Mangang leh lungngai tâwpa ka awma min thlamuantu, chanchhe ber leh khawvêl êng kîl ngam lo tur khawpa zahna nasa ka tawh chânga ka bula awma, hmangaih tlâk loh khawpa inngaihna rilru pu hial khawpa suala ka tlûk chânga min theihnghilh lotu, ka nu hi chu a hlu thláwt a ni. Mite anga khawilo kal dâwna chêng tam min hûm chhuahtîr thei ni mah suh se, a hmangaihna tawngkam kha a hlu a, suma lei theih a ni lo. Nu sàr veh vawh leh duh duh thawka ti thei ni lo mah se, amaha beiseina leh rinna awm chuan a tichak a, chu chu a a faten paw’n kan lo chhim thîn.
Thiamna lamah chhuan tur engmah nei lo mah se, a thilthlâwnpêk zozai kha tu nu dang mahin min pe thei lo va, min hmangaih anga tu dang mah a hmangaih thei lo hi vânnei ka intihna ber a ni. Eng emaw chângin thinrimin han titau ve thîn mah ila, nêm leh zaidam takin min thawidam a tum thîn a; a bulah chuan vânduaina lo thlengte pawh hi a nuam bîk hliah hliah a, mal taka ka awm a phal ngai lo.
Khawvêl sualna tam tak leh hmêl hrang hranga inlana mi bum tum thîntu laka ka fihlîm theih nan a theih chin chinah a âng chhûng nuamah min chêntîr a, ka tawrh ai pawhin a tuar mai thîn. Chu a hnathawh ropui tak chu a hlawhchham hauh lo va. A hlawhtlinna chu keiman ka têl mêk a ni.
Ka thiltihah hlawhchhama ka awm chângin kei ai mahin hrehawm a lo ti thîn a, ka rilru ai mahin a rilru a lo na thîn. Chu’ngte avângin a bulah chuan naupang thar ta sawtin ka inhre thîn a, chuta tang chuan a hlutzia chu ka hre chhuak uai uai a. Ka chhût a, ka chhût nawn leh thîn a, ka hlawhchham a ni; tunge nu hmangaihna hlutzia chhût chhuak zo ang le? Taimâkna leh tumruhnain min kaihruai a, chhelna leh dawhtheihnain min enkawl seilian bawk a. Ka awmdân tura tha tam tak min hrilh mah se, a chêtdân leh awmdânin thil tam tak min zirtîr zâwk a, amaha pârmawi chu keimahni-ah a lanchhuahtîr thîn. Chu chuan puitlinga ka kalna kawng a kawhhmuh a, ka inchhuihbah palhna lak atà min vêng tlat a ni.
Ka damlo va, a tlaivâr a; lungngai leh khawhar ngawih ngawiha ka awmin min thlamuan thîn. Thinlung ngui leh chauva ka awmin min kuangkuah thîn a, ka tahna mittui chu duat takin a hruhul thîn. Sual kawng ka zawh a phal ngai lo va, a tih theih tâwk tawngtaina hmangin min hnèm thîn. Hmangaih tâwp lovin min kuangkuah a, chutah chuan thlamuang takin ka tap thîn. Nu leh fa inkâra hmangaihna tluanghrui awm hi tu’n chhuchat zo tak maw aw..!
