https://misual.life/2010/08/20/ka-thil-tawn-rapthlak/ chhunzawmna ..
Nia, Ka thiam lo a ni.Kan khua atang chuan internet hi duh hun hunah a access theih loh a, hman zan khan ka lut fuh ve teh mial a, kha thil kha ka han post ve chawr mai a nia! zan rei tawh anih avangin ka thu chheh dan pawhin duhthu a lo sam lo hle reng a, mutchhuak tawh nen laklawh zetin ka ti tawp chawr mai a ni. Tichuan a tukah hotute thupekin ram ril zawkah min han tir chhuak leh ta a, ruah sur nasat avangin haw thei lovin kan la riak zui! tichuan misual ka han hawn leh zet chuan chhuahchhalhna leh fakna, etc etc a l0 awm bak chuk tawh mai a, zanin hian ka han chhun zawm leh thawr mai a ni ang chu.
Tichuan Delhi Mizoram house ah chuan beidawng zetin kan kir leh ta hna hna a, ka nau chu dama hmuh kan beisei tawh lova, a ruang hmuh chu kan tum leh beisei, kan zawn bera chu a ni ta mai. Thu kan than nasat avangin phone call pawh kan dawng nasa a, ‘ni awm tak’ ruang an hmuh thu an rawn sawi zo zaite pawh on the spot-ah kan en zel a, bei a dawng ta e. Tlangmi hmel pu fit 5’7” vel, ngo lam, slipper bun, motor sut hlum an rawn sawi phei chuan ‘amah’ ngei ni se kan ti ngawih2 tawh mai a ni.Mahse kan beidawng tluang zel.
Han sawi kai leh ta phawt ila, Delhi Mizoram House vela kan tal chhung hian khatih laia kan Chief Minister Pu Zoramthanga te, Chief Secretary te, Home Minister Pu Tawnluia te an awm a, kan thlamuanpui hle a, Pu tawnluia (Ka pa cousin) chuan motor hman tur min pe bawk a, kan tangkaipui tak zet. Chung zawng ai pawh chuan kan MP pakhat zawk Pu Hminga fakawm ka ti. Min ngaihtuah tak zet niin ka hria. Tlai khat chu kan beidawng lutuk tawh, house a kan chau kan mu zun zun chu Pu Hminga hi a lokal a, ka lo chhawn tha peih vak lova (MP anih kan la hre lo), kan MP lo ni rengin! Ka inthiamlo hnu hnawh hle. Pu Hminga hi Mizoram Periodicals Union din tan tirh a, Aijal Club a 1985 kuma conference kan neih laia Senhri weekly enkawltu, pa cher theng thawng kha a lo ni awm e, a lo danglam tawh em a ni.
Tichuan beidawnga haw chhoh tuma kan inbuatsaih ril ruk laiin Aizawl lam atangin phone a lo kal ta a, Kan naua chu Guwahati Mizoram House-ah hmuh a nih thu kan dawng ta nawlh mai zu nia! Chumi tlai chaw kan ei tui zia chu, Broiler buhchiar kan hmeh tih chu ka la hria a, a dang ka hre mumal tawh lo.
Ka nau chanchin: Khatia railway junction vela mipui tam lutuk vanga an inhloh ta kha, rel pakhatah lo chuangin India ram thlang lam Rajasthan an lo pan pui daih mai a lo ni a. A chuang kual nasa hle a, English tlem bak thiam a nei lova, a rilru pawh a buaiin rilru pagngai pawh a lo pu tawh lo hial a, sign board sap tawng a ziah lo awm ve pheuh2 atangin a thlen chin vel a hre thei a, north east lam rawn pan chhoh leh a tumna kal kawng phei chu a chhui zui mumal thei tawh lo.
Misual a tawng ang tih a hlau avangin a a der ta a, dik taka sawi chuan hetih lai hi chuan a a deuh tak tak niin a lang. Kutdawh zingah te tal vein an khawngaih zia a la sawi thei a, ei tur leh mutbu an neih ang ang an share ve zela, kutdawh dan thlengin an zirtir a, kawt thlerah pawh ni 20 vel zet chu kut a lo dawh tawh a ni awm e. Vawikhat pawh Police Station ni awm takah hian a tei lut a, TV an lo en a, kawr mumal a hak tawh loh avangin ‘vawt i ti em?’ an ti a ‘Aw’ a ti a, kamis tha tak an lo pe tih a la sawi thei. Chutia a vak vel lai chuan rail pakhatah ‘North East’ tih lam pang(?) chuang a hmuhah chuan a lut tawp a, ticket khawntu pawhin a khawngaih viau niin a sawi.
Chu rel chuan Guwahati rawn thleng chhovin busah a chuang leh a, a hawi kual velna lamah “Mizoram House’ tih intar a hmu ta thut a, a thiam ang angin a chhuk duh tih a au pui ruai2a, an chhuk tir a, Mizoram House-ah chuan lutin he house mi tangkai ’Putea’ an tih hian a lo hmu a, lo tuam hlawmin chaw te a lo pe a,a hming a zawh pawhin a hre dik mumal thei tawh lova, Aizawl lam phonein annin Delhi-ah min rawn phone leh a lo ni.
Ka uten sumo hire-in an han hruai nghal a, an han thlen chuan an lo mut hahdam tir a, kan monu a han hmuh thut chuan ” E he! haw tawh ang u, ka lungleng tawh lutuk, ka khua a har, etc etc ” a lo ti nawk nawk a, dam takin Zawlkhawpui an luh pui leh ta a ni. Kan han thlen chhoh pawhin a lo biak tlak viau tawh a ni. Thenawm khawveng leh lainattu te an lo leng liam2 zel a, an chungah kan lawm tak zet.
A bo hun lai,thla 2 dawn chhung hian min thlamuantu, mimal leh kohhran hrang hrang min tawngtaipuitute chungah kan lawm takzet a, Lalpan a let tam takin rul che u rawh se.
Pu Vangchhia, Tete Upper Republic hi sawi thiang teh reng e, a hming tak MS Ralte, a pa R Zohluna, a nu Nupuii (Ka u) a ni e.
Similar Posts:
- Ka Thil Tawn Rapthlak
- Mobile Phone ka nei ve a
- Mizoram Tourist Kalkawng?
- Thanchhingi & Son dawr tlak an ni em?
- Zei Book – Part 2
August 25th, 2010 at 3:35 am
ka thaw huai e!!! a lawmawm takzet e dam taka alo ho leh chu.. a dam chhung daih sawi tur a nei tawh dawn ani!! a bo dan chanchin kimchang hriat te pawh ala chakawm ta deuh deuh ka ti!!
Report this comment
October 8th, 2011 at 12:32 am
kk
Report this comment