Ka nuam ve e..

October 3rd, 2010 9:00 am by Keimah Thingtlangpa

A khuhhawnna

Khawpui hmun hulum laia chen chuan khawl ropui tak tak ri leh mihring duhamna leh neihloh hlauhna rilru pu zi nuai nuai bak hriattur a awm lo. Chhemdam thlifim dawn tur a awm lova, siamchhuah hlim ni awm taka thiang vâk mai ramngaw atanga lo chhuak boruak lah chu vana rah ang mai a ni si. Leilung te lah chu hmelma kumhlun ang maiin kan cheibawl a. Kan bawlhhlawh chhehkhawm hian min la nek chhuak angem? Engmah a chiang lo.

Chawlhna tuikam lam panin

Chu khawpui hmun chu chhuahsana, boruak thianghlim, leilung mawina hmua hahdam tumin ka chenna hmun chu ka chhuahsan a. Khawl ropui tak tak ri a reh tial tial a, mihring duhamna leh itsikna pawh hmuhtur a awm tawh meuh lo. Ka kal zel a..

Tlangtin mualtin, thingtin zar belin,

Va tinreng kawplai D’ nen..

Lenlai ni an chen..

Lungrualten an her siau e..

Ka kal zel a..thing hlim nawm hmel tak a lo awm a. Ka chawl a, thlifimte chu ka han dawng a, dawn a nuamin hah a dam sawng sawng mai. Chu hmunah chuan leilung hlutna a lang tan ta..

Ka chungah chuan sava an chiar nak nak a. An nundan ka han ngaihtuah ta. Anni chuan lungkham nei lovin theihtawpa an Siamtu fakin tlangtinah an thlawk kual a, thing tinah fu kualin lungrual takin an eiin an inchhai thin a sin.

Tukloh ramhnuaiah maw..

Mihring duhamna nasa tak vangin he kan ramngaw chereu nasat dan hi kan ngaihtuah ngai em le? Boruak thianghlim min pe tu tur chu hmelma angin kan tihluma, hlimna min thlentu nungcha dangte chu kan tihlum thin a nih hi. Khawnge hmanlai ramsa tam tak kha an awm tak le..

Zobawm dingdi, tlangsam par sirsiar..

Lentu chhawlhnawng ramdaiah

Nungcha lengrualte’n hlimin

Sam an chai e…

Dingdi parmawi tak tak leh kan pipute hunlaia naupangin an hlimpui em em thin ‘bawh pet’ an tih mai tlangsam hmun an bawh pêt thin pawh hla takah lo chuan hmuh theih a ni tawh lo. Ramngaw te lah chu vawm bo ang duak a ni tawh a. Chawngtinleri laitual lenna hmun chu zawn a ngai tawh. Chung hmunah chauh lo chuan ramsaten ngaihngam takin ang cheng ngam tawh lo. Ramhnuai tuma tlawhpawh loh hmunah chuan an thatlai an chen a sin.

Thal awiin maw..

Khiang zik a lo chawrno a, nipui thereng a lo hram a. Thing hnah tlakawlh tawh chu a lo chawrno leh a. Kan ram an rawn timawi leh a..

Vau tuahpui leh thingtin par zawngte,

Vullai rel an kur siau ve

Romei zam chiai zing riai nen..

Thal an awi e…

Ni e, vaube mawi taka par hi hmulo fa kan la tam in ka ring a ni. Changkang tak awm pawh hi hmanlai kan pipute lungtilengtu vaube hi kan hre lo tlat thin. Mahni inen teh ang u! Thal a lo ni a, tlangtin mai chu romeiin a bawh paw chiai a, thinghnah tlakawlh tawh te chuan hnah rawn chhuahin duah takin he nipui chhung hian an chawrno a, ram hring an siam thin.

Ka nuam ve e..

An leng e, hlimlai chenin..

An ngai lo thleidang par, he lei chinah..

Ka nuam e, an ianga hmatiang dawn ngailo hmun nuam..

Aw… awm ve ngai maw hringnun?

Ni e, nungchate chu hlim tlang takin, lungrual taka lengin siamtu kutah an innghat a, lungkham nei lovin an siamtu an faka, an chawimawi a sin. Duhamna leh itsiknain an nunah hmun a chang ve ngai lova, midang chanai neih duhna thinlung an pu ngai lo. Hetiang nun hi mihringte hian kan nei ve thei angem le?

18 Responses to “Ka nuam ve e..”

1
Zephenath Says:
October 3rd, 2010 at 9:03 am
Nakina chhiar atan ka khek e… (ngaihnawm hmel)
Report this comment
2
sihal Says:
October 3rd, 2010 at 9:09 am
chhiartlak fu mai. i ti tha e posttupa!
Report this comment
3
kawlhawk Says:
October 3rd, 2010 at 9:19 am
Le! Vawiin Pathian Ni a lo thleng… Biak buk lam i pan ang u le.

KTpa chu- I rawn thùal ngaihnawm thiam fû mai a. Hah a dam sawng sawng e!
Report this comment
4
RempY_sciSsoR Says:
October 3rd, 2010 at 9:19 am
Post ‘ka rilrem ber of the week’ a ni e! A va dik in a va ngaihnawm em!!
Khawpui chhung lai takah ka han ding chawt a, ka hawikual a, poisa ringawt ngaihtuah mipui ho chu an phe suau2 a, an in sulpel nuaih2 mai, motor a ri tuar2 a, dawr a tlep hmur a, building hrawl tak2in min hual khup a,..mang a va ang em! Ka tre ta tuar a, a reh thut a, ka hawi chhuak leh chu ramngaw reh leh thiang takah ka lo awm ta a..
Huhuu..
Report this comment
5
ainawn Says:
October 3rd, 2010 at 9:47 am
Ziak tha dap dap hle mai.Mifel leh mithate chanvo ni awmtak-Zing boruak thiang leh nithar lochhuak ka ngaihtuah chian changte leh-Misual ho post tha tak tak leh bengvar thlak tak mai han chhiarte hian hah a dam e…
Report this comment
6
ZerO Says:
October 3rd, 2010 at 10:00 am
Nangmah Thingtlangpa ni lo leng leng. Nangmah Aizawlpa nih kha.

Nia, Khawpuia traffic jam leh mipui zi nuai nuai hmuh reng chuan thingtlang a ngaihawm. Mahse thingtlanga khawsa tan chuan khawpui a ngaihawm ve tho. Aizawl atangin Hmuifang in rawn lam sek a, Hmuifang nitin hmu tan chuan Aizawl kal hun an nghakhlel teh mai a nia.

By the way, he hla “Ka nuam ve e” hi pu Butta (Vulmawi) phuah a ni.
Report this comment
7
Vitamin_C Says:
October 3rd, 2010 at 10:53 am
Kmtp chu reh rai rai hle mai ngaihnawm deuh deuh hi rawn phuhchhuak a…..tha lutuk
Report this comment
8
truangtuahpuii Says:
October 3rd, 2010 at 10:58 am
Ka lung a ti leng zual dawn tlat chhiar zo peih loh mai ang..:(.
Ziak thiam khawp mai.;)
Report this comment
9
D_auachwgthu Says:
October 3rd, 2010 at 11:38 am
Nakinah comment ang.
Report this comment
10
zozo vangchhia Says:
October 3rd, 2010 at 11:55 am
Va ngaihnawm ve. han chhiar tui tak tak chuan khaw lum kan hre chang tawh hlei nem le..
Report this comment
11
caribou Says:
October 3rd, 2010 at 12:22 pm
He hla K. Lalchamliana sak kha ka ngaithla thin a, a nalh ka ti khawp. A hnu leha sa ho pawh hian an sa nalh phian zel. Kan ram hi a hring dup tak na a, nungcha te an zalen lo khawp mai.
Report this comment
12
cotdarz Says:
October 3rd, 2010 at 12:40 pm
Nalh hle mai.. Rik nuaih nuaih reng chu lung a zing alawm,buai renga hun hman te.. mahse nie reh ruih reng pawh nuam chuanglovang.
Report this comment
13
muantea Says:
October 3rd, 2010 at 1:44 pm
Vawiin khawlum tak hnuaia hetiang thu han chhiar chu hah a dam sawng sawng alawm. Mahse phuah belh kher lo se :lol:

Va tinreng kawp lai D nen
Lenlai (ni) an chen….
Report this comment
14
shailendra Says:
October 3rd, 2010 at 2:07 pm
khitiang lam hawi zawng a hla thu chanchin sawi hi a ngaihnawm ka ti khawp mai. Hla dang pawh han ti zel teh. Tin, he hla hi chu nalh ka ti ve hrim hrim…
Report this comment
15
2STATES Says:
October 3rd, 2010 at 3:42 pm
Thingtlangpa pawh hi i post chhiar a nuam hle mai, comment ngai vak lova chhiar chi, i ziak tha thei hle. Thawk khat lai phei kha chuan i post ho kha a sur in a sur a ni thin a, tan la in han bei leh teh. Thangtharte hian kawng an bo zawh hma hian.
Report this comment
16
Keimah Thingtlangpa Says:
October 3rd, 2010 at 7:42 pm
Ka lawm e
Report this comment
17
bucko Says:
October 3rd, 2010 at 8:02 pm
Hey… Pu KT, Post sei deuh ve a……. mahse chhiar chhuak tho ang….
Report this comment
18
swiftymcvay Says:
October 4th, 2010 at 12:14 am
ekhai a ngaihnawm thei khawp mai i post hi….
Report this comment