Kan dawr kawngka luchunga ‘Pim Pom Restaurant’ tih intar chu ka thlir dauh dauhva. A hming put chhan te chu ka ngaihtuah neuh neuhva. Thawk ka’n la halh a. Kum thum liam taa chu kan dawra thil thlengte chu nimin liamta ang maia chiangin ka ngaihtuahnaah chuan a rawn lut tup tup a.
Kan thingpui dawr hi lian tak phei chu ani lova. Mahse sikul lian tak awmna bul anih vang leh City bus dinna hmunpui bul anih avang hian kan lun ve viau thin. Chhunah phei chuan kan indaihlo ve em em thin ani. Hnathawk tur lakbelh ka duhna chu a rei tawh a; mahse han zawn a ralah chuan anlo vang khawp mai. Hlawh kan pek theih lah a beitham si. Vanneih a siamin ka thianpa Zira chuan hnathawk tur min hmuhsak ta hlauh mai a. Tichuan ni 20. Aug 2007 kha Thlantea ka hmuh hmasak ber na ni chu ani ta ani.
Thlantea chanchin hi ka’n sawizau lawk ang e-
A tetlaia khawsikpui vanga a kaih nasat thin avangin rilru lamah rualban zanlohna anei a. A piantro hi a fuh zanlo bawk. Lei tawt tawng lek lek hian a tawng thin a. A rualpuiteah a te fal hle bawk ani. A hrisello em em a. A lung lamah natna benvawn a neia, Doctorte phei chuan rei a dam lovang anti hial ani. Mahse kum 16 lai ani ve tawh a. Mi hlim thei tak, mi taima, nui reng mai anih avang hian natna hian a chungah ro a rel theilo ani ber ang chu.
Vaphai khaw mi ani a. A nu nen chauhva khawsa an ni. Vanduai tur renga Khuanu ruat ang hrimin a thisenzawmpui neih chhun a nu hi chhul cancer ani a. Vawitam tak zai tawk tawh mahse a bawrhsawp reng avangin tlawmngai pawlin tar chawmnaah an dah ta tawp a. Thlantea hi fahrah chawmna lamah a seilian thung ani. Kum hnih liamta khan a nu hi rawn ziaawm deuhvin Aizawl lamah an rawn pem thla ta ani.
Dikchiah chuan Thlantea chhawr chungchangah hian min dawrtute ah bus driver, hrawmhraw pui pui ho hi chu ka vengthawng ber lo. Pawi tihna ka neih rilruk deuh chu zirlaite lam hi anni a. In uluk em em mai, ei in thianghlim duh em em an ni si a. Thlantea hi an thinhrik mai ang tih chu ka hlau ru angreng hle ani. Min dawr thintute hian Thlantea chunga an rilru puthmang tur hi ka hrethiamlo a ni ber mai.
A rawn thawh tirh kar khat vel chu a rukin ka thlithlai uluk hle reng ani. Mahse sawiselna tur ka neih awmchhun chu dawhkan tihfai a thlahlel lutuk chu ani deuh mai a. Mi a kawm hlim thiama, min dawrtute tumah nui hmel pu lovin a chhawn ngailo. Driver ho pawh chuan an ngaina ta em em mai a, Thlantea hming chu an lam reng ringawt mai thin. Pim pom sweet a heh em avangin ‘pimpom’ tihin an ko ta nghe nghe a.
Tumkhat chu a lungna a chhuak ta tlat mai. A in entir chuan zaipui a tawh a ngaih dawn thu Doctorin alo hrilh a. Zaina tur pawisa lah a nei der silo. Chawlhkar thum lai chu hnathawk theilovin khumah a bawksawpa. Ka va kan changte hian, “Ka dam tep tawha ka rawn thawk leh dawn ania, tumah dang lo ruai suh aw ka pu.” alo ti lawm lawm thin. Kan dawr chu a reh hle a, min dawr thintute pawhin, “Khawnge Pimpoma?” an ti thlazen ringawt mai ani.
Tlai khat chu kan dawra thawk ve tho nula senior Achhungi chuan, “Hei hi driver hovin an lo daha, han en ve teh” ati a. A mit chu a hnam par mai a. Envelope hi alo ni a, a chhung ka han en nak chuan cheng 4000 lai mai hi alo awm a. Hawrawp tha fahranlova thuziak tawite hi alo awm bawka ‘pimpoma tan’ tih chauh hi a lo inziak a. A tukah chuan intiamrual ang hrimin zirlai ho chuan Thlantea tan cheng 3000 lai an lo khawnkhawm bawka. Mi te hi an lo va tha em!!
Thlantea pawh a dam tawh sawt viau mai. A nat atanga chawlhkar thum a ral dawn hnaih chuan ka va kan leh a. A tuka a rawn let leh theih tawh dawn thu chu minlo hrilha. A rawn kal dawn tih an hriatlawk avangin driver ho pawh an rawn awm thahnem viau a. Inrinni anih avangin zirlai lam pawh an rawn kal ve nual bawk. Kan dawr te takteah chuan kan khat tlat ani ber mai.
Dar 9:00 velah chuan Thlantea chu a rawn kal ta a. (Hemi tum hian ka hrilh lawk angin a nu in a rawn kalpui ani.) A dang bai a, a cher kiam bawk a. Kei chuan thupe aw angreng tak hian, “Dawhkan sengfel tur a awm e” ka han ti a. Nui sang hian phur fahranin dawhkan hnawk nuai chu a ava pan a. Dawhkana napkin hman hnu mai mai emaw atih chu ava hui khawm dawna, a han enchian chuan pawisa hlir hi a lo inthlep tun a. Lehkha thema ‘Pimpoma tan’ tih inziak pawh chu a hmu bawka.
A makti lutuk hrilhai, lawm hmel kha ka theihnghilh thei tawhlo. A zat a chhiar senloh avangin min chhiartir a. Cheng singhnih chuang lai alo tlingkhawm hman a. Amah an zaina tur chu a daih dawn ta ani. A awm zawng zawng chu hlimlo kan awmlo. Kan nui dar dara, driver ho an ri leng lung bawka. A va hlimawm tak em!!
Thil nuizatthlak angreng deuh chu- Mi zi nuai nuaih karah chuan Thlantea chu ka va en a, thahnemngai taka dawhkan hnawk vel alo hrufai mawlh mawlh lai hi ka va hmu a.
Kha mi danglam Lalthlanzuala kha chu ka theihnghilh tawh ngai lovang!
