mi(sual).com

NIBIRU

(He article-ah hian a puithuna lam zawngin Nibiru hi chhui a ni lo, a scientific zawngin ziah a ni)

Tun hnai maiah Nibiru chungchang hian Mizote min chiah hneh hle mai a. A chanchin hi kumin kumtir atang khan ka lo chhui ru ve ngar ngar tawh a, mahse thu lawi lo mai a nih avang hian chhui zui tlakah ka ngai lem lova. Chutihlaiin ka rin lawk ang ngeiin tunah kan buaipui ta hluai chu a nia. A chanchin hre tak nih te pawh hi Science mi han nih ve takah chuan a zahthlak deuh rohin ka hria a, miin an sawi pawhin hre awmin ka awm duh der lo.

Chu bakah mi thenkhatten hlauhna avangin Pathian lam te pawh an hawi deuh nia ka hriat avangin thawm lo neih ve kher chu tulin ka hre lem lova. Chutihlaiin mi tam takte nun tiralmuamg lotu a nih tho si avangin chanchinbu lamah te chiang taka ziah a ni tawh nachungin tuihnih veleh thain ka hre thar leh hnuhnawh a. Ka hriat ngai lem lohte pawhin ziak ve tura mi an rawn ngen tak fo a vang te, leh a bik tak pawhin thianpa Zara (Lunglei, MSc Maths) te leh zelin ‘hetia mi an chi-ai laia engati nge i ngawih reng’ min rawn tih  takah chuan tha kan thawh thar leh ta chu a nia.

Nibiru chungchang kan luhchilh hmain a tobul hre fiah tak tak tur chuan universe leh kan solar system chanchin tawi tein kan tarlan hmasak phawt a ngai ang. Hei bakah hian solar system-a planet an hmuhchhuah dan leh a dang an la zawn mek dan kan sawi tel loh chuan Nibiru chungchang hi kan fiah thei tak tak dawn chuang lova, chuvangin Nibiru tak tak kan sawi hmain a chhehvelah thui fe kan kual hmasak a ngai dawn a ni. He article-ah hian puithuna leh hmanlai thawnthu atanga Nibiru lo irh chhuah dan sawi kan tum lova, Scientist ten Planet-X an zawn dan leh chumi kal zelin Nibiru a lo hrin chhuah dan sawi kan tum ber dawn a ni.

Universe han tih mai chuan van pum pui hi a ni mai e. Chutah chuan Ni, thla arsi, planet, simeikhu, blackhole, brown dwarf…kan thil hriat zawng zawngte an awm kim vek a ni. Arsi tam zawng lah chhiar sen rual loh niin chung arsite chu tluklehdingawn bia intelkhawmin arsi hlawm khawmna hmunpui Galaxy an siam a. Kan awmna galaxy hi Milky way galaxy an ti. Chutiang galaxy chu tluklehdingawn eng zata tam nge vanah hian awm ang tih lah chu tumahin an hre hek lo.

Kan awmna solar system pawh hi milky way galaxy lairil a tanga light year 27,000 vela hlaah a inher ve laih laih a, chu galaxy laimu chu helin kan zavai mai hian kan her dual dual mai a ni. Solar system kan tih chuan Ni leh planet 9 te (Pluto tiamin) a huam a ni. Ni atanga a hnaih dan indawtin chung planet 9 te chu – Mercury, Venus, Earth, Mars, Jupiter, Saturn, Uranus, Neptune leh Pluto te an ni. Mahni kawng bik theuh neiin heng planet te hian ni chu an hel dawr dawr mai a ni.

Ni atang khawvel hlat zawng hi 1AU (Astronomical Unit) an ti a, hei hi 150,000,000 km a thui a ni. Solar system huam chhung emaw a hnaivai deuh chin emaw sawi nan AU hi an hmang mai thin. Solar system pum pui len zawng hi a lai hawlhtlangin 11,000,000,000 km vela zeta zau a ni a, chu chu zau viauin hre mah ila galaxy lenzawng nena khaikhin chuan arhmai tiat lek tih pawh hian a sawi fiah zo lovang. Hemi chin hi Solar system leh a kaihhnawihah chuan tawk phawt mai sela, thu dangah kan pakai tawh a niang chu.

Planet hmuhchhuah leh an zawn zel dan :

Kum 1781-ah khan Sir William Herschel chuan Uranus hi a lo hmuchhuak tawh a. Planet dang pawh la awm ngeiin an ring a. Uranus an hmuhchhuah leh hnuin kum 1840 chhovah khan French Mathematician Urbain Le Verrier chuan Uranus chetvel dan ngun taka a zir hnuin a kawng kal tibuaitu awm ngeiin a ring a. Chu chu la hmuhchhuah loh planet lian tawk tak, hipna ngah tak, uranus orbit aia hla zawka awm vang a nih ringin Newtonian mechanics hmangin a awmna tur hmun a chhutchhuak a. He a thil chhut chhuah hi German astronomer Johann Gotfried Galle a thawn ta a. Ani hian Le Verrier-a sawina hmun takah chuan Planet thar Neptune chu kum 1846-ah khan a hmuchhuak ta a ni.

Neptune pawh chu Uranus ang thovin a che vel chu a nghet lo riau hian a hriat a, a hma ang thovin planet dang, neptune che vel lo tibuaitu awmin an la ring ta fo a, chu chu an chhuizui leh ta char char mai a ni.

Kum 1846 – 1930 chhung khan astronomer leh Mathematician ten observation leh theory hmangin an zawng ngat ngat a, amaherawhchu hemi hun chhung hian tumahin Neptune piah lamah planet an hmuchhuak lo.

Planet – X chu :

Kum 1894-ah American Astronomer Percival Lowell chuan William Pickering-a puihnain Arizona-ah Lowell observatory a din a. Heta tang hian vana arsi che velte leh planet thar zawngin an telescope tha zet mai chuan van lam khi an vil thur thur reng mai a ni. A hmalama kan chhiar tak ang khan a theory chuan planet dang la awm ngeiin an hre si, an hmuchhuak thei mai bawk si lo, chuvangin mathematics-a kan thil zawn chhuah duh aia ‘x’ kan dah thin ang hian an planet zawn mek pawh chu Planet-X an ti ta a ni. Hei hi Roman number-a 10 tihna a ni lo, hriat loh Planet tihna a ni zawk.

Kum 1915 a lo nih chuan Lowell-a chuan ‘Memoir of a Trans Neptunian Planet’ tih paper a tichhuak ta a. Chutah chuan Planet–X chu khawvel aia a let 7 vela mass ngah zawk a niin ni atanga 43AU (6,450,000,000km)-a hlaah a awm a. A density (sakhat dan) a tlem em avangin a lian hle dawn a ni. Ni eng a sawhkhawk tha hle ang a, Saturn ang deuhin ‘ring’ pan tein a hual ve ang. Lei atanga a en zawng pawh 12-13 magnitude vel a ni ang a, chu chu telescope hmang chuan a hmuh theih dawn a ni a ti a. Hei hi Lowella’n Planet – X awm dan tur nia a lo ngaih chu a ni.

Pluto an hmuchhuak daih!

Kum 1916-ah Lowell-a chu a thih tak thut avangin Observatory pawh chu hun eng emaw chhung chu khar lailawk rih a ni a. Kum 1925 atangin entlang, a hmai darthlalang 13 inches a lian nen Lowell Observatory chu an hawng leh ta a. Kum 1929 ah Observatory director thar V.M Slipher chuan astronomer naupang te Clyde Tombaugh, kum 22 mi chauh chu a ruai a, ani hian chhum lo chat lovin Planet – X chu hmuhchhuah tumin a bei ta char char mai a ni (Heta Planet – X kan tih hian Nibiru a ni lo a nia, planet thar a ni mai).

Chutia chawl lo leka kum khat deuh thaw a thawh hnu, arsi maktaduai 2 zet a zirchian hnuah kum 1930 Feb ni 18-ah khan Pluto chu a hmu chhuak ta hlawl mai a ni. Hetia arsi/planet hmuhchhuah tuma an zirna atan hian van lama an rinhlelh deuh laite chu telescope hmangin a thla an la phawt a, chu chu an zir chiang leh chauh thin a ni. Khatia Pluto an hmuhchhuah hnuah khan thlalak hlui hote an han ennawn leh chuan kum 1915 March ni 13 ah khan Lowell-a khan Pluto thla hi a lo la daih tawh a, a hre chhuak lo mai chauh a ni. Percival Lowell-a hminga P leh L te hi la kawpin Pluto tih hming pawh hi an sa ta a ni.

Planet–X, Pluto?

Tun hma zawnga Neptune piah lama planet awm nia an lo ngaih thin chu lian tawk tak, khawvel tiat emaw, a aia lian emaw a ni ber a. Chutih laiin pluto erawh chu Planet 9 an hmuhchhuahte zinga te ber, khawvel aia a let 5 emaw vel zeta te zawk a ni a, a mass lah chu a tlem hle bawk. Chuvangin Pluto zawng Astronomer-ten nasa taka an zawn thin Planet-X chu a ni lo phawt mai.

Planet-X zawn chhunzawm zel a ni :

Kan chhiar tak ang khan Uranus leh Neptune te ni hela anmahni kawng ve vea an kallai tibuaitu planet dang la awmin an hria a. Pluto kha hmuchhuak tawh mahsela an beisei lawk anga lian leh mass ngah a nih tlat loh avangin Planet-X chu ngawrh zawkin an zawng chhunzawm ta zel a. Kum 1978-ah Pluto heltu Charon an hmuchhuak a, kum 2003-ah Sedna, kum 2005-ah Eris. Sedna hi Pluto aiin a te deuh a, Eris hi a lian hret thung.

Hengte mai lo hi chu thil lian tham deuh hmuh chhuah a tam lo hle a. Hei hi duh khawp lovin astronomer Joseph Brady chuan kum 1972 ah khan Halley’s comet kal kual vel danah hian Pluto piah lamah khian planet lian tak, Jupiter tiat zeta lian a awm ngei a ring a. Mahse he a ngaihdan hi Marsden-a leh P.Kenneth Seidelmann te chuan an hnialthla chiang hle thung. Halley’s comet hian a kal kual vel pah hian a mei lama vur leh lung them nawi te chu a phuh chhuak ur ur reng a, chu chuan a che vel kha a ti pai leh deuh uan uan thin a lo ni zawk.

Planet-X zawn hna chu chawl mai lovin a la kal ta char char tho va. Pluto piah lam hla takah khian khawvel tiat emaw, a aia te hret emaw, lian zawk fe emaw awma ngaihna chu Mithiamte thinlungah a la thi thei  chuang lo. Amaherawhchu Pluto piah lam hi chu ni atanga a hlat tawh em avangin planet lian tak pawh lo awm sela a eng a chauh tawh dawn em avangin hmuhchuah a harsa takzet thung ang.

Hetia planet-X an zawn velna atana an hmanraw tha ber chu Telescope (Entlang) a ni. Khawvel hmun hrang hrangah a tha ber ber chi an bun thluah a, chutiang hmun chu observatory an tih chu a ni. Heng hmun te atang hian vanlam khi chawl lovin mithiam ten an thlir reng a ni. Heng telescope te zinga Nibiru nena inkaihhnawih bik 3 te chu –

IRAS – Hei hi Infra Red Astronomical Satelite tihna a ni. USA, UK leh Netherland tangrualten van lam chanchin zirna atana satelite/telescope an kahchhuah a ni a, vansangah lei hel chungin vanlam thla a la reng a ni. Kum 1983-a a thlalak pakhat chungchang scientist ten hetiang deuh hian an puang chhuak – Eng thil emaw ni, Jupiter tiat zet tur, solar system-a tel ve ni mai awm tak kan hmuchhuak a, Saggitarius constellation-ah a awm mek tiin. He an thil hmuhchhuah hi a hnua an han zir chian leh chuan 10 zinga 9 te chu galaxy dang hla tak ami, engti kawng maha keini min rawn tibuai pha lo tur an ni a, 1 dang chu galaxy tam takte chhum ang deuha paw deuh phut mai chu a ni. Chuvangin IRAS thlalak, Nibiru nemnghehna an tih kha Nibiru a ni lo, light year tam taka hlaa galaxy te an lo ni zawk e.

(ii) Hubble image – Nibiru tia Youtube-a a video an dah, mi tam takte tiralkheltu kha eng dang ni lovin arsi pakhat V838Mon an tih mai, light year 20,000 vela hla ami thlalak a ni; Monocerotis constellation ami a ni nghe nghe. A taksa pawn lam chu a chhan hriat chiah si lovin a rawn lian vak mai a, a rawng pawh a sen a ni nghe nghe. He arsi hi kum 2002-ah khan hmuhchhuah a ni. Light year 20,000 a hla daih hi zawng a hla lutuk a, eng tluka chak pawhin khawvel su turin rawn thlawk ta sela kum 20,000 hnuah a lo thleng chauh ang. Nibiru a ni lo leh ta phawt.

(iii) South Pole Telescope (SPT) – Hei hi khawvel chhim tawp Antartica khawmualpuia America rama university hrang hrang tangrualten galaxy bawr khawm tup mai zirna atana kum 2007-a telescope an bun a ni. Radio telescope a ni a, thla a la thei lo. Nibiru thla phei chu a la hauh lovang! Mi thenkhatten USA hian Nibiru hi a hre ru tawh a, a ruk thei ang bera chhui an duh avangin mihring awm lohna Antartica-ah kher he telescope hi an bun ta a ni an tih leh pek chu. Antartica hi a humidity (tuihu) a tlem a, chu chu telescope bunna atana duhthusam a ni, chuvanga he hmun khera bun hi an ni.

Engtin chiah nge Nibiru chu a lo pian tak le?

Kum 1976-ah khan Zecharia Sitchina’n ‘The Twelft Planet’ tih lehkhabu a chhuah a. Amah hi tawng hlui zirtu, a bikin Hebrai, Sumerian, Akkadian leh Mesopotamian tawng leh an chanchin zirna lama mithiam a ni.

Chu a lehkhabua a ziah dan tlangpui chu hetiang deuh hi a ni –

‘Planet pakhat ni (sun) hel ve lo, Solar system pawn lama arsi pakhat heltu, Sumerian hoten Nibiru an tihah chuan mifing tak tak (Aliens)te an awm a. Lian pui pui 10-15 feet zeta sangte an niin a sang zualte phei chu 30 feet laite pawh an ni. An planet chuan an ni ve a helna kawngah kum 3600 a ral apiangin kan leiin ni a helna kawng hi a rawn tan tlang ziah thin a. Chutia a rawn hnaih lai chuan khawvelah an lo kai ta a, heng mite hi mihringten Annunaki kan lo ti a ni. An thiamna a san em avangin zawng chi (Primate) atangin an gene (zefang) tidanglamin mihringte an siam chhuak a. Salah te neiin an pawl bawk a, an fa hrinte pawh lian pui pui leh chak tak tak, Bible-in Nefilim mite a tihte kha an ni a, chung mite chu hmasang mi chak hmingthangte an ni bawk.

Leia an lo kai hmasak ber phei chu he leia mihringte kan lo awm tan hun vel kum 450,000 vel kalta kha a ni.  An planet tuamtu boruak thawm thatna atan lei atangin rangkachak an lai chhuak teuh nghe nghe. An thiamna a sana an ropui em avangin mihringte chuan chung mite chu Pathian an lo tih thinte kha an ni. Hei hi a lehkhabu kaldan tlangpui chu a ni mai e.

A lehkhabu chu hralh a tla ta phian a. Scientist ten an lo zawn tlut tlut Planet-X pawh chu Nibiru ni ngeia ngaitu an pung ta tual tual a. Solar system hmawr tawng leh a piah lama thil hmuh chhuah awm tawh hlek chu an ti-Nibiru ta zel a ni ber mai. Nibiru hi Babulon hote pawhin an thawnthuah an lo nei ve tho va, anni chuan ‘Marduk’ an ti thung, an Pathian pakhat a ni nghe nghe. Sumerian hote thawnthu hluia a lan dan chuan Nibiru a lo lan apiang hian khawvelah chhiatna a thleng thin a ni.

Nibiru pawmtute sawi danin a lo lan hnuhnun ber chu 1600BC vel a ni a, hei hi Mosia hun lai bawr vel kha ni awm e. Aigupta rama tui zawng zawng thisena a chang ta thut mai te kha Nibiruin a kal paha khawvela thir them nawi rawng sen nei (Iron oxide) a rawn thlauh thlak vang a ni a, rial lian pui pui lo tla te kha tlangkang vanga tuihu khal lo sur leh a ni a, ni 3 chhung khaw thim te kha khawvel vir lai a tihdin vang a ni e an ti ta zel a. Thu puarpawleng leh thil dangdai deuh ngaihven reng rengte tan chuan a awihawm ve viau mahna le!

Nancy Lieder-i leh a pawlte :

Kum 1995-ah khan kalsual pawl Nancy Lieder-i leh a pawlte (sapho khawchhak lung lum hlau pawl ve) chuan Nibiru chungchang chu an rawn tithar leh hluai a. Ama insawi danin arsi pakhat Zeta Reticuli-a chengte ‘Zeta’ an tih maite chuan vawi khat chu an kiangah an hruai tawh a. Chumi tum chuan a taksaah inbiakpawhna khawl chi khat an dah a, chumi hmang chuan an rawn be thin a ni. Nibiru avanga chhiatna lo thleng tur pawh hi chung Zeta mite chuan amah kaltlangin mihringte rawn hriattir an tum a, khawvel chhandam tur leh mite lo inralrintir turin an rawn ti a ni awm e. Zuitu lah a ngah phian lehnghal. Zeta Reticuli hi arsi phir (Binary star) a ni a, lei atanga light year 39 a hla, Reticulum constellation-a awm a ni. Arsi 2 te hi an intiat hle a, a pakhat zawk Zeta2 an tih mai phei hi chu a len zawng, sat zawng leh mass (rih zawng ti mai ang, a dik chiah lo naa)-ah te kan ni (sun) ang deuh chiah chiah a ni nghe. He arsi hi Scienc fiction film eng emaw zatah a lang tawh a, planet a nei vea lantirin chutah chuan mifing tak takte an cheng anga lantir a ni deuh ber. Mizoten kan hriat lar pakhat chu ‘Alien’ tih film, kum 1979-a chhuak kha a ni.  Heng science fiction film neuh neuhte hian Nancy Lieder-i zeldinna pawh hi a hruai ve te pawh a ni mahna.

A hmaa kan chhiar tawh ang tho khan Scientist-ten planet thar hmuh chhuah an tum Planet-X pawh chu Nibiru ngei a ni e tiin a tharthawh hluai bawk a. Hei bakah hian remchang takin Mayan calendar-ah chuan ngaihruatin lunglen a hril chang chang tih ang deuh hian kum 2012 hi khawvel tawp hun tur ang deuhin a ngaihruat theih chang chang a. Chungte chu hmehbel chho zelin Nibiru chu kum 2012-a khawvel rawn suasam turin a chhuah ta mai a ni.

A sawi zel danin Planet-X (Nancy Lieder-i tana Nibiru) chu khawvel aia a let 4 vela lian a ni a, May ni 27, 2003-ah khawvel a rawn hnaih hle dawn a. Hei vang hian khawvel vir lai chu ni 6 vel chhung a vir tawp chuih ang a, khawvel chhim tawp leh hmar tawp a inthlak thleng bawk ang (chutiang chu Pole shift an ti). Chu chuan chhiatna rapthlak lutuk a rawn thlen anga, mihring zawng zawng deuh thaw kan thi vek ang a, a la dam chhun te pawh eitur awm lo avangin an tam hlum thak tho ang tiin a lo hrilh lawk tawh nghe nghe.

Mahse he thu hi a dik lo tih chu nang leh kei hi a taka hretute kan ni. Chutia a hrilhlawkna a dik tak si lovah chuan a hun a sawn leh ta a, kum 2012 Dec. ni 21 ah zawk a ni e te a tikawi leh ta niah niah mai a ni.

Amah tho hi a nia kum 1997-a Hale Bopp simeikhu lo lang tur Scientist-ten an lo sawilawk, a ni dawn lo ti tlattu kha. Zeta miten min hrilh lo, simeikhu lo lang dawn sela chuan min rawn hrilh ngei ang te zuk ti vel chuan! A thu leh ui bengah hlin tur a awm lo ve. Chuvangin Nibiru hi i lo hlau thin a nih pawhin lo hlau tawh reng reng suh, chu ai chuan Ni biru hi hlau zawk rawh!

IRAS, STP, Hubble Image te kha?

Henghote hi Nibiru pawmtuten Nibiru dikzia nemnghehna atana an hman chamchite chu an ni. Heng telescope te hian khawilama planet thar emaw, Planet-X emaw, Nibiru emaw an hmuchhuak lo. IRAS thil hmuhchhuah an sawi lar tak hlut pawh kha a zavai mai khan light year maktaduai tela hlaa galaxy teho an nih kha. Chutiang thovin Hubble telescope-in a thlalak, arsi sen deuh vut, Nibiru an tih mai Youtube-ah pawh a video-a an dah kha light year 20,000-a hlaa arsi sen pakhat V838Mon thlalak a ni kan tih tawh kha. Khawilama Nibiru mah va ni suh. South Pole Telescope pawh khan khawi lama Nibiru thla mah a la lo, Radio telescope a ni a, thla a la thei lo hrim hrim.

Nibiru leh Kristianna :

Heti hian ngaihtuah teh ang – Nibiru hi a tak tak a nih chuan kum 2012-ah khawvel hi a tawp dawn tihna ni ang. Chutiang chhiatna rapthlak lo thleng tur chu Pathianin a mithianghlimten an tawrh ve a phal lo anga, chumi ma chuan Mithianghlim a lawr ang. Chuti chu kum 2009–2012 inkarah hian Mithianghlim lawr a awm dawn tihna.

Bible-in a hun thu tumahin Pa chauh lo chuan an hre lo a tih mawlh mawlh laiin keini chuan kan hre lawk deuh roh tihna a ni ang. Chu chuan Bible thu a kalh tlat a ni. Chuvangin Nibiru hi i pawm a nih chuan Bible hi hnawl law law la, Bible hi i pawm a nih chuan Nibiru hi hnawl hmiah la, thawnthu ngaihnawm ve satliah ang chauhin i ngai dawn nia. Kan thu hriltute pawhin Pulpit tlang atanga intihthaihna atana hman fo hi chu i sim tawh ang u, kum zabi 21-naah kan awm tawh hi, i mawl tha tawh lovang u.

Tlipna :

Khawvel hmun tinah kal sual pawl an awm zel a, saphote zingah hlei hlei hian an tam emaw tih tur a ni. Chung zinga pakhat chu Nancy Lieder-i leh a pawlte hi an ni. Anniho bakah hian Thlengthlawkthei mite (UFO) Pathiana lo be ta mai pawh tam tak an awm. Hmanlaia miten Pathian an lo tihte pawh kha tu dang ni lovin khawvel pawn mite (Aliens), Technology changkang tak tak an ni a, mihringte tan chuan Pathiana biak awm reng an ni alawm tia ngaihdan nei, Pathian awm ring lo pawh tam tak an awm reng a ni.

Heng kal sualhote zirtirna atthlak takah hian tlu lut lo turin fimkhur la, Kristian i nih ve chuan Bible-in ni hnuhnungah chuan Zawlnei derte pawh an lo la pung hluai dawn a ni tih a lo sawi tawh kha a thleng dik mekah ngai hmak mai rawh. Hei bakah hian hetiang lam thil hi miten an ngaihsak tih hriaa, lehkhabu leh DVD lo siam a, sum leh pai lama hlawk tum ran an tam hle a ni tih te pawh hi hriat tel a tha ang.

Nibiru vang kher lo pawhin van lam atanga arsi them eng emaw ber sutna avangin khawvel hi chhe rup thei chu a ni tho tho mai. Scientist-ten an zawn mek Planet-X hi a awm lo tih pawh sawi theih a ni lo, an la hmu chhuak lo a ni mai. Hmuchhuak ta pawh ni sela Nibiru kher zawng a ni chuang lovang.

Tun thlengin Nibiru hi an la hmu chhuak lova, chuvangin a tak pawh awm lo na na na zawng lo hlau duh vak suh. Nibiru hi zawng hmanlai Sumerianhote pipui thawnthu ve mai, tun hnai chhova kal sual pawlten an ngaih dan nemnghet tura Science thil hmuh chhuahte a bawplawka la chunga zeldin thu bawl, a tak pawh awm lo an chhakchhuah ve mai mai a ni.

Mahse hei hi a chu a chiang – kum 2012-ah kan NIBIRU DAWN LO.

Similar Posts:

• Pluto is no longer a Planet =(
• 2012 ah Ni a Biru dawn lo
• Planet Saturn zam hualtu hmuchhuak thar
• December 21, 2012
• Best Mobile Social Network

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Saturday, May 1st, 2010 at 3:18 am and is filed under Information. You can follow any responses to this entry through the RSS 2.0 feed. You can leave a response, or trackback from your own site.