Kan ram dung leh vang han thlir ila, politics, sumdawnna, zirna, sakhuana leh ni tin nuna thil chi hrang hrang mita kan hmuh leh benga kan hriat thinte hian lawmna aiin lungngaihna, thinurna, beidawnna leh lungawilohna min va thlen hnem zawk thin em! Kan nitin chanchinbu leh TV chanchin thar te chu hlemhletna te, rinawm lohna te, inbumna te, tharum thawhna te, inpawngnekna te leh mipat-hmeichhiat hman khawlohna thuten hmun leh hun an luah khat fo thin.
Tunlai kan khawvelah hian chanchin ngaihnawm kan tih hrang hrang zingah hian ‘chanchin tha’ hi a va tlem thin em! A ulh zawnga ngaihtuah phei chuan he khawvel hi thihna te, natna te, lungngaihna te, harsatna chi hrang hrangte leh chhiatna ten ro an relna ni hialin a lang thin a, hlimna leh lawmna te chu vana rah ang maia hla ni hiala hriat chang pawh a awm fo mai thei e.
Amaherawhchu, tun hnaia ka rilrua thil lo lang chu hei hi a ni: A chhe lai thlira insawisel luai luai ai chuan a tha lai hmu thiama infuihtawn hian rah tha a chhuah fo zawk tih hi! Chuvangin, ka thil thlirna tarmit ka han siam rem sauh sauh a, ngun leh zuala kan ram hi ka han thlir vel chuan min tilawmtu thil tam tak ka tawng ve ta tlat mai! Chung zinga tlemte chauh han sawi mai mai ila:
1. Hlemhletna duh lotute: Kan ramah hian hlemhletna leh eirukna te hian bu an khuar thuk viau nia a lan lai hian hetiang thila inhnamhnawih tak tak chu tlem te zawk an la ni tho nia! Kan chanchinbu leh website/blog ilo fahranah pawh hian hlemhlet duh lohna thu ziakte hian hmun laili an la chang tlat a, heng thil sual duh lova dotute hi Zofate zingah hian kan va la thahnem em! Mi hlemhle leh hleprukhmang engemaw zat awm mah se hlepru ve duh lo, mi rinawm tam tak Mizo fate zinga kan la awm hian min tilawm thin!
2. Thalai invawng thianghlimte Nulat-tlangval sualna, hmeichhiat-mipatna hman khawlohna leh HIV/AIDS thawm na takin min tuam vel laia thalai, nula leh tlangval hmel tha tak tak, ‘luck’ loh vang ni miah lova hetiang lama intibawrhbang duh lo, Lal Isua leh a kohhran ho tana invawng thianghlim tlat mai ho hian min tilawm thin! Zirna leh thiamna lamah te mi naran chung lam, khawsak phungah pawh awmthei tak tak chhungkua atanga lo seilian, nula tlangval duhawm tak takte, khawvel aia Lal Isua thlanga hmun hrehawm tak taka Missionary ni tawhte leh ni mekte hian min va tilawm thin em!
3.Sumdawnna leh eizawnnaa mi rinawmte: Dik lo taka miten sum an hai luha bumna hmanga hlawkna an um suau suau laia chutiang ti ve duh hauh lo, sumdawnna leh eizawnna kawnga mi rinawmte hian min tilawm thin!
4. Pathian leh a ram tana mi rinawmte: Mi thenkhat, Kristianna hi kawra hmanga kohhran ho phena thil sual ti thinte awm mah se, a tam zawk chutiang ti ve duh miah lo, Krista leh a kohhran tana mi rinawm tak tak mi thahnem tak kan la nei hian min tilawm thin! Chu mai ni lovin, heng mi tlemte, Kristianna hi kawra hmang tute pawh hian thil dang aia ‘Kristianna’ kawrah tal an la hmang duh pawh hi a lawmawm tho tho mai! Setana biakna te hi kawrah an hmang reu reu ang tih pawh a hlauhawm zawk e!
5.Ram hruaitu Kristian: Kan ram hruaitu, kan Politiciante Muslim ni lovin Kristian an ni hi a va lawmawm em! (Muslim ho sawichhiatna ni lovin) Chu mai ni lovin kan CM ngeiin hlemhletna do zawnga huai taka a han tawng chhuak ngam ringawt pawh hian min tilawm thin! A takin han bawhzui zel phei se chuan min va tilawm nasa leh zual dawn em!
6. Lal Isua’n hnehna a chang tawh! Khawvelah hian sualna hi lian thur thurin lang thin mahse, Lal Isua hmingin sual leh a thiltihtheihna te hi hneh tawh an ni hian min tilawm thin! Chu hnehna chu Isua ringtute nunah a taka lantira a awm zel thin hian min tilawm leh zual! Thlarau Thianghlim keimahnia awm hian lawmna thuruk min pe a, thlamuanna sawifiah phak loh min neihtir thin! Nakin lawkah sualna zawng zawng hneh famkima awmin, Chatuan Lal ram, hmangaihna leh thlamuannaa khat chu Lal Isua ngeiin a la rawn din tur hian beiseina nung min siamsak a, min tilawm veng veng thin!
Kan ram hi tun hmaa in lo thlir thin dan lo deuhin, ‘thatna tarmit’ te, ‘lawmna tarmit’ te khan han thlir ve chhin teh u! Khing ka han sawi bak pawh khi thil dang tam tak in la hre ngei ang! Han thawh belh ve teh u…
Similar Posts:
- ABELA LEH KAINA TE THIL HLAN
- Mitchhia kan awm em ?
- Inbihchianna/Chona!
- Thawnthu hlui chul thei lo (Good Friday Pual)
- I Phatsan thin em ? (Pathian Ni pual)
(Y)
March 29th, 2010 at 4:14 am
keimah, chhiar a nuam hle mai. Mahse, a tha zawnga emaw, thatna lai han thur chhuak tur ngat chuan “ram leh hnam thil” ah chuan FIR tak nih a pawilo tihna chen ka nei asin. Ngaihzam chin emaw kan neih chuan, sawi tur an nei theuh awm si a te ka ti mai mai.
1. na hi, zep miah lo chuan hlemhletna leh eiruk na hi duhlo tu tawngkam tam mahse, duh lo leh hua anga sawi thin tamtak te hi eiru leh hlemhlet na lama bang lo an nih ka ring hlawm.
Engemaw zat mi rinawm leh hawihhawm awm mahse, mi tlemte vangin ram a chhe vek thei a, ram leh hnam a hmingchhe theiin, ram in a tuar in a tluk chhiat phah thin si a.
5. na hi a ni ngawt mai, tuntum sawrkar chu ka rin aiin an huai tlat mai. Hei aia nasa hian mi tenawm te haichhuak zel turah i beisei ang aw
Report this comment
March 29th, 2010 at 4:33 am
Tunlaiah thalai tamtakten kan Mizo zia leh culture kalsana, changkang zawka inhria-a, mi tihdan kan lakchhawn mek laia, Mizo rilru leh hnam hmangaihtu te, Mizo culture dik leh fel, hmasawn zel chunga vawng nungtute tam tak an la awm tih ka hriat hian min tilawm thin!
1. Hlemhletna hi chu HV sawi ang hian a sawi thiam a piang leh duhloh hmeltu te pawh hi a fihlimlo an ni duh chawk…(misual zingah pawh hian an awm mai thei a sin)
2. Thalai chhungkaw pangngai tak atanga seilian leh mahni In lum nuam taka khawsa thei ten Lal Isua an thlang a, harsatna hmuna an kal hi chu Van-ah lawmman an van hmu tha dawn bik em! Chutih rualin tlema sum nei zawk ten khawvel thiamna lamah Mizote an tihmingtha thin hi keini mirethei tan pawh hian a hnam pum angin min tilawm thin..(thiamna in ang rau rau-ah sum leh pai nen deuh tan chuan Advantage hi a tam zawk a)
Report this comment
March 29th, 2010 at 4:43 am
Zephenath, “Tunlaiah thalai tamtakten kan Mizo zia leh culture kalsana, changkang zawka inhria-a, mi tihdan kan lakchhawn mek laia, Mizo rilru leh hnam hmangaihtu te, Mizo culture dik leh fel, hmasawn zel chunga vawng nungtute tam tak an la awm tih ka hriat hian min tilawm thin!”
Kan ti nawn leh ngat ange, ka ngaihdan chiah a ni e.
Report this comment
March 29th, 2010 at 5:04 am
Chu thuziak chu a van dik em! Kan tarmit vuah hi kan thlak a ngai a ni. Kan in sawisel leh a chhe lai hlir kan hmuh hian rahtha a chhuah lo, mi tamtak a ti beidawng a. Hlep rukna a tam lutuk kan tih fo hian, thahnemngai tak leh rinawm taka thawk te rilru hi nasa tak in a tihnualin a ti beidawng fo bawk. Mipui mimir te hi chuan a thalam tarmit hi vuah ila. Kan politician te leh ram hruaitu te hian, siam that ngai hi a zawn in zawng rawh se!
#Zephenath 100% in ka tawmpui che! Bamboo dance ti ho kha, bamboo in an mawng kan hawlh dawn nia :evil:
Report this comment
March 29th, 2010 at 5:18 am
@Jaspi: Mau-in a daih ang maw? hawlh tur an tam phian mai thei ni
Report this comment
March 29th, 2010 at 7:25 am
Hmmm… he post chu ava tha leh kher em.
@keimah: Hetiang post tha tak tak hi han contri fo teh.
Sumdawng tam tak hi an rinawm in an fel tawh, dawr pawh an nuam tawh khawp mai.
Report this comment
March 29th, 2010 at 8:12 am
post tha tak ani. Rilru a tiharh vak mai alawm. Ni e, kan thahnemngaih luatah hian chhelailetder ni mai awm hian kan inchhuah deuh thin a. A thalam kan thlir ve thin pawh hi a ngai ani.
Report this comment
March 29th, 2010 at 8:13 am
Zirna lam leh infiamna khawvelah te Mizo hming titha thintute hian min tilawm em em bawk thin!
Tlawmngaihna hian mual min liamsan tawh emaw kan tih mek laia Mizo nula tlangval zingah tlawmngaihna dik tak la nun puite han hmuh chang hian min tilawm thin!
Report this comment
March 29th, 2010 at 8:21 am
Ram hruaitu dawheh zet te,thutiam hlen nachang hre ngailo ho te,mahni pumpui tanghma chiah haia thleh dual2 te,zoram hmasonna tur mahni pumpuia hnoh lut vek thin tute,mi rethei hmusit a mi hausa tlon huam2 thin hote,hmeithai zu zuar te zu leihbuaksaka mi hausa te zu laka mitdel tlat te, pulpit tlang chum dup2 chunga eiru tho te, PATHIAN in ti ring ho chhung lama bolhloh tak te ka hmuh hian ka khongaiha…….
Mi diktak, felna leh rinomna in a tuam. Tlomngaihna leh khongaihna ngah tak, PATHIAN ring mi tak te, zoram tana tha leh tui seng thin tute, mi rethei khongaih thin tute, mahni nihna hrechiang mi te ka hmuh hian ka hlimin ka lom bok si……..
Thinrimna tur reng ka hre lo
Report this comment
March 29th, 2010 at 8:21 am
Thil thalo a awm chuan thil tha hi a sirah a lo awm ve rek rek thin. Chumi thil tha hmu thei tur a tarmit vuah dan, he post hian min kawh hmuh a, a va lawmawm em.
Report this comment
March 29th, 2010 at 8:23 am
Mi hlim hmel (honest smile) hmuh hian ka hlim thin.
Misual dot com ah mi puitling tak tak, muantea, Kawnga, Saitawk, ThaiBoy, keimah, shailendra, Xaia, pu mz, chawnghilh, Irre, Amanda, kanidar, funny, bawmrang, wonderboy, kawlhawk, leh midang tam tak , a hranpa a ka kawm phak loh tur emaw hial te ka level pui kawm bawrh2 thei mai hian hlimna nanem lo min pe bawk.
Report this comment
March 29th, 2010 at 9:47 am
HV #11,
Khing ho zing atang khian min thai bo vat rawh, i ti zahthlak! Kei pawh HVa, kawm nuam leh nelawm, fiam dawl leh ril bawk si nitin zantin ka kawm thei hian min ti lawm thin… !
Pu Keimah,
I lawmnate khian kei pawh min ti lawm thin ngei e. 1-dang ka’n belh ve; Tunhmaa Sorkar hnathawk, Ofis kai ho dawr hreawm leh en pawh min en tha duh loa bul tak2a min chhang thin ho kha (Nu thenkhat la mawl fal deuh chu awm bawk mahse..) tunlai/ tunhnuah hian an felin biak an va nuam ta em! An va polite ta em! Heng mite harh tharna chang ka hmuh hian min ti lawm thin…!
Report this comment
March 29th, 2010 at 9:57 am
Hallelujah Amen!!!
Report this comment
March 29th, 2010 at 11:51 am
A thra hle mai thil diklo ti duhlo tam tak an la awm ngei ang .Tam tak te erawh chu eirukna kawng ah nanan chuan eiru thei dinhmun a din loh vang mai a eiruk duh lo ang a in sawi le hua ang a insawi an ni nual tho .Tin trhen khat hua em em ang a in sawi te pawh hi eiru tho pawh an awm ngei ang.
Eiruk haw tak tak tam tak awm chu nise an trhenawm eiruk ching te chungah pawh eiruk trhat loh zia an lan tir ngam ngei angle.
A sawi asawi mai ni lovin a tih a tih anih hma loh chuan sawi mai chu i ring vak lo teh ang u.
Report this comment
March 29th, 2010 at 12:38 pm
Pu Keimah nge nge, i thil thlir dan atangin i tarmit vuah lai chu bifocal ani hial lo maw?
Report this comment
March 29th, 2010 at 1:00 pm
Pi Lal Irre…bifocal mai ni lo, multifocal a ni e!
Report this comment
March 29th, 2010 at 2:15 pm
@keimah i ziak tha tlawt e! Beidawnna hian sual leh thil tha lo zawkah min hnuk lut fo tih i hmu chiang hle in ka hria.
Report this comment
March 29th, 2010 at 2:19 pm
He post zet chu tlang kara ni chhuak mawi tak ang lah ni a!.Doctor te pawhin natna zawn chhuah leh a enkawlna inbuktawk pawimawhna an sawi thin.
Kan ram leh hnam a damlohna lai hi kan zawng zel ang,kan chhui zel ang,chawl lovin kan vei zui zel ang;mahse chutih rual chuan thusawi leh thuziak reng rengah a damdawi ni awm kan bilh tel zel loh chuan chhiartu leh ngaihthlatuah beidawnna a siam ve thei bawk.
Kan ram (hnam,chhungkua,mimal) krista kan pe tia thinlung taka kan zai theih hunah kaihhruaina dik leh tluantling kan chang ang.Kan chan tawk duh khawp mai lovin lungawi zel erawh zir a ngai a ni e…
Report this comment
March 29th, 2010 at 2:34 pm
‘A chhe lai thlira insawisel luai luai ai chuan a tha lai hmu thiama infuihtawn hian rah tha a chhuah fo zawk tih hi!’
Kan Amen leh lawks teh ang. Ka Amen rualin ‘We don’t see people as they are, we often see them as we are’ tih hi ngaihtuah zui mai mai atan ka rawn chhawp chhuak tel bawk e.
Report this comment
March 29th, 2010 at 3:07 pm
A ziaktu rilru leh ngaihtuahna tlang thlir pui chuan a dikna lai chen a awm a, mahse saptawng takin a va VAGUE ve mawle ka han ti teh ang.
Ti zawng hian ka han comment mai mai ange- lehkha zirlai chuan ram leh hnam kan vei a, mahse hna kan thawh hnu hian mi tam tak hian thlemna kan do zo leh thin si lo niin a lang. Chutiang mi chu ka hmelhriat te zingah hian zuk hre teuh a mawle!
On the brighter side- ka hmelhriat pakhat erawh chu sorkar hnathawk a ni a, supplier 1 hna a hmuh tir vangin lawmthu sawi nan Rs.1 lakh lawmman atan tiin a lo pe a, a rilru nuam lovin min hrilh a, kei chuan “doubts i neih chuan a dik love, pe let roh, i mamoh hek lo” tiin ka hrilh a, a pe let leh ta anih kha. Tun thleng hian a account bu en sak a la cho reng…..
Ram hruaitu tam tak hi dik duh mahse mipui zawkin kan la zir miau loh vangin an tan dik a har thin…mipui zawk hi kan in en let a ngai! Dam reng chunga medical reimbursement tih duh vanga damlo anga lan hnial lo hi sawrkar hnathawk pangngai hmel deuh deuh zingah pawh an la awm fo nia!
Anyway, tha mual mual chu kan la awm chiang alawm…. a post tupa han contradict ve vel kha chakawm mai mai ni
Report this comment
March 29th, 2010 at 3:23 pm
Post tha khawp mai, rilru young nge nge, thil in thlir famkim thin e!!
i 3rd para khi nizan ruahsur bengchheng mu thei lovin ka lo ngaihtuah ve mai2 a, tunlai chu sawiselna tarmit kan bun deuh thrup mai a, a chhe zawng hlir a kan thlir thin hi chu a hahthlak mah thin!
Report this comment
March 29th, 2010 at 6:09 pm
A lawm awm e,beisei bo rak khawp a insawi sual siak ai chuan kan ram hian a thatpui ngei ang.A ziak tu a puitlin angin a thu pawh a puitling e.
Kan ram rethei tak kan tih a tang a Missionary engnge maw zat an han chhuak te hi ka ngaihtuah chang chuan kei pawh ka lo lawm ve thin.
Report this comment
March 29th, 2010 at 6:50 pm
A chhe lai thlira insawisel luai luai ai chuan a tha lai hmu thiama infuih tawn hian rah tha a chhuah fo zawk!
A dik hle mai, chu mai pawh a la ni lo —A chhe lai thlir chianga inmawhchhiat rei iak tawh lovin, rang taka thawm that vat vat mai hi development dang a kal mek lai hian—rah tha kimchang zawk a chhuah ngei ngei ang.
Kan journalist leh ziak-miten khitiang lam hawi thuziak hi vawrh uar sela, a tha a ni mai. Jakob-a’n tuichhunchhuah kianga tiang rang a tun kha i hre chiang ang u … tiang rang hmu tuk tin tlai tin ran rualte khan fa rang an hring pung chiang hle a ni. Thil tih that/thil tha tih hmuh tur, chhiar tur hi tam hle mai teh se.
Report this comment
March 29th, 2010 at 6:55 pm
#15 & 16 : Durbin zawk alawm Pu keimah chuan a hman!
Report this comment
March 29th, 2010 at 9:11 pm
[…] Min tilawm thin! | mi(sual).com […]
Report this comment
March 29th, 2010 at 11:26 pm
Lehkhapuan var hlai taka chhun han te tak te a langsar thin ang hian sual hi a langsar mai thin a ni. Kan zoram hi a la chhe love mi rinawm tak tak an la tam a, hmasawn tum thalai rual an tlei tan mek e. Nula hmelthatna pawh a thlirtu thinlungah a awm chuan lawmna tarmit vuah chuan khaw hawi a tinuam ngei ang. Pu keimah, i rawn sawi tha dum dum khawp mai.
Report this comment
March 30th, 2010 at 12:57 am
@Pu Keimah, i thil thir duh dan hi thlir dan tha a ni. Kan ram dinhmun ka suangtuahna-a ka thlir ve chang hian beidawnna chhiarsen lohvin min bawm thin. Mahse, a chhe lam ringawt thlir hian hmasawnna min pe lo tih ka hriatchian em avangin ka thlirna tarmit hi ka thlak ve fo mai. A lo nuam zawk bawk nen.
Kawng engkimah ka pha hauh lo na chein, kan rilru hi a inmil tihah hian ka chiang ngawt mai. Lunglei pa i nih laia ka lo hnimhnai lo che kha pawi ka ti ta khawp mai…
Report this comment
March 30th, 2010 at 1:43 pm
@muantea & Kawnga, a lawmawm thin e! “Ka thinlung ang pu mi” in lo awm ve thin hian min tilawm thin!
Report this comment