«
»

Second hand smoke

July 25th, 2009 1:54 pm by tintin

Secondhand Smoke?

Meizial khu hmun thuma thena hmun hnih hi a zutu chuapah lut lovin boruakah a leng vel a. A zutuin a hip luh meizial khu ang thovin a bula mite tan he meikhu hi a hlauhawm a ni. Pasalte meizial zuk nasat avanga an nupuite, meizial zu lo,  chuap Cancer vei si an tam em em. Hetianga mi dang mei zuk khu, boruaka leng vel lo hip luh ve hi Secondhand Smoke an ti a, Environmental Tobacco Smoke (ETS) emaw Passive Smoke an ti bawk thin. Secondhand Smoke hi chi hniha then a ni leh a:

  • Sidestream smoke: Sikret, zozial, tuibur, vaibel, biri, cigar leh pipe tan kaina lam hmawr atanga vaihlo khu lo chhuak hi Sidestream smoke an ti a. He vaihlo khu hi a hlang tha (concentrated)-in a hlauhawm em em a ni.
  • Mainstream smoke: Mei zutuin a hip luh bang mei khu a rawn thawk chhuah leh hi Mainstream smoke an ti a, a dal hretin a hlauhawm nep deuh.

Eng vanga buaipuiawm nge a nih?

World Health Organisation (WHO) peng pakhat International Agency for Research on Cancer (IARC) leh US Environmental Protection Agency (EPA) te, US National Toxicology Program te chuan Secondhand smoke hi mihringa cancer thlentu langsar tak a ni (known human carcinogen) tiin an puhthlu thuai mai.

Vaihlo khuah hian “chemical” chi hrang hrang 4000 chuang a awm a. Heng zinga 60 aia tam mah te chu cancer thlen theitu niin, Polynuclear Aromatic Hydrocarbons (PAHs), N-Nitrosamines, Aromatic Amines, Aldehydes, Benzene, Vinyl chlorides, Arsenic, Beryllium, Cadmium (battery siamna hmanrua), Lead (rawng siamna), Nickel leh Radioactive Polonium-210 te hi a hlauhawm zualte an ni.

Secondhand Smoke-ah hian boruak hlauhawm (poisonous gases) tam tham tak a awm bawk a. Hydrogen Cyanide (chemical weapon atana hman thin), Carbon Monoxide (motor mei khu chhuahna atanga lo chhuak thin hi), Butane (gas lighter tuiah an pawlh thin), Ammonia (bathroom leh toilet tihfaina hlo) leh Toluene (rawng hnawihna thinner siamna hmanrua) te hi Secondhand Smoke-ah hian a awm vek a ni.

Tin, Arsenic (rannung thahna hlo), Chromium (steel siamna hmanraw pakhat) te hi Secondhand smoke-a thil sakhat hlauhawm (toxic metals) awm te chu a ni bawk.

Ngun taka an zir hnuah, US Surgeon General (2006) report ‘The Health Consequences of Involuntary Exposure to Tobacco Smoke’ (Duh reng vang nilova vaihlo khu hip luhin hriselna a nghawng dan) chuan hetiang hian thutlukna pawimawh tak mai a siam ta a:

  • Secondhand smoke hian mei zu ngailo naupang leh puitling zingah natna tam tak bakah hma taka thihna a thlen a ni.
  • Mi mei zuk khu hip fo thin nausen leh naupangte chu nausen laia thih thut (sudden infant death syndrome), hritlang awm na benvawn, pneumonia, bronchitis, beng kherh leh lawng bakah asthma te an tan a pumpelh theih loh tluk a ni.
  • America-a zirchianna atanga an hmuh danin naupang rilru ngaihtuahna, thluak hnathawh (mental development) leh an thil chhutna (reasoning skill) a khawih buai nasa a ni.
  • Puitling mei zu ngailo, mi mei zuk khu hip fo thin zingah lung leh thisen zam natna chi hrang hrang leh chuap cancer a hluar bik.
  • Meizial khu hian hmeichhe naupai laiah nghawng thalo tak a neihte chu – naute thla kim loa hrin te, nau zang leh te bik (low birth weight) hrin te, naute hrisel lohna  leh bawrhsawmna a thlen te hi a ni.
  • Secondhand smoke hi a tlem emaw a tam emaw, a nasa emaw nasa lo emaw a hlauhawm dan a inchen vek a ni.

Khawi hmunahte nge harsatna a thlen?

Secondhand Smoke i hnualsuatna tur hmun pathum pawimawh deuh deuhte chu:

I hnathawhna hmunah: Puitlingte tan chuan hnathawhna hmun hi duh loh meizial khu an hip tamna hmun lun ber a ni awm e. America rama hnathawhna hmun hriselna leh himna enkawltu pawl lian tak Occupational Safety and Health Administration (OSHA) chuan, cancer thlentu bulpui ber ni turin Secondhand Smoke hi kawng engkimah mawhphurtu nih a tling tawk a ni tiin a puang hial mai.

Vantlang hmunah:Vantlang hmun kan tih hian mipui kan punkhawmna hmun chi hrang hrang – Biak In, Damdawi In, School & College, Aganwadi centre, khawhar In leh mo lawmna In, Bus, Maxicab leh Taxi service chhung leh an dinna station, Bus stop, bazaar(shopping mall eg. Millenium Centre, Solomon’s Cave), restaurant leh a dangte (Cinema Halls, Auditorium, Intihlimna Hmun etc.)  a huam ang.

Nangma In ngeiah: Nang leh i chhungte hriselna tur atana i tih theih sang ber chu meizial khu lak atanga i chhungte i venhim kha a ni. Mei zuk khu hi hun rei tak inchhungah a chambang thin a. Chhungkaw member tute pawhin Secondhand Smoke kaihhnawih natna vei theih a ni chungin naupang pawisawilo ten an tuar nasa bik thin.

Hemi chungchangah hian kan tih theih enge awm?

Tukverh hawn thawven te, hmun hranga thut te, ventilation tha siam te, boruak thlitfimna khawl (air filter) leh fan hmante hian Secondhand Smoke hi a tibo thei tak tak lo. Nang leh i hmangaihte himna turin hengte hi hriat a tha:

  • I inchhung leh i motor-ah tumahin meizial zu lo se.
  • Nang leh i fate bul hnaiah midangin mei an zukin inthiarfihlim turin ngen rawh.
  • I fate kalna School, Aganwadi leh Day Care Centre te kha vaihlo khu lak atangin a fihlim em tih hrechiang turin fiah la, a fihlim lo a nih chuan dan in a phut angin a fihim theih nan hma la ang che.
  • Mei zuk lohna dawr leh restaurant te chauh pan thin rawh. Chung hmun neitute chu an thil tih that avang chuan lawmthu hrilh rawh.
  • Mi mei zuk khu laka inthiarfihlim turin naupangte zirtir rawh.
  • Naupai lai i nih phei chuan meizial khu lak atangin fimkhur lehzual ang che.
  • Doctor leh hriselna lam thawktute nen Secondhand Smoke hlauhawm zia hi sawiho fo ang che u.
  • Meizial zumi i lo nih palh hlauh chuan Secondhand Smoke laka i chhungte humhimna tura kawng awm chhun leh tha ber chu mei zuk i sim kha a ni tih hi pawm ngam ang che.

Eng vanga mei khu tihbawlhhlawh loh boruak thianghlim phut nge kan nih?

A chhan thenkhatte chu

  • Meizial khuin a tihbawlhhlawh loh boruak hip luh hi mihring dikna chanvo (human rights) a ni.
  • Khawvela mihring tam zawkte hi mei zu lo an nih avangin, midang mei zuk khuin anmahni a tihbuai loh hi an dikna chanvo (rights) a ni.
  • Secondhand Smoke hian natna tihbaiawm tak tak leh thihna a thlen a.
  • Zaa za boruak thianghlim hian vaihlo khuin natna a thlen theih te lak atangin hnathawktute leh mipui vantlang a chhanhim.
  • Zirchianna atanga an hmuh danin, vaihlo hman khuahkhirhna dante hi mei zumi te pawhin an thlawp tha hle a ni.
  • Ram changkangah chuan chhungkaw tam zawkin mei zuk lohna sumdawnna hmunte an pan duh zawk avangin chutiang hmunte chu a lun hle a, an sumdawnna pawhin a hlawk phah hle a ni.
  • Mei zuk khuahkhirhna dan tha tak hmanna hmuna hna thawkte tan mei zuk sim a awl bik.
  • Naupang leh thalaite vaihlo hmang ve lo turin a veng a ni.

Thu Tlangkawmna:

Secondhand Smoke hi a tam leh tlem azirin a hlauhawmna a nep chuang lo a, chuvangin engtikawng mahin kan ngai zam mai thei lo ang.

Chutih rual chuan, mei zu thin mite harsatna kan hriat thiampui a tul. Anmahni leh midangte tana thil tha anih avangin, mei zuk an sim theihna turin theihtawp kan chhuahpui a tul a ni.

Vaihlo bawiha tang, tanpui ngai i ni em? Midang tanpui ngai i hria em? A hnuaia addresss tarlanah te hian puih che kan inhuam a, TCC bikah te hian, kartin Thawhtanni atanga Inrinni thlengin, OPD hour chhungin tanpui che kan inpeih reng e:

Mizoram State Tobacco Control Society Office

Chaltlang Venglai, Aizawl Mizoram

PIN-796012 Ph. (0389) 2306663

E-mail: smokefreemizoram@gmail.com

&

Tobacco Cessation Clinic

Room No. 509

Laboratory Building (Blood Bank Chung)

Civil Hospital Aizawl, Mizoram

PIN-796001  Ph. (0389) 2315210

E-mail: tccaizawl@yahoo.co.in

&

Tobacco Cessation Clinic

CMO Office

Kulikawn, Aizawl

&

Tobacco Cessation Clinic

CMO Office

Chanmari, Lunglei

.

Similar Posts:

Recent Posts:

This entry was posted on Saturday, July 25th, 2009 at 1:54 pm and is filed under Education, Information. You can follow any responses to this entry through the RSS 2.0 feed. You can leave a response, or trackback from your own site.

10 Responses to “Second hand smoke”

  1. 1
    H.Vangchhia Says:
    July 25th, 2009 at 3:38 pm

    tintin, a lawmawm hle mai hetianga awareness min rawn pe ta zeuh zeuh hi.

    Report this comment

  2. 2
    GOMI Says:
    July 25th, 2009 at 3:40 pm

    testing, ka comment hi a chang leh in post a, a chang leh a awm lova..

    Report this comment

  3. 3
    kungawrhi Says:
    July 25th, 2009 at 5:24 pm

    nia..

    Report this comment

  4. 4
    XaiA Says:
    July 25th, 2009 at 7:13 pm

    A tha hle mai, tum hnih tum thum a zir tham tum khat ah min chhawp hnawk a, kan zo lo palh em lawng chu. :lol:

    Report this comment

  5. 5
    tintin Says:
    July 25th, 2009 at 9:18 pm

    nia ka lo ti thui deuh hlek a ni, tun tum chu tawi te te in tih kan tum tawh dawn nia.lo chhiar hram hram rawh u, kan mamawh ania

    Report this comment

  6. 6
    XaiA Says:
    July 25th, 2009 at 9:30 pm

    Misual a sawi uar atan a tha a ka rin chu mei zu thin nghei leh te tan a taksa lo “fit” leh tak dan han sawi itawm vel kha(a chhan chu a tam zawk hi zu tawh thin kan ni mai thei) ,chu chuan mitamtak nghei tur in a pui ngei ang :!:

    Report this comment

  7. 7
    ChhanaPa Says:
    July 26th, 2009 at 7:46 pm

    Meizial zuk hi a tha lo. Mahse,nghei tum,nghei thei si lo kan tam bok sia, chuvangin meizial zu,nghei thei bok si lo ten a kan hriat tur chu ‘ Meizial zuk na hun leh hmun hriat hi a ni mai.

    Report this comment

  8. 8
    lrliana Says:
    July 28th, 2009 at 10:22 am

    Meizial nghei, mahse tuibur hmuam ta hlauh te hi enge an dinhmun ni ang le

    Report this comment

  9. 9
    Alejendro Says:
    July 28th, 2009 at 10:35 am

    Meizial hi nghei tum chuan a nghei theih miah loh.

    Report this comment

  10. 10
    nell_maiden Says:
    July 28th, 2009 at 10:45 am

    Eh khai. Meizial ah hian benzene a lo tel ve tih ka lo hre ngai reng reng lo..Chuti a va rimtui lo ve (dendrite rim ang a va awmlove) hehe.
    Nia meizuk chu sim/nghei a har mahse a hun leh hmun hriat mai a thra in ka hria keipawh.

    Report this comment

Leave a Reply

You must be logged in to post a comment.