mi(sual).com

1^st. Monday:  Tuirial chhak, bawlhhlawh paihna thlanga ek paihna, oxidation pond chu hman tan a nita.

2^nd. Tuesday: Mizoram Synod hnuaia Revival Speaker-te chu Synod Conference Center-ah an inhmukhawm. He hunah hian Mizoram Synod hnuaia Revival Speaker zawng zawng mi 70-te an tel kim a ni. He hunah hian Executive Senior Rev.Vanlalzuata’n fuihna thu a sawi a ni.

3^rd. Wednesday: Chhun dar 12:00 khan Kolasib Salem Venga Pi Lalthangi in (Assam Type) chhungkaw pathum luahlai chu bungrua engmah chuh hman lohvin a kang ral vek. Mihring thi leh hliam erawh an awmlo hlauh. He kangmei hian an thenawma Pu Lalringa in pawh a kangkaia; hei erawh hi chu a kan ral hmain thelh mih hman a ni.

4^th. Thursday: Kristian Thalai Pawl (KTP) General Conference vawi 53-na chu Mamitah palai lawmna neia tan a ni. He hunah hian Synod Moderator Rev.Chawngliana’n Pathian thuchah a sawi. He conference hian Pathianni lo awm tur 7^th. February thleng a awh ang.

5^th. Friday: Mizo Zirlai Pawl (MZP) chuan Central YMA Hall, Tuikhuahtlangah ‘Zoram Ni’ an hmang. He hun hmanpuitu NESO Chairman Pu Samujal Battacharya chuan MZP-te’n Zoram Ni an buatsaih chu an tihtur diktak a nih thu a sawi.

6^th. Saturday: UPA Chairperson Sonia Gandhi chuan a pasal (Prime Minister hlui) Rajiv Gandhi hming chawia Mualpuia stadium sak mek lungphum a phum.

7^th. Sunday: 4^th. February-a tan tak Kristian Thalai Pawl General Conference chu zanin dar 11:45 khan fellowship hlimawm tak neih a nih hnuin a tiak ta. He inkhawmpuiah hian kumdang zawng aiin palai riaklut an thahnema; mi 15000 chuang an riaklut a ni. Hruaitu thar thlan nghal annia; chungte chu:

Leader: Rev.K.Lalpiangthara (Synod ruat)

Asst. Leader: Pu Zohmingliana Dawrpui Vengthar

Secrectary: Upa Lalrinmuana (Synod ruat)

Asst. Secrectary: Tual Upa Dr.C.Zarzoliana Ramhlun South

Treasurer: Pu Lalmuanawma Kulikawn leh

Fin. Secrestary: Pu Vanlalfinga Bungkawnte annia; heng bakah hian committee member 14 ruat nghal anni bawk. 2011 KTP rorel inkhawm neihna hmunah Bethlehem Kohhran ruat a nia; 2012 General Conference na hmun atan Thenzawl thlan a ni bawk.

8^th. Monday: Tukin dar 8:45 khan 25^th. Assam Riffle’s-a tanglai Joseph Rothangpuia (23) New Serchhip chu Imphal atanga kms. 38 vela hla Ukhrul district chhungah hel nia hriatte’n an kaphlum.

9^th. Tuesday: Electrict Veng chuan Red Ribbon Inter Village Football tournament-a an champion chu an sial dawn ngei chuan ruai nen hlim takin an lawm. He hun hi Home Minister Pu R.Lalzirliana’n a hmanpui.

10^th. Wednesday: Vawiin khan Lunglei Theiriat khuaa Bawkmual ram halnaah unau pahnih C.Lalrinmuana (17) leh C.Lalrinchhana (35) Pu Nghakthanga fate chu an kanghlum.

11^th. Thursday: Kumin Chapchar Kut chu vawiin khan Zoram hmun hrang hrangah ropui taka lawm a ni. A hmanna pui ber AR lammuala hmanah chuan Chief Minister Pu Lal Thanhawla chu ‘Kut Pa’ a nia; Mizote’n kut kan neihte chu Isua Krista tel ve theih nana remchang siam a that thu a sawi.

12^th. Friday: Khawvela a ruala Cheraw kan tam ber record chu vawiin khan Aizawlah siam a ni. Hei hi Guinness Book of World Record-a ziahluh a nih thu Guinness adjudicator Lucia Sinigaliesi chuan a sawi. He huna Cheraw kantu zawng zawng hi 10,736 annia; bu 671 lai an daih a ni. Lammual khat tlata an lam bakah Chanmari leh Sikulpuikawn inkar kawngpui khat tlatin an lama; a ropui hle a ni.

13^th. Saturday: Tukin dar 4:49 khan Mizoram chu lirnghing richer scale 5.5 a nain a sawia; thil tihchhiat erawh a nei lo hlauh. He lirnghing hi Myanmar ramri hrul atanga rawn intan a niin second 30 chhunga rei a nghing a ni. He lirnghing hian hmarchhak state dangte pawh a sawi tel a ni.

14^th. Sunday: Baptist Church of Mizoram rorelna sang ber (Assembly) 11^th. Thursday atanga tan chu Lawngtlai Bazar veng Baptist Kohhran Biak Inah neih a niin zanin khan a tiak taa; He assembly-ah hian Pro-Pastor thawklai mi parukte chu Pastor puitlingah hlankai anni.

15^th. Monday: World Consumer Rights Day a nia; he hun hi Aizawl leh district khawpui hrang hrangahte pawh hman a ni. Kumina an thupui chu ‘Be financially literate: Save your investments’ tih a nia; he ni pual hian zingkarah Kulikawn atanga Chanmari thleng kawng zawh a ni.

16^th. Tuesday: Land Revenue&Settlements Department-in chak zawk leh felfai zawka hna a thawh theih nana softwere an siam thar, Land Revenue Management and Monitoring Information System Softwere (LAREMIS) chu LAD Minister Pu Pc Lalthanliana’n a tlangzarh. LAREMIS hmang hian awlsam zawkin chhiah a pek theih tawh dawn a ni.

17^th. Wednesday: Mizoram State Assembly parukna Assembly Session vawi ngana chu tan a ni. He hunah hian Governor MM Lakhera chuan thu sawiin member-te chu chibai a buk a ni.

18^th. Thursday: Mizoram Baptist Thalai Kristian Pawl (MTKP) inkhawmpui vawi 44-na chu Vaivakawn field-a pandal sakah palai lawmna neia tan a ni. He inkhawmpui hian tun Pathianni lo awm tur thleng a awh ang.

19^th. Friday: Ramhlun Vengchhak Br. KTP blanket sua Sairang Tlawng luia hnatlangte zinga mi pahnih C.Lalruatfela (26) s/o C.Lalhluna leh Lalfakawma (21) s/o Lalfakzualate chu tuiah an tlahlum.

20^th. Saturday: Tlai dar li khan Tuirialah Lalawmpuia (33) s/o Zion Thangi Electrict Veng chu a tlahlum.

21^st. Sunday: 18^th. March-a tan tak MTKP inkhawmpui chu tluang taka neih a nih hnuin a tiak ta. He inkhawmpuiah hian hruaitu thar thlan nghal a nia; President atan Rev.C.Zohmingliana thlan a ni. Kum 2012 a inkhawmpui na hmunah Haulawng ruat a ni.

22^nd. Monday: Tukin dar thum khan Sihphira Pu Lalnaa in, Pu Lalramchhana luah lai chu a kangral vek. Gas bur khat bak engmah an chuh hmanlo. He kangmei hi an in bula vawk chaw chhumna mei tihmih loh vang nia rin a ni. He kangmeiah hian in neitute hi an kanghlum teuh hle. Kangmei hian an pindan lampang bang kang hmasain an thosi len zarlai kang sawrin in neitupa hnungzanga a rawn far atangin an harh chauh a ni. Vanneihthlak takin he kangmeiah hian in neitupa wallet chhar a nia; a chhunga Rs 5,000/- awm chu a kang lo a ni. Tumdangah chuan helai hmunah hian thli a tam thei hlea; vanneihthlak takin hetih lai hi chuan thli a ngawi hmak a ni.

23^rd. Tuesday: Israel ram atangin Mizoram Judaism-te tlawh turin cameramen pakhat telin mi pali an lokal.

24^th. Wednesday: Sihphir Brangch YMA Rising Day vawi 72-na a nia; hemi pual hian Presbyterian Hospital Durtlangah a mamawh apiangte hman atan thisen unit 31 (mipa 29 leh hmeichhia 2) lai an pe a ni.

25^th. Thursday: Lalrinngheta Varte s/o Laldanglova Varte leh Lalhriatpuii d/o Lalhmachhuana Sihphir Venglai mi ve vete chu Sihphir Venglai kohhranah Rev. John Raldosanga kutah an innei.

26^th. Friday: MBSE chuan Matrict result a tichhuak. A pumpuiah exam beitu mi 14,652 niin mi 9758 an pass-a; pass percentage hi 66.60%a ni. Tuntum hi MBSE hnuaia HSLE result that ber tum a ni. A pumpuia pakhatna chu Benjamin Lalfakmawia s/o Biakdika Colney, St. Peter HSS Chhingchhip a ni. Topten-ah hian mi 12 awmin an zinga mi pali hi hnam dang anni.

27^th. Saturday: Central YMA Vice President Pu C.Zoramliana (50) chu chawhma dar 10:00 khan Civil Hospital Aizawlah a pum a nat thut avangin a boral.

28^th. Sunday: Lal Isua khawvela a len laia chawimawina a dawn awmchhun ‘Tumkau Ni’ chu Zoram hmun hrang hranga Kristiante chuan ‘Hosanna’ tia auva chawimawiin kawng an zawh.

29^th. Monday: Supply Minister Pu H.Rohluna chuan Luangmualah Gas Agency thar ‘Zothan Indane Agency’ a hawng. He agency hian Sakawrtuichhunah gas cylinder 8,000 dah theihna kudam an nei. He agency thar hian Luangmual, Zonuam, Chawlhhmun, Gov’t. Complex, Sakawrtuichhun leh Tanhrilte a chawm thei dawn a ni.

30^th. Tuesday: Zing dar 2;30 vel khan Gauhati-Aizawl bus, MZ 01D-9098 chu Kalyan leh Masimpur inkarah misualte’n an lo suama; lehkhabu engemawzat leh Rs 16,000/- man hu an chhuhsak a ni. Misualte hi bus-a chuangte’n an theih ang tawka an lo beih let ve avangin duh angin an che thei lo a ni.

31^st. Wednesday: 16^th. Assam Regiment Shillong-ah din a nia; hemia tel tur hian Mizo sipai bn. hrang hrang amite pawhin helai hmun hi an pan khawm.

For admn. Ferbruary ni 20, na thu kha ngaimawh an awm avangin min lo delete sak t’u.

Similar Posts:

• August 2008 Mizoram Diary
• December 2009, Mizoram Diary
• October 2008 Mizoram Diary
• March 2009, Mizoram Diary
• September 2008 Mizoram Diary

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, April 4th, 2010 at 1:32 pm and is filed under Information, Mizoram. You can follow any responses to this entry through the RSS 2.0 feed. You can leave a response, or trackback from your own site.