Mizote hi intihthaih nuam ti tak hnam kan ni a, keini anga intihthaih nasa hnam dang hi an awm ve ang em aw, ka ti thin. Naupang, tawng pawh la tawng fiah thei lo atangin bul kan tan a. An tah emaw, huaikawm an bawl deuh chuan, “Chumi chuan a hau ang che… Vai an lo kal a nia… Ramhuaiin a man ang che… etc.” in bul kan tan a, a changin kan barakhaih thul. Hetiang reng reng hian kan enkawl seilian a.
Chutiang hnuaia seilian tan chuan khawvelah hian hlauh tur a tam em em a, hlauhawm ni awma lang lo pawh a hlauhawmna lai hmuh phet tumin kan khawsa a. Hlauh leh râp kan ngah a, tih leh khai tur kan hre laileng bawk. Intihthaihna sikula zir chhuak tan chuan intihthaih leh insawithaih te chu a bu ang thlapin kan thiam a ni. Kristian ni lo phei ila chuan hei ai hian kan la dawihzep lehzualin a rinawm.
Tunlaia kan thu khel nasat pakhat, rêl lo luh tur chungchangahte hian a lova luak chhuakin kan insawithaih a. State dangten tangkai taka kum tam an lo hman tawh, a tel lova khawsak harsa an tih tawh laiin keini chuan hlauhawm hmuha inhmuhtir tumin mawng vawmbain kan insawithaih a. Kan media-te chu insawithaihna thuin a tial bei buai mai a nih hi!
Hman deuhah, sorkarin Lengpuia airport siam a tum pawh khan nasa takin kan insawithaih a, “Thlawhna ri bengchhengin Lengpui pa ho beng a tichhêt vek ang… etc.” te kha kan ti chiam chiam a. Tun thlengin bengchhêt an awm phah thu chu kan la hre lem lo va!
Tunah Swine Flu kan ti leh. Hei pawh, virus hlauhawm uchuak a nih loh thute leh tha taka inenkawl chuan thil hlauhawm a nih loh thu te ai chuan a hlauhawmna lam bawk kan hre tam leh ta. Malaria vei za zela thi zat leh Swine Flu vei za zela thi zat hi han khaikhin ila, a eng hi nge hlauhawm zawk tih chu a hriatthiam theih maiin ka hria. Media-te lah chuan zan tin maiin Swine Flu vanga thi an awm belh thu min la hrilh mawlh mawlh ta dah a.
Similar Posts:
- Swine Flu thawhhnihna thleng mek
- Tips to stay away from Swine flu
- Narendra Modi down with swine flu
- Mittui nên hringnun
- Swine Flu kan hlau hi
a tha khawp mai
August 23rd, 2009 at 6:05 am
Tunlai hi chuan kan ching nep deuh tawh em aw ka lo ti ve mai mai a, kan naupan lai kha chuan an ching khawp mai ka seilenna velah chuan.
Inchimral kan insawitrhaih nasa hle ramhuai ni tawh lovin. H1N1 chuchanga hlauh leh hlauh loh tur in zirtirna Vanapa Hall ah neih ani a tahchuan Eich-ai-En-ai HiNi tiin stage atranga sawipha chin khan zuk lam tlat maia :!: An zirtir ho chu an ngaihtuahawm em lawng chu maw
Malaria vanga thihna a thlen hian, Malaria control lama hma la tura ruat health deptt ho hian, thihna thlen chhan hi thui fe report a ngaih avang hian Malaria a thi ani tih hi an report trha duh lo ni awm tak ani. Ataktakah erawh chuan Malaria vanga thi hi Cancer vanga thi ai pawhin kan ramah hian a tam zawk hmel tih hi thilchikmi te ngaihdan a ni. Kei misual hian ka trawmpui khawps.
Report this comment
August 23rd, 2009 at 7:27 am
Malaria leh DDT chungchânga AIR-a Health Department lam in-advertise-na thu leh hla kha chìk takin ka ngaithla a, “Health Department,” ti lovin, “Hell Department,” a ti tlat! Ràpthlàk ru reuh tlat!
Naupan lai chuan, “Purùn nge i hlauh Khairêk?” tih te kha intihthaihna chi khat a ni. “In thum kàr,” tih ang rengte kha! “Thinlanga,” tih te … “Dàp chhuat àwng lai hnawh phui vek emaw an inti a; mahse, a thutna zàwn an lo hnawhpui hmaih a …” tih te. “Bawp bal leh rîl awrh,” tih vèl te … THIM hrim hrim hlauh te … a tam mai! “Chhawihfà leh Khaw’mu chawi ..” tih aduang! “Chingpìri-nu-in THI-ZUN a rawn ti ang,” tih te, Ar ai lawm lawm… tih te … Vaisàm ramhuai a pâwngtàl, Saza Bangla a hrâng, thisen a rawn intheh thawt thawt …
Naupang kan intihthaih mai pawh a ni lo, puitling thleng thlengin maw le .. Khawchhak Lungpui rawn lum tùr … hlauva Lalzâwna Pâwl khawchhak lama pêm chho hum hum te … H. Vànawia Pâwl te, Zathangvunga Hnamte Pâwl Thianghlim Famkim, Daktawr Biakmawia Pâwl Kohhran Thianghlim …Vulmawii Maichàm, Enoka Pâwl —kan tàl hiar lu’lam deuh … Politics lamah lah inchirhtheh rèng rèng kan bâng thei lo … hmasàwnna tak tak lam ai hian inchirhthehna thawnthu tènghneng hi kan neih belhchhah ni ta mai hian a lang …
Thesis ziak phàkho pawhin inhlauhsiak tùr an dap nasa ta mai! Kan bàwngpui khàn Jeep a hlau va; tùnlai mi thenkhatin Rêl an hlau a ni leh ber e. Hei hi chu keini mimàwlho mar (pulse) deh an tumna stetoscope-ah ka ngai a, General Election-a eng ticket emaw bera zuan-luh an tumna thang-zangsî a ni ber mai lo’m ni?
Report this comment
August 23rd, 2009 at 9:37 am
Hlauh loh tur hlau-va hlauh tur hlauh nachang hre lo keini Zo-fate khawvel hi engtik takah ENG ang maw tih hi kei misual zawhna leh beisei(bo-rih) chu ani hrih e
Report this comment
August 23rd, 2009 at 12:58 pm
Awmze nei lo a intihthaih chu a tha lo,mahse intihthaihna then khat chuan nun a siam tha ve fo awm e.
Report this comment
August 23rd, 2009 at 1:18 pm
Mi dawihzep chu a thih hmain vawi tam tak a thi thin tih thu hi a dik fu mai. Mihring tan vawi khat thih ruat a ni a, he thu hi pawma vawi khat thih chauh hlau lo mite hi mi huaisen chu an lo ni mai thin. Thih hlau tawh lo tan hlauh tur hi vang deuh mai tur a ni.
Report this comment
August 23rd, 2009 at 1:23 pm
Dan hi zah tur ani,a zawm lo chu an hrem trhin avangin a hlauhawm tih lam te hian intihtrhaih ila chu intihtrhaina trha chu ani ngei ang. Dan zawm tur hian intihtrhaih a ngai a ni lawm ni tih hi kei misual beisei(bo rih) dan a ni e
Report this comment
August 23rd, 2009 at 1:29 pm
thil reng reng hi pawngpaw huai vak tur anilo!!
Report this comment
August 23rd, 2009 at 2:30 pm
in barakhaih hi chu atitu tan chuan nuam ve deuh asin… hahaha
Report this comment
August 23rd, 2009 at 6:06 pm
He topic chu ka pawm zawng tak ani. Heng bak ah pawh hian kan puithu na (atthlak) te pawh hi kan la chhawm nung tha khawp in ka hria. Kan puithuna tam tak hi chu a tak a ni lo tih ring tho hian tumah hian zu tilui ngam chuang miahlova. Natural wonder’s leh wonders chiahlo
te pawh hi kan sawi hrang ti tih deuh zel. Kolasib a tuilut kan tih ang te khu mi ram a natural water reservoir an tih nen hian a danglam na ka hrelo, mi chuan an vawng tha a, an luh chhuak in an ti thianghlim a, natural tuizem ah an hmang mai a, keini chuan thil enge maksak leh hlauhawm deuhva sawi kan chak tlat zel in ka hria.
Hnam dawihzep tak chu kan lo ni ve hrim hrim nge ni….Rel te pawh kan hlau mauh mai!!!!!!!!
Report this comment
August 23rd, 2009 at 6:13 pm
Tuilut ahlauhawm em ni. Kulikawn Pu Vanlalngaia ram chhung a awm a ni a, kan kal in kan lut thla tawh. A thim ruih mai a, anuam reih ruih lutuk. There’s peace in the dark
Sap tam tak mak ka tih ve na mai mai pakhat. Thil hlauhawm emaw, engemaw interesting deuh min an sawi hi chian kher (proof) an tum emaw tih an awl khawp mai.
Hlauhawm min an sawi kha, a hlauhawm reng em tih an finfiah tete. An tlanchhe nghal ngawt lo. A lo hlauhawm a nih chuan an mahnin solve tum lovin, 911 an call mai hairehai.
Misual an hmuh pawn, inpun khawmin an man a an vaw ve ngawt heklo, police ah an report mai. Fel fai thaks.
MIn barakhaih miah suh u kei chu, in awm hniah phei chuan,” aw khaiah tihpalh” in hnar a thi sung mai ang. hairehai*
Report this comment
August 24th, 2009 at 10:46 am
Naupan lai kha chuan Phung mai pawh ni lo, Phungphuhrut te kha kan intihthaihna a nia, hlauhawm ve tak a ni.
Mihring hlau lo, ramhuai hlau tawh bawk si lo, Pathian hlau bawk si lo an lo pun tak zelah hian a buaithlak tan ta deuh chu a nih hi.
Report this comment