Han inhnial luih luih mai hi chu, eng teh ual sawi kaw lem lo mah ila, a nuam ve hrim hrim a. Hrin hrang, lubur hrang, seilenna hrang, hmelchhe deuh leh keini ang hmel sar veng vawngte’n zaikhata luanza tuma thu kan han khelho hi a pui ve hrim hrim!:) Kei ngei pawh hian ka thuziakah hian mizo tawng hi ka hmangsual fova, ziak zawm leh zawm loh turte pawh hi a hre ber ni awm zia zangin ka han ziak vel tak na-in, ka hre em em bik hauh lova.
Sawi tawh angin, kei hi chu mahni ngaihdan dik bera ngaia sawhsawn duh reng reng lo mai mi ka ni lem lova. Ka ngaihdan hi chu ngaihdan dang eng emaw, ka ngaihdan sawhsawn thei leh ka ngaihdan aia dik zawk ni-a ka hriat ka tawn hma-a dika ka ngaih hi a ni mai a. Heng a hnuaia ka tarlante hi i han khelho leh teh reng ang u hmiang.
- Nimin-minleh/Nimin piah : Nimin piah tih mai hi a fel a. Nimin –minleh tih kual vel hi a dik lo.
- Naktuk- tukleh/naktip : Naktuk tukleh tih duah mai hi kan hrat riauva, a dik lo hran lova. Mahse, zo tawng nalh tak mai, ‘naktip’ tih kan nei a. Hman hram hram a tha. Naktip tih hman zah tlat mai hi a pawi hle-in ka hria.
- Naktuk zan/nakzan: Naktuk zan tih duah ai chuan, nakzan han ti zaih mai ila, a mawi zawkin ka hria.
- Nimin piah zan/zan hmasa: Nimin piah zan tih duah ai chuan, zan hmasa tih mai tur a ni.
- Nimin zan/nizan: Nimin zan tih ai chuan nizan tih mai hi a fel thak bawk.
- Zing chaw/tukthuan: Tukthuan tih mai hi a mawi a; zing chaw tih hi a dik lohna a awm lem lovin ka hria a, mahse, tawngkam mawi zawk chu tukthuan tih hnap mai hi a ni.
- Ngaihthlaknawm/ngaihnawm: Tunlaiah ngaihthlaknawm hi kan hmang dik lo nasa tawh hle. Mi thusawi kan ngaihthlak emaw, mi thuchhiar kan ngaihthlak emawin, a ngaihthlaknawm khawp mai tiin kan sawi thei a. Tichuan, thawnthu ka chhiar chu ka tan chuan a ngaihnawm a, nang, a lo ngaithlatu tan chuan a ngaihthlaknawm ta a nih chu.
- Eng ilo mai mai: ‘ilo’ tih kan hman hian ziak zawm thlap thlap tur a ni.
- Hmanni-ah ‘white lie’ chungchang hi kan sawiho luam a, mizo tawngah chuan ‘dawt var’ a ni ve ringawt lo. Dawt var ni lovin, dawt pawi lo, dawt tangkai emaw, dawt pawi sawi lo emaw tih zawk tur a ni.
Similar Posts:
- Mizo tawng tlem i zir lawk ang
- Mizo tawng ziakdan tlem-II
- Hnam bil tlawmngai pawl din hi a dik em?
- Lalhnam/Hnam Sakhua- ho post ka ninna tlem..!!
- AYUSH lam kan rawn inlar leh ta e
(Y)
June 8th, 2010 at 5:32 pm
‘Chutiang ang’ tih hi “chutiang emaw chuti ang” tih mai hian a fel thlap. ‘chutiang ang’ kan hman chuan ‘chuti ang ang’ tihna a ni.Chutiang zelin “Hengtiang ang” pawh.
@coolsoul
#4.ZAN HMASA tih khi ‘nizan hmasa’ tiin ka hmang.
Tawngtaina tawp lama ‘Heng zawng zawng hi LAWMTHU SAWI CHUNGIN kan rawn dil a che’ …., ‘lawmthu sawi chungin’ tih leh kher hi tul ka ti lo.A tirah khan lawmthu chu sawi daih tawh tur.Chubakah, LAWMTHU SAWI CHUNGIN kan tih ringawt hian eng thilah nge lawmthu kan sawi kan sawi lang lova, a kim lo. Bible-in “lawmthu sawi chungin dil rawh u…” a tih kha tawngtai tawp lama ‘lawmthu sawi chungin’ kan tih sam et hi a kawh tum niin ka hre lo tlat kei misual hian.
‘Ngaihthlaknawm’ hi khawpui ka awm hnua ka hriat ve chauh a ni. Mi thawnthu sawi/chhiar ngaihtla mah ila ka ‘comment’ dan tur chu “A ngaihnawm hle mai” tih a ni ang. Ngaihnawm hian a sawifiah tawk a ni. A ngaihthlaknawm hle mai ka ti duah peih ve lo. Khawngaihthlakawm pawh hi khawngaihthlak tih hian a tawk.
Report this comment
June 8th, 2010 at 5:46 pm
@evergreen, a tha thak thak kher mai.
khawngaihthlakawm hi kan hmang ta fova, i sawi ang hian, khawngaihthlak tih mai hi a fuh zawk hmel khawp mai.
Tawngtai hmawr bawkna atana ‘lawmthu sawi chungin’ tih tel kher zel hi chu a chang hi chuan a nuihzatthlak duh deuh ka ti. Mi thenkhat phei chuan an duh duh an dil zut zut a, lawmthu an sawi eih lova, a tawpah, ‘lawmthu sawi chungin kan dil e’ an ti leh et zel ang lawi si a. A fuh lo tawp a ni.
Tin, inkhawm hruaitu-in, inkhawm tantirha tawngtaina hman hi a that rualin, a hranpa-a tantu ruat a nih tho hi chuan, a tul lo mai mai ngawtin ka hre thin bawk. Tantu thu chham tur zawng zawng a lo chham khalh vek zel leh nghal vei nen!
Report this comment
June 8th, 2010 at 7:21 pm
Naktuk tukleh, tlai chaw eikham ah peih chuan la comment leh ila tha ang
Report this comment
June 8th, 2010 at 8:28 pm
comment #40 na khi enge in ngaihdan?
Report this comment
June 8th, 2010 at 8:47 pm
@Henry, nakthian hi kei ka lo hre ngai hauh lova, naktip nakthai tih thleng hi chu ka hria.
Naktip tal hi chu hman lar leh theih ni se ka ti ngawt mai. Kei hi chuan ka hmang hram hram a. Hmang ve hram hram ula tih hi ka duhaisam a ni e. RC-a hrim hrim hi chuan mizo tawng chu a thiam ve khawpin ka hria. Anthonys-ah khan kan zirho thin a, Stephen Hall-a kan awmpui thin a ni.
Report this comment
June 8th, 2010 at 9:00 pm
coolsoul, Naktip nakthai tih vel hi Thawntanni, Thawhlehni, Nilaini etc sawi nan kan hman thin ka hre ngai lo, kan pi leh pu te pawn an hman ka ring bik lo ve tawp. Naktuk te naktuk tuk leh etc sawina ni maiin ka hria, Sunday, Monday, Thawhtanni, Thawhlehni tih vel lam ni lovin.
Report this comment
June 8th, 2010 at 10:34 pm
HV, see #49 :smile:
Kei pawh Nakthian hi ka lo la hre lo tlat pek, ka knowledge tlang a arh leh ta sawt mai, ty Rc.
#34 last para a ka sawi zulzui khian tawng hman ik loh kan ngah rualin, a thluk lamah pawh hian tih dikloh kan nei nual ang.
eg. Ngamthlem – Hnahlan tih thlukin
Tawngtai – ‘tai’ hi ‘inchai’ tiha ‘chai’ thlukin
Nakthian – Lam thiam tih thluk a ni em? Rcafanai
Report this comment
June 8th, 2010 at 10:35 pm
muante nih #56 kha?
Report this comment
June 8th, 2010 at 10:38 pm
Nimin min leh hi nimin piah tih mai a awlsam bakah a dik zawk tih ka pawm a. Mahse, kan han ti ti malh malh a, hun liam tawh kan han sawi mai dawn a, Nimin kan han ti zet tawh a, a ni lo tih hriatchhuah leh thut hian min leh tih zawm mai hi awl ve deuh a ni. Hawh u, pawm tel tho ang u :lol:
Kan veng pa, tawng lama mi thilchik leh chhui peih deuh hian Mizo tawngah hian hun leh hmun kan tiha hmun kan thluk dan hi a dik lo. A thluk sang nilo hian a hniama thluk tur a ni, a ti. (eg : Hmunphiah tiha ‘hmun’ thluk ang hian). A chhan chu place sawi nana kan hman dang hovah pawh hian a hniam vek kan hmang, eg: Sum hmun, Behlawi hmun, in hmun, etc. Han ngaihtuah cheuh cheuh hian, a dik hmel tlat.
Ka pa ka va ti ti pui zawk a, ziah leh ziak chungchangah kan va inhnial chiam chu a… :lol:
Report this comment
June 8th, 2010 at 10:45 pm
Khawtlang leh Khawtlang lam dan pawh hi a thluk hian awmzia a neih danglam tir asin.
Report this comment
June 9th, 2010 at 8:04 am
Mizo tawng ziak danah hian kan fimkhur thei ngang lo a nih hi, thangtharte chauh pawh nilovin rual u deuh tawhte pawh hian an vei tawh vak lo em ni chu aw? Kan media lam pawh hian an uluk lo thin lutuk a, vawi tam tak chanchinbu-ahte an rawn ziak tawh thin nain tuman an ngai pawimawh lem lo chu a nih hi maw. Ram leh hnam hmangaihna kan nei tawk lo deuh a ni lo maw?
Report this comment
June 9th, 2010 at 9:26 am
helai post chu kalo hmu harve
nimin-minleh han tih ai chuan nimin – piah han tih mai chu a awlsam zawk ngei mai a, nimahsela nimin-minleh han tih hian nimin -piah han tih mai ai chuan kan sawi tum Ni tak kha a hrilhfiah mah zawk in ka hreve tlat kei chu, nimin piah han tih hi chuan eng Ni tak nge tih kha a hrilhfiah zolo zawk mah in ka hria kei ka ngaihdan ah ve mai mai chuan 
Report this comment
June 9th, 2010 at 9:59 am
#57 Muantea,Nakthian tiha thian hi thrian thlukin ka thluk mai thin. Dikte-a pa @16 khian nakthian aiah nakthiang a ti thung a, ani khian engtin nge a thluk ve thung hriat a chakawm khawp mai.
Report this comment
June 9th, 2010 at 3:15 pm
@Rcafanai Nakthiang hi thianghlim tih a thiang ang in a ri.
Report this comment
June 9th, 2010 at 8:18 pm
Zirtirtu hi ‘Aieng’ lam rik anga han lam san vak ching kan tam, a dik lo anti. Miin naupang lehkha a zirtir (‘siamtir’ tih thlukin)-a, a zirtirtu chu: zirtirtu (Aieng anga thluk) ni loin, zirtirtu (siamtirtu, lo kal, lawmawm ect) thluka lam ngei2 tur a ni anti.
Report this comment
September 19th, 2010 at 1:17 pm
Hei pawh a thupui khi ‘ziahdan’ tihtur ani e
Report this comment