mi(sual).com

In pakhat hi mi thenkhatin an luahza angah han ngai chhin la. A zatve chuan chu In chu Khual Buk angah an ngai a, a zatve dang chuan Tan In angah an ngai thung a. Khual Buk anga ngai te tan chuan hmun duhawm leh chenna nuam a ni hauh lovang a, Tan In anga ngaite tan erawh chuan beisei phak baka duhawm a ni thung ang. A tira hmun nuam lo ber mai, Tan In anga han ngaih ngawt kha chu a atthlak viau angin lang mah se, a tawpah chuan beisei phak loh nawmna thlentu a ni ta hlauh zawk a.

Hei vang chiah hian, he khawvela thil tha lam ngawt mai thlira tlante chuan a tawpah lungngaih leh manganna an tawk chawk a, he khawvel, hlimhlawp bawlna hmun anga thlir lem lote hi hlimna hian a nangching chawk thin. – CS Lewis, God in the Dock

Hun thawl hek hawk insiamin, he kan chenna khawvel hi i darthlalang hmaah hungin han bihchiang teh le. I mitte chuan tlai ni tla tur eng phut mai te chu duhthawh takin han thlir vang vang la. Chutah, i kete chu tuipui kam tiauvutah te chuan han chhir pil vel la; ngawirenga dingin, tuifawnin duat tak maia i ke a han chim hlap hlap lai te chuan eng dang mah ngaihtuah suh.

Anih loh vek leh, phengphehlep khawina huan te tlawhin, rawng mawi chitina Siamtu chei phengphehlep chi hrang sing chuang tak meuh te chu han bihchiang teh. Khawi lam lemziakthiam mahina an suangtuah phak ngai loh tur khawpa mawia duan, an taksa zang tak mai sep kang tura siam an thlate chu ngun takin bihchiang ang che. Heng zawng zawng siamtu Pathian rin mai hi thil harsa a nih lem lohzia chu i chiang uar uar mai ang.

Heti a nih lai mek hian, mawi chung chuang tak maia tlang kara pil ruai ruai thin Ni ngei mai hian Africa ram te chu hmun khawrovah chantirin, a leilung te pawh a chhun khi phawk phawk a, mi sang chuangin a sa lutuk tuar zo lovin an thihpui mek bawk si. Tuifawn mawi taka inchhawk nghulh nghulh te pawh thlipui na takin a han beng chuan, tiril timur sung sung khawpa sang rapthlaka inhlawm khawmin, tuipui kama khaw awmte a chim pil duai duai bawk si.

Mawi dangdai taka duan phengphehlepte pawn, nungcha dang nunrawng takte zanriah atana duan an nih miau avangin karhnih emaw awrh chauh te lenlai an chen a. He siamtu kutchhuak hi kan unaunu, bawkkhup thlawpa tlu, kaihthawh ngai chu a ni a, he kan chenna khawvel, Pathian thilsiam mawi tak tak mai phochhuahna pawh hi, tihchhiatin a awm mek si.

He khawvela mihring cheng thinte hi han ngaihtuah teh. Bach, Beethoven, Luther leh Goethe te seilenna ram ngei chuan Hitler, Einchmann leh Goering te pawh a lo hring tel ve thova. America ram ropui tak mai, mihring zalenna pawimawhzia hria a, Zalenna Lehkhazial (Bill of Rights) duangchhuaktute ngei chuan sal khawiin, Civil War hial an tawng a. Thilsiam zinga nunna nei pakhat kan nihna leh he mi pakhat kan nihna-ah hian keimahniah finna, remhriatna leh khawngaihna te kan pai a. Heti chung hian keimahni thovah hian chapona te, rinawmlohna te leh mahni ringawt mai inngaihsakna te hi a inphum tel tho bawk si.

Na kan tih pawh hi a bang bik lo. Ngun taka zirchiana bihchian chuan, na chu thil tangkai tak mai, kan thian rinawm a nihna chu kan hmu thiam a. Kan thil thlir kan tihzim lehzual a, taksa indinphung zirmite zirna te kan han enpui ngat phei chuan na hriattheihna chu Siamtu thilsiam ropui ber maite zinga pakhat a lo ni e kan ti thei hial a. Hriatna thazam, siamtu themthiamzia tarlangtu hian Rembrandt-a lemziak mawi tak ang maia ngaihsan leh fak hlawh tlak a ni.

Heti a nih mek lai hian, na kan tawrh chang hian ngunthluk taka a thatna lam ngaihtuah lovin mangangin kan rum zawk fova. Chhan mumal tha tak neia taksa peng te hi na thin a ni tih leh, taksa-a thil dik lo awm meka chu min rawn hrilh a ni tih te hi ngaihtuah thei thin ila chuan, na hrim hrim Pathianin a lo duan danah hian kan lungawi hliah hliah ta ve ang. Mahse, dakchhuakin han hawi vel ila, khawvel pumpui mai hi na tuara rum thawmin a khat a, kawtthlerah thisen a luang a, riltama pum dawm ngawih ngawih lah a sang tel an awm bawk si nen. Khawvel mipui nuai tel hian thlankhur an pan mek a ni tihte I han hmuh meuh chuan, hriatthiam har tiin I indawmkun ngei ang.

Na avanga kan taksa tha lo lai kan hriat theih thute hi chu na avanga harsatna kan tawh thin hian a khuh pil hneh em em thin a. Han ngaihtuah teh mah, he na tawrhna hian mihring beiseina chu umbosakin, beidawnna ruamah a hnuk lut te te a, a thlarau thlenga a ral raih thlengin a nghaisa fo a ni lovem ni ? Engvangin nge thenkhat nun hlim tak tur te chu natna tihbaiawm tak tak cancer te, arthritis te leh piansualna chi hrang hrangte’n a bawm mek lai a, thenkhat ve lem kum sawmsarih el euh hritlang khawsik eih pawh nei lova an dam bik si ni ta ang le ? He khawvel nun hi hlahril phuah thiam William Blake chuan tihian a lo ti a,

Ka nu na tuar rum thawm leh, ka pa mittui karah,
Khawvel tihbaiawm hi ka rawn rap ve a….

Philosopher (mifing/ thil zirbingmi)-te hian mihring tawrhna hrang hrang chanchin sawi vel hi nuam an ti khawp a. Theih ni phei se lang, heng tawrhna hrang hrangte hi hlawmkhawma Pathian hma-a han thlen a, “ Hei, i khawvel siama tawrhna chi hrang hrang hlawmkhawm a nih hi. Engtin nge heng tawrhnate hi i han sawifiah dawn tak le ?” ti-a Pathian han chhuahchhal tak hi an nap thin ang. Ivan Karamazov-an Dostoyevksi-a thawnthu ziaka a thusawi pakhatah chuan ti hian a ti a, “ na hi mipakhat tan hian, hun ruat bikah chauh a lo thleng thin – phu reng vanga lo thleng pawh ni lo tawrhna – naupang tapin a awm a chum ringawt te pawh hian, harsatna a rawn thlen thin.

Na hi, Siamtu duan danah taksa dinhmun hlauhawma a din thu hriattirtu chu a ni teh meuh mai a, Mahse, kan khawvel hi a buaichuar zo tawh a, na hi kan duh duha kan tih phak lohvah a tawlh hla ta a ni ber mai. Hetia harsatna kan hmachhawn mek lai hian, kan tawng hmang te pawh hi kan thlak danglam a hun ta te pawh a ni ang : ‘Na’ tih chu kan taksain thil tha lo leh hlauhawm a tawh mek thu min hriattirtu tihna ni sela, chuan, tawrhna tih chu mihringte manganna sawina ni ta bawk sela a tha viauvin ka ring.

Mi tam tak hian malsawmna dawngin taksa natna lakah fihlim thin mahsela, kan zavai mai hian tawrhna eng emaw tak, damchhung daih tur hi kan hmachhawn fur hlawm a. A then chu duhtakte then tak avanga rilru hrehawm te, naupan laia an thiltawn eng emaw an theihnghilh theih tlat loh avanga rilru hrehawm te, mahni inthiamlohna ruk eng emaw nei te an ni.

Tawrhna awmzia hmufiah tak tak tur chuan chik tak maia ‘na’ hriatchian tuma enlenna hmanga kan enna hmun atang hian tawlhsawn hretin, kan mihringpui na tuara rum mek hmaifanga tawrhna hmel lo lang chhuak chu kan en a tul a ni. Tichuan he kan zawhna, “ Na kan tawrh chang hian Pathian hi khawiah nge a awm thin ?”, tih pawh hi, “ Kan na tawrh a reh hleih theih loh lai hian Pathian hi khawiah nge a awm thin ?”, tih a lo ni zawk tawh ang. Engvang tehlulin nge maw Pathian hian na hrehawm em em mai kan tawrh hi a phal ni ta ang le ?

(Ka lehkhabu lehlin “Where is God when it hurts?” tih Bung 5-na atanga lakchhuah a ni a. Ngaihnawm ti in awm chuan, a tahtawl te-in ka rawn chhawpchhuak dawn nia – James)

Similar Posts:

• Favang/Fall Season
• Khawvel thiamna hi
• Inti senior te tan
• Mihring siamtute zawng hmu turin NASA in mithiam rual van thengrengah tir
• Khawngaihna Formula

Recent Posts:

• 16th Adventure Course, 2016 at Vaipuanpho
• MARCH 2016, Mizo(ram) Diary
• MIZORAM KANGTHELH TUTE PUIHNAN!
• February 2016, Mizo(ram) Diary
• RIP lushai_er

This entry was posted on Wednesday, August 18th, 2010 at 6:32 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.