Hausakna : Sum leh pai leh larna hi hausakna/hlawkna a ni a, hlimna a pe che a ni. Miin an hriat hle che chuan i lo inchhuang a, mi tak takah ilo inngai thin a, a chhan chu tumah i nih loh vang a ni. A nihna takah chuan engmah a lo ni si lo. Rilru hausakna pawh a ni si lo, rilru tak tak a i lo hausak chuan tuma hriat pawh ni lo mah la i lung a awi tho ang.
Lar i duhna te, mi hmelhriat nih i duhna te hi i retheih vang a lo ni. Chhungril taka hausakna chuan mite hriat lem loh, mi pakhat nih ve ringawt pawh hian lungawina a pe thin. Lar duh mi chuan mite tel lo va thil tih te, mite hriat lova midang tana thil tha tih te hi an hlau a, mite fakna leh ngaihdanin an inti lian thin.
Mahni tawka hausa chuan mite fakna an mamawh lo a, mite hriattur kherin thil tha an ti lo. I hnathawhnaah, office kalnaah, Kuhva pahnih/khat an rawn ken avang mai emaw, thingpui an koh sak che vang mai emaw a biak i nawmphah chuan … i va han pachhe tak em! Sum ngah hle mah la hausa an ti thei lo ang che.
Politics : Politics diklo hrilhfiahna pakhat chuan “Politics hi mi tlemtein ro an rel theihna tura mi tam tak buaina” a ti a, a dik hle lo maw? Politics-ah hian mahni mimal hamthatna tur a chhawr ve phak mang lo turte hi a buai buai leh meikawh a tang huai huai an ni duh khawp mai. Politics dikah chuan mimal hlawkna leh hamthatna lam niloin ram tana hmasawnna, hausakna a ni. Ram a lo hmasawn a, a lo hausak chuan a mi chengte tan sum leh pai thawhchhuah a lo awlsam a, hnathawh man a awm avangin mi in taima takin mahni hna an thawk a, an dinhmun te a lo changkang mai thin. Kut tlingloa sum lakluh chu an ngainep a, an thawkrim a, an nun a lo changkang thin. Sawrkar a lo pian pawhin party sawrkar ni lovin mipui sawrkar a ni thin. Party inthliarna a awm lo.
Lal Bahadur Shastri – Vawikhat chu Lal Bahadur Shastri hian a sikul chawlh laiin sakhaw hmunpui a tlawh ve a, chu hmunah chuan atlawhtu apiangin cement bangah an hming an ziak thin a, chuta hming lang chu inchhuan nan an hmang thin. Ani pawh chuan a hming chu a han ziak ve ngei a, a zan mut dawn chuan a han ngaihtuah nawn leh a, cement bang leh lehkhabu-ah te a hming chu lang uai uai thin mahse, engtikah emaw chuan ala reh ang a, a thih hnuah a hming ala dai dawn a ni tih a ngaihtuah chhuak a, a muhil thei ta reng reng lo mai a, a hming banga inziak chu ava thaichhia a, mite tan thil tha tiin an thinlungah a hming lantir/ziak turin chhia a chham ta a ni.
He pa hi India ram zalenna sualtute zingah milar tak a nih bakah India ram Prime Minister hial a ni a sin. India Prime Minister a nih laiin a boral a, a thih chuan a nupui leh fanaute chuan hawnna tur in leh lo pawh an nei miahlo a, sawrkarin a ngaihtuah sak ringawt nia mawle. Ram leh midangte tan a nun leh hun hlu zawng zawng a hmang ral a, an chhungkaw tan engmah a lo khawl lo a nih chu. Tunlaia kan Zoram politician te nen chuan an in ang lo hle mai. Bahadura chet dan hi Thlarau Thianghlim harhnain a nuai nawn awn awn kan Zoram-a Kristian-te chet dan tur ni zawk awm tak a ni? Mahse amah hi ringtu kan tih ang hi chu a ni miah lo, kan sawi danah chuan ringlo mi kan tih ang hi a ni.
Kan ram politics(…cians) : Mizoram-ah chuan ram hmasawnna dah lal ber lem lo, ram thatna tur aia mahni pumpui hnawh puar hmasak phawt tum politicians leh a chekkawi an tam lutuk hi kan thanmawhbawk dik tak a ni. Mahnin hrawkhrui hrai tlai hmasak tum rana ram politics luhchilh tuten min kiansan hma hi chuan Pathian zawnchhuah ram inti Zoram hian eng ang thlarau harhna pawh dawng kur ngei nguai mahila eng kan ang chuang lovang. A lu ber atanga dai kil kar ber thlenga politics tuipui tuten anmahni hlawkna tur zawnga an tha leh zung an han seng hmasa phawt han hmuh hian Politics hi enge a nih a, engnge a awmzia tih pawh min theihnghilh tir zo dawn tak ngialin ka hria !!!.
Similar Posts:
- Mizo te kan la hniam hle
- Pu Zawma’n UPA a thlawp tur a ni
- Zolitics
- Engtin nge ni dawn le?
- Ram hruaitu te ka khawngaih
July 29th, 2010 at 11:20 am
… a dik chiah
Report this comment
July 29th, 2010 at 11:30 am
lzboikhar nawmsam loh chu kan tan hlawkna a lo nih hi, post & comment lamah tan a lak theih phah a :lol:
Report this comment
July 29th, 2010 at 11:42 am
Ram hruaitu te chauh kan ni lo AAY te thleng hian diklohna/duham chuan zung a kaihthuk khawp mai…Vankhaúm ang vel kan ni awm a sin..Mifel panga tal anla awm ve a niang..!!
Report this comment
July 29th, 2010 at 12:04 pm
Ngaih nawm hle maia…tha hle bawk.
Report this comment
July 29th, 2010 at 12:09 pm
Khaih..i tawngring lutuk..politician ten an hria anga..hmun kilkhawr deuhah an san mai ang che tih a hlauhawm e..lol
Report this comment
July 29th, 2010 at 12:27 pm
He thu ka chhiar hnuah kan kristian politician ten ringlo mi politician tluk løh an nei nasa tih ka hre chhuak uai uai mai…A pamhmai lua e.
Report this comment
July 29th, 2010 at 12:30 pm
kan ram hian Finna pathian atranga chhuak kan mamawh ber…
Report this comment
July 29th, 2010 at 12:34 pm
Kan politician te ho, Bahadur-a ang a ram tan thawh chu nahi, politcs chawlhsan hnu a haw na tur neih loh te chu kaha a ni ringawt. A eiru thei apiang hi Pathian hian mal a sawm a mawni tih mai tur leh nghal (Pathian in min ngaidam se)
Report this comment
July 29th, 2010 at 12:48 pm
Tumah midik reng an awm lo,pakhat te mah an awm lo
Report this comment
July 29th, 2010 at 12:53 pm
#3.. “Ram hruaitu te chauh kan ni lo” ka tawmopui khawp mai che…. NREGS ah te hian harsa ve te te pawh hian hnathawka ni 10 hlawh lak aiin, thawk lo a ni 2 hlawh lak duh zawk hi an tam teh a nia.
Lal Isuan engtin ngai ang maw?
Report this comment
July 29th, 2010 at 1:23 pm
he post chu ava tha angreng ve
Report this comment
July 29th, 2010 at 1:43 pm
Human resource kan neih ang ang hmang tangkai thei lova kan awm hi ka rilru taka ka vei ve chu a ni. Sawrkar dik leh tha, chak tak nei ila chuan, tun aia nasa theuh hian hna kan thawk anga, rilru kan seng tlang ngei ang. Tunah chuan kan theihna zawng zawng hi kan seng lova, seng thei dinhmunah pawh hian kan ding meuh lo a ni.
Report this comment
July 29th, 2010 at 1:44 pm
lzboikhar @ mi rethei ka lo va ni tehlul em!!
Report this comment
July 29th, 2010 at 2:20 pm
Mizoram ah hian Kristianna kan hmangsual nasa tawh em em ani. Kristianna zara hmang that, hmingthan, Kohhran zara politican hnaih/contract/job hmuh, Kristianna hmanga nupui/pasal tha hmuh. Vote thlak peih chhun lah hian Congress leh MNF chiah kum 1984 atangin an vote tling duh. Kristian dodaltu tak rawn lal sela, Mizoram hian Kristian 100,000 pawh kan awm ngun tak ang emaw.
Report this comment
July 29th, 2010 at 2:23 pm
mi rethei tak ka lo ni e,mahse ka’n ti teh ang he’ng hmingthat duhna te hi chu mihring zia ve reng ani lo ami le aw!
Report this comment
July 29th, 2010 at 3:25 pm
Shastri-a thusawi ropui, “Jai Jawan, Jai Kissan.”
Sikul a kal laiin, lui kan a ngai ziah thin a. Ferry-a chuanna tur pawisa a nei ve zo si lo. A kawr phelhin, a lehkhabu a fun khawm a, a chhipchhuan a. Lui chu a hleuh kai ni tin thin.
Hlawhtling tlak a ni. Buai kum kan tih, 1966 khan a thi ta a nih kha!
Report this comment
July 29th, 2010 at 5:06 pm
tha hle mai… comment no. 14 in Kristianna kan hmangsual nasa a tih hi dik ka tih zawng tak a ni
Report this comment
July 29th, 2010 at 5:09 pm
Chik vakloh pawhin a dik khawp mai..
Report this comment
July 29th, 2010 at 5:23 pm
@muantea … ding chunga han nawmsam loh meuh chuan a lo sual (misual) theih ngei mai, post tha tak tak karah pawh ka insit peih ta bik lo a nih hi … tih tur a awm lo em a ni…sermon tha deuh deuh ziah ka tum a, pawlna ka dawng ka dawng ta miah si lo va … a thu a sepsel hlawm ta khawp mai.. haha
Report this comment
July 29th, 2010 at 8:25 pm
Tha hle mai.
Mizoram ah chuan kum 2 minister an nih dek 2 chuan PACCA BUILDING LIAN TAK AN NEI hman zel
Report this comment
July 30th, 2010 at 4:20 am
Ka lo chik chhin a, dik ka ti khawp mai.
Report this comment