mi(sual).com

(Sawihawnna : College kan kal lai khan, tum khat kan titi na-ah, ‘article leh short story’ ziak a awl leh awl loh thu-ah kan inhnial a. ‘A awl lutuk’ ti pawlah ka tang a. “Mahni rilrua lang lem lo thupui phuahchawp hmang pawhin maw ?” an ti a. ” Aw” ka la ti phung phung a. ” Kawmthlangpa Kezungpui” tih te hi ni ta sela, an ti a…ka tang laklawh tlawm hreh khan khami zan la la khan ka ziak ta a. A rei ta hle mai. Lung te pawh a leng lek lek mai. Hope you guys will enjoy it)

Kawmthlangpa tan chuan he khawvel hi thlakhlelh tlak loh, hmun khawhar, engtiklaimaha hlimna tluantling chang ve tura phalsak a nih tawh ngai lohna hmun – hremhmun khawvel a ni. Kum eng emawzat liamta-ah kha chuan he khawvel, tuna atana hlimna reng awm tawh lohna ngeiah hian van malsawmna dawngin a nupui fanau duhtakte kianga chengin, hlim takin hmalam hun a thlir thin a nih kha. Zingah ni se, hma taka thovin, khawchhak lam atanga ni lo chhuak turin-a, a chhun en kawl eng tantir te kha hmel hlim sarh pu chungin, beiseina nung nen a thlir tuktin a.

Zing ni chhuak eng no raih maiina a fate muhil hmel a’n rawn chhun eng sat thin te kha a tan chuan ennawm ropui a tling a, an muhil thaw ri sak-sak thin te tak kha a sin, a benga rimawi chu ni. Tunah zawng, kha’ng hunte kha thawnthu hlui nghilh har mai an chang zo ta. Atan chuan ni leh thla-in awmzia a nei tawh lova. Kumsul veiin nundan thar kaichhuaka, a vela chengte hnena beiseina thar a thlen lai pawh chuan ani chu beidawngin a kun a.

Chhun leh zan inher hian a nunah eng danglamna mah a thlen zo tawh lo va, zing nichhuak thlir ai chuan, tlai nitla tur thlir chu atan chuan a letin a thlakhlelhawm tawh zawk a. Thenrual kawmin, puipunna hmunahte han kal ve thin bawk mah sela, lunglenna leh beidawnna mai lo chu a chharchhuak ngai lova. Amaha a awm fal lahin a thlarau chu lungngaiin a rum tak meuh meuh thin si. Atan zawng, he minung khawvel hi hremhmun khawvel a va han ni tehlul em!

Hetia nun khawhara nung tura hnutchhiahtu, a hmangaih ngawih ngawih, a nupui leh a fate pahnih nunna laksaktu ‘Hripui’ kha a theihnghilh thei tawh ngai lova. Vawi tam anchhia a lawh a, mahse, hripui huatthlalaawm tak anchhia a lawh avang chuan a nupui fanaute chu kaihthawhin an awm phah tawh chuang lova, atan lah nun hahdamna a thlen phah tawh chuang hek lo. Mahse, a sawt chuang lo tih hrereng chung pawhin a beidawng lutuk hian anchhia a lawh leh ringawt thin a.

Kha hripui kha tharuma beiha hneh theih ni se, a samzai thlenga a ral raih thleng pawha beih a inhuam a, mahse, tharuma nuai mih mai chi a ni lova, hriamhrei nena vau zam mai mi lah a ni hek lo. Ani, thingthlangpa damdawi hriat ve ho lah khan awmzia reng a nei hlawm si lo. Theihnghilh duh mah se, a chhia leh tha hriatna-in a phatsan hma loh chuan chuti maia theihnghilh ngawt theih a ni si lo. A awmfal apiangin a mitthlaah hmanlai hun chauh khan hmun a chang tawh a, atan chuan a fala awm chu lungngaihna darthlalang a ni mai a. Mahni chauhva khawsa a nih miau tawh avangin chu lungngaihna darthlalang chu a thlir fo lo thei lo va, mittui nena nunhlui thlir kir chu a nitin hun hmandan a lo ni ta.

Thukah chuan mei a alh hlep hlep a. A chang changa rapchunga vawksa rep inthil tlar that atanga sahriak rawn farin meialh a’n far fuh zauh chuan, a ri sawr sawr a, a alh pawr leh hliai thin a. Pawnlamah chuan thli a thaw vur vur a, ruah lah chu sur zawh vek tum niawm fahran hian a buakin a baw tlawrh tlawrh mai bawk a. Meilum hnung-puakin, a khupa a puanven suih chung chuan kawmthlangpa chu a thu a. Kawmchar lam, pathlang tukverh bula khum tar tawh zet mai inhunga tluzal chung chuan lehkhabu ka chhiar a. Engati tehreng emawni ka lehkhabu chhiar chuan ka rilru a luah hleithei der lo mai a. Tapchhaka thu kawmthlangpa chu ka va melh a.

A khupa a lu nghatin, che lo chang lo hian a lo thu a. Khua a vawh deuh hlek avangin meilum ai tur chuan tapchhak lam chu dimte in ka pan phei a. Kawmthlangpa chu a muhil ni-a ka hriat avangin tihharh palh hlau tak chungin a kiangah chuan thuthmun ka’n rem ve a. “Vawt i ti ta deuh e lo ?” a rawn tih pawh chuan ka phu lek lek a. “Nia” ka ti mai a, inbezui lovin kan thu ngawi vang vang a. Chutah, “Vawiin khua em em chu a va han sur duh tehreng em. Thlasik laia heti em a nasa a an sur mai chuh”, a rawn ti leh bauh a. Kei chuan “A ni ngawt mai”, kan lo ti leh ngawt a. Chutiang thu chu rawn sawichhuak mah sela, a hmel atang chuan thildang ngaihtuah muk tak a nei tih hi a hriat theih a. A vanglai hunte chhuikirin, hmanlai hunah bawk a cheng leh ta ni-a ka rin avangin biak buai zui ka tum lova, ka chaicheh hum chuan vutah chuan thil lem eng eng emaw ka thai a.

Kawmthlangpa chuan a aw a’n thian kharh a, chutah dam dap hian “Ninga ni a, kan tlangval lai chanchin min zawh tuma ‘hun remchangah ka la hrilh dawn che nia’ ka tih kha i la hrereng em?” min han ti a. Kei chuan ka la theihnghilh loh thuin ka chhang a. A puanven sawirem pah chuan “Khawsak rel a la hun lo deuh bawk a, kan tlangval ve lai hun chu ka’n hrilh poh dawn che em maw ni le” a’n ti a, a ngawi leh deuh vang vang a, chutah, tihian a sawi ta a.

“ Kan tlangval ve lai chuan , khaw khat tlangval buanchak a sawi ve hat hat thin ka ni a. Kan Lalpa’n a zin khawthawnna vela a hruai berah ka tang chho va. Khang hunlai te kha chuan tu nun mah kha ka awt ngai lova, tun dinhmun angah hian ka la ding ang tih ngaihna reng reng ka hre ngai hek lo. Sapsakeia kawng zawn kan laih tum a, kawng dal taka Bungpui lian fahran mai ding kan khaw thenawm tlangval chak leh chhuanvawr, Thanghulha nena kan han in cheh chhawk laia, kan khuate ve ve an lo haw haw hluah hluah lai te kha hmanlai a ni ta mai a.

Kan Lalpa ka zui kualna lama Dari nen kan intawn lai te khan, tihian mahni chauhva awm turin min la kalsan ang tih reng reng ka dawn phak ngai lova. Dari nen kan inneih hnu a fapa kan neih hmasak ber tuma ka hlimzia te tak kha aw ……. Dari lah khan fanu a awt thei em em a, chutah fa kan han nei leh a, hmeichhia a ni tih Dari’n a hriat rual rual a, chau tak chunga, hmel hlim fahrana min nuih lai te kha ka mitthla-ah hian a cham reng thin. (A ngawi leh vang vang a.) Tumkhat, kan fate leikan ve deuh hnu a, kan nupa a thing kan phurh tumin, Dari’n a hrei a chek thlawk palh a, ka kezungpui vei lam takah hian a tlak a. A thi duh em em mai si a, Dari puanlukhum kan pawtthlera, kan tuam ta a, chawlhkar khat zet chu, awl lai te a ni bawk nen, In ka awm phah ta nghe nghe a.

Ngawiteh hei tun thlengin khami ni a, min tihpalhna ser khan thak chang a la nei nia, a ser hi a nung tlat mai a. (Chumi a sawi pah chuan a kezungpui chu tlemin a’n lek kang deuh hlek a, a vang tan zawnga ser awm raih chu ka hmu a.) Hetia, he sernung a rawn thak chang apiang hian, khami ni a thil thleng kha ka hrechhuak leh thin a, he sernung a thih hma hi chuan ka hriatrengna pawh hian min phatsan dawn lo zawng a nih hi. Tichuan, ‘kan fate an lo leikang ve dawn ta tak tak e’ ti a, nghakhlel taka kan thlir lai in, kha hripui huatthlalaawm zet mai kha a rawn leng ta a….(A ngawi leh vang vang a, a ngaihtuah awm ang chu ka hriatthiampui em em a.) Tun-ah zawng min tihlim em em thintu ka nupui fanaute kha, min tilungngaitu leh min tihrehawmtu lek an lo ni ta a nih hi! Khawvel hi zawng a lo van mak tak em,” ti in a kun ta ngawih ngawih a.

Ngawi-rengin ka thu a, kawmthlangpa kezungpuia sernung chu ka thlir vang vang a. Thuka meialh chu a rem a, pawnlamah chuan thli a thaw vur vur a.

Similar Posts:

• I hriat loh ka hlau thin a
• Van Lehkhathawn
• Lungpui Chungah Chuan
• MIZO TE HI HNAM DAWIHZEP TAK KAN NI.
• Misualte zawhna

Recent Posts:

• Tun Hun Hi
• BELH CHIAN HI KAN VA DAWLO EM
• Flight 370
• UNAU KAN NI
• MIZORAM CAPTAIN ZICO HI TUNGE?

This entry was posted on Thursday, May 6th, 2010 at 6:15 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.