Greek Hmangaihna Chi Hrang: Johana Greek tawngah hian hmangaihna chi hrang hrang sawi nan thumal chi hrang hrang an nei tih chu kan hre vek awm e. Pathian Thu zir thenkhat te pawhin kan Kohhranah te pawh an sawi tawh thin awm e.
Agape love tih te, thian hmangaihna tih te leh a dang te kan sawi fo thin. A dik love chu ka ti hran lova, mahse heng Greek thumal hrang hrang te hi awmze hran hlak anga ngaih tur a ni hran lo mai thei tih Chanchin Tha Johana ziak hmang hian ka han tarlang duh mai ani.
A bik takin Pathian hmangiahna leh thian hmangaihna te hi thliarhrang lovin Bible ah hian synonyms (thumal hrang awmze intluk) ang pawha hmanna a awm ve tho mai. Chumi awmzia chu Pathian hmangaihna (agapaw) tih leh thian hmangaihna (philew) tih a then vek mai hi a fuh chiah lova, kan Bible lehlin thlengin a nghawng thei tihna a ni.
Chanchintha Johana ziak bung 21:15-17 ah Lal Isua leh Petera inbiakna kan hmu a, helai ah hian chiang takin agapaw leh philew hi kan hmu ani. Greek ka khawih tak tak hma chuan a English ai mahin a chiangah ka ngai thin a, mahse tuna kan Bible-a kan lehlin dan hi agapaw (Pathian hmangaihna) leh philew (thian hmangaihna) then hran kan tum tlat avangin a buai tlat ani. Kan bih chiang ang helai chang te hi.
Kan Bible letlingtuten an hriatthiam dan leh tuna kan Bible a kan hmuh dan chuan, Chang 15 na ah Lal Isuan Petera hnenah, “hengte ai hian nangin kei mi hmangaih (agapaw-Pathian hmangaihna) em,” a ti a. Peteran, “Aw Lalpa; ka ngaina (philew-thian hmangaihna) che tih i hria e,” tiin a chhang let a. Hengte ai hian tih tel tawh lovin, a vawikhatna ang deuh bawk khan an in zawt in an in chhang leh a.
A vawithumna ah chuan Lal Isuan, nangin kei min ngaina (philew-thian hmangaihna) em a ti ta thung a. Tuna kan hriatthiam dan chuan Isuan a vawithumna ah Pathian hmangaihin min hmangaih em ti tawh lova thian hmangaihin min ngaina em a tih tak zawk avang khan Petera kha a lungngai ani. Petera lungngaih chhan kan hraitthiam dan hi chu awlsam te in a chinfel theih awm e, English translation NIV te en hian a chiang nghal mai.
Johana hian Pathian hmangaihna leh thian hmangaihna hi thenhran a tum lova, amaherawhchu Greek tawng kan zirna a kan lo hriat than (hmangaihna chi hrang hrang) angin helai Bible chang hi kan letling ani zawk, chu chu anih dan tur ani chiah lo deuh ani. Johana hian Lal Isuan Petera hnenah vawi thum ngawt min hmangaih em tiin a zawt nawn tih a ziak mai ani.
Tin, Petera pawhin Lal Isuan ringhlel awm fahrana vawi thum ngawt a zawt nawn hi a lungngaih phah zawk ani. A hma lawka a phat thu te kan chhiar chuan helai an in zawhna hi a awm viau ani. Lal Isuan a kalsan tawh dawn a, a zirtir a rin ber mai pawh khati mai kha ala ni si, chuvang in amah tih chiannan a zawt nawn sek ani mai thei.
Sawi zui tur a tam, mahse kan subject anih loh avangin helai chu duh tawk ang. Chang 17 tawp lama, “Tin, a vawithumnaah, “nangin mi ngaina em?” a hnena a tih avang chuan Petera a lungngai a” tiha “ngaina” tih kher hi a chuang tlai hret. Hmangaih tih leh ngaina tih a thliar tum hian a ti khaihlak ani. A hmangaihna leh a ngaihnatna lam ni lovin, a “vawithum” lai hi helaichanga pawimawh zawk tak chu ani a, chu chu Petera ti lungngai tu pawh chu ani zawk awm e. Kan man em le? Ngaina tih a hman tak avang ni lovin vawithum a zawh nawn vang zawka Petera kha lungngai ani.
Engvangin nge synonyms anga kan ngaih ang? Johana hi chhiar chiang ila (a Greek ah chauh a chiang). Lal Isuan “a zirtir a hmangaih” tih tawngkam hmang hian kan en ang. Bung 19:26 te 21:7 te leh 21 20 ah te chuan “a zirtir a hmangaih” tih nan agapaw (Pathian hmangaihna) tih a hman laiin, bung 20:2 kan en chuan “Simon Petera leh zirtir dang Isuan a hmangaiha hnenah” tih ah chuan philew (thian hmangaihna) a hmang leh tlat thung.
Chuvang chuan a changin a zirtir Pathian hmangaiha a hmangaih ania, a chang in thian hmangaiha a hmangaih tihna ani thei dawn em ni? Kan sawi tawh angin Lal Isua leh Petera in biakna a Pathian hmangaihna leh thian hmangaihna kan lehlin hran ang hian kan letling zel dawn anih chuan, a changin Isuan a zirtir a hmangaih a ni ang a, a changin a zirtir a ngainat tih a kan lehlin hran nuaih a ngai dawn tih na ani.
Anih kei leh nang hi Krista tana rinawmna thu tiam ve fo tawh thin kha kan ni lawm ni? Vawiin ni ah hian Kristan “hengte ai hian nangin kei mi hmangaih em min ti.” Engtin nge kan chhan ve ang? Vawi engzatnge kan phatsan tawh le? Thlarau Thianghlim hmangin Kristan amah kan hmangaihna hi Peteran a hmangaihna ang khan hriatchian a duh ani. Vawi engzat chiah nge min zawh nawn ve tawh thin le? Krista kan hmangaihna hi vawiin ah hian sawifiah a la ngai cheu dawn em? Lal Isuan vawithum ngawt Petera a zawh khan engnge a awmzia ni thei le? Petera kha ama lamah a chiang tawk lo ani thei, chuvang chuan amah Petera ngei pawh a lungngai ta a nih kha.
Amah tichiang turin Kristan vawithum ngawt a zawt a ni thei. Keini hi kan chianloh thin em avang hian lungngai ve tur kan ni dawn lawm ni. Piangthar inti tawh thin te hi kan nun chawhpawlh lutuk avang hian Thlarau Thianghlimin min zawh reng thin angin, vawiinah hian Krista kan hmangaih chiah em tih min zawt nawn leh ta, engtin nge kan chhan ang?
Petera chuan a lungngaih hnu khan thih thlengin Krista a hmangaihna a tilang chhuak ta zawk ani. Chutiang chiah chuan keini pawh Krista kan hmangaihna tun thlenga zawh nawn kan la ngaih reng chuan kan lungngai ve tur ani ang, chumi lungngaihna chuan min ti chhelin, phatsan tawh ngailovin kan damchhung hian Krista kan hmangaihna hi chiang takin kan ti lang zel tawh zawk tur a lo ni.
Similar Posts:
- Simon, Johana fapa, nangin mi hmangaih em?
- Nu Hmangaihna
- I Phatsan thin em ? (Pathian Ni pual)
- Enge Pathian Thu?
- Hmangaihna Dik
ps. Model ngawr2
October 12th, 2009 at 9:04 am
Greek tawng hi chu a hausa bik riau
Report this comment
October 12th, 2009 at 9:17 am
Ni e, Greek ho hi mifing hmasa an ni a, an tawng pawh a hausa hlein ka ring. Hmangaihna chi hrang (Agape, Philia, Storge, Eros) an han nei hrang thliah thliah te hian an tawng hausakzia a tilang thin.
Mihringte atang hi chuan Agape hi chu a chhuak thei dawn em ni? Keini mihring inhmangaihna te hi chu Pathian hmangaihna (Agape) nen chuan tehkhin phak niin ka ring lo.
Report this comment
October 12th, 2009 at 9:52 am
Pathian hmangaina thuk zia hi Greek trawng pawhin a phawk zo thei hian ka ring lo.
Paula pawh khan “A kimlo in kan hria … darthlalangah kan hmu riai ruai ..” a tih kha he post atrang hian kan hmufiah riai ruai tho tho ang tih hi kei misual ngaihdan ani e
Report this comment
October 12th, 2009 at 10:29 am
pathian hmangaihna hi sawi a fiah emaw tawngbungrua hausa emaw lam a tanga teh phak theih a ni ngai lo vang.agape ah hian adang zawng- Philia, Storge, Eros te hi a khung len vek theih bawk.
Mihringin hmangaihna kan lo tem leh hriat ve zawng te pawh hi pathian hmangaihna hlim thla leh kan hriatfiahthiam theih nan a entirna min pek a ni dawn lawm ni.
Mihrinngpuite hmangaih loh chuan Pathian engtinnge ‘ka hmangaih’ kan tih theih ang le.Petera kha zawng kan Lalpa khan hman duhna a nei a ni.Petera kha vawithum a phat zat chiah a zawh nawn khan a lamah a pawm let leh entirna a ni thei bawk ang.
Pathian mize ropui ber chu hmangaihna a ni,hmangaihna a khat a ni si a.Amah hi hmangaihna chu a ni.
Report this comment
October 12th, 2009 at 12:08 pm
Hman kum deuh tawh khan Lunglei Serkawn Biak Ina BCM inkhawmpui an nghah tum a ni ta awm e, chu ta Upa pakhat tawngtai an sawi chhawn ka lo hriat chu hetiang deuh hian a ni: “Lalpa, i hmangaihna hi a nasa em a, HMANGAIH LUANGLIAMA ka’n ti teh ang che…” a ti a ni awm e. Tun thleng hian ka ngaihtuah chang apiangin ka rilru a la khawih nia..Kan Pathian hi ‘Hmangaih Luangliama’ han tih chu a phuin a va inhmeh em ka ti thin!
Report this comment
October 12th, 2009 at 3:11 pm
Ngaihnawm hle mai. Zirchianna leh sermon pangngai ang bawk si, kan tihtur min kawhhmuh tho bawk si anih na hian ati hlu zual e.
Khimi context bik ah ni chuang loviin, phileo; Mizo tawnga , ‘ ngaina ‘ tia an letling hi chu amawi ka lo tive thin.
” Hengte ai hian nangin kei min hmangaih ( agape- hmangaihna zawnga hmangaihna sang ber ) em? ” Helaia Lal Isuan comparison ( hengte ai hian ) a siam hi amawiin apawimawh khawp bawk mai.Zawhna mawlte zawhna zawt siin, zawhna chhan har ber ani lawi si ang !
“Hengte ai hian ” – atih hi hetiang hian a sawi theih ang. Peter zirtir dangten min hmangaihna aia nasain min hmangaih em ? I nitin eizawnna ( fishing ) aiin min hmangaih em ?
A thu hrim-ah Peter atan khan, Isu, Agape hmangaihna-in ka hmangaih che han tih kha chu a harsa khawp ang le. Anun hmalam an en let anga , alo phatsan tawh si a. A nun ah khan agape hmangaihna NUN a hmu si lova.
Tin, Lal Isuan a zawh vawi thumnaa agape hmang lova phileo ahman tak zawkna chhan pawh hi Petera nun ahmuh chian em vang pawh ni thei.
Isuan Petera hi nakina apostol-te hruaitu tur atan a duha, Lal Isua kha engdang zawng aia a hmangaih hmasak a duh ani.
Tin Lal Isua hian, agape a hmangaih tur hian min phut nghal kher lova. Kan hmangaih tawk lo tih min hriattir aduh a, chumi inhriatchhuahna hmun atang chuan; nitina kan hmangaihna chu thanglian ( grow ) zel turin min duh ani.
Report this comment
October 12th, 2009 at 3:22 pm
unau duh takte u. Hmangaihna dik tak, Pathian hmangaihna hi zawng, sawia fiah chi a ni tlat lo. Chanfiah chi a ni ber e.
Report this comment
October 12th, 2009 at 4:12 pm
Greek ho chauhin ‘Hmangaihna’ chi hrang hrang an nei hleinem. Mizote pawhin sum hmangaihnate, inchei hmangaihnate, Zu inpui hmangaihnate leh thildang dang hmangaihna kan neih ve tho hi
Report this comment
October 12th, 2009 at 4:16 pm
Valkebai-a (fam) hmangaihna pawh ka hria. A bialnu in, ” u Val mawh, mi hmangaih ve em,” a ti sek mai a a ning ta deuh aniang, “ka ngaina che tih i hria eeeeeee,” sin fiak raihin a tih khum. A tap, kan in thlem vel hairehai :))
Report this comment
October 12th, 2009 at 8:46 pm
@HV : Vâlke-a i rawn sawi —ka lung i tilêng kher mai! Mizo-tawnga inbe ngai lo kan ni a, kan phùnglùng dùn thei khawp mai!
Kan kalna a kilkhàwr châng a tam … kal lamah mah a bai tawh a —hàwn lam phei hi chuan, ani’n a thluak fìm a rizàp tawh si a, ka muscle nge nge kha kawngpui a thlen theihna a ni thìn!
Kan inkawm lai khân UNAU-PIANPUI (or THIAN) INHMANGAIHNA (Phileo) ang chiahin kan inkàwm. Amah ka han thlìr chian khân a mit pàwng hlit hlet, a khabe leh hmui —hnapthlèng hmul chhip chhepte kha ka han en chianin, hmeichhiaah ka inchan chhin a, EROS han neihna èm tùrah ka ngai thei si lo! Rui thle ngiala kan khawsak dun lai khân Pathianin min hmangaih dùnzia AGAPE kha kan sawichhuak lo dùn ve khawp mai! Thàwkkhat zuai —a nupui tehsùr kha chu —a hmêl a chhe lo khawpin ka hre thung. A nupui han hmuh kha chuan —zauthauna EROS hi a rawn chhuak dâwn lek lek thìn. EROS leh Phileo pawh hi thliar hràn duh tak tak chuan —keimahni atanga feeling-ah hian a hriat khawp mai!
“Greek Hmangaihna,” tih caption khi “Hmangaihna chi li te —Greek Tawngin” tih ni zàwk ta se, a fiah zàwkmahin ka ring.
A ha ha! Ka thenawmah hian Greek chhûngkua an awm a, an fanu hi a chhe lo mai mai khawp a … thlìr rùk zui vawng vawng a awl khawp mai, “Greek Hmangaihna” a awm deuh dâwn emaw ni chu le?
Chu Greek hmeichhia —ka va thlìr rùk zui duhna kha EROS chu a ni chiang mai le —farnu (thian) enin ka en phal lo tlat pawh a ni thei! E heu! kan inkârah PHILEO awmtîr ka phal lo tlat em ni? Hetiang ngaihtuahna leplèrh hi Pathianin mihringte min hmangaihna AGAPE nèna khaikhin ngam chi zia chu a ni ta hauh lo mai!
He Grik hmeichhia hi a nu, a hringtunu chuan STORGE takin a hmangaih ve leh dâwn bawk. Eros rilru taka ka lo thlèk deuh deuh lai khân, a nu erawh chuan a fanu inkhalh chhuak tùr kha, him taka rawn kìr leh tùrin —STORGE takin a thlîr liam dâwn bawk a ni. Kan thlìr liam dàn —STORGE tak leh EROS tak pawh hi —a la inthlau hle dâwn mai.
Philadelphia khua kan piah maiah sâwn dârkâr li vèl tlànah a awm a —Unau inngaina takte awmphung changchawia khawpui an din a ni. Amish an tihho, American thingtlâng-mi dik tak te chènna ram a ni. Tùnlai technology nèn an inhnìmhnai duh eih lo. Quakers-ho inbenbelna hmun kha Pennsylvania, Philadelphia hmun leh a chhehvèlte hi an ni.
Mizo-te pawhin sawi fiah chian dàn kan neih thiam chuan, hmangaihna chi lite chu a hming chher hrang kher hlawm lo mah ila —kan lo neih ve vek, sense and feel HRAN theih vek an lo ni, tih hi ka puang ve a ni ber e.
Johana Greek (Johanine Greek tihna deuh em ni?) han tih kher khi engnge a awmzia? Kan hmangaih rùk ve viauten, “Thian angin inen ang aw,” an han tih hi chuan —EROS leh PHILEO inkâr thil a lo ni ta daih mai si a, la na vang vang zàwk chu a awm theih teh mai asin! PHILEO-a bul tanin, EROS-ah kan lùt chho fo!
Report this comment
October 12th, 2009 at 9:30 pm
Kan bible ah pawh hian mihringte in hmangaihna ah THIAN leh Nu hmangaihna a teh fungah a hmang ve chawk lo thei lo va,Agape lan chhuahtir nan mihringte chungah tihlan a ngai si a le.
Tuipawlhloh (tak tak)agape hi chu a har deuh a niang a cocktail leh thin chang a awm thei ta ve ang.
Report this comment
October 12th, 2009 at 10:38 pm
Greek tawng chuan hmangaihna chu engzat pawh lo nei sela, buaina em em tur a awm lo. Pathian Hmangaihna hre fiah tur leh Pathian duhdan anga AMAH hmangaih leh midangte hmangaih dan hrethiam tur chuan Lal Isua hi a pawimawh ber. Hmangaihna thu a sawi lai khan Greek tawngin a sawi lova, mawlte in hebrai/aramaic in a sawifiah mai zawk ani:
Agape, Philia, Storge, Eros – heng Greek thumal hriatfiah em em ai hian Lal Isua thusawi mawlte hian hmangaihna chu a sawifiah zawk.
Agape = Isua Krista thuawih
Report this comment
October 12th, 2009 at 11:12 pm
Ἐὰν ἀγαπᾶτέ με, τὰς ἐντολὰς τὰς ἐμὰς τηρήσατε
AGAPE thumal tho, agapate tih ISUAN a hmang! Grik tawng chu a ni tho mai!
Agape = Isua Krista thuawih?
Agape (n), Agapate (v)
“Nangnin mi ἀγαπᾶτέ (hmangaih) chuan ka thupèkte chu in zàwm ang.” [Johana 14:15]
Report this comment
October 12th, 2009 at 11:23 pm
Isua tawng hman original nilovin Greek tawnga an ziah dan ani zawk lo maw? Isua khan Greek a hmang hleinem.
Tin a Greek tawng ka letling lova, Pathian thu in hmangaihna/agape min zirtir dan ka tarlang mai zawk ani e.
“Tupawh in a thu a zawm chuan Pathian chu a hmangaih takzet ani.” 1johana 2:5
Report this comment
October 12th, 2009 at 11:25 pm
@Donald : YOU ARE RIGHT! But, Johanine Greek a ni lo’m ni kan thupui hi? Chuta Hmangaihna sawina chi li?
Aramaic chu hmang e, “Talitha Kumi …” tih aduang chu!
Tin, Assamese leh Hindi chheh fin atang hian Nagamese a chhuak a, Aramaic hi PIDGIN ENGLISH nen tehkhin ila, a fuh phian mai lo maw?
Report this comment
October 12th, 2009 at 11:36 pm
Ni e.
Pathian hmangaihna [agape] chungchang kan sawi a, Lal Isuan a sawifiah dan ka rawn sawi.
Report this comment
October 12th, 2009 at 11:37 pm
Donald : I tidik, ka thlawp che. Pathianin min hmangaihna hi AGAPE a ni a; a thupèkte (Commandments/Commandment —Johana hian a ziak kawp si a) kan zawmin “kan AGAPE lèt” ve tih a ni tih tichiangtu kha Isua a ni a. Agape hi keimahni lam atang pawhin a awm ve thei a nih dâwn chu —Pathian min hmangaihna sawi bìk nân chauh ni lovin!
Report this comment
October 12th, 2009 at 11:43 pm
chawnghilh : Ka lawm e.
Report this comment
October 12th, 2009 at 11:50 pm
@Donald : Five-senses thanks!
Report this comment
October 16th, 2009 at 6:35 pm
Isuan Greek a hmang lo maw? Chiang chiah em? Isua kha Hellenization hunlaia mi a ni a, a hunlaia mite ang bawkin aramaic leh Greek hmang thei ve ve anih a rinawm ve tho lo maw?
Report this comment
October 16th, 2009 at 6:42 pm
Mizorama mihlim nuho pawh AGAPE atanga EROS a an luh chho thin vang alawm an khurbing a, sawn-thianghlim te an pai nawlh nawlh mai ni!
Report this comment