Kum 14 ka tlin hma khan vawi 14 ai tam min vua niin ka hria, khatih lai khan ka hua che a, min hua niin ka hre bawk thin. Matric ka pass hnuah college ka chuangkai ve a, post matric scholarship (tribal) dil ve ka tum tuma parent signature pekna tura min sign sak duhloh kha ka theihnghilh thei ngai lo. Dil thei chin tur hlawh bi tuk i en a, hei hi ka hlawh a ni lo, he scholarship dil tur zinga mi hi i ni lo i tih khan mawl ka ti che a.
“A dawng thei tur hlawhbi an sawi zat ang hi hlawh ta ila, nangin i college kal chhung zawng scholarship hmu ta thung la, i lawm a ngem … he sum tlemte avang hian kan mihring zahawmna hi kan hloh thei asin, dikna leh rinawmna tluka mihring zahawmna pe theitu hi a awm hleinem” i ti chung chung khan college ka kal chhung zawng ka thianten scholarship an lak apiangin ka huatna che a zual thin.
Nikhua ka lo hre chho ve zel a, office-a i officer puite leh i thawhpui thenkhatten MAWL tia i chungchang thu an sawi thin thu ka hre leh a … a chhan nia ka hriat ber pawh i hlawh bak sum itna chang i hre ve lo te, a tha thei ang bera hotute thu anga hna i thawh rumrut thin vangte kha a ni a, ka zahpui thin che.
Sawrkar office building sak pakhat i enkawl tuma i hman bang zawng zawng i thehluh (return) tum phei kha chuan sawi hat khawpa mawl nih i hlawh a, ka lo zak ngawih ngawih. I staff-ten i chungchang thu an sawi ka hre leh a, ‘kan pu ang hlir hi kan rama officer-te hi ni se la chuan …’ ti chung chunga ‘hna siam a thiam si a, a ninawm’ an tih thin che ka hria a. A staff ten an nin em em kha ka pa a ni tih ka ngaihtuahin ka zak ngawih ngawih.
Gazetted officer ve pui si, hmunphiah, chem leh iptepui nena tuktin deuh thaw mai vengchhung kawng ti fai tura i chhuah te hian miin an nuih che ka hlau thin. I la hriat reng ka ring a, kum 10 chuang a liam ta in ka hria Mizoram-a Poltical Party lian tak pakhatin zanlai dar 12 pelh tawhah an party candidate a tana an sawm tum che a i lo hnawl kha … hmalam hun dream chungin rawn chhan sak mai che kha ka duh zawk hial. A chhan i sawi ‘kan ram politics kalphung leh ka mizia hi a inrem thei ngai lovang, politics-a lal duhna ai chuan ka mizia vawnnun tlat hi ka duh zawk’ i tih khan mawl ka ti lutuk che.
Ka hriatthiam theih ngai loh bawk chu kan Kohhran Pathian ram thawhlawm report-a a sang ber pangana (5) chunglamah kan awm deuh reng chung hian kan aia thawh tlem tam takte aiin kan hausa zawk chuang silo. Gazetted officer family ve lem thla tawpa indaih ngawr ngawr mai leh duh leh awh ngawih ngawih pawh kan neih theih ngailoh thin te kha ka hrethiam thei ngai lo. Assam type in hlui ve taka chen a, water filter thar kan han neih ve ringawt pawh chhungkaw lawmna a tlin ziate kha ka ngaihtuah a, ka rualawt lutuk hian officer rau rau-ah i hniam bik niin ka hre thin.
Mahse ka pa, a lo ni lo, tunlai khawvel intlaksiaknaah hian MAWL tih hlawh mahla, i fate, i chhungkua leh Pathian i hmangaihzia ka ngaihtuah erawh hi chuan MAWL tia sawi tur i ni si lo. Mi pangngai pha thei tawh lo tur nia inngai khawpa ka nat tuma ka hnena i thusawi khan tunge i nih tih min hriatchhuah tir a. Ka pa, Mahatma Gandhi ai pawhin ka tan chuan i lo ropui zawk si, Isua hi Pathian/fapa, min chhandamtu chu ni lo se la chu, a ai pawh hian ka tan chuan i ropui zawk ngei ang. “Mihring hausakna hlu ber chu lungawina hi a ni a, Pathian avanga lungawina tluka hausakna hi he khawvelah hian a lo awm lo, chu HAUSAKNA chu khawvel duhamna, itna leh awhna khawvela tlan mekte hian an nei ngai hleinem …. eng dinhmunah pawh ding la … dikna leh rinawmna i neih chhung chu tuman rilru takin an hmusit ngailo ang che” ti a min hnem tum khan “ka sim ang ti rawh” i tih thin lai pawha ti duh ngailo khan ka mittui hi ka dang thei ngang lo a ni.
I chanchin i sawi tuma … rambuai laia sipai puak phura i tan thin thute, i high school kallaia Serkawn High School-a i farnu-in i hostel fee ai tur buhfai a rawn phurh thin thu i sawi te. Inhlawhfa chawpa Shillong leh Guwahati-a MA distinction-a i pass thu ka hnena i sawi laite khan ka chhuang che a, mi thleng sil leh mi chhuat nawta inhlawh chunga i zirna tur i hlawh chhuah thin thu i sawi lai erawh kha chuan ka beng hi lo hup ping tlat ka chak, ka ngaithla ngam lo. Kum 30 vel chauh a la liam, rammbuai laia engmah neih nei lo leh nghaisak i tuarte, retheih tih piahlama i nun i hman thinte ka ngaihtuah a, he kum 30 vel mai chhung chauha Mizoram Sawrkar-a Gazetted Officer ni thei khawpa i survive dante ka thlir let chang hian ka tan chuan Abraham Lincoln-a aiin i ropui zawk.
Ka pa, thu tam tak min hrilh thin a, mahse i thu min hrilh thin zawng zawng aite hian i nun ka hmuh hian ka nunah thu a sawi nasa zawk a sin. Inkhawm i peih tehreng nen i lam lai ka la hmu lova, i hallelui lai hmuh phei chu ka inbeisei lo tawp, mahse, Pathian thu i hriat ang ang hi a takin i zawm tih ka hre ringawt lo va, atakin ka hmu a ni. Concrete Building ka awh ve lutuk avanga kan chenna Rangva In hlui ve tak ka lo zahpui thin zawng zawngte kha min ngaidam ang che. Tunah chuan he Assam Type in hlui tak hian dikna leh rinawmna hi a la nung a ni tih min hmuh chian tir tawh a; he rangva in chhungah hian dikna leh rinawmna vuan tlattuin ro a rel a ni tih ka hmuh chian hnu hian ka zahpui leh tawh ngai lo, ka tan chuan Buckingham Palace ai pawhin a ropui zawk a sin. Tunah hian ka tluk lo che tih ka chiang a, chhungkua ka din ve hunah i chhungkaw din ang hi ka din ve thei lo a nih chuan chatuanin ka tluk dawn lo che tihna a ni ang.
I fapa
(Damlaia inchawimawi ngam silo, thih hnu chauha inchawimawi kan ching tiin he lehkha hi ka ziak a, mahse a lo har a nih hi, draft bak chu hma ka sawn thei lo. Mihring nih phungah a upa zawk zawk chatuan hmun pan hmasak a ni zel dawn a nih chuan Pa hun ruatah he lehkha hi ka la chhiar chhuak leh khawp ang)
Similar Posts:
- Intodelh Nan – Rinawmna Leh Dikna
- Mizo kungah Mizo nun a rah tur a ni
- Moral Reform Pawl
- Overseas Scholarship House-ah sawifiah
- Rinawmna
August 15th, 2010 at 10:33 am
Ka rawn lut leh zawk, chhiar phawt ang.. nakinah ka rawn comment ang!
Hetiang ang article hi keini ang tan hian a hlu zual bik tlat!
Report this comment
August 15th, 2010 at 10:36 am
I pa chu a fair hle mai. Ka ngaisang bawn tawp
Report this comment
August 15th, 2010 at 10:42 am
A va tha tehlul em…han tuihnih tluar2 phawt mai teh u…Nakinah ka rawn puakkeh ve chauh ang e.
Report this comment
August 15th, 2010 at 10:48 am
A va tha in a va ngaihnawm ve. Hetianga mahni pa te fak ngam hi a tha, an dik tawk ah ka ngai mai.
Report this comment
August 15th, 2010 at 11:41 am
A tha hle mai… eirukna hi chu do chatuan tur
Report this comment
August 15th, 2010 at 12:01 pm
Ziak tha hle mai. Kan officer te leh ram hruaitute hi I pa ang vek hi ni sela a duhawm hle mai. Ka mi ngaihsan zawng tak ani.
Report this comment
August 15th, 2010 at 12:05 pm
A ropui hle mai
Report this comment
August 15th, 2010 at 12:05 pm
A van ropui tehlul em Pa te enkawltu innei hi lawm rawh u…..kei zawng ka pa chu a la dam mahse ka tan chuan mithi a ni si……
Report this comment
August 15th, 2010 at 12:09 pm
#8 Lonelyboy, enge i thil sawi awmzia tak hi aw!! A sawi mai chi em?
Ka pa min hmangaihna hi chu ka la rul let ve khawp ang.
Report this comment
August 15th, 2010 at 12:20 pm
Ka chhiar chhuak, ka hnuk a ulh, ka tap tep, a tha ka ti lutuk tlat!
Report this comment
August 15th, 2010 at 12:55 pm
Muangchang a chhiar atana ka lo khek chu ka va lawm em… A hun laia kan thil tawn hi, a bik takin kan nu leh pa te atangin, kan duh dan a nih loh hian kan vui thin. Mahse a hnuah chuan min siamthatu an lo ni leh fo zawk thin, tih i rawn hailang chiang hle mai…
Report this comment
August 15th, 2010 at 1:05 pm
India Danpui Art 46: Promotion of educational and economic interests of Scheduled Castes, Scheduled Tribes and other weaker sections.—The State shall promote with special care the educational and economic interests of the weaker sections of the people, and, in particular, of the Scheduled Castes and the Scheduled Tribes, and shall protect them from social injustice and all forms of exploitation. hmanga hetiang scho hi pek kan ni a. Tribal community anga recognition pek kan nih avangin hetiang scho hi dil hreh reng rengloh tur a ni.
Supreme Court pawhin creamy layer chin a bithliah fel theihloh laia a dil thei chin tur ST & Sc te tana income ceiling lo siam hi a tul lemlo ka ti khawp mai.
Report this comment
August 15th, 2010 at 3:08 pm
I ziak tha khawp mai!
“Tunah hian ka tluk lo che tih ka chiang a, chhungkua ka din ve hunah i chhungkaw din ang hi ka din ve thei lo a nih chuan chatuanin ka tluk dawn lo che tihna a ni ang.”
Chhungkua, i pa din ang lo din thei ta teh reng pawh ni la, i fapain i chhungkaw din ang a din ve angem? I fapa chuan Pathian zarah lo din ve leh se, i Pa tan chuan a tupa ani dawn a…….chutiang zelin chatuan thlengin.
I sawi tawh ang khian “Pa te hi zawng tluk rual an lo ni lo e”
Report this comment
August 15th, 2010 at 3:31 pm
Hnukulh teuhva ka chhiar chu!
Vawiin hi ka Pa duhtak a lei taksa kan thlah liamna champha vawi 3-na a ni reng mai! lzboikhar ziak ang hian ka ziak ve thiam lo, damlai chawimawina nimahse ka Pa tan ka lo hlan ve ngawih ngawih e.
A thuziak hrulah tihian ka han ziak ve leh si teh ang. Revenue deptt a council hunlai atanga thawk thin a ni. Mi thenkhatin ram invalh tura an sawm laiin ‘ka chenna tur in ka nei a tawk e’ a ti, tunthlengin ram tha kan nei ta lo. Mahse ka ngaihsanna a tizual. Tripura, Manipur leh Shillong ah a zir thin, @lzboikhar-in a pa lehkhazir lai a sawi ang khi ka Pa tawn ve thin a ni. Vai rama ka zir ve laiin a tawn ang ka tawn ve loh nan theihtawp a chhuah thin.
Miin kan kawngkhar an rawn kik a ‘Ka Pu..’ an rawn tihin ka Pa kha an kohna a ni thin. Tunah erawh keimah hi ‘Ka Pu..’ an tih chu ka lo ni ta reng mai!
Mahse ka vui lo, Pathianin ka Pa hi ka hriat chin leh hriat hma kum 76 zet min lo pe a, hei aia rei lo pa nei hi an tam em! Pathianin min compensate na pawh ka hmu nasa khawp mai. A ni hian khitah min lo nghaka, nakinah kan inhmu leh ang.
Report this comment
August 15th, 2010 at 3:44 pm
in va vannei tak em!!!! pa ngaih tur te inla nei alomle..keichu ka pa ka hmu hman hleinem!!! mahse k mittui chu a titla….ka nu min ti hrechhuak!! aizawla kan pem tirh hian taxi 1 ah kan nufa in kan bungrua zawng2 nen kan leng vek!! class 7 ka ni ve toh a open ah kalin pawl sawm a zir nawn leh a…ka ute nen pawl sawm an pass ho te kha!! kan va inhmu khat thin tak zingah a class a a lo ban chuan kei sikul turin k chhuak toh thin si a, zanah khan kan inhmu tawk thin kha ania……eeee..k sawi thui ltk chuan k tap mai dawn!!!
Report this comment
August 15th, 2010 at 3:48 pm
@muante-a … i pa boral chamah hian i rilru ka tawmpui pahlo che tih hrereng chungin tawrhpuina ka hlan a che. I pa taksa chu awm tawh mahse a la nung dawn chauh a sin…
In sawi belh takah chuan … fair-ah hian over mah mah mai thei
tumkhat chu tuna kan inhmun, kan ram neih chhun ar hmai tiat lek ka pa’n a lei dawn khan a pass a lo la awm hauh lo mai a, ka pa chuan a pass sak thlap a, tichuan a man an chhiar ang thlapin a lei nia mawle ….
Report this comment
August 15th, 2010 at 3:49 pm
#15 ..@ma-i , i nu chu ka ngaisang hle mai
Report this comment
August 15th, 2010 at 3:55 pm
lzboikhar, Mi dikten nuihsawh an hlawh zauh zauhna ramah hian ka Pa leh i pa ang mihring hi chhuang hlei thei lo dinhmunah pawh ding mah ila ka chhuang zel tho vang.
Tlangval zek zawk laiin Zirtirtu hna ka hmu a. Jeans/T-Shirt/sneaker ilo vel ka uar ve bawk si. Chutianga incheia a ni hmasa ber atana school ka kal tur chu min ko let a, Kamis leh smart pant min haktir leh ngat. A phal lo, ka chhunzawm ta zel a, ka inchhir lo khawp mai. A hlawh lak zat min hrilh vek a, tumkhat phei chu min chhiartir hial. Chumi mila nung tur chuan min ti, mahse..khatih lai kha chuan hriat thiam loh leh zauh chang ka nei thin. Mahse a lo dik.
Report this comment
August 15th, 2010 at 3:57 pm
ma-i, i ne pawh kan ek pha lo a nih hi!! I nuin hetiang thleng thei tura a enkawlna che u chu a va ngaihsanawm ve!! Thin loh chibai ka buk e.
Report this comment
August 15th, 2010 at 4:02 pm
#18 @ muante-a … ka ngaithla ngam tawh lo a ni ber !!
Keia thu leh hla ve tehlul hian tu tuihnih mah a hlawh ka rin loh teh lul nen … in va han tha tliar tliar tak em
Report this comment
August 15th, 2010 at 4:07 pm
lzboikhar, a ngaihnawm kher mai, i pa ang mi rinawm awm leh dikna ngaina hi Mizo zingah hian an tam lo ngawt ang, he tiang mi pa i nei hi ka lawmpui che.
Report this comment
August 15th, 2010 at 4:10 pm
@ Muantea leh lzboikhar…..in ti lomom e, keipoh in pate veve ka ngaisang khop mai……
Report this comment
August 15th, 2010 at 4:12 pm
@post tupa, i pa nuih tute i ziak langsar mai2 a. I pa ngaisangtu leh a ruka ‘midik ani’ titute hi an tam zawk ngei ang ka ring tlat. A staff te ho te khian a ruk chuan an ngaihsan hi ka ring ani. Mi dik, i pa hi ka fak hle mai.
Report this comment
August 15th, 2010 at 4:13 pm
@As_Khiangte … kan ramah hian dikna leh rinawmna vuan tlattu … baal hmaa thingthi ngailo hi an la tamin ka hria, chu chuan kan ram leh hnam tana beiseina thar hi min siamsak leh thin … ka lawm e
Report this comment
August 15th, 2010 at 4:27 pm
@lalmisualpa he lei ah hian ka pa chu a la dam a lawm mahse mithi ang mai a ni chawimawi tur pa ka nei ve lo
Report this comment
August 15th, 2010 at 4:29 pm
@lalmisualpa he lei ah hian ka pa chu a la dam a lawm mahse mithi ang mai a ni a chhan maw ka piantirh a ta tun thleng hian kan la in hmu tlem khawp mai
Report this comment
August 15th, 2010 at 4:29 pm
#24 boikhar, A dik! Duhthawh lùatah kan han insel chiam thin tak na-a, mahni hnaa dik leh rinawm tak2 hi kan la kuh tul a sin! Paws a tha bawk a nia’ng, komen ho reng a ropui tlang e! Hei hi a ni– Mi(sual).com ka lohriat thin leh tha ka tih em em thin ngei kha…
Report this comment
August 15th, 2010 at 4:45 pm
#27 Kawlhawk … ka tan chuan chawimawina ropui tak a ni e.
Kan ramah hian dikna leh rinawmna hi rahbehin a la awm lo niin ka hria a, hlemhletna thawm lo ri ring zawk thin hian mipuite hnenah rinhlelhna min pe thin niin ka hre thin !!
Confucius-a’n ram rorelnaah chuan ‘mipuiten sawrkara rinna an nghah ngam tawhloh hi a hlauhawm ber’ tia a lo sawi ang khan … hlemhletna thawm ri ring zawk hian kan rinna leh beiseina a thiat zo tawh a, dikna leh rinawmna vuantute chanchin hi ring takin tlangaupui thiam ila chuan mipuite hnenah a tha zawnga thu a sawi ka ring tlat thin.
Report this comment
August 15th, 2010 at 5:17 pm
lzboikhai, i pa chu a va ropui ve, i ziak chhuak thiam ka ti bawk. Pa te hi cu a tluk theih tak tak loh an tia, mahse dikna leh rinawmna hi chu a lo tlo a ni.
Report this comment
August 15th, 2010 at 7:40 pm
Ngaihtuah ati thui hle mai;pate min hmangaihna kan hriatthiam tak tak hun chu fate kan neih hunah ani chauh mai.
Kan Zoram khawvel hi chhe lailet der leh Corruption bu khuarna hmunpui anga sawi kan chin lai hian,mitha leh tam zawkte thil tih that hi thupin a awmfo,hei hi kan media te leh mipuite thiam loh ani pakhatve bawk.
Report this comment
August 15th, 2010 at 8:39 pm
@lzboikhar: I pa a ngaihsanawm e.. Tin, ka lawmpui bawk a che. Heng ang mite hi a ni Mizoram hruaitu tur atana kan duh/zawn chu ni..
I ziak ngaihnawm thiam bawk e. Nang pawh Sial rangin Sial rang a hrin chuan.. ngaihsanawm tak i nih ka ring.
Report this comment
August 15th, 2010 at 9:29 pm
@Zephenath … a chang chuan a budelh te pawh a hring ve tlat thin nia
Report this comment
August 16th, 2010 at 3:01 pm
College kal laia ‘scho’ lak kha chu a nuam ve thei khawp mai, sawrkar dan(tehfung) atanga chhut lahin kan tling chiang nasa mai si a.
Report this comment
August 17th, 2010 at 12:02 am
ka thian ka va in ang veee… ka pa hi gazzeted officer a ni a ka naupang lai in a pen office atang a a dawn hi ka dil a min pe phal lo a, chuan kei chuan ka ti bo ti la ka ti a a ni min chhan dan chu ‘ka ti bo ka tih a pen thar office atang a ka lak chuan eiru ka ni a nga sin’ min tih khum a …… a post a that avang in mi in cantract hna te supply tur te an rawn pe tawp thin a mahse pakhat mah a thawk ngai lo a hnar zel….. tun ah a fa 4 te zing ah GO level 3 kan awm a GO lo pawh pastor a ni ….. Lalpan a mi te a malsawm thin… he thu ziak tu hi ka an pui a ni e a ziah zawng zawng hi kei pawn ka tawng vek… ka pa hi MAWL an ti thin a chhan chu a ei ruk ve duh loh a vang in… party pakhat hian MLA a in cnadidate tur in an rawn sawm a pawisa kan nei lo ka pa hian a ti a.. pawisa chu kan pe ang che chuan motor pawh ka pe ang che an ti a mahse a duh lo… a tir chuan ka ui a mahse tun ah chuan ka lawm
Report this comment
August 17th, 2010 at 4:20 pm
he post hi thra ka ti ltk a, ka comment ve chuan a hlutna ka tidal palh ang ti hlau vin ka comment ngam lova.. ka dinhmun pui anlo tam ve ka hmuh hian nuam ka ti!! scholarship han lak ve te hi chu chakom trin alom..maseh Pathianin a aia nasa a min malsawmna hi ka thlang jok feee
Report this comment
August 17th, 2010 at 5:42 pm
@Jewel … lawmawm e, lukhawng nei miah lo pawh nise dikna leh rinawmna hi amah chauh pawhin malsawmna a tling pha hrim hrim tawhin ka hria.
Report this comment
May 23rd, 2011 at 7:50 pm
I pa ang hi Zoram fa chuam te an nia sin. I pa hlutzia hmuchiang theia i awm pawh hi i fakawm khawp mai. Good post.
Report this comment
March 1st, 2012 at 8:14 pm
Post tha lutuk… Rilru a hneh khawp mai. Ka Pa min ngaihsan zual tir sauh a, a hlutna min hriatchhuah tir nasa ngei mai. I Pa ang em hi Pa nei ve lo mah ila, i Pa nun ang hi chu entawntlak ka ti thlawt a, ka ngaisang khawp mai. Ka phak tawkin entawn ka tum anga, ka rilru ah ka vawng reng ang.
Report this comment