THANG PART-II

September 10th, 2010 11:25 pm by lushai_er

Hmun hnihah kan then ve luklak tawh si a, hei ka rawn bel leh e. A then chuan ava sei in ti leh tho mai thei. A lem awm lo hi siam tum mek a ni .

iii) Mangkhawng: Hei hi sava te, thehlei te delh nan thing tlawn lian deuh a hmawr lehlam khai kangin an kam a, a hmawr lehlam chu an phuarbet a; dai an theu thin. Mangkhawng delh hi sa a tuihnai lo deuh.

iv) Thangchep : He thang hi thehlei leh zupawl awh nan kam a ni a, a nghawnga in rek hlum tur a kam bawk a ni.

v) Vaithang : Hei hi sazu(zupawl) awh nan kam a ni ber. A thang ngul leh a hruite amaha inpu chawp vek a siam a ni a, duhna lai laiah vit phunin an kam mai.

vi) Sakuh thang : Sakuh hi sachhiah kai pha ve lo chin a ni a, a thang pawh sahdal ang bawkin a nghawnga awk turin an kam thin. A thang hruiah hruitung hnang an hmang mai a, ngul nei a kam chi bawk a ni.

vii) Thangthleng : Hei hi sava rah tlan leh par tlan awhna a ni. Ngul neiin a fukna tur dawh an siam a, chuta a fuk veleh a keah a awk thin.

viii) Kawlper : Hei hi thil tenau, a nghawnga lo chep tur a kam chi a ni. Hrui a nei ve lova, ngul nei chawpin leiah an phun mai thin a, a remchang hle.

3. Sa hlauhawm tihhlumna bik

i) Tlak : Sakei leh savawm hi sa dang anga awh theih chi an ni lova, chuvangin tlak an siam zawk thin a ni. Thing pum pahnih lei angin lawn nuam tak turin an dawh a, a tawpah a thil duh zawng tak chi sa emaw mai emaw an chah a. A hnuaiah chuan thal zum tak tak an bun fur mai a, a lan lohnan hnimin an thup leh a, sa a lo kalin an thil chah chu lak tumin a pawt a, a per ta a, a tla mai thin.

ii) Kar : Hei hi sakei tihhlum nan bawk a kam a ni. Fei an hmang ber a, mau zum hman chang pawh a awm. Hun lo kal zelah silai kar an siam ta zawk a. Sakei a lo kal veleh a lo khawh nghek tur emaw, lo kap kap nghek turin palte hrui an zam a, a pal per ta thin a ni. Mihring tan pawh a hlauhawm avangin losul haw hnuah an kam a, khawvarah an sut leh thin. Kar an kam hian tlangau hmangin mitin an in hrilh hre thin.

iii) Fal : Fal pawh sakei tihhlum nan bawk kam a ni ber. Delh hlum nan a ni a, sakei delh hlum zo tur a nih avangin a rit em em a ni. Fal tenau chu zawng tan te, vathu tan te pawh an kam bawk.

iv) Chehrep : Hei hi sakei tihhlum nan bawka hman ani. A sa duh zawng tak an hung hnan a, a kawngka hawnah chuan a luh veleha lo chep tura kam a ni. Sa tenau deuh sanghar cheh nan pawh ama tawk tein an kam ve bawk.

23 Responses to “THANG PART-II”

1
Mr. TSA Says:
September 10th, 2010 at 11:28 pm
Lung a va tileng ve aw.. Thlam hnuaiah mangkhawng kan kam thin a.. Buhpaw karah vaithang kan han kam a. Pawl kan tuam a.. Kha’ng hun kha he post hian min ngaihtuah chhuahtir e.

@lushai_er: I post avang hi ka hlut thin a nia.

Ka lawm em em e.
Report this comment
2
Mr. TSA Says:
September 10th, 2010 at 11:29 pm
@lushai_er: I post ~~avang~~ hi ka hlut thin a nia.

Ka lawm em em e.
Report this comment
3
chhana Says:
September 10th, 2010 at 11:30 pm
Bengvarthlak e.
Report this comment
4
machomas Says:
September 10th, 2010 at 11:40 pm
iva hre thui teh duah ve!!!mihringthanglam han sawi zel la!!
Report this comment
5
RempY_sciSsoR Says:
September 10th, 2010 at 11:41 pm
thang hrang2 ka hriat hnem ve phah hle mai..kan tunlai nundanah han chhawr zui maina tur a tam toh lo nangin, knowledge atan a thra hle mai. Ka ti mai2 a, eiru te awhna tur thang te hi a siamtheih lo maw le? Hehe
Report this comment
6
_CFL_ Says:
September 10th, 2010 at 11:43 pm
A bengvarthlak leh hle mai. Chhinchhiah leh keuh teh ang.
Report this comment
7
sihal Says:
September 10th, 2010 at 11:44 pm
thangthleng kan kama, phuanberh kungah tawllawt velte kan awka mahse mu in a lo ei hian uihawm ve duh khawp mai.
Report this comment
8
chemte-i Says:
September 10th, 2010 at 11:48 pm
hriat ve mai mai a tan a that hi
Report this comment
9
Mr. TSA Says:
September 11th, 2010 at 12:03 am
Admin online an awm chuan khawngaihin lo inlar lawk teh se’n..

Ka lawm em em e.
Report this comment
10
VaiVa Says:
September 11th, 2010 at 12:08 am
@Mr TSA: Please, check your mail!
Kan lawm em em e
Report this comment
11
Devil18 Says:
September 11th, 2010 at 12:15 am
Sawi ve ang, thang te nau ho hi chu ka kam ve nual tawh. Sa dangin a awk sa a lo ei hian a va uiawm thei tak em
Report this comment
12
tristinabelvawtu Says:
September 11th, 2010 at 12:17 am
A bengvar thlak hle thin mai.. thanks to lushai_er.
TLAK ah hian ka nu te khua a mi hmeichhe naupang a tla palh toh. a thi chiang hle ni awm e..
Report this comment
13
ovala ralte Says:
September 11th, 2010 at 12:19 am
Thangchepah Vahlah ka awk tawh ve tlat.
Report this comment
14
Kawnga Says:
September 11th, 2010 at 12:30 am
I thangchep lem khi tih loh dan a ni chuang lo na-in, ka mitthla-ah chuan sazu khana kam a lang tlat. Thang hi ka kam tam vak hman lova, mahse, thangthleng leh thangchep hian ka awk hnem ve hman hle. A va ngaihawm ta em! Pan lai ni te….
Report this comment
15
Mokkai Says:
September 11th, 2010 at 12:55 am
Lung a tileng ve thei a lawm mawle.. Fal hi keini chuan sava thangah kan hmang thin. Buhseng zawh hian fal kan kam a, nileng ten kan veng ve thin. A ven buk tur kan siam a, sava tamna ah chuan ven a nuam ve khawp mai.
Report this comment
16
lalmi5ualpa Says:
September 11th, 2010 at 1:35 am
Thang kam tih vel hi chu ka tih ve ngai loh thil a ni. Mahse a bengvarthlak e, hriat ngai loh te ka hriat phah nual mai.
Report this comment
17
ChhawnBura Says:
September 11th, 2010 at 6:41 am
Bengvar thalk thin hle mai.

A lem ziaktu hi thiam ka ti khawp mai. En chiang ve mah teh u. A ngul kul/kur dan leh, a per hnua a ngul mar dan vel theng khian ka lo en ka lo ena. Thiam tak a ni.

Kar leh tlak te hi ka la hmu miah lova. A lem han awm tel thei se aw. Mitthlaa ka hmuh bak ka la hmu miah lo. :smile:
Report this comment
18
chawnghilh Says:
September 11th, 2010 at 10:09 am
Thang ka kam ve. Ka la awk lo. Tin, a awk hmu leh turin emaw pawhin ka thang kam ka en nawn leh tawh ngai lo. Ka nu leh paten an phal lo.

Tum khat chu ka pa’n ka thangthleng kamah sazu a lo awhtir a, a luruh kehsa vek a ni a. Ka ngaihtuahna a buai hle, la naupan lai thil a ni bawk a! Ka nu pawh ngunthluk takin ka zawt a, thil dik mi hrilh duh chiah lo va. Mahse, ka thiante hnenah an lo sawi puang leh tho si a, nuihzat em em tur a tam phah hle.
Report this comment
19
bucko Says:
September 11th, 2010 at 10:29 am
Thangthleng ka kam tawh, be-ai thang ka kam tawh, sahdal ka kam tawh, mangkhawng/fal ka do tawh,Vaithang ka kam tawh, sakhi thang ka kam tawh,Sakuh thang ka kam tawh,……. A mak lai ber chu . ENGMAH KA LA AWK MIAH LO hi a ni.

Thang pakhat kan nu in a awh theih zawk chu sawi lo mai ang…. ha ha ha :lol: :lol: :lol:
Report this comment
20
Aryan Says:
September 11th, 2010 at 12:00 pm
Naupan lai atanga nungcha khawngaih thei tak kanih vang hian feh kawnga mi thang kam ka hmuh te hian kawngkawrawih ka awh tir thin a, an thinrim/nuihza thei raps.

Report this comment
21
khumchikthei Says:
September 11th, 2010 at 2:06 pm
Naupan lai a va ngaihawm ve aw. Mangkhawnga sanghar per vek khawpa delh lai te kha.

…khrum
Report this comment
22
mzvision Says:
September 11th, 2010 at 6:00 pm
Thang kam hrat ka nilo ramvachal ka ni hek lo mahse heng thang hrang hrang keini misual tana chhawpchhuaktu hi ka fak khoops
Report this comment
23
lushai_er Says:
September 12th, 2010 at 3:46 pm
Ka post hi ka vil hman lo fo ta mai a, in hriatthiamah kan ti a niang chu. Weekend-te hi free deuhva hman theih loh chang hi a awm leh thin a :evil:
Report this comment