mi(sual).com

Kum 1993 thlasik chu kum dang ang thoin a vawt suk a. December ni 20 zan, thla eng no nghalh hnuai ah chuan Lunglei pan tum in MST night bus hnung ah ka u nen kan thu ve ran a. Kan hma hma leh ah chuan ka nu leh ka u pakhat an thu bawk a.Keini line chu a hnung ber tlar kan ni. Ka dinglam ah chiah chuan ka u a thu a, chu mi dawt ah nu pakhat leh a pasal an thu a, ka vei lam seat 2 chu a la ruak thung tlat mai. Dar 6 a ri ta a  kal a hun dawn tih ah chuan lunglei nula 2 hi an rawn thu ve ta a.

A tir ah chuan ka en chiang mai lo a, tlem a ka han en chian chuan ka bul chiah a thu chuan belhchian a dawn ngei mai. A vun chu a ngaihno bei tawkin a ngo paw phet a. A mit hmul tlem a er deuh sang , a hnar ngul zum rat mai leh, a nuih zawnga a ha var rual thah rawn lang  thin han hmuh chuan siamtu themthiam zia min ngaihtuah chhuah tir a. A hmelchu ka en leh thin, ka tawngkam thiamna hian ka sawifiah thiam lo, ‘a va han hmeltha em’  ti ila ka sawi bawrhbang tawk chauh emo ani si ang. Hlim taka ka zin tum chhan te min zawh seuh seuh lai chuan bus poh chuan kal lai relin min tlanpui ta vut vut mai.

Rei kan la tlan hman lo, seling kan thlen vel chuan mut chhuakin mi rawn zel chiai chiai a, ka thiannu (ti mai ila, kei ai chuan a u zawk daih) min rawn biak pawh chu ka chhang mumal hleithei ta lo aniang, aw nem zaidam aw tak mai hian i mut a chhuak ta ani maw, i thut na a lai tak ania, tlawh chhan tur pawh i nei ve si lo, ka malchungah lo mu mai rawh a tih chuan sawm nawn leh ka ngai ta lo. thlamuang takin ka awn ta riai riai a a, ka u inthlahrungin ka lo pawm mu zawk ang che a tih leh a nin a poi lo, keimahni lam side hi a rem zawk a tih ri chu ka la hre viai viai.

Shawl a min khuh lai chuan thlamuang takin ka mu ta siai siai a. Ka lo muttui bawk aniang Serchhip kan thlen chuan kan chawl a, ka harh hlol mai a. Bawnghnute i in duh em a tih chuan ka in peih lo ka tih veleh, i van that chhe ve ka tulh dawn che emni tia nui hawk hawk chungin a thiannu nen chuan pawn ah an va chhuak thawl a.

Serchhip a tanga kan kal leh pawh chuan ka bula nula zunzam chuan min phuar tawh tlat. A malchungah bawk mu lehin Lunglei chu zing dar 5 velah kan thleng a. Kei poh chu in tih harh tumin ka han in siam rem vel a. Nuih saih chung chuan “Nizan chu ka chhangchhe ngei mai, tlangval mut duh chuanpui tih takah” tiin min han fiam zui a. Zing lam ah poh chuan zan lam ang thoin a hmelchu a that ngai rengin a tha a, mut kham lo hmel reng reng a pu chuang lo.

A hmelchu ka ennawn leh thin, a nung ser a, a tha hliah hliah mai a. A hming ka hre si lo, ka zawt ngam bawk si lo, khatih laia kei rawlthar kum 13 bawr vel lek rilru buai zia kha aw..Tichuan chanmari ni ta in ka hria, bus chu a ding dat a. An ni poh chu an in siam a, nui sen sen chung chuan hetah hian kan chhuk tawh dawn a, Nuam deuh krismas chu hmang ula, in haw leh hunah poh tluang takin in haw dawn nia tia min thlah phah chuan bus a tang chuan an chhuak ta a.

Tun hun kum 16 tal tap a lo liam a, krismas in min rawn bawm tan vel lai hian kha nu te kha thinlungah a lo lang thar leh a. A hming tal ka lo zawt ngam lo kha ka in chhir ngei mai mahse tunah zawng phengphe khua a tlai ta si..I sakhming hre lo mah ila, thinlai ah i hlui thei lo tiin Misual.com kal tlangin ka rawn zawng leh che ani e. Khawiah tak tuan che maw. A tawp nan ti hian aw..

“Hmanah hlimten an sawi Leitlangpui tual nuam panin,

Suihlungrual ten nau ang kan nui za.

Tunah erawh tuanna tlang a dang zo ta.

Hlimten leng la, aw Leitlang dingdi,

I lungdumtu nen fanau maltluan chawi turin,

Ka duhsakna sangber ka hlan che a.

Kumtam liam tawh mahse, nghilhbik suh aw nangnen ,

Leitlangpui lam phei kan zawhni kha…” tiin kha nula te kha misual.com kal tlanga zawn pahin duhsakna ka hlan e.

This entry was posted on Friday, November 19th, 2010 at 1:00 am and is filed under More than words. Both comments and pings are currently closed.