100 hnuai lam belh chu a chak khawp mai. A kut zungtang 10 hmangin rang takin a belhin a paih chhuak zung zung thei tlat. Number chi hrang hrang sawiin han belhin han paih tir vel ila, hmuhnawm thamin a thiamin a rang tlat. Kan naupan lai kha chuan 10 aia tam belh chuan kan kutzungtangin a daih tawh loh chuan ke zungtang lam kan bih ngar ngar a, a la daih loh fo chuan thiante ke zung trang kan melh tel thin kha a nia. ALOHA-ah chuan an kut zungtrang 10 a tawk viau mai.
Report this comment
July 9th, 2009 at 12:46 pm
ALOHA chu a that hmel viau chu,Number 10 chunglam pawh pheikhawk pum bun chungin an belh thiam dawn bik a :lol:
Tunlai naupang an vannei,an khawsa nuam tawh tlat, kawng engkimah.
An vanduai, khawvel nun tak tak an hrethiam mang lo thung.
Keimah leh keimah ka debate a nih kha :!:
Kawngtam takah chuan tunlai naupang vanneih zia leh tunlai hun ang a naupan that leh ka chak thin, tun a kan fel ang tho hian fel chho i la…Eh ! :lol:
Report this comment
July 9th, 2009 at 1:10 pm
Hmanlai ni si lo tunlai ni chiah bawk si lo ho hi kan vanduai berin ka hria kei chu! Hmanlai (engtia rei chiah nge ka hre lo!) thil chu hnuchhawn ram kan lo ti ve laklawh si a. Tunlai thil chu hmalam thlirin kan thlir ve deuh roh bawk si a. Kan lai a ni e…
Report this comment
July 9th, 2009 at 2:35 pm
Kawng thenkhatah an vannei a, kawng thenkhatah erawh an vanduai ka ti. Kan naupan laia kan hlimpui em em thin tam tak- saihlum hrual, sava veh,thangkam, sephung laih, tangtial vai,tawlhpahrit tawlh, tlangsam hmun bawh en te leh thil dang tamtak kan tuipui em em thin te kha tunlai naupang chuan an hre ve ta lo. Theirah leh thil dang dang, tui ti taka kan ei thin te, Sekhupthur te kha aw, S (esi) chhang tui kan tih theih zia te kha. Masi a lo thlen dawn a kawrthar etc kan neih a kan lawmna leh ruaitheh nuam kan tihna ang kha tunlai naupangte hian an pawh pha hian ka ring lo. Tunlai chuan thil tha leh to deuh pawh han lei sak ila lawm ve viau bawk mahse a tur reng a ngaihna hi an nei deuh tlat tawhin a lang. A leh lamah chuan an vannei tawh khawp mai. Thil engkim mai hi a hun lai hi a awm ve a, khaikhin thiam a har. Naupang hnena kan naupan lai cc sawi chuan an nuih a za tlat tawh.
Report this comment
July 9th, 2009 at 2:44 pm
Kan tehna hun zel a zir nimai in ka hria. Tunlai naupang pawh hian an fa te chu ‘vanduai’ an la ti ve thovin ka ring. Kan hun laia zaithiam tak tak kan ngaihthlak a, tunlai naupang hovin an tuipui te nen kan khaikhin chuan an khawngaih thlak ka ti. Mahse an ni chuan an hun tawn ang kha ropui ber ah an ngai tho chuan ka ring/hria.
Report this comment
July 9th, 2009 at 3:02 pm
Zirna leh khawsak changkanna lamah chuan an vannei hle zawk niin ka hria. Mahse, kan ‘Mizo Tlawmngaihna’ hlu tak mai hi ti nung reng turin inchhungkhur leh zirna in a zirtirtute’n tan lak a pawimawh hle in ka hre bawk a. Tlawmngaihna ti nung reng tur chuan Zirna In (Zawlbuk) a tangin a tam zawk chu kan zir in kan nunah a intuh theih nana tangkai ber te chu ZIRTIRTUTE niin ka hria.
Report this comment
July 27th, 2011 at 2:56 pm
ÐÀÇÁÎÐÊÀ È ÄÅÌÎÍÒÀÆ ÇÄÀÍÈÉ È ÑÎÎÐÓÆÅÍÈÉ…
minny…
Report this comment