mi(sual).com

from James Ramdinmawia

Dawn ti sei:
Mizo nih hi a lo nuam khawp mai. Vairam pilrilah kan vawi khat zin chhuahnaah heti khawp hian kan che thain tumah hruaitu leh ruahman saktu pawh nei lovin kan zinna ram Lt.Governor kan han titi pui thei mai a.

Thingtlang sikula seilian, vawi khat mah English Medium School an tih pawh la rap pha ve ngai lo, phai awm tur lek phei chuan kan neihin a tlin loh mai pawh ni lo, kan neih loh pawhin a tlin ve phak loh, mi rethei pawh ni ve phak lo, mi rethei tehna hnuai lam (Below Poverty Line)-a iak pha ve tawkin tawngah harsatna nei teh lua lova anmahni Vaiho zawkin kan sap tawng awphawi nalh ti zawk maha mi an lo ngaisang zawk hial te kha ka ngaihtuah chang hian, keini aia sap tawng thiam leh inhai veng zo tur, sum leh paia harsatna nei miah lova phai sikul tha leh saptawng hman theihna hmuna awm thei Mizo zingah an tam si a.

Hengte hian Central nghawng pha lawih turin Central politician te emaw, Officer lian te emaw, an fa te emaw thianah leh hmelhriatah han siam ta hlawm se, Mizoram tan an tangkai duh awm mang e, ti tein ka ngaihtuah neuh neuh a.

Tuk khat chu zing khawvar chian hmain Tuifinriat thlifim dawng tura Beach-a kan kalin French tlangval pakhat hi kan titi pui thei hlauh mai a. Kan inkawmna chuan ngaihtuah a tithui ta hle mai! Amah chu ‘Fireman’ a ni a, a nu leh pa leh midang tumah pur buai lovin ama hlawhchhuah ngatin India ram leh ram dang dang a fang thei a, hna dang vawn a nei lo bawk. Mizoram Fireman-te hian anmahni hlawh ngawr ngawr hian Feren ram leh khawvel ram dang dang fanna an nei daih hauh lovang le.

Kha French tlangval khan a hlawha lungawi loh vanga nawrh awmzia a hre hauh lo, lungawi takin ‘Fireman’ a ni mai. Mizoramah hian entirnan ‘Kuthnathawh chawisan’ kan tih chuan nikhat hlawhfa rate hi Rs. 500 vel a tlem berah ni ta se, tuna lehkhathiam hna hmu lo tam takte hi chuan rinawm leh taima taka kuthna thawh an hreh hauhin ka ring lo. Chutiang bawkin thlaitharte pawh a market tha hle se chuan kan taima leh zualin ka ring tlat a ni.

Kan chaw eina ber Ashram Dining Hall an tih-ah khan Sapho an awm ve nawk thin avangin kan bula an lo thut ve changte hian tha tak leh nelawm takin kan lo chiauau thin a. Kan hmel a danglam deuh bawk a, tin kan awphawi pawh Vaiho ai chuan a lo nalh deuh zawk mah a niang chu, mi an nel phian zel a. Dangnal rau rauah chuan Vaiho hi kan pha lo tlangpui a, mahse awphawiah leh lamrik danah erawh chuan mi an pha lo hle thung. Kan Sap thian chhar thar hote chuan vawi hnih inhmuhna atang hi chuan kan hmingin min ko nalh nalh thei tawh thin.

Kan kal chhuah hma khan Mizoram Tourism leh I&PR Office atang tein Mizoram chanchin inziahna Information Brochure/Booklet te kan va lam a, kan keng thla teuh kha a ni a. Chung te chu chung kan thian tharte hnenah chuan kan pe thin a. Chaw ei laia kan han titi hian, Mizoram chu India rama State ralmuang ber, tlang ram, ram ngaw leh thing hringte’n a khuh hrin nghalh mai, sik leh sa thu-ah pawh India rama State nuam ber a nih thu te, Mizote chu zaa za Kristian kan nih thu leh kan hnam zia pawh Western Culture deuh vek a nih thute kan han sawipui thin chuan, kan Camp-a tel ve kan thian, state dang atanga lo kal, dawhkan khat kan kilpuite ho hian anmahni state chanchin sawipui ve chak tak hian an lo ngaithla ve doh doh a. Mahse an be ve ngam thin si lo. “Thian thar(Sap) i chhar leh ta maw?” hi min ti a, mi hi an ngaisang em em mai a, Mizo nih chu nuam tak a ni. Kan thian chhar thar ho chu American, German, Italian, Canadian, British leh Brazilian te an ni tlangpui. Football te kan han sawi kai a, an ram club te, players lar te thlengin kan lo hre phian zel si a, kan in kawm ngeihin kan in pawh tak zet thin.

Vai rama fahrah rethei tam lutuk khuan ngaihtuah a ti thui khawp mai! Rel-a mi chaw ei bangnawi, chhuata an paih tawh khawn khawmin, an kut bal takin ten leh ten loh pawh sawi hlei thei lovin an ei a, an eitur hmuh chhun a ni miau si. Ka vawi khat tawn ve na a ni bawk a, ka lainatin hmuh hrehawm ka ti thin hle, mahse khawngaih sen an ni si lo.

Enga ti nge hetiang tur ringawta khawvela an lo pian ve le? A bul thumah i han chhui teh ang: mi bathlara mahni bungraw neih zawng zawng nena eirawng inbawla riak ve mai mai te pawhin fa an nei ve zel si a. An fate future chu a va bright lo tak em! A… an future lo pawh a bright chuang lo, an engmah a bright lo, kutdawh bawk an hmabak. Heng ho hian Sex Education leh Family Counselling an tlachham a ni.

An tlakchham ang chiah hi Mizoramah pawh kan tlachham, chuvangin an dinhmun ang hi kan hlat lo mai thei! Ngaihtuah chiang mang hlei lova naupangtê-a nupui pasal nei ve ngawt, nei rei leh thei tak tak si lo te, naupangtêa sâwn pai/thlak ta mai mai te kan tam ta. Chu chuan Zoram hi a tibuai. Fahrah na na na chu pi leh pu te’n an lainat bik a, an duat rawn a, an duat sual nge nge a, khawtlang leh ram hmelma an lo ni thuai thin. Pi leh pu nei tawh lo hlei hlei khan hmangaihtu nei lovin an inhria a, nun beidawngin an awm a, zirtirna tha an dawng lova, mi hnawksak takah an lo chang mai thin. Tin, Sex Education lama zirtirna dawng lo bawk an nu leh pa, nuthlawi/pathlawi lo ni ta te khan eizawnna ngelnghet an neih loh phei chuan zu zawrh leh damdawi zawrhah an tlak duh khawp mai a, chuvangin a pawi vel vek a ni. Hnam pui zawkte chuan, ‘Prevention is better than Cure’ an lo ti a. Tuna kan harsatna tawh mek hi sutkian a hautak viau ta ve ang. Chuvangin tuna thalai rawn ni chho mai tur leh a ni mekte hnenah hian a venna kan lo siam lawk tur a ni ang. Sex Education, Family Counselling, Pathian Thu nen tangkawpa kan beih chhoh a ngai ta tak zet a ni. Tichuan ‘Next Generation’ atan mel lung pawimawh tak, Zoram thar innghahna lungphum phumtu te zinga chhiar tel kan la ni ve mahna.

Kan rawn haw lamin (Silchar kawngah) Mau, truck bang sang pui puia an rawn phurh thlak kan tawk teuh mai a. Kei lah pek chuan ka lo ui ve em em ringawt. Kan chuanna Sumo Driver chuan hemi let eng emaw zat hi Tlawng lui leh lui dangah an tawlhthla thin tih min la hrilh ta deuh deuh! Aw… khati khan tlawm tak takin kan zu hralh ang a, an thil siam chhuah to deuh deuhin mi an rawn lei tir leh ang a. Enga ti nge Mizoramah Paper Mill te kan din ve mai loh? Thil dangah raw material kan neih loh tehlul nen kan neih chhun lah a ‘raw’-in Vaiho sawngbawl atan kan phur thla vek a, kan state sum hnar ve tur, uihawm tak a ni. Chief Minister hmasa-in Mau a lo buaipui viau hi a mawh love, a nuihzat pawlah ka tel ve thin a, tunah chuan ka nuih a za ta lo. Mau sawngbawlna kan mamawh zia ka hriatin kan Chief Minister hi a thlawpawm hlein ka hre ta. Amaherawhchu tute tan emawa sum siam nan mai mai ni lo, a taka tihhlawhtlin ngei ni thei se a tha hle ang.

Vaiho chuan two-wheeler hi intihtheihna’n an hmang ve lo, mamawh atan an hmang. Pondicherry-ah phei chuan Karishma, Pulsar leh CBZ tih vel te hi hmuh tur a awm mang hauh lo mai. An changkan loh vangah kan puh ngei ang le, mahse keini aiin an changkang zawk fe lawi si. A man tlawm tlawm, a quality hniam hniam kha an hmang mai a, a man to aiin an tangkai pui zawk mah awm e. Car nalh tak tak kan hmuh te chu milian hovin an neih chuang liama an lei a ni tlangpui a, Mizoramah erawh kan neih zawng zawng pawh ni lo, kan neih phak bakin ‘loan’ leh ‘instalment’-in Car chhuak thar changkang tak tak kan lei a, chutih lai chuan Vaiho chawmhlawm kan la ni tho si! Hman lai kan pi leh pute khan ei leh bara mahni kham khawp thlo chhuak zo lo nih chu thil zahhlak takah an ngai a. Tunah erawh leiba ringawta inti changkang ho hian zah kan tum miah lo. Vaiho hi kan ngaisang miah lova, an zinga kan dinhmun hrechiang erawh chuan min hmusit thung. Changkanna nia kan hriat hi changkanna changkang lo, hnung lama mi min nuih ruk tet tetna tur lek a lo ni mai ang tih a va hlauhawwm em!

Kan mithar tawn apiang hian, “Manipuri em ni i nih? Nge Naga zawk?” tiin kan nihna min zawt fo mai a, “Mizo i ni em?” tia min zawt nghal chawt hi kan tawng miah lo. Manipur leh Nagaland an hriat viau lai leh Hmarchhak mi, hmel in ang deuh apiang kha Manipuri emaw, Naga emaw an tih laiin Mizote leh Mizoram chu an lo la hre lo hle mai a, hei hian ngaihtuah a tithuiin rilru a ti na hle mai.

Mizoram chhungah nu leh pa te chawmhlawm ringawtin kan intichangkang a, kan in la pawr a, ei leh bara intodelh hawt si lovin kuthnathawh kan ngainep a, lehkhathiam awmkhawm inti si state danga hna zawng ngam miah lo awm dul dul ho hian kan thenawm state te chu kan hmusit ve khanglang a, kan la phak loh si zia chu ka han sawi tak atang hian a lang reng si! Mizo thalaite kan thanharh a va hun tak em!

Eng line pawh ni se, Mizoram hi India ram mai pawh ni lo, khawvelin a lo hmelhriat theihna tura thawktu tur kan ni, thenawm state thalaite’n min thawhsak dawn lo, keimahni mawh liau liau a ni. Rualawh a na, chutih laiin rualawh nachang hre miah lo, Night Club leh Party-na apianga inti changkang taka pheleng ho te, nu leh pa eiruka inla lian em em hote hi kan la ngaisang zaw mah a, heng ho kan ngaihsan chhung chuan India ramin min hmusit reng ang a, khawvelin min hre hek lovang. Chuvangin kan ngaihsan zawngte pawh hi kan thlak a, rilru thar kan put a hun ta e.

Kan sawi tawh angin Mizote’n talent kan neih that zia kan hre tawh, hengte hi ti pungin, tun atang chuan India ram khawi hmunah pawh kal ila, “Mizo i ni em?” tih zawhna kan dawn nghal chat theihna’n leh kan hmel anpui, kan hmarchhak unaute pawh, “Mizo i ni em?” an lo tih zel theihna tur khawpa Mizo leh Mizoram a lo lar theihna’n Mizo thalaite’n mahni tuina lam lamah chak taka ke pen-in i che chhuak ang u.

Tuifinriat kan vawikhat hmuhna a ni a, tun tum kan zin chu nuam kan ti hle. ‘Romantic mood’ zawng zawng bo thak khawpa khuahkhirhna hnuaiah pawh Mizo tlangval awmchhun pathumin Delhi lam nula pathum an han tilungleng ta mai te khan Mizo society-ah nulat tlangval inhmangaihna lengvelin hmun a chan pawimawh zia min hriatchhuahtir a. Vaiho thuhnuaia awm duh miah lova kan thuhnuaia kan han dah tlat thinte kha a nuam ve em em.

Mizoramah saptawng hmanna a van em em laia anmahni sapho tak tak te kawma duh tawka kan han dak ve thinte kha a ropui kan ti lo thei lo. Dawra thil lei tura han luh apianga ‘Sir’ tia min lo chiauau thin te kha ‘Sir’ tih la hlawh ve ngai lo tan chuan theihnghilh a har a. A te ber siin mahni aia lian daih vai pakhat ka hauh hrep tum a, tumah tawng ngam tawh lova an han mu ta diak te kha ka hriatchhuah leh apiang hian ka inthlahrung thar leh thin.Rel chhunga an nulate’n kan thlalak an in chuh avanga Nepali chhungkaw hung tak pakhat an han in hau tap per pur te kha a ngaiawm ve dawn ta hle mai.

Heng zawng zawng aia ka lawmna ber chu mi tam takin an hloh thin Krista Thuhretu nihna dik tak lanchhuahtir a, kan vawng nung reng thei kha a ni. Keini aia fel zawk, Baal hmaa la thingthi ngai reng reng lo hi Mizote zingah hian an la awm teuh ang tih hi ka ring tlat a ni.

Similar Posts:

• Mizoram flag
• Lt. Gen. M.M. Lakhera nen Pondicherry ah – Part I
• Burma Ram Vanglai leh Mizo te
• Autonomous District Council tamtak kan mamawh
• Mizoram hnam hrang hrang awm zat

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Saturday, September 4th, 2010 at 9:00 am and is filed under Travel. You can follow any responses to this entry through the RSS 2.0 feed. You can leave a response, or trackback from your own site.