Kan ti nek neka kumin krismas chu a hnai leh ta hle mai. Kan ti ti tui ber pawh krismas lam hawi a nih leh ta. A lunglenthlak zawnga thlirtu tan a lunglenthlak vawng vawng a, a hlimawm zawnga thlirtu tan lah a nghah-hlelhawm na-ngiang mai.
Krismas kan hman dan thin kan chhui kira, kum dang aia hman nawm loh hlauvin phak ang tawkin kan inbuatsaih ta mup mup mai le. Kan hun neih dan a zir te, kan hmanna hmun a zir te leh kan hman tum dan hrim hrim (rilru) a zir te’n he hun ropui tak lo thleng tur hi kan hman dan a inang lo hlawm hle ang.
Engpawh chu ni se , he hunpui zet hi zawng mitinte’n hlimtaka  chhungkua leh thenrualte nena hman ho tluka thlakhlelh kan nei awm lo ve. A ni, krismas meuhah hi chuan khawvel hi hlimin a fawn a ni ber e. Mahse, chutihlai chuan keini erawh zirna avangin hostel-ah khawhartakin Lehkhabu leh Pen nen kan lo inbitum ve dawn a ni si a.
Rilru engthawl tak leh leh hlimtaka chhung te leh thenrual te nen, duh ber te nena hman ho kan thlahlel ve ngawih ngawih a mahse, a theih si loh.  ‘Exam tur’ tih chu hotupa thu chhuak a ni a, zirlaite’n ‘tik’ pawh ti ngam lovin zawm mai tur kan ni si. Mite’n hlimtaka krismas an hman laia exam lo neih bik chu a khawharthlakzia ka rawn luanliam-pui dawn a ni.
‘Bar’ thla rawn de tanin thlasik khawvawtin min rawn hmet tan a, sawi leh inhrilhtawn ngai miah lovin rilruah  ‘U Ama’ a rawn lang tan a.  A eng-a-mah hmain keini awm nem deuh chu lung a leng tan ti tih der mai. Zanah han hawi chhuak ila thla lah chu theihpa tawpin a lo eng a , thla eng kul(h) hnuaia chhumvar fiah em em zam vel te chuan lung a ti leng em em mai a. Arsi  eng pe tuar mai te chuan Bethlehem lam min hawi tir a, thlasik kawng paw ruai te chu khawsak mifingte kawng nen ka han hmehbel ve rawk a.
Chhak lawkah Nula tlangval te hlimtakin an zaia, muang fan raiha ‘ Zan thiang reh lai takin enna a rawn thlen ta’ an ti ri riai riai te chuan thinlai mu hnu a rawn  kai tho leh a, thawh lawka an zinga tel ve tak chu ka nap a. Mahse, a theih loh exam mai tur kan ni si.
Krismas a hnai chho zela, zing ni chhuak tur kawl eng sen chuk te pawh a mawi telh telh a, tlaini tla tur kawl eng phut, rangkachak zam emaw tih mai tur te  pawh chu hmuh hmaih phal rual a ni lo. Chutah nula tlangval ten engto nei miah lova programme duanglawk sa thlapa urlawk tlai nitla tur thlira an leng ho dial dial tur te chu mitthlain a hmu renga, an zinga telve chu chak ve hle mah ila a theih si loh.
He krismas hun lawm tur hian a lawm phai ram leh foreign atang te paw’n mahni inlum an pan khawm dawr dawr ni. Khawpuia zirlai te leh hnathawk te’n mahni khaw lam thlen hman loh hlauvin an hmanhlel a. Pi leh Pute khawlamah chhungkaw hova hmang tura kal khawm tawk lah bo lo. Thingtlang kilkhawr ber pawh nise phur em emin an pan a, lehlamah chhungten nghakhlel takin an thlir reng a ni tih hriain thlenhlan an nghakhlel ngawih ngawih a.
Ka ngaihtuah a, tunhma thian za ho va inti-khawpuiawm fahrana mahni khua, khaw chhete mah ni se phur taka kan pan lai te kha…Tunah chuan ‘ Dam takin aw, ka chhung te kha krismas leh kum thar chibai min lo biak dawn nia’ tia thiante vai liam mai loh chu tih theih kan nei ta lo. Chutah, chhung ten Tlumtea thlir takin min lo thlir reng anga, nitin min lo hmuak ve reng dawn a ni tia ka inngaihtuah chhuah chang phei chuan mittui hi a hnam ve par par thin. A ni, miten krismas hmang tura an nu leh pate in lum an pan sung sung lai hian kei ni zawng room vawt takah Lehkhabu leh Pen nen krisamas khawhar takin kan hmang dawn a ni si a.
Chhak lawka kohhran inkhawm thawm that zia chu ka bengin a hria a. Hla hruaituin sang veh vawha ‘Khawvel lawm nan a lo kal a…’ tih hla a han la vang vang chu ka hre pha vek a, kil khat atanga hlimsang nu “ Hallelui’ pap pap te chu ka room atang chuan ngaihthlak nuam tawk vel a ni a. Chhoh nal nala han“ Amen†sak chu chak  hle mah ila a theih si loh. Thuhriltu thu sawi hmaa tawngtai rual thawm rin zia te chu ka hre pha vek a . Nausen piang lawma Kohhran mite Biakin lam tuala an lam mup mup mai te chu mitthlain a hmu reng a.
Thuhriltuin mittui parawl teuhva Bethlehem daireh a rawn fang, kohhran mite mittui a sur tir nasatzia te pawh chu ka hmuh thelh chuang lo. Chutah, biakin lamtual khattlata mite lam phu suau suau chu ka ngaihtuaha an zingah tel ve a, a sang ber bera ban phar chhohva kan tana nau lo piang lawm chu ka chak em em a, mahse a theih si loh. Kohhran mite’n Krismas ruai ropui taka an kil mup mup tur te, Fatu te’n ‘Ruai peih a ni ta e’ tih huna zaikhawm khuang ran at at tur zia te chu rilruin a dap a.
Kohhran upa hovin hmui mawm hluam a Krismas ruai sa chi hrang hrang an  peh kawh laiin keini erawh chuan Hostel Dal leh Alu ruai kan lo theh ve mai dawn a ni si a. A ni, kohhhran zingah tela fakna hla saa zai chak viauin ruaitheh pawh  chu chak ve viau mah ila a theih loh  exam a ngai miau si!
Chutia mahni chauhva khawhartaka ka inngaihtuah lai chuan hei hi ka rilruah a lo thleng ta a. Chu chu a ni ka sawi duh ber mai chu… Krismas hi i tum angin i hmang hmang hman lova, hlimtakin i hmang thei lo a ni mai thei. Hnathawh laklawh vang emaw, zirna vangin emaw , infiamna vangin emaw i hmelhriat ngai loh hmunah i awm a ni thei.
Missionary-in khawhartakin nangmah chauhvin i awm pawh a ni thei. Sipai niin ralvenna hmun, hmun ral ti leh ramreh takah he krismas lo thleng tur hi i hmang a ni thei e.Tanin rip takah emaw, Damdawiinah emaw khawhartakin i awma, chumai a ni lo, mite’n hlimtaka hmanga an phu suau suau chu i tukverh a tangin i thlir renga mahse, an zingah chuan i tel ve thei si lo.
I chhungte boral tawh ngaiin i kuna , hlimtaka chhungkaw kima krismas inhman lai te kha i ngaihtuaha i khua a har a, i lung a lung a leng vawng vawng ti raw?! Phaiah kristian pawh awm lohna hmunah, krismas awmzia pawh mite’n an hriat miah lohna hmunah i awm a ni thei. A nih loh leh inthenawm lawkah krismas lawmin an ri bung bung a, mahse nang chu zirna avangin emaw damlohna vangin emaw thil dang eng emaw vangin pawn chhuak thei lovin i awm a, i rilru a hrehawma, i khua a har a, mal ngawih ngawih niin i inhria a, i inngaihtuah lungchhia a, i mittui a tla fep fep thin tiraw?! In sum reng reng suh i demawm love.
Mahse, hei erawh hria la, nangmah chauhva awm emaw i intih lai leh mal ngawih ngawih a i inhriat lai khan i mal lo a sin!. I kiangah Krismas  neitu, Lal Isua a awm renga, amah chu hmanpui turin sawm la  a hnar hauh lo vang che. Amah ngeiin Krismas a rawn hman dan hi a tlawm a, a reh vawng vawng a, a khawharthlak ngawih ngawih a sin!. Chuvangin i khawharna chu a hrethiam em em ang. Tawngtai chungin sawm la, tichuan nangmah chuahvin awm mahla Lal Isua nen Krismas hlimtakin in hmang ngei ang.
