mi(sual).com

Aizawl, July 29 (Evening Post):Nizana ruahsur nasa avang khan Aizawl veng hrang hrangah lei a min a, hriat theih chinah leimin vang hian In 3 a hnawl a, mi pahnih thiin, hliam pahnih chu damdawi Ina dahluh an ni.

Nizan dar 11:15 vel khan Zemabawk North huamchhunga In pahnih chu leiminin a hnawl a, mi pahnih an thi. Hliam na lutuk tuar an awm lo a, leiminna bul velah hian lei khi ala awm avangin a bulhnaia chhungkaw 10 vel chu an inthiarchhuak a ni.

Zemabawk North Branch YMA president R. Lalnghakliana hnen atanga thudawn danin leiin a hnawl In hi Lalhmingmawia leh Krosslalnunmawia te ta niin an ni hi chhungkaw member 6 ve ve awmna an ni a, Hmingmawia In hnuai hi chhungkaw 2-in luahin a phel lehlama awm te hi a vanduai ber an ni a, khum khata mu VL Malsawmtluanga (19) s/o Vanlalringa, Kawrthah leh Timothy Lalhmingtluanga (18) s/o F. Lawmzuala, Zemembawk te chu lei hian chhilhin tukin dar 3:30 vel khan an ruang hi phawrh a ni.

Malsawmtluanga hi a u-te nupa nena khawsa an ni a, Timothy-a te nen hian chhungkhat niin Malsawmtluanga te Inah hian a riak zauh zauh a, nizan pawh hian a riak phei a. Khum khata mu an ni. Malsawmtluanga pa hi Forest Guard niin Kawrthah-ah hian a ruang hi phurhthlak a ni.

Vawiin khan Zemabawk North khawtlang chuan In tlu senghawi hna hi an thawk nghal a, leiminna bulah hian lei khi ala awm avangin chhungkaw engemawzat chu an insawnchhuak a ni.

Nizan dar 11:20 vel khan Tuikual ‘C’ Mual-a C. Neihthanga In luah lai assam type chu a chhaka raw bul hung tawlhin a delh a, a thlanga Zomuana In bulah hnawl thla in In chhunga awm mi 7 zinga 2 chu an hliam a nat deuh avangin damdawi Inah dah an ni.

Tuikual North YMA Asst. Secretary Lalzuiliana hnen atanga thudawn danin C. Neihthanga te chhungkua hi member 6 niin mikhual pakhat an nei bawk a. Neithanga fate Lalruatfeli (10) chu a lu leh awmah hliam tuarin Malsawmdawngliana (12) chu a ban ruh a tliak bawk a, midang te hi chuan hliam na nei loin first aid pek an nih hnuah chhuahtir lehnghal an ni. In chhung bungrua a chhe deuh vek niin a sawi. C. Neihthanga te chhung hi VC House-ah awmtir rih a ni a, tukin khan YMA chuan vengchhungah vehbur khawn nghal a ni.

Tukin dar 1:00 vel khan Zotlang huamchhung, Vaivakawn Zohnuai chungzawna assam type In, Lalkhama, Sialsuk ta, chhungkaw hnih luahlai chu a chhak lam lei tawlhin a hnawl tlu bawk a, bungrua engmah an chuh hman lo. Thudawn danin In luahtute hian zan dar 10:00 vel atangin an hlauhthawn an nei tan tawh a, zan dar 11:00 velah an chhuahsan fel hman a ni.
~~~~~~~~~~~~~~~~~~~~~~~~~~

Chhiatrupna a lo thlenin
Thal a ni a, kangmei vangin chhiatna a thleng thin, dan hleihtheih a ni lo. Fur a lo thleng a, lei a nghet si lo, tlang a awih si, ruah bawhawk chu Mizoram leilungin a dawl lo a ni ber, chhiatrupna a lo thleng a, mite zawhna lian tak ni ta chu khawnge 17 June 2010-a State Disaster Response Force Mizoram CRI Sensawnga training chhuak kha? “Hetianga chhiatrupna a thlen hian sawrkar hian mitthi, hliam leh chenna in chhia zangnadawmna eng nge a kalpui thin?” tihte chu zawhna a ni.

India rama State Disaster Management Response Force(SDMRF) din hmasa ber leh training pe hmasa ber hian chhiatrupna a lo thlenin heng Force-te hman dan leh hmanraw neih turte a la rel fel chiah lo.

“Hmanni khan sawi a ni tawh a, 13th Finance Commission sum tum tur an ni a, Force hmanrua hi kan pek tur a ni a, a dilnate kan ziak leh mek,” tiin V. Sapchhunga, Director, Disaster Management & Rehabilitaion (DM&R) chuan Evening Post a hrilh.

Tunah hian 12th Finance Commission la hman mek a ni a, kumin atang hian 13th Finance Commission hman tan tur a ni.

“Thil awlai a ni lo a, sawkar hian tihpuitlin ngei chu a tum dawn a ni awm e,” Director chuan a ti.

Nizana Aizawl hmun hrang hranga chhiatna thlengah pawh SDMRF chu veng mite’n an beisei tawh hle. Mahse a hman dan tur rel fel a la ni chiah si lo.

“Mihring hman tlak tul zual company 4(mi 400) zirtir tur an ni a, mi 50 Mizoram Police 1st & 2nd MAP atangin mi 25 ve ve zirtir an ni tawh,” V. Sapchhunga chuan a ti.

Chhiatrupna a lo thlen hian District tina thuneihna kengkawh bertu chu Deputy Commissioner (DC) an ni tih thu dawn a ni a, anni hian chhanchhuahna hmanruate pawh an kutah dahin tanpuina sem chungchangah pawh a hmalatu ber an ni.

DM&R lam hi chuan pawisa leh chhanchhuahna hmanrua an neih ang angte DC hnenah an hlan a, DC hian a sum peka leh chhiatrupna thlen endik thlengin an lo kapui ta niin thudawn a ni.

Sawrkar laipui atanga sum dawn leh dan behchhanin chhiatrupna (natural calamities) avanga nunna chante hian DC-ah report-in DC hian certificate a lo pe ang a, ralna Rs 1,00,000/- an pe thin.

Natural calamity vanga thi ngei a ni tih finfiahna DC certificate a ngai tih hi niminpiah lawka order chhuah thar a ni a, thil thar a ni.

In chhia pawh hi tanpuina pek theih an ni.
“Relief tih chauh a nih avangin a tam thei lo a, 13th Finance Commission sum kan hman hunah notification chhuahin sum pawh a tam dawn,” V. Sapchhunga chuan a ti bawk.

India danah chuan building chhia chu ‘authorized construction’ tih kher a ni. Chu chu Town & Country Planning emaw, ADA-in phalna a pek bikte tan chauh ‘relief’ pek theih danin a ti. Mahse hei hi Mizoramah chuan kalpui a harsat avangin ‘inhriatthiamna’ in kalpui a ni.

“Tuna building pangngai kan tih angah hian a chhia tanpuina cheng 3,500 thleng pek theih a ni,” thudawnnain a ti.

Hliam bikah hian kar khat damdawiina enkawl chuan medical certificate nen cheng 7,500-a thleng tanpuina an dawng thei.

Khing tanpuinate hi sawrkar laipui atanga State Disaster Management & Rehabilitation, Mizoram hnena sum rawn kal, DC hnena sem tura pekchhuah atanga pek thin a ni.

Similar Posts:

• Aizawl-Lunglei Sumo Accident ah 2 thi
• Ruahsur vangin chhiatna thleng leh!
• A nupui zaihlumtu mipuiin an chilhlum
• School 2-ah mi pakhat a thawk kawp?
• Krismass bawng ser ru

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Thursday, July 29th, 2010 at 3:00 pm and is filed under Mizoram, News. You can follow any responses to this entry through the RSS 2.0 feed. You can leave a response, or trackback from your own site.