mi(sual).com

1^st. Monday: Mizoram Police leh Taxation Department-a enforcement tangrualte chuan Selesiha Vety. College bulah Silchar atanga dan lo a Serkhan-Bagha kaltlanga (Vairengte kallo) phurh luh leitha (urea) truck trip ruk an man. Heng truck an mante hi MZ 04-2423 C.Lalduha, Ngur ta, MZ 04-2781, Hrangthanga, Champhai Electrict Veng ta, MZ 04-2839, K.Malsawma, New Saron, Champhai ta, MZ 04-2251, VL Nghaka, Champhai Vengthlang ta, MZ 04-3344, C.Lalrosiama Champhai Vengsang ta leh MZ 04-2500, Huzauva Ngur khaw tate an nia; leithate hi Zonunsanga Champhai Venglai ta a ni.

Heng urea an phurh hi Agriculture Department Fertillizer Control Act bawhchhia annih avangin Agriculture-in an chungthu an ngaihtuah phawt anga; chumi hnuah Way Bill tellova phurh a nih avangin Taxation Department chuan an chungthu hi an ngaihtuah ve leh dawn a ni.

2^nd. Tuesday: Mizoram Board of School Education (MBSE) hnuaia HSLC Examination 2010 chu tan a nia; he exam hian 18^th February thleng a awh ang. Tun tum exam-ah hian center 78 a awma; candidate mipa 7,408 leh hmeichhia 7,530 an vaiin 14,398 an awm dawn a ni.

3^rd. Wednesday: SCERT hnuaia English Language Traning Institute (ELTI) chuan school headmaster-te tan Awarness Programme in English Language Teaching (ELT) a buatsaiha; he hun hi Parliamentary Secrectary Pu Chawngtinthanga’n a hawng.

4^th. Thursday: Excise & Narcotics Department-a Anti-Narcotic Squad-te chuan Chawnpui venga Pi Lalhmingthanga ina khawsa mek, Elvis Denghmingthanga (27) s/o L.Thangseia Sakawrdai Hmarveng nia insawi hnen atangin Spasmo Proxyvon mum 630 an man.

5^th. Friday: Mizoram police-te chuan 22^nd. January-a Burma mi 33 an mante chu court thu angin Indo-Myanmar ramria thawnkir turin an hruai.

6^th. Saturday: Parliamentary Secretary Pu KS Thanga chuan Sialsuk YMA tuikhuahna tur lung a phum. He tuikhuah tur hi a dung meter 180, a vang meter 80 leh feet 30 laia thuk tura ruahman a nia; Mini Hydel Project pawh siamtheih tura ngaih a ni.

7^th. Sunday: Champhaia Salvation Army Biak In thar chu Territorial Commander, Col.Samuel Charan-in a hawng. He Biak In sak nan hian Rs 11,000,00/- lai senral a ni.

8^th. Monday: Red Ribbon Football Tournament a tel, East Lungdar Football player’s-te chuan Aizawl Civil Hospital-ah a mamawh apiangte hman atan thisen an pe.

9^th. Tuesday: Mizo National Youth Front (MNYF) chuan tunlai power supply thalo chungchangah sorkar demnan Aizawl khawpuiah mombati an sem. He an thiltih hi mi thenkhat chuan ‘Zawngin a ngumkhak a hmulova; a thiante ngumkhak a nuihzat’ tih ang deuh khan an sorkar lai pawha eng an nih bikloh thu an sawia; hetianga thawk tha bik niawm taka thil an ti hi a nuihzatthlak an ti hle.

10^th. Wednesday: Mizoram puma khaw 866-a Sub-Center/IPPI Booth 1209-ah  naupang kum nga hnuai lamte zenghri danna pek anni.

11^th. Thursday: Aizawl District Fire Prevention Awarness kal mekah vawiin khan group no 10-te’n Sihphir leh a chhehvel khuate tan Sihphir Community Hall-ah kangmei laka fimkhur tura infuihna leh in zirtirna beihpui an thlaka; mipui an kaltha thawkhat hle.

12^th. Friday: Digital Audio Bible, Mizo Version chu Bible House-ah Bible Society of India, Aizawl Auxiliary President Rev. C.Rosiama’n a tlangzarh. He Mizo Digital Audio Bible (Mega Voice Ambassador) hi World Cassette Outreach of India siam a nia; a man pangngai Rs 750/- tur a ni naa; a tlangzarhna hmunah hi chuan Rs 700/- a hralhchhuah a ni thung.

13^th. Saturday: Naktuka Valentine Day lo thleng tur pualin (Blood for Your Valentine) Mizo thalai a thei apiangin Aizawl Civil Hospital-ah thisen an pea; he an thisen pek hi units 145 lai a ni. Valentines Day puala thisen petute zingah hian Blood for Your Valentine King leh Queen thlan nghal a nia; King-ah singer TBC Zaithanpuia, runner-up Rider RS-ate an nia; Qween-ah reader Zikpuii, runne-up singer Zoramchhanite thlan anni.

14^th. Sunday: Mizoram Synod hnuaia pastor bial hrang hranga hmeichhiate inkhawmpui chu zanin khan a tiak hlawma; inkhawmpui hmanna hmun pakhat Kulikawn Biak Ina neiha chawhnu inkhawma Pastor-in thu a sawi laiin hmeichhe pakhat chu pulpit-ah lawnin Pulpit Bible a paih. He hmeichhia hi Kulikawn V/C leh YMA tangrualte chuan man nghalin Kulikawn Police Station-ah an hlan nghal.

15^th. Monday: Chief Secretary Pu Vanhela Pachuau chuan Chief Secretary Conference Hall-ah Mizoram sorkar-a secretary-te thil pawimawh a sawipuia; secretary-te chu an department chan theuhvah court case leh court order-te ngaipawimawh turin a hrilh.

16^th. Tuesday: Assam Rifles 3 Corps-a General Officer Commanding, Lt.Gen.NK Singh chuan Aizawl a rawn tlawha; Mizorama venhimna leh ramria venhimna chungchang Governor leh Aizawla sipai lam hotute a sawipui.

17^th. Wednesday: Bungthuam Branch YMA chuan 13^th. November 2009-a Tuikuk hel hovin an kahhlum tak Zarzokima,(17) s/o Lalngilneia hriatrengna lung chu amah an kahhlumna hmunah an phun. He hun hi Langkaih Group YMA leh Mizo Students Union hruaitute’n an hmanpui a ni. He lungphunah hian “Helai hmun hi November ni 13, kum 2009-a Bru Revolution Union-te’n kan YMA member, Zarzokima an kahhlumna hmun a ni” tih an ziak a ni.

18^th. Thursday: UPC-te chuan Mizoram hmun hrang hranga an Biak Inah Mizorama UPC International a luh kum 60-na an lawm. Mahni biak In theuhva dar vawi 60 theuh an vuak bakah jubilee mei an deta; jubilee lung an phun nghal bawk.

19^th. Friday: Sailo lal zinga damrei ber, Lalrumruta, kum 2006-a boral ta lung chu a tu leh fate’n Rulchawmah an phun. Lalrumruta hi 1921-ah lal tanin 1945-a lal ban a nih thleng khan Rulchawmah a lal a ni. Tu leh fa 294 a nei.

21^st. Sunday: Bible Society of India (BSI) chuan vawiin atang khan an kum 200 tlinna lawmna St. Paul’s Cathedral, Kolkata-ah an nei tan. He hunah hian West Bengal Governor MK Naraynan chu khuallian a nia; Mizoram Chief Minister Pu Lal Thanhawla chu khual zahawm a ni. Bible Society of India rawngbawlna hi BFBS rawngbawlna peng pakhat angina 21^st. February 1811 khan Kolkata-ah tan a nia; 21^st. February 2011-ah kum 200 a pumhlum dawn a ni. BSI kum 200 tlin lawmna hian nakum thleng a awh ang.

22^nd. Monday: Kristian Thalai Pawl (KTP) din champhaphak vawi 56-na a nia; Mizorama Branch KTP hrang hrangte chuan Central KTP-in ruahmanna a siam: Vantlang tana thiltha tih, Thisen pek leh branch intihhlimna hun atana hman nise a lo tih angin mahni remchan dan ang berin an lawm hlawm a ni.

23^rd. Tuesday: Higher & Secondary School Games 2010, Aizawl District chu khelh tan a ni taa; he hunah hian school 75 atangin infiammi an fuankhawm a ni. Ruahman lawk ang chuan he hun hian 27^th. February thleng awh tur a nia; football bikah hian tel an thathnem deuh avangin ruahman aia an zawh har maitheih thu an sawi.

24^th. Wednesday: Pu C.Chhuanvawra lehkhabu ziah, ‘R.Vanlawma leh kei’ tih chu Aizawl Press Club-ah Minister Pu S.Hiato-in a tlangzarh. Pu C.Chhuanvawra hian a lehkhabu ziah hi MJA library-a dah turin a pe nghal a ni.

25^th. Thursday: R.Laltanpuia (47) Champhai Kanan Veng chu Tuipui chhak Chhungte rama an ramvahnaah a ramvah pui Lalchhunga (43) s/o Thandailova Champhai Kanan Veng ami vek chuan a luah a kap palha; Champhai Civil Hospital thlenpui a nih hnuin a boral.

26^th. Friday: Chief Minister Pu Lal Thanhawla’n tunhma kum sawm chuang liam taa (an sorkar lai) eirua puhna  thubuai chu Aizawl District Judge Pu T.Saikunga hmaah sawi a nia; Pu T.Saikunga chuan Pu Hawla’n thiamlohna a neihloh thu sawiin thubuai chu a titawp nghala; amaherawhchu he thutluknaa lungawi lohna nei an awm chuan appeal mai theih a nih thu a sawi nghal.

27^th. Saturday: 17^th. February atanga neih tan Mizoram State Arm Wrestling Championship vawi 13-na chu Engineer’s Club Babutlangah zawhfel a nia; mipa chak ber chu J.Vanlalhruaia Rangvamual niin hmeichhiaah Laltlanmawii Keifang chu chakber a ni bawk. He championship-ah hian Rangvamual chuan Gold-6, Silver-3 leh Bronze-3 lain team champion anni.

28^th. Sunday: Nimin tlai ni tlak atang khan Mizorama Judaism-te chuan an hnam chhanchhuaha an awmna champhaphak ‘Purim Kut’ chu ruai nen khaw hrang hranga an Community tinah an hmang. He hunah hian naupangte chu an in cheirang nasain an hlim hle a ni. Estheri bu chhiarchhuah a niin an hnam boral duhtu Hamana hming an lamrik apiangin nasa takin bengchheng an siam thin.

Similar Posts:

• November 2008, Mizoram Diary
• Champhai Civil Hospital- ah Damlo ngaihthah an ni em?
• January 2010, Mizoram Diary
• February 2009, Mizoram diary
• June 2008 Mizoram Diary

Recent Posts:

• MIZORAM SUM LEH PAI DINHMUN IN HMA A SAWN NASA
• ZoRO Press Release
• MIZO KRISTIAN MARTAR THENKHAT TE
• BEIDAWNG SUH
• Bawihpuia kha

This entry was posted on Thursday, March 18th, 2010 at 3:02 pm and is filed under Information. You can follow any responses to this entry through the RSS 2.0 feed. Responses are currently closed, but you can trackback from your own site.