Ka thil hmuh, ral atanga ka mit la tlattu chu ka hnaih tial tial a. A zawn ka thlen chuan Bike ti ding meuhin ka’n en chianga ‘A ni. A ni chiang! Hmana mi kha… LP-i ngei kha…’ Full Face Helmet nen ka ni a, a ni chuan min hre dawn lo tih hre mah i la, chutia a mah ena an kawta han din tlat mai chu… tiin, Bike chhia niawm takin chhuanlamah ka Bike chu ka’n thlek kual der vel a. Ka enchian poh leh ‘a ni’ chiang ting mai si…
A va mak em! Engvanga he lai hmun khawhar leh fianrial, In tlâwm tak tuala nau lo awi ta mai nge maw a nih le? A nau awih, bei hle hle saw a fa em niang le? A chanchin ka hriat hnuhnung ber leh tuna ka hmuhdan hi a va inpersan si em! Rilru-ah zawhna tamtak, mak tihna nen a rawn lut nghal tup tup a, ka thil hmuh chuan min Barakhaih chiang kher mai.
Thal thli lum-in a sam a rawn chhêm lêng heuh heuh te; Hlâm nga dan vel atang pawha a heh vam hiam mai te chu hmuhnawm a va’n la tling em! Ni e, he mi/ he nu zet hi zawng Kum 5 hnuah pawh a that ngaiin a la tha renga, mit a la la zar reng mai nih hi. Hei lo liama Chuailo Par!
Thawnthu chu…
Kum 7 vel kal taah khan;- Zochuan Veng Nula hmeltha leh fel ber tunge? ti a, zawhna a awm apianga mitin, a pui a nawi kâ atanga channa chiang sa/ chhanna thuhmun awm thin chu- “LP-i” tih a ni. Chawngtinleri ianga hmeltha, Ui tè piantha ang maia duhawm, Thuva ianga nunnem, Rose Par var ianga thlir nuam, khawngaihna leh lainatna-a thuam, piang vannei bikah pawh ‘Vannei chungchuang bik’ a ni. Vengchhung Pa ho leh Tlangvalte suangtuahna ti tamtu a ni a, zep nãk emaw- chu’ng zingah chuan kei ngei pawh ka bãng bik lo. Thâi a tan hiala ìt ngawih ngawih thintu ka ni a.
Tet tè atanga mize tha nei, naupang fel leh thuawi thei tak, piai hlawh tak a ni. A pumrua a len avang leh a nun a chengvawn reuh èm avangin, kum 16 a nih atanga kumtling en-a tlang en a ni. Kum a rawn tlin chhoh meuh chuan Kristian Nula mai ni loin Krista Mo a ni a, Kohhran chu a nun a ni. Chu mai a ni nem- Chhungkaw zahawm tak leh Nu&Pa fel tak hnuaia seilian, Lehkha thiam chungchuang a ni a, mithiam ti a sawi hial a ni. Sorkar leh Company hrang hrang atang-in sawmna duhawm tak tak te pawh a lo dawng cham-chi tawh thin a.
Chutiang khawpa nula hmeltha leh fel ni ta chu- Zochuan Veng Tlangval tam zawk chuan phu loh ‘Va lêng’ ni-ah ngaiin, rimah pawh an tin lo hial a. A ni, Kei, Zirtirtu hnathawka Kum 10 lai an venga lo khawsa tawh leh mahni tawka ‘Pa’ inti ve em em thin pawh khan an runsâng meuh kai a, an thuthlenga bawp khawkherh tur èm chuan huaisenna ka nei ngai lo. Hmaichhanah duhtawka duh thu han fah mial mial te kha chãk hle thin mah i la, chakna ka nei thei tlat lo kha a ni a.
Chutia, a nulat nalh vanglai a hman chhoh mek lai chuan chunglam “Kohna” a dawng ta tlat mai! A thalaipui, Ruihhlo leh Mipat Hmeichhiatna bãwi a tâng mèk (KS)-te chhanchhuah hna thawk turin a inpe ta… Chu’ng mite hnena a taka rawngbawlna nei turin ‘Pawl pakhat’ a zawm ta… Chu’ng mite chu hmangaihna kutnéma kuangkuahin, an taksaa pân-hnai-la tenawm tak takte chu dawhthei takin a sil saka, duat takin a enkawl a… Krista avanga tuarin Krista avang véka lawm siin, nitin nun a hmang thin… tih te kha a chhanchin ka hriat hnuhnung ber ber te chu a ni a.
Bike chu ka ti nung ta a. Chu, In tlawm tak leh hmun khawhar tak, a tuala hmana ka ralkhat Di, LP-i nau awi lauh lauh chu hnungchhawn zai ka rel ta a. A mak… A mak a ni! Hmana mite thlir rawn, Vengkhat nula fel leh chhuanvawr, hmeltha bawk si kha engtia he lai In chhe tè tuala lo awm ta mai nge maw a nih le…?
Kawngtluanin a chanchin chiang taka hriat chakna chuan min tùr satliah mai ni loin, a pump hian min pump ut ut ta mai a! Ka Pate-a Nupui Lungphunna-a tel turin hun ka la nei tho bawka tiin, Zochuan Veng lam panin ka pêng ta daih a. LP-i te kawmthlang, Pu Duhsaka (Ka pa rual mah nise thian anga ka kawm thin)-te In lam pan chuan ka liam ta nal nal a.
A lo nimaw…
Pu Duhsaka chuan ka hriat duh chu a lo hre na-ngiang mai.
“Khatia, Ruihhlo ngai leh KS te enkawlna hmun/ HOME a luhchilh hnu khan a enkawte zinga Tlangval hmeltha tak, Aizawl Mihausa Fapa mal nibawk nen lo inhmelduh-in, atawpah chuan nau hial a lo pai ta a. Chu thu chu a Nu&Pa (LP-i nu&pa)-ten an hriat chuan an thinrimin an zak em em a; a naupai chu ti tla-a, a rawngbawlna pawh chawlhsan turin leh HOME chu a rang thei angbera chhuahsan nghal turin an fanu chu thu an pe a. LP-i pawhin a Nu&Pa te bula haw mai chu tha a ti a; mahse thil pakhat, harsatna khawlh zet mai lo awm ta chu- a naupai chungchangah a ni. A Nu&Paten naupai chunga a rawn haw chu an remtih theih loh mai bakah a pai tlang lui a nih chuan Tuithlar a nih tur thu an sawi laiin, LP-i chuan engti kawng maha a naupai chu tih thlak a tum bau si lo. Chutiang teh nuaih boruak a nih tak avang chuan LP-i chuan nau chu pai tlangin, nau a hrin thlengin HOME-ah chuan a khawsa ta a. A thawhna HOME mah nise, Nau keng a nih takah chuan hreawm a tiin a inthlahrung em em thin a. Hun a lo kal zela, Nau tè Pa lah HOME a chhuahsan atangin a chanchin hriat zui tur awm bawk hek suh. Nau tè thla 5 a nihin LP-i chu a lo enkawl dam tawh nula 2 nen huanthlaite siama, Vawkte vulha mahni ke a ding turin tuna i rawn hmuhna- Khawdai/ Hmun fianriala In ruak chhe tè saw an luah ta a ni…” tih thu te min han hrilh meuh chuan kei zawng, insum har ka va ti em! Patling hnuk-ulh insum hram hram chunga ‘A lo nimaw…’ tih bak sawi theih ka nei ta lo.
LP, Aw… LP, Ka va ngaisang che em! Chengkawl chesual an sawi ang maia vawi khat chetsual avanga chuti teh hrepa hringnun i’n hman tà k chu le… Ka va lainat che em! Ka rawn hmu leh mawlh ang che. Bike chhia chhuanlama rawn ral thlir mai mai tur che ni loin, damchhunga hringnuna harsatnate hmachhawnpui tur che in. Chumi hunah chuan i Rûn tlawm tè kha ka Rûn a ni ve tawh ang a; I tawrhna pawh ka tawrhna, I lawmna chu ka lawmna a ni ve tawh ang. LP, hei, I lam panin ka rawn kal e. Engtin min lo chhang ang che maw…?
