Tunlaiin hmun thenkhatah huan nghet neiha thlai chin an uar tawh hle a. Kumtina a thar zela lovah hi a hautak hle a, nasa taka tha sen angai thin a, kumtluana hah taka kan lo thawh tawhna hmun kha chhuahsan leh mai a tul thin. Hei mai a ni lo, kumtina a thar zela thlam sak a ngai thin pawh hi hautak tham tak a ni. Huan nghet nei tur chuan terrace hi laih theih ni ngei se a tha hle ang. Hmun awiha thlai chin ai chuan zawla thlai chin nge nge chu enkawl a nuam bik. Kan ramah hmun zawl a tlem avangin terrace laih hi kan tih ngei ngei atan a tha.
Huan nghet tura buatsaih hi a hautak viaua a lan laiin zawi zawia buatsaih chuan a hautak lem lo. Thlai te hian hmun zawl hi an ngeih em thin avangin thlai chinna lai tur chu zawl thei hram se, duhthusam a ni. Mual vang tan zawnga lane tam taka ‘laih zawl’ hi terrace an ti a. Vawikhata laih zawl chiam a harsa a, a tul lemlo bawk. Lane khat tal kum khatah laih zawl nise, laih zawl hmasak berah chuan thlai chin rih loh ni se, huana hnim thlawhna hnu a tm thei ang ber chu laih zawl tharah chuan chhek khawm nise, a kum leh ah chuan thlai a chin ve theih tan mai ang chu. A kum lehah lane khat dang laih leh ni ta se, chu lane thar ah chuan hlo thlawhna hnu, a tam thei ang ber chhek khawm ni se, a tawih hunah chuan thlai a chin ve leh theih mai ang. Hetianga tih theih bek bek chuan kum 6-8 hnu ah chuan thlai chinna tur hmun terrace duhthusama tha, nghet leh tlo, a neih theih mai dawn a ni.
Terrace dawlna:
Terrace hi dawl lem loh pawhin a laih theih ve mai a. Amaherawh chu a zawl a zau mawh em em thin. A dawlna siam anih chuan tlemte pawh lai ila, a zau hma em em thin a, tin lei vung pih ral mai mai a awm ve lo. A dawl zawl nan chuan heng te hi a hman theih.
- Lung: Terrace dawl nana tha ber chu lung a ni. A tawih ral ve theilo hi a thatna lai ber chu a ni. A dawlna atana lung kan hmang dawn anih chuan a foundation uluk taka laih zawl phawt a, lung lian lian thlana chutah chuan rem tur a ni. Rem chin apiangah leivung chap zawl chawp zel tur a ni a, duh ang tawka zau anih thlengin chhaklam ko cheh thlak zel mai tur a ni.
- Thing: Terrace dawlna atan thing a hman theih a. Thing chu a ban neiin uluk takin rem tur a ni. Thing hi tawih thei anih avangin terrace ko tlang hi chhe mai thei a ni a, mahse a tawih har avangin leilung a lo nghet hman viau tawh thin.
- Mau: Mau rem khawm hi terrace dawl nan a hman ve theih tho na a, a chhe rang khawp mai.
Terrace riser:
Terrace leh terrace inkara hmun zuah awl hi terrace riser an ti. Terrace riser ah hian lei titha thei tu thlai, be kawm nei chi (legume plant) ching ila a tha hle. Legume thlai kan tih ho chu be kawm nei chi reng reng, heng chana, dal, bean, bete, behlawi, zawngtah, vang thing, japan zawngtah, etc. te an ni a. Legume kung te hian an zungah bacteria chikhat Rhizobium te’n hmun an khuar thin a, chung bacteria te chuan lei leh boruaka nitrogen awm te hiplutin thlai taksa (a hnah, a kung, a zar, a par, a rah, a zung, etc) ah nitrogen compound tam tak an chhek khawm thin. He nitrogen hi thlai chaw pui pathum (NPK) te zinga pakhat, N hi a ni a, thlaiina a mamawh urea kan pek thina hi hetiang legume thlaiah hian a tam em em thin a ni.
Legume tree lian lutuk lo ho hi terrace riser ah a tlarin ching ila, a hnah tam tak terrace zawlah a tla khawm thin ang a, chu chuan lei a titha em em thin dawn a ni. A kung a san leh len lutuk loh nan a zik leh zar te chhawk then thin tur a ni a, chung te chu terrace zawl ah kan dah khawm ang a, anih loh pawhin thlai kung bulah kan chhep ang a, a lo tawih hunah chuan thlai tawih atanga chawtha kan hmuh theih piah lamah nitrogen tam tak kan hmu thei dawn a ni.
Terrace riser a kan thil chin te hi a kung a len tak tak hmain a kungpui leh a zarte hlawi thin tur a ni. Metre chanve (½) vela sang ah an hlawi tlangpui thin a, chuta tanga rawn chawr chhuak leh te chu metre 1 vela sang ni turin an hlawi zel tawh thin. Hetianga control tlat anih chuan forget-me-not kung ang mai hian hniamte ah rual takin a chawr tir theih dawn a ni. A kung a len lutuk chuan terrace zawl a zar daihlim khup ang a, thlaiin ni eng an hmu tha thei lo ang. Hetianga thing zar uluk leh awmze nei taka hunbi neia hlawi thin hi pruning an ti. A tang hlawi atngin a rawn chawrno leh mai thin a ni.
Terrace zawla thlai chin:
Terrace zawla thlai chin hian rinai takin a chin tam theih a. Zau vaklo nia kan hriatah pawh hian a chin teuh theih thin. Terrce zawl hi mihring mai bakah ramsa tan kal a nawm thin avangin a lei hi a charin a bel duh hle a. Thlai chin hmain uluk takin lei cheh phut tur a ni a, thlai zung awm ang ang te paih fai vek tur a ni.
Terrace zawlah di a to anih chuan thlai chin hma in sam tur a ni a, sam atanga chawlhkar 3-n velah a rawn chawr no hluah ang a, chutah chiah chuan di hlo (Glycel) hmangin chawhma lamah kah tur a ni. Di hnah in a hnah kua (stomata) ah a lo hip lut ang a, a kungah leh a zung lam thlengin a lut ang a, ni reilo teah a kung a thi ang a, a tawih ral vek ang a, a zung pawh a thi vek ang. Di kah dawnah a hnah vuak sil loh tur, a hnah kuaah di hlo tui a lut tha theilo palh ang e. A kung a thi ta maw tih ah nasa takin lei cheh phut a, hnim zung awm leh lungte awm te paih fai a, a theih chuan compost leh NPK fertilizer chawhpawlh nen uluk taka chawh pawlh a tha. Lei cheh phut chu nisa in han em se a tha leh zual. Lei cheh phut chunga hnim ro hal hian leia rannung a tihhlum mai bakah vut al (potash) leiah a tihtam phah a, thlaiin an ngeih hle thin.
Terrace zawlah sawhthing emaw ai-eng emaw i ching dawn anih chuan duhtwka lei i sawisak hnu ah sawhthing/aieng chi chu phum la, i phum zawh vek hnu ah zawl ah chuan hnim hnah chap darh chiam rawh. Ruah a tlak hnuah hnim hnah te an lo tawih tan ang a, i sawhthing/aieng chin te pawh hnah ro karah an lo chawr chhuak ang. Hnim a to tha thei lo ang a, chutih laiin hnah tawih te chuan leitha an siam belh thung ang. Terrace zawlah pangbal i ching anih chuan i chawh phutna hnuah antam a theh nghal mai theih ang.
Tlangram loneih dan pangai hi a rei tulh tulh a, leilung a da tulh tulh a, terrace garden ve thung chu a rei tulh tulh a, terrace zawlah leitha a inchhek tam tulh tulh ve thung. Hriat reng tur pakhat chu terrace zawl, rei tak thlai chin lohva lo awm tawh ah hian thlai chin ve satliah ringawt chuan thlai an tha thei lo. Cheh phut hmasak ngei ngei tur. Terrace hian chak taka tuihawk luang tur a ven avangin leilung luangral mai mai tur a veng nasa hle a ni. Chhungtin hian huan nghet nei ta theuh ila, ramkang nasa takin kan ven theih phah ang a, forest regeneration pawh nasa takin kan tanpui thei mahna.
Thenkhat tan chuan he post hi a ho hle in ka ring a, mahse kan ram intodelhna tur chuan gardening lam hi a pawimawh ve tlatin ka hria a, inthlahrung tak chungin ka han post ve pawm mai anih hi. Ka duh aiin a sei, mahse ka ziak tawi thiam ngang lo a ni e.
April 15th, 2010 at 2:10 pm
nia, terrace laih theih chuan tluk om lo, tlangram lo neih hi chu Fur alo nih phei chuan lei chung hang lei tha kha tui in len bo xel a…
Report this comment
April 15th, 2010 at 2:21 pm
Hei chu thra hle mai. Kan print thlap ang e…hman trangkai duh hun a la awm takin.
Report this comment
April 15th, 2010 at 2:40 pm
Tha ngai tlem zawng a Terrace laih dan ka hriat pakhat chu; tlang dungah tlar fel tak neiin pangbal phun phei tluah mai ila. Sakuh,sanghal etc ho tha hmang in awlsam te in Terrace hi a laih theih. Rih zawl thuak thuak leh a kotlang uluk deuh hlek a mam a ni tawh mai. :lol:
@caribou remchang hmasa-ah kan huanah kan la kal dawn nia.
Report this comment
April 15th, 2010 at 2:44 pm
caribou,
I Post hi ka tuina lam ani hauh lo na-a, he ti khawpa post tha leh chaw pai hi ka Komen lo phal lo. Eng vanga inthlahrung ngawt nge maw i nih reng reng a; Tu’n nge maw ‘Ho’ ti tehlul ang le! He tianga Thlai chin nana hmun zawl/ nghet siam hi a that dawn tehreng nen kan Lo neitu te hian an hre kur ngiai-nguai tawh a, an peih lo ni maiah ka lo ngai a sin.
Report this comment
April 15th, 2010 at 2:45 pm
Post tha lutuk. Pistol hum dan post ai chuan a tangkai daih.
Report this comment
April 15th, 2010 at 2:47 pm
@Diktea_Pa: Tehreng mai. I huan chu hmuh ve a chakawm khawp mai.
@BMW: ka thuziak ho tak mai min ngaihhlut sak vangin “Thank you”.
Report this comment
April 15th, 2010 at 2:51 pm
A trha ka ti ram nei tan chuan huan neih hian hlawk tur a thawh leh chin tur hriat hi a trh a tim terece pawh hi zau deuh tak tractor ka theihna tal nise hnathawh tak takna tham a siam ni bawk se intidelh thei ka ring.
Report this comment
April 15th, 2010 at 2:51 pm
@kawlhawk: I va tilawmawm ve le.
@sony: HV-a i ngam lovang, bang den nan a hmang mai tur che ania
Report this comment
April 15th, 2010 at 2:54 pm
mizo hi in bul maia huan neih ching hi kan nia, kawmthlang ar hmai tiah vel a thlai han neih te hi nuam kan ti em em.
ti nge tin 5 hmunte vat hian kan tih peih der loh le? keini chhung zawngin acres 20 a zau huan hi kan chhawr a sin
Report this comment
April 15th, 2010 at 3:04 pm
Sony,
Kerh Kerh Post ai paw’n tiraw… :lol:
Report this comment
April 15th, 2010 at 3:17 pm
laih ngai lo hemi terrace zawk hi Mizoramah chuan a tam law mi?
https://en.wikipedia.org/wiki/T.....uilding%29
Report this comment
April 15th, 2010 at 3:21 pm
Kum tin maia kan ram thing leh mau kan vat a,kan hal kang dur dur mai thin hi thawidamna a awm ngei hi kei mimawl hian ka lo ring ru ve ngawt thin a,tangkai taka hetiang lama ngaihtuah chhuah tur erawh ka chem kalna lam a nih aih loh vangin ka hre baulo thung a.Thil vei ve em em erawh ka nei ve a,”Hetia ramngaw ti chereu zawng nilo hian kan mithiam te hian thingtlang lonei mite eizawn dan tur hi engtik khawtikah tak hmuchhuak ang maw,anni hi an ngawi daih a,zankhat fahran pawh helam kawnga ngaihtuahna leh zirna fumfe nei hleilo kan politiciante hian helam kawngah hian eng thu thu emaw hi an sawi ve fo mai thung a,eng ber hi nge a damdawi ni ang aw” ka lo ti ve thin a.Tunah chuan hei le thianpa caribou zarah eng eng emaw chu chhar ta in ka inhria.
Report this comment
April 15th, 2010 at 4:05 pm
Post tha tak a ni, Sony te anga #5 tawng thlahdah ve satliah chu a ni hauh lo mai.
caribou hi ka tuina i hre thei
mahse, Terrace gardening i tih hi Terrace cultivation i tihna ah kan ngai ngawt a.
Report this comment
April 15th, 2010 at 4:51 pm
Terrace hi kan ram angah te hi chuan tih makmawh a niin ka hria.Contour trench (an tia mi kha?) ang te pawh thawkkhat chu kan sawi uar viau kha.
Post pawimawh tak a ni e.
Report this comment
April 15th, 2010 at 4:59 pm
Thra khawp mai,MAHSE terrace te kanlo neita thlap a duh2 thlai kha kan ching ngawt a,a lo hlawk leh ta manglo a,thlai threnkhat a thrat theih hle laiin threnkhat thra manglo anlo awm a.kan huan neihna ram leilung ngeihzawng thlai kha engtinnge kan hriat ang le?tha tam tak sen hnu chuan a uiawm duh hle a Zopa mawl hriat thiam tawkin khawi a trangin nge kan huan leilung ngeih zawng kan hriat theih ang thlai kumhlun eg Serthlum hmun te lo ti dawn ila kan huan khan a ngeih reng em? tih hriaat theihna awlsam leh senso ngaizat te a hriat theih dan a awm em le?
Report this comment
April 15th, 2010 at 5:11 pm
Pu HV, Pistol hum dan kha a tha lutuk a nia, pistol lo deuh pawh thil dang ‘hum’ dan te pawh maw le. Nang exp. i nei ang ? hahahah
Report this comment
April 15th, 2010 at 7:00 pm
Mizoram zawng taimak na in a tlin loh bakah a lo chhengchhe ve bawk em ani
Report this comment
April 15th, 2010 at 7:09 pm
Kei pawh sawhthing kan kawmchar ah ka ching ve a tunah chuan an ei ve theih tawh e, KG 1 $ 15-20 te ani tralh mai sia. Kum khatah $100-150 (Rs 4000-6000) vel ka save dawn ni in ka hria
Report this comment
April 15th, 2010 at 10:25 pm
Thlai lam zirnaa ‘pu’ kai nge nge chuan a ziak tha e. A copy siam ila AMFU ho kan thehdarh tir dawn em niang? @Diktea_Pa #3 idea khi a va tha ve!! Wild life bulldozer a ni mai!!
Report this comment
April 15th, 2010 at 11:29 pm
@Muantea: Nangni ang thu thiam te’n in post tha duh mang si lo va, tihian rilrua awm ang ang ka han post ve phawng mai anih hi. Tun atanga ni 7 ral hmaa i post chhiar tur ka hmuh loh vaih chuan thingpui min TREAT ang.
Report this comment
April 16th, 2010 at 12:44 am
@ Caribou : Good post ! Mahse Terrace riser hrilfiahna khi ka va chiang lo ve aw…min han hrilh fiah leh teh. Ka mitthla thiam mang der lo. A lem nen min hrih fiah thei nge nge la a lawmawm leh zual ang.
Report this comment
April 16th, 2010 at 1:16 am
@lushaier: Stairs leh steps pangai ah chuan zawl pahnih inkarah hmunawl a awm lova, terrace ah erawh zawl pahnih inkarah hmunawl zuah thin ani. He hmunawl hi duh chuan terrace la laih zau belh nan a hman theih. He hmun awl hi terrace raiser an ti. Hetah hian legume plant awmze neia kan chin chuan terrace zawl leithaa chawmtu thatak ani thei. A lem ka post thiam lo. Han google zuai mai ta che, a awm ka ring.
Report this comment
April 16th, 2010 at 2:05 am
Terrace gardening hi ram-awih zal deuh hlekah a tih chi hmel, kan ram awih nasa 40 degree ai awih ah hi chuan tihchi vak ka ring lo.
Mi threnkhat sum lama buai lo deuh te chuan lung an rem mawle, pangpar huan aizawl daia siam te poh hian an tih ka hmu leh thrin.
Terrace siam dan thra deuh hi design chhuah chu a ngai khop mai. Mexixo leh ram steep deuh ho tihdan hi kan zir a trul hmel
Report this comment
April 16th, 2010 at 2:22 am
Mizoram kham pang anga awih ah pawh an siam thei alawm mawle, enge maw a awih em mai ti a kan huphurh ngawt ang le.
Proof:
https://i40.tinypic.com/2iuz72g.jpg
Report this comment
April 16th, 2010 at 6:46 am
@HV: I pic rawn dah atang khian, mi fa te lo taihmak zia leh tumruh zia a lang.
Khitiang khi Wet Terrace an ti deuh kher a. Tlangram leilet hmun ang ani deuh ber mai. Buh chin nan a hman theih.
Khitiang hmun rem lo lutuk ah pawh terrace tha lutuk an siam thei anih si chuan :roll:
Report this comment