Kei mi luhlul leh tihmawh hi ka rilru a na ve thei tlat mai. He’ng a hnuaia ka rawn ziah ho hi ka hmuh châng chuan ka rilru a na vawng vawng thîn.
1. Vei lèm nei lo thalaite
Ni e, sualna tam tak chu thalaite atangin a rawn intan chat chat a. Thalaiten an tuar a, ram hmêl lanna thalaite an râwih a ni. Ka rilru tinatu ber zâwka chu, vei nei lovah pawh bike luahlumtute hi an ni.
Proton an han vuah a, chak tak takin an tlân fia fia a, an hnungah mawng poh táwrhin nula mal mûm an han bei thlep a; an pan tur hre lo mah ila, an tih tum chu hre ruak hian ka inhre thîn a, chutah tak chuan ka rilru a na leh thîn. Zîng lam dâr 3 vêlah ring tak taka au chunga nula thawmhnaw ha tlêm thiamte nen an han inphur hmuh hi chuan.. ka ngaimawh a ni lo, ka rilru a nâ a ni zâwk.
An hma lam hun tur ka dâwn a, a êng ka ti lo; a thim a ni. Hun hnuhnunga thil lo thleng tura hrilhlâwkte kha a thlengkim tawh; a lo kal lehna chiah kan nghâk tawh a ni tih ka ngaihtuah a, hetianga sual rawngbâwlna hun a va ni tawh lo êm!
2. Chawhmeh zuar nu te
Zîng dâr 3:30 vêlah mut kham bîk lo takin an tho va, inzawrhna hmun tha pawh chang lovin kawngsîr remchâng laiah an han inphah tawp a. Vâwt an ti lo bîk lo, mut kham lo takin an hâm ve bai bai thîn asin. Nilêngin nisa hnuaiah an thutpui a; lîrthei leh vaivut khu nen, bengchheng dang chi hrang hrang kârah hmai sen tâkin inhralh loh hlau êm êmin min han au lawm lawm a, kalsan zawng an harsa teh e.
Zîng an thawh hma vânga haw hma ngawt thei an ni si lo. Dâwrtu an awm mial lo maw tiin zan khaw tairêk thlengin an thutpui a, a tûkah chutiang bawk chuan bul an tan leh thîn. Ka nu tel lo mah se, mi nute vek an ni a, an fate enkawl nan, an sikul kal nan leh rual an pâwl loh bîk hlauvin hrehawm an tuar tih ka hria a, ka rilru hi a na vawng vawng thîn. (He thu ka ziah lai ngei pawhin ka mûr uaih uaih thei a ni).
3. Thihna
Thihna meuh hi chuan mihringte hi min va chinglet nasa êm! A chunga kan ziah tâk pahnihte pawh he thihna hian a hmuak reng si.
Kum 10 lai kal tâ khan ka unaute pahnihin min boralsan tawh a, engmah ka la hrethiam lo; thla hnih kal tâ khân ka thianpa kawmngeih êm êmin min boralsan leh a, ka hrethiam ta! Min Siamtu hian amah ka pan theih nan ka chhehvêla mite a hmang a ni. Siamtu hmangaihna hi a va sáng êm!
A hrethiama pawmte chuan thihna pawh hi nunna kawngkhâr an ti si a. Mihringten ‘thi’ kan tih châng hian an thlarau chuan, ‘ka thi lo ve. Chatuan nunna kawng ka pan zâwk a ni,’ an la rawn ti lawm lawm hian ka ring thîn.
Mahse, thihna hian ngaihtuahna thui tak min siam a, ka thian duh takte leh ka mi hriatchian tak takte an han liam hi chuan thihna avâng hian ka rilru a na leh lo thei lo a ni.
Thi turin kan inpeih tak zet em?
Similar Posts:
- Thaikawi Palai te kha
- Mizo Thalaite Khawiah Nge?
- Nung hlut a hlu
- Eden natna
- Congress thalaite’n Mimi Lalzamliani leh a nu rilru ti nâ
(Y)
September 13th, 2010 at 2:58 pm
Pu Kawlhawk, ka hmu reng a, ka hmu lo der a!!
Ka lawm em em e.
Report this comment
September 13th, 2010 at 5:04 pm
Bazar pui leh kawngsir a thil zuar tam tak te hi kharchhawng an ni tlangpuia..Burma lam unau ‘Pi, Pu’ min lo dawr ve rawh tih an ching em em a. Inrinni tlai khat, Dawrpui phei Taxi stand hnung, Parking Lot bula ka awm laiin.. Patling pakhat hi nu/nula pahnih hian an zui tlata.. Kan ngaihthlak uluk deuh chuan an chawhmeh zawrh kha, chu patling chu leisak turin an lo zui char char chu a lo ni a. ‘Kan lei tawh’ a ti chungchung pawh khan an chhuah lo. Ngam tak an ni. Midang kei aia hmu chiang pawh an awm ngei ang.
Mahni thlai thar rawn zuar tur te hian harsa an ti. Nitin a zawrh tur an neih loh vangin, seat nei loin, kharchhawng hnenah hmanhmawh em em in an hralh a, tlawm te in. Chutah an nin, khawilai ‘Mall’ style in a let hnih-thum-li-nga-in, thut hmunah an lo zuar ve leha.
Kharchhawng te ho pawh hi an khongaihthlak tho mai han sawi zel takah chuan. Pa ber in a ruih bo san emaw vanga chohmeh zuar te an lo ni lehzel thei boka, fa te tunge lo enkawl ta ang?
Zoram nu leh pa te hian, mahni chhungkua-fa te kan uap lum zo ta lo emaw ni..kan fanu te ‘lum’ um in bike chak taktak ah an thut thawt ta fua fua mai le.
Report this comment