Kan titi naah te hian jhoom system of cultivation hi a thalo, ram a tichhia tih kan sawi thin nangin, tihngaihna awm silo niawm tak ten kan sawi fo mai. Heihi dawt leh chhut thui loh vang niin ka hre ve tlat mai.
Mizo te hi mi’n, kan thurawn an mamawh em tih ngaihtuah hmasa lova, mahni rilrua awm anga kan veng mite in sakah pawh ngaihtuahna lo seng ve ngawt thin kan ni. Thurawn leh ngaihdan hi kan sawi hnem lutuk vang a ni thei angem, min tha an sawi hi kan rilru mil zawnga an sawi thiam loh chuan thaah kan pawm duh miah loh, ka ti thin.
Mizo ten kan lo neih dan hi ram leh khawvel tana thalo ber chi a ni ti chung si hian tihdan thlak kan tum reng reng lo mai hi a hahthlak a ni. Mi ram, Mizoram aia chhengchhia ah te pawh tlang pang awih tak takah a khawnawtin tlang pangah terrace an siam khat tlat mai a, chumi ah chuan leilet a kan tih ang deuh te hian ramri an siam mai thin.
Chhungkua te te in an siam hrang kher lo, khawpum ta tur te hi hnatlangin an siam mai thin. Siam len dan a zirin hun a duh reiin a duh rielo mai a ni.
Tlangram leilet (Terrace) thatna chu phai leilet angin kum tam tak hmun ngaiah buh leh thlai dang tha takin athar theih a, sangha khawi nan a hman theih bawk. Buh lak hnuah thlai dang chin nan a lo hun ve leh chiah a, kum tluanin thlai lam chaw tur thar theihna a ni. Kan lo neih dan pangai ah hi chuan, buh kan phur hawng a, kan lo chu Chul ram ani tawh mai a, hmarcha rah tlem te la awm emaw, Zupawl Vaithang leh Fal te emawa man tur bak engmah laktlak a awm tawhlo a nih ber thin hi maw.
Terrace siam lai mek hian kum hnih khat te emaw chu eitur lampang chu khaw pawn ami chawk luh te pawh angai maithei (kan chaw lut reng tho a!) mahse, a hnulam hahdam leh eitur thar hnem theih dan te leh ram tha tih chhiat loh na a nih dawn te avang pawh hian,terrace system of cultivation hi Mizoram tan hian ka van awt tak em!
Tuna kan lo neih dan hi chu Tuitaiput ang lek, chhenfak tlak loh leh ram ti chhe tu mai a ni si a. Tuitaiput pawh hi fur lai chuan tuihna angin lung kar atang ten a lo put ve a. Nipui ah lei a ti kau a, thalvaekchar ah chuan khami hnawng kau kha nisa in an em ro a a lo kau tangmar ta thin a. Khawvawtin an hmet ta bawk si chu a sawng te leh thin. Lei kau a sawng te leh che vel chu fur a lo thlen leh meuh chuan chhiatna, leimin mai a lo thlen thin anih hi. Kan lo neih dan pawh hi kumkhaw hman tlak ni silo, hman zawh a ram tichhe tu mai a ni si a.
Ram leilung hmangaihin a khawnawta thawkchhuakin terrace hi siam han ni mai sela chuan aw, kum hnih hnuah te chuan dam chhungin hmun sawn sawn tawh lovin eitur hnianghnar zawk kan thar chhuak thei mai tur a. Inca ho te chuan hmanlai atang tawh in an lo siam tawh thin a, eitur an thar tha em em mai a, leichhe tur ven nan pawh a tha bawk si. Chung terrace te chu Inca hun lai atang tawh khan tunlai thleng hian Andes tlangah te chuan an la hmang nghe nghe a ni. Tui lakna a buaithlak kan ti ani maithei e, Mizo pa chen lek lek pawn Mizoram aia ram chhengchhia Andes tlang pangah kum za tam liamta khan an lo siam daih tawh, enge kan theih loh bik teh lul ang le. Arunachali ho pawn hman hman atangin an lo siam thlip thlep tawh asin.
