Hmânlai hian Satel hian rûlpui tui a vêng a. Nakînah chuan Sakhi hi a lokal a, Satel chu rûlpui inzuankahlênsiakah a sâwm a. Satel chuan, “E khai, kei zawngin ka zuankahlên ve zo lovang; rûlpui tui chu ka bawh keh ngei dâwn a, a hlauhawm dâwn êm mai,” a ti a. Mahse Sakhi chuan, “Bawh keh mah la ka chhan tlat ang che, hlau reng reng suh,” tiin a thlem lui talh a, Satel pawh chuan, “Ni e maw le,” a ti ve ta a.
Tichuan Sakhi chuan rûlpui tui chu a han zuan a, a zuankahlên thei mai a. Satel pawh chu ‘pak chheih khah’ tiin a han zuang ve a; mahse a zuan khum thei ta lo va, a bawh keh ta rap mai a, a pu Rûlpuia pawi a khawih ta. Sakhi chuan a hlau ta êm êm mai a, chhan ngam lo napui chuan tihngaihna dang hre hek lo, “Tela, tlan ta mai rawh, ka hum ngam bik lo che,” a ti a, a rang a rangin a tlanbo ta a.
Chutichuan Satel chu a tlan pawh tlan hlei thei lo chuan chhuk zâwngin a lumin a lum ta bawp bawp a, Saza in a dêng a, Sazuk in te, Sanghal in te a dêng zel a. An hnênah chuan, “Rûlpui tui ka bawh keh a, min hum rawh khai,” a ti zel a, an lo hum ngam lo zel a. Nakinah chuan Savawm in hi a zuk dêng leh dawt mai a, ani chuan, “Tu nge ka in dêng?” a lo ti a, Satel chuan, “Keimah Teltea,” a ti a. Savawm chuan, “Eng nge i hlauhva khatia i lo tlanchhiat chiam mai?” a ti a. Ani chuan, “Sakhi nen rûlpui tui kan inzuankahlênsiak a, ka zuan khum ve zo lo va, ka bawh keh ta a. Rûlpui chu ka hlau va, ka lo tlanchhia a ni, nang zawngin mi hum lul ang che,” a ti a. Savawm pawh chuan, “E khai, ka hum ngam lo’ng che, tlan leh mai tawh,” a ti a, a tlan leh ta a.
Sakei in hi a zuk dêng leh a, “Tu nge ka in dêng?” a lo ti a. Satel chuan, “Keimah Teltea, Sakhi nen rûlpui tui kan inzuankahlênsiak a, ka zuankahlên ve zo lo va, ka bawh keh ta a, ka hlau va, ka tlanchhia a ni,” a han ti a. Sakei pawh chuan, “E, khai khai khai, chu zawng ka hum ngam awzawng lo mai che, tlan leh ta mai tawh,” a lo ti ve leh si a, a tlan leh ta bauh bauh a. Nakinah chuan Murâ in hi a zuk dêng leh ta dawt a, “Tu nge ka in deng?” a lo ti a. Satel chuan, “Keimah Teltea, Sakhi nen rulpui tui kan inzuankahlênsiak a, ka bawh keh ta a, ka hlau a, ka lo tlan a ni,” a ti a, humhim a dil nghal a. Murâ chuan, “E, hlau reng reng suh, keiman ka hum ang che,” a ti a, a thla hnuaiah chuan a bihruktir ta tlat a.
Rûlpui chuan Satel hnu chu a rawn chhui a, sa apiang chu a rawn zawt zêl a. Murâ in a lo thlen dâwn chuan a rawn tleng ri leh ta hruah hruah mai a, Murâ chuan, “Chu, eng thawm nge ni ta?” a ti a; Satel chuan, “Chu chu alawm ka hlauh chu, rûlpui tleng thawm a nih chu,” a ti a. Rûlpui chu a lo thleng ta a, Murâ hnênah chuan, “Teltea i lo hmu em?” a han ti a, Murâ chuan, “Hmu teh suh e,” a ti a. Rûlpui chuan a ringhlel deuh a, “I inah hian a hniak a tawp si a, i hmu ngei tûr a ni; i thukru a ni ang e, i thla kha han zâr teh,” a ti a. Murâ chuan a thla lehlam chauh chu a han zâr duai a. “Lehlam kha han zar leh teh,” a ti a, Murâ chuan, “Helam hi zawng a nâ a ni,” a ti ta tlat a. Rûlpui chuan, “Tlêmte talin kan kau teh,” a ti talh a, a han kau a, Satel mei hmawr chu a hmu ta hlauh mai a. Chutah rulpui thinrim chuan chunglêng leh hnuailêng indo thu a puang ta a ni.
Chutichuan hnuailêng zawng zawng chu an inko khawm a, indo tûr chuan an inbuatsaih ta mup mup a. Chunglêngho zawng zawng pawh an inko khawm a, bûngpui zârah hian an fu khawm tuih mai bawk a; inbeih dân tûr chu an rêl tawn ta mup mup mai a. An rel zawh chuan an inbei ta a; rûlpui chu a han ding ûr ûr a, bûng zâr lehlam chu na tak hian a han vaw bal hlawk mai a, a zâra sava fu zawng zawng chu an darh ta chum chum mai a. Hnuailêngho chuan an hotu rûlpui thiltih chu an lawm a, hlim êm êm hian an hawhaw dur dur a.
Rûlpui a lo hahdam deuh hnu chuan a ding leh ûr ûr a, bûng zâr lehlam chu a vaw tliak leh ta mai a, hnuailêngho chu an hlim nasa lehzual a, chunglêngho erawh chu an ngui deuh rawih hlawm tawh a. An zîngah chuan bâk hi a lo tel ve a, a thlawh ve theih avângin chunglêng zîngah a inchhiar a ni a. Nimahsela hnuailêng ho chu chan tha zawka an lan tak avâng chuan an hnên lamah a thlawk thla a, “Hei, mi en ula, ka lu te, ka hate hi hnuailêng ka nih hi,” a ti a, hnuailêng awmin a awm ve ta a. An indo chu an inbei nasa deuh deuh va, chêngkawlte hian pîtte ngal delh tliah an tum a, vatê te pawhin changpât hi man talh an tum bawk a, a lianin a lian, a tein a te, mahni tum tâwk tâwk chu thahnemngai takin an inbei a.
Nakînah chuan Murâ chuan rûlpui chu a ching ta nawk nawk mai a, rûlpui chu a chau ta. Chuvâng chuan chunglêngho chu an hlim ve leh ta thung a, an hotupa Murâ huaina leh thiltih ropui chu an lawm a, an hawhaw leh ta hluah hluah mai a. Bâk chuan a hmuhin chunglêng lama tan a chak leh ta hle a, an hnênah a thlawk chho leh a, “Mi en ula, hnuailêng ka nih loh hi, thla pawh ka neih hi,” a ti leh a.
An indo chu nasa tak hian an inbei zel a, nakînah chuan rûlpui chu a lo ding leh ta ûr ûr a, bûngpui zâr chu a han vaw leh vak a, a vaw tliak zo ta lo va, a kâkpuiah chuan a inbâng uai ta hnup mai a. Chu veleh Murâ chuan a zâng ruh tak maiah chuan a hmuiin a zuk chilh tliak ta vek a, a thi ta a. A tâwpah chuan chunglêngho chuan an ngam ta nge nge a ni.
Nakinah chuan inremna an siam ta a, an lo inngeih leh ta a. An indo lai khan Bâk kha a dawihzep avânga thawkpalai fo a nih avâng khan chunglêng leh hnuailêng an inrem hnu chuan pâwl tur a hre ta lo va. A inzahpui a, khaw engah chuan len pawh lêng ngam lovin pûkah a tawm bo va, zânah an hmuh lohvah a chhuak ve ngam chauh zuk nia!
Ngaihtuah zui atan:
1)Teltea kha indo lai khan Murâ khan a la hum zui ta zel nge? A chipui hnuailêng Sipai atan rulpui khan a pawm ve leh ta mai niang le?
2)Kan Politician intiho zingah hian Bâk ang hi an tam viau mai lo’ng maw?
3)Chêngkawlin Pîtte ngal delh tliah a tum lai vel hi han mitthla ve chhin teh u.
November 6th, 2009 at 3:06 pm
Zir tur a awm nual mai..kan ngaihtuah phawt
Report this comment
November 6th, 2009 at 3:21 pm
“In Pi leh Pu-te thawnthu-ah za ka kham vek tawh” tiin Pathianin a lo sawi tawh AN TI!
Kan Mizo thawnthu behchhana Pathian thu sawi thiam tak tak tlem kan nei, thlarau mite zingah. An han sawi tak tak mai chu a ngaihnawmin a ropui thei teh asin!
Report this comment
November 6th, 2009 at 3:59 pm
[…] Chungleng leh Hnuaileng indo | mi(sual).com Stem of voeg toe aan: […]
Report this comment
November 6th, 2009 at 4:14 pm
[…] Chungleng leh Hnuaileng indo | mi(sual).com Stem of voeg toe aan: […]
Report this comment
November 6th, 2009 at 4:27 pm
A ngaihnawm. Ka mittui a titla nasa hle mai. Rulpui tui hi ka lainat takzet a ni!!!!
Report this comment
November 6th, 2009 at 4:47 pm
Satel kha chu a dawi em mai a, a kawr chhungah khawpui rik hma chuan atawm ta aniang
Mizoram politician ah hian Bak an tam alawm. Hming hmerhin kan sawi dawn em ni?
Chengkawl thiltih hian Mizo phaivai cho/ti thinrim min ti hre chhuak tlat nia mawle, daih mai a
NOI
Report this comment
November 6th, 2009 at 6:10 pm
Jogging ka’n nei phawt … he thawnthu hian min tiphur! :lol:
Report this comment
November 6th, 2009 at 6:25 pm
good 4 U
Report this comment
November 6th, 2009 at 7:52 pm
ngaihnawm hle mai, he thawnthu hi kalo theihnghil trep tawh a thenawm te nau ho la hrilh tur anih hi
Report this comment
November 6th, 2009 at 8:38 pm
Winged-Rodent … a changtupa lo ber hi a làr ta ber elo maw chu le?
Sakhi leh satel —hnuailênga mite ve ve an han inphatsan rang lulai. Evi leh Adama pawhin mi dang mawhchhiat tùr an zawng hmasa ber —hringnun nature hi a lo mak duh khawp mai!
Satel rilru hi a va tha em? Chhantu a ngai a ni, a thil tihsual palh hi a confess nawn reng hnial lo. A belh apiangte kha hnuailêngho vek an ni; a tàwpah chunglêng Hotu a bèl fuh. Satel dinhmun hi a laklawh ve tho —(khawmual leh tuia chèng kawp) a ni daih thung —chunglêng leh hnuailênga inhambeina zàwk tùrah a buai hran chuan a rinawm lo, “chhantu hria” a nih ngai chuan! Zoram chuan a mangan lai bera chhantu mi-huaisen chu a hre lèt duh tawh chuang lo! Satel pawh tluk lo Zofate kan tam ta!
CHHANDAM tih thumal hlu tak Kristian-ten kan nei hi a ropui —chhan ngaia mahnia che thei tawh lo kan ni, chhanhuai satliah kan ni lo, chhanchhuah hnua DAM chatuan tùr kan ni!
Chèngkawl leh Pìt …, vatè leh changpàt … final BOUT … ultimate fight tak tak a tling e. REMTHU an han siam puitling leh thei te hi thawnthu namai lo tak Zopa rilru puakchhuakah chuan a tling hial awm e … satel chanchin hriat zui loh, rûlpui tàwpna a vànduai, damkhawchhuak ta ni se INREMNA a awm thei ang em? … Mura rilru hi a tha tluan viau a ang.
A hlàwkthlàk e … kan ram politics hrilhlàwkna thawnthu nung a tling. Folk tales hi Army-ah pawh thil pawimawh, hnam sùkthlèk tichiang bertu a ni tih hre chiangin Commissioned Officers-te pawhin an va dai luhna tùr hnamte Folk tales an zir ngun hle thìn. Tirhkoh Paula-te pawh khàn Grik mythology —mipuite rilrua bet nghet tlat kha Chanchin Tha-in an do lèt reng thìn tih i hria ang u.
Kawnga, thnks, ka ru jeih!
Report this comment
November 7th, 2009 at 12:23 am
ho em mai a.
Report this comment
November 7th, 2009 at 12:54 am
Kawnga, i ti lawmawm e. Mizo thawnthu in post tawh ho zawng zawng kha ka lo dahtha hmak hmak zela, mahse ka hard drive a chhiat avangin ka chan veka, ka ui ngei mai. A bul atangin ka’n tan tha leh ang e.
Report this comment
November 7th, 2009 at 3:53 pm
a ngaihnawm hle mai, keipoh ka lo hre tawh mang hlei nem he thawnthu hi.
‘mahni tum tawk vanzemah’ tih kha an han in khuainuai lai tak2 sawi nan hian an hmang nia kan hriat tlat chu.
Report this comment
November 7th, 2009 at 4:16 pm
Mizo thawnthu hi ka hre ve thin hle in ka inhria. Ka fanu kan hrilh dawn chiah chu kalo hriat pawlh nuaih ta mai. Kawnga, i ti lawmawm khawp mai.
Report this comment
November 7th, 2009 at 4:58 pm
@HV. Kawnga pawh hi a tlangval lai chuan mizo thawnthu hi a chikat ve chiang khawp asin, mahse fanau mal tluanchawi a an khawsak tak ah hian a tangkaina a hre chho ta tulh tulh! Naupang in ngaihnawm an ti em alawm!
Nau awih hla a hriatsa ho hian a awi mu zo tawh ngang silo a, Pi kawngi’n a duty atan Nau-awm a lo tuk sak tawh bawk si, thawnthu hrilh lamah tan a khawh thar a nih hi!
Bâk ang tak hi chu Politician tak tak ho ai chuan party workers-Ak zat hnih hnuai lamho zing ah an tam zawk ka ring deuh.
Report this comment
November 7th, 2009 at 9:20 pm
Saitawk, fa i neih ve hun meuh chuan older post i la hai i la hai ang ti nia…
Tak takin, in hlut emaw hlut lo emaw dahthat hi a pawimawh ka ti hrim hrim. Kan pipute thawnthu neih thin thamral mai tura ka dawn hian ka ngai ngam ngang lo. ‘A thei theiin in hriat zawng han dah ve ru’ ka tih lah chu, Pu Chawnghilha bakin kan ti thei si lo. A tam thei ang ber dah tha ila, hriat dan in ang lote awm nuai se, tha tur hi nia le…
Ku Chawng, han contri ve leh tawh la…
Report this comment
November 7th, 2009 at 9:34 pm
Mizo thawnthu hi ka duha ka ngainat teh rèng nèn, a Bu ka nei tlat lo va; ka hriat dàn a chiang tawh lo … ka ngaihpawlh tlat … keini zir ve thin chu e, Joi ai Ahom, Joi ai Ahom, Joi ai amar Ahom desh …” tih vèlte kha a ni thìn a …
I lak atang hian ka zir chiang nasa hle. Ka khawl keuh keuh bawk. Chawnghilh’s blog-ah pawh Chunglèng leh Hnuailêng Indo chu ka dah leh diam tawh maw le! Ka hul tlat! :roll:
Report this comment
November 7th, 2009 at 10:43 pm
Hriat pawlh kual ve vek mai hi a awl riau a, sawi dan a lo in ang lo thin bawk nen. Naupang deuh ho lah hian an han ngai sang lo khawp mai thin leh nghal a. Vei zawng hi a inang lo hlawm a, kal khat lutuk pawh a dik chuang lo bawk a.
Ding zawng pawh in ang chuang lo a
Report this comment
November 9th, 2009 at 12:32 pm
He thawnthu hi a tha khawp mai, Sermon-a tehkhin thu-ah ka lo hmang ve keuh tawh…
Report this comment
October 24th, 2016 at 3:49 am
[…] Chungleng leh Hnuaileng Indo […]
Report this comment