mi(sual).com

1st. Thursday: April Fool a nia; naupangte’n intihhlim nan an thiante in biakbumin an hlim hle. Hetih lai hian mi puitling leh challang tak takte an lo bum avangin nunphung pawh tlemin a khaihlak deuh.
2nd. Friday: Lal Isua kan sual tlana a thihna champha a nia; he hun hi Pathianni anga serh a niin Kohhran hrang hrangin Lalpa Zanriah Sakramen nen urhsun takin an hmang.
3rd. Saturday: C.Lalduhawma (35), Papuia s/o C.Vanlalhluna Durtlang chu pumna avangin PC Hospital Durtlang ICU-ah dar 08:15 khan a boral. A boral hian a testimony a pa’n a chhiarchhuah chuan sunpuitute thinlung a hneh hle. He thihnaah hian Speaker Pu R.Romawia pawhin an thawhpui a nih angin pangpar mawi takin a thlah a ni.

4th. Sunday: Pu Jonathan Thandailova Illan (68?) Israel rama awm chu hun rei tak cancer natna a tawrh hnuin India ram sanaa zan dar 7:30 khan a boral. Pu Thana hian a nupui Pi Shalom Chalziki Illan leh a tute leh fa panga a kalsan a ni. Kut a nih dawn avangin vui nghal loh a ni.
5th. Monday: Assembly Speaker Pu R.Romawia chuan 7th. March-a tan Budget Session chu tiamchin awm lovin a titawp ta. He session zawhfel takah hian bill pasarih pass a nia; starred question 193 chhan hman a niin unstarred question 92-te chhanna siam a ni.Session tawp niah hian Speaker hian member-te hi zanriah a buatsaih sak thina; tuntumah erawh hi chuan tunhnaia thli leh ruah avanga chhiat tawkte an tam avangin avangin a buatsaih sak lo a ni.

6th. Tuesday: Social Wellfare Dept. hmalaknain puanthui leh pheikhawk siam traning nei turin mi engemawzat chuan traning nei turin anmahni hostel tur an pan hlawm. Mipa ho hi Thakthingah an awm anga; hmeichhe ho hi Laipuitlangah an awm thung dawn a ni.
7th. Wednesday: Mizorama khaw pariatah tluang takin Village Council inthlanna neih a nia; khawi hmunah mah boruak duhawmlo thleng a awmlo.V/C thlang tur pakhat Lunglei Dist.-a Sailen khuaah chuan Congress candidate pathumte’n chuhtu an neihloh avangin inthlanna hi neih a ni veloh a ni.
8th. Thursday: Mizo Zirlai Pawl (MZP) chuan HSLC Examination 2010-a Mizo zirlai top ten-a tlingte chu Vanapa Hall-ah an chawimawi. He hunah hian Education Minister Pu Lalsawta chu khualliana ni.
9th. Friday: Saiha Dist. Website, www.nic.saiha.in chu Saiha NIC Office-ah PHE Minister Pu S.Hiato-in a hawng.

10th. Saturday: Nirvana Pilgrims Society, Kolkata leh Mizoram Entrepreneurship Network (MEN) buatsaih ni sawm chhung awh tur Best of Asia Expo 2010-International Border Trade Show Mizorama a hmasa ber tur chu AR Lammualah tan a ni. He hunah hian Mizoram thil siam chi hrang hrang leh India ram state dangte bakah Thailand, Bhutan, Myanmar, Cambodia leh Turkey ram atangtein an thil siamchhuahte lei theih turin an rawn kengkhawm a ni.
11th. Sunday: Presbyterian Kohhran Puitling Sunday School-ah ‘ Lalpa ni leh rorelna dik’ tih zir a nia; Mizoramah rorelna diklo tak avanga mi retheite kan chep ziate sawiho a nia; rorelna dik leh felna leh hmangaihnaa roreltu kan mamawh thute nasa taka sawiho a ni. He zirlai hi kan ram rorelkhawla kan hotute zingah zir ve tamtak an awm avangin zirlai tangkai tak a nih an beisei.
12th. Monday: World Bank-a External Affairs Division (Journalist), Vinita Ranade chuan World Bank sum hmanga Aizawl-Thenzawl-Lunglei kawngpui siam mek chu a hmunah a enfiah.

13th. Tuesday: Pi Darchhingi (81) Dawrpui Veng (Zion Street) chu chhun dar 12:00 khan zunthlum natna avangin a boral.
14th. Wednesday: Phuldungsei High School-a zirlai nu leh pate leh MZPte chuan Science zirtirtu an neihloh avanga an lungawi lohna lantirnan an sawilawk tawh angin 1st term exam vawiina tan tur chu an boycott. Science zirtirtu an neih hma chu sikul kai an tumloh thu an sawi.
15th. Thursday: Lamsuaka Memorial Criket Stadium, Sihhmuia sak tur lungphum chu Cricket Association of Mizoram (CAM) President leh Chief Minister ni bawk Pu Lal Thanhawla’n a hawng.
16th. Friday: Mizoram Synod hnuaia Pastor bial hrang hrangte chuan ‘Bial Inkhawmpui’ an hmang tan. He Inkhawmpui hian 18th. Sunday lo awm tur thleng a awh ang.

17th. Saturday: Central YMA Basketball khelh mekah chhun dar 12:30 khan Zarkawtah Ramhlun North Branch leh Ramthar Branch an intuma; Ramhlun North hian 81-43-in an hneh a ni.
18th. Sunday: Chawhnu dar 2:00 vel khan Bethesda Home, Sihphira mi chu anmahni area-ah tho TV an en laiin mutna pindan a kang.
19th. Monday: The Hindu chanchinbu phek 10-naah ‘Lapang willing to step down’ tih thu a inziaka; chuta picture-ah chuan mak tak main Chief Minister Pu Lal Thanhawla thlalak a intar daih.
20th. Tuesday: Pachhunga University College III yr. BA zirlai hmeichhia11, mipa 19 leh an zirtirtu 2-te chuan New Delhi, Agra leh Kolkata hmuna hmun pawimawhte fang turin New Delhi Mizoram House an thleng. House-ah hian thawktute’n an lo dawnsawn danah zirlaite an lungawi lo hle.

21st. Wednesday: Mizoram Upa Pawl (MUP) General Assembly vawi 38-na chu Vanapa Hall-ah hman a nia; Minister of State for Social Wellfare Pu Pc Lalthanliana’n a hmanpui. Kum 2010-11 kumpuan thupui atan ‘Thianghlimna’ tih thlan a ni.
22nd. Thursday: Aizawl khawpui pawn lama Village Council-te hnena PA set semchhuah bultanna chu LAD Cofn. Hall-ah neih tan a nia; LAD Minister Pu Pc Lalthanliana’n a hmanpui.
23rd. Friday: Mizoram Board of School Education (MBSE) chuan Higher Secondary School Leaving Certificate Examination (HSSLC) 2010 result a tichhuaka; exam beitu 7362-ah 4489-in an pass-a; pass percentage hi 60.98% a ni.Compartmental chance nei mi 290 an la awm bawk.
24th. Saturday: Adventist International Institute of Advanced Studies (AIIAS) Philippines chuan Vanapa Hall-ah ‘Chhandamna tluantling’ leh ‘Nun hlimna thuchah’ puanchhuahna, Happy Living Seminar an tan. He hun hmanpui tur hian AIIAS atangin professor, doctor leh zirlai engemawzat an rawn tel a ni.

25th. Sunday: Tuirial Airfield Venga Zuala (25) ‘Matu’ tia koh chu Vanlalrova s/o Ginzalama leh Lalrotluanga (Tluangte-a) s/o Ramate’n an sawisa hlum.
26th. Monday: May 18th. 2007-March 30th. 2009 chhunga Rs 4,87,35,000/- senga Border Roads Organization (BRO) hnuaia Project Pushpak-in Champhai kawng, Keifang leh Dulte inkara Tuivawl lei, Parmanent Pre-stressed Concreate (PSC)-a a siam chu Chief Minister Pu Lal Thanhawla’n a hawng. He lei hi meter 70-a thui, meter 12-a zau a ni.
27th. Tuesday: Lynchpin leh MJA tangkawp huaihawt, EduFest 2010 chu Millennium Center chungzawlah tan a ni. He hun hi Prominen Journalist Pu Robert Lalchhuana’n a hawng. He hun hi naktuk ah pawh hman leh a ni ang.

28th. Wednesday: Chawhma dar 11:00 khan Bethlehem Venga Pu VL Muana in, a makpa C.Lalramchhuangate chhungkaw luahlai chu an bazaar kal hlanin bungrua engmah chuh hman lohvin a kangral vek.
29th. Thursday: Vanlalhnema (32) leh a nupui Ramnunmawii (36), Seling Zahngai Vengte chu anmahni inah bomb puak avangin an boral. He thil thleng hi Bawngkawn Police, forensic-te leh Seling doctor-te’n a hmunah an enfiah nghal.
30th. Friday: Aizawl Custom Division, Champhaia mite chuan Champhai Bethel Vengah pistol pakhat leh a mu pahnih an man. Silai kawltu Ginsiandong (60) s/o Thangzachin Myanmar pawh an man nghal a ni.

Similar Posts:

• August 2008 Mizoram Diary
• July 2008 Mizoram Diary
• October 2008 Mizoram Diary
• April 2009, Mizoram Diary
• June 2008 Mizoram Diary

Recent Posts:

• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO
• Like!

This entry was posted on Thursday, May 6th, 2010 at 3:48 am and is filed under Information. You can follow any responses to this entry through the RSS 2.0 feed. You can leave a response, or trackback from your own site.